Kamie Ho's Profile

收完工落tst買完野勁重🫨諗住都係响附近食個飯就算，行上K11見到有間X茶食蛋包飯，因為太開陽冇去到，望一望見到入面又有一間就行入去，舖頭位置比