Kana To's Profile

晚黑去咗食飯，見openrice寫佢係22:00關門，諗住都ok. 點知佢9點零開始已經熄咗冷氣、21:25收晒枱面啲嘢，連茶壺都收埋叫你過主 。我問佢哋唔係閂10點咩？職員話佢哋關21:30 。食物又細碟，蘿蔔糕都唔好食，齋嚟講真係好差 。叫咗個蕃薯苗係可以，糖醋面還可，叫咗8樣餸包括前菜。餐飯由8點前開始食，食咗成千蚊，9點鐘開始被人趕走，到9點半離場 。但其實由9點開始，佢閂冷氣、執嘢 bing ling bang lang 啲碗碟衝擊交響樂已經好難再傾偈。直接入黑名單了 。:(:(:(…Read More

坐低揀嘢食，睇餐牌，有下午茶餐，然後系統無此選擇。問眼細細的女店員點解叫唔到，佢西口西面答我星期一至五先有，而你哋嗰幾張餐牌同promotion只係搵圈圈扣住，點解假日唔抽走星期一至五的下午茶套餐？得嗰兩頁，我嘗試打開個圈抽走嗰兩頁，有幾難？你下午茶時段拎個獨立餐牌出嚟寫住下午茶，客人會睇會揀有咩問題？依家係咪尋寶？入你哋餐廳要玩photo hunt? 要找錯處？要同你哋做埋員工應該抽起嗰兩頁餐牌嘅工作？之後我發覺落單落錯咗，我係要烏龍豆干，落錯咗烏龍豆干血米糕。瘦削男店員聽到，同我取消咗個烏龍豆干血米糕，但冇加返個烏龍豆干。我話咗畀佢知：「我係想要烏龍豆干但我頭先落錯咗。」佢問落錯啲咩？我答佢：「烏龍豆干血米糕。」然後佢好醒咁行開咗。呢個對話有幾難明？咁算啦既然佢幫我取消，我都無謂再落過個柯打了，反正都冇乜胃口食了。或者我落旺角食嘢係唔應該有正常要求，我對你哋有期望真係唔好意思！但都唔該你哋改進吓，換餐牌嗰樣嘢唔係話咁難下話？唔洗成本架喎。眼見員工喺度卿卿我我咁，又唔係好忙呀。…Read More

諗住假日幫襯飲杯啡 enjoy 一下，叫咗杯 hazelnut latte... 送到嚟嘅時候咁樣呈現... 都冇期望話要拉啲咩花，但$47杯咖啡用杯上點都應該畀個心心我啊... 點知都冇... 應該以後都好難再嚟幫襯，因為呢間係cafe，咖啡應該是重點啊... 唔知係咪 hazelnut 嘅影響，杯咖啡嘅奶又好似好粗咁，但撥開又發現奶泡其實少得可憐，比正常latte奶泡更少... 本身都係見網上有人讚先至特登去，但cafe的咖啡令人失望已經夠了，食物是不錯的，croissant 係好味嘅，但都無補於事 。…Read More

訂咗枱諗住舒舒服服食餐生日飯，點知一食完嘢就即問係咪走得，但我哋仲有個蛋糕未上啊....... 佢哋幾個職員又搞一輪就上埋個蛋糕 。食蛋糕當然係喉住我哋食完蛋糕未？要收碟 。我一路篤住個生日牌未放低叉，佢最終就出聲問係咪收得喇你隻碟？全程坐咗兩個鐘 。同埋食嘢嘅中途，我哋明明傾緊偈但職員就好鍾意攝入嚟問我哋啲賴尿蝦係咪好新鮮？呢樣嗰樣，依家到底我係嚟畀錢你兼招呼你定我哋自己食飯呀？食物質素都冇我對上嗰次食咁好味 。叉鴨河味道失色 。扇背普通。東風螺調味直頭唔好食，白灼應該會好啲 。老火湯講到好熱叫我哋睇熱，但只係暖啦吓 。可以唔駛再幫襯 。埋單4個人三千幾 。…Read More

原本去就係見佢係全個又一城最夜收的餐廳，點知未夠9點半入到去，已經強調10點last order 10點半收。完全同openrice寫嘅不符。如果有其他選擇，應該會選擇其他....... 🥹🥹…Read More

未幫襯過。但剛訂了枱，餐廳發訊息來確認booking表示用餐時間2小時。但由於當晚打算長時間聚餐，故致電查詢如果兩小時後我們再點餐是否可以繼續坐，職員表示如果兩小時後繼續，需要每人再點$350食物或飲品再加一。最終跟朋友商量，決定取消訂座了。…Read More

裝潢清新，價錢合理。只係飲品方面，見所有檸水、檸茶都要加十幾蚊，就唔加錢叫咗佢杯「季節時令熱飲」。估唔到，原來係.............. 飲落嘅口感係熱茶一杯。唔知如果加$3轉凍飲，係咪即係凍茶一杯？XD但食物方面質素不錯的，食咗個宜蘭紅燒濃汁牛丸湯麵，幾好食嘅。都可幫襯。…Read More

食物質素本來係幾好，有個鬆餅口感不錯。但叫咗個all day breakfast有薯角，問佢要茄汁，職員嘅態度係：「我哋冇茄汁！」（亦冇尾音！）......... 一係你唔好提供薯角啦！你啲薯角冇味㗎～～ 係完全冇味！我試咗一舊，又冇調味料，冇茄汁，乾爭爭點食呀？？？？最終問佢要salt and pepper，再用佢嘅茄汁豆入面嘅汁嚟點吓，先至唔洗嘥咗啲薯角。然後塊多士（唔記得影相），嗰pat jam. 個範圍細到，大約好慳好慳地都只夠我搽到半塊多士！好彩有點個鬆餅，就有樽jam，用剩嗰啲可以畀我搽埋塊多士！不得了！…Read More

薯條好食，但個set迫人一定要揀pickles 令到我冇要到個餐。Burger正常，價錢合理。但如果個經理可以唔洗迫我陪佢一齊訓練員工會比較好。個員工埋嚟落單，落完，經理喺隔離問：「你要講句咩呀？」個員工再講。然後覆完單，又直接繼續企喺我張枱隔離研究頭先邊啲嘢應該講邊啲唔應該講，搞到我都好似同佢哋一齊做緊嘢咁。我嚟食嘢㗎咋放過me please. 不過係幾好坐，環境正常，價錢合理，所以都值得一去嘅。希望訓練員工只係一段短時間會咁，下次就有正常服務。…Read More

興高采烈諗住入去幫襯，埋邊盡頭有4張四人枱，no.1-4 順序單列排放，四人枱亦好闊落。當時只有最盡頭嗰張1號枱有人坐，我哋兩個人行入去，侍應起初叫我哋隨便揀一張嚟坐，我哋諗住坐1號枱前面的2號枱。正想拉櫈，女侍應截住我哋：「如果你想坐呢張要兩人並排坐一邊。」原來話因為一人坐一邊，有一邊會靠得1號枱太近，要1.5米距離。咁我哋唔想並排坐呀，茶餐廳peak hour時段嗎？於是我哋話坐3號枱。（嗰度距離1號枱，應該有兩米距離。）女侍應話：「呢張都唔得，麻煩你哋坐4號枱先可以對坐。」吓？想坐2號枱時，都只係叫我哋坐遠嗰邊。咁坐3號枱是但一邊，都一定近過坐2號枱啦？？個侍應擺明玩嘢，睇嚟真係生意好好，做到冇停手，所以想倒米。其實應該同防疫無關，係同智力有關。唔知係老闆意願定侍應話事，但如果真係唔俾坐嘅話，我建議佢直接搬走啲枱，提升餐廳空間感，亦無謂惹客人誤會以為啲櫈可以坐。…Read More

兩個人叫咗一個紐約辣味，同埋一個澳式風情。睇圖好似好正咁，買到返屋企打開，呆咗，我哋完全唔知邊個打邊個，兩個都係普通熱狗咁樣，同張相完全唔同。最終憑顏色推測，紅色醬係辣味、白色醬係田園，估計係咁。當然只係普通熱狗冇特別。我order嘅飲品，又發現俾錯口味我。我同隔離嗰個都表示以後唔會再幫襯。好後悔當日唔記得影低相同大家分享，真心覺得離譜。鋪頭嘅員工/老闆態度係友善嘅，但都彌補唔到圖文不符嗰個程度。係好耐都冇試過幫襯間餐廳，件食物同張相可以差咁遠。…Read More

一早訂了三人晚飯時間，此餐廳還會很貼心地預早提供餐牌希望客戶能預早點菜。但他們提供的是串燒食物，很難一早決定。到達餐廳時，他們只提供了一張直徑40厘米的圓桌，在如此狹窄情況下實在難以進餐。見他們另有四方枱，雖不見得好，但都叫好少少，然而他們說未能提供。一間餐廳可以suppose客人在這樣的桌上進餐，不如直接叫返自己做酒吧，不要& restaurant 好了。是次唯有離開，以後不會再光顧了。…Read More

呢個價錢，配呢種服務態度，呢間嘢真係我記憶中光顧過最差嘅餐廳！沒有"之一"，是最差！早一日book咗枱，係要21:45先到，諗住餐廳收得夜D，即使last order後都可以坐耐D。咁遠水路行入去LCX最盡的盡頭，就係諗住收得夜唔駛俾人趕。點知一去到，receptionist不停強調佢地好多菜都已經賣晒，問我地介唔介意。但唔知道係咩菜，唔知點介意，最終佢就話帶我地入去坐低先。入緊去時，已聽到疑似餐廳經理問其他職員：「佢(receptionist)做咩帶人入去呀？」跟住坐低，疑似經理走過來不停強調：「我地好多菜都冇架喇!!」我地問有咩菜冇啊？佢講咗D，朋友同我講：哦，咁都唔係好多菜冇呀.」疑似經理向我地下指令：「你聽埋先！」哦，咁聽曬啦，但都覺得唔係好多菜冇呀其實。叫咗四樣餸先啦，因為未幫襯過，唔知份量有幾多。菜到，食咗一陣，唔夠，諗住加嘢。其實我地都唔知過咗last order未，但又冇人向我地提過要截單喇，咁就即管問某職員拎個menu嚟睇吓，佢俾咗我地。快揀，快叫。點知疑似經理行過嚟，聽到我地要ORDER就話：「我地截咗單架喇！」跟手收返我朋友手中的menu........你截單前唔會問個客仲有冇野要加的嗎？難度要個客自己較定個鬧鐘喺度傾計，等到截單時間自動響鬧再提自己加野？話晒都係較為高級的餐廳，通知客人LAST ORDER喇都係基本服務吧？跟住11點職員就自己隊張單嚟，叫我地埋單先。跟手再追我地俾錢。其實唔係規則的問題，係佢地態度嘅問題，黑面程度，一入去就好似覺得你嚟搞著佢嘅感覺，毫無掩飾地曝露出來，完全想你快D走！講嘢態度係「我依家講野好有禮貌架不過語氣係咁倔架喇但我有問你駛唔駛移去第二個未打烊嘅位坐囉！」呢一種。根本係 由 頭 到 尾 都 趕 緊 我 地 走 。由 坐 低 前 開 始 。其實個BOOKING應該唔好接！9:45PM? 唔接ORDER喇你唔好訂枱啦！完！如果咁嘅SERVICE，配上咁嘅價錢，真心唔值。我唔知咩事只係想舒舒服服食一餐飯啫，但由頭到尾餐廳職員都要令你不得安寧係咩餐廳宗旨。…Read More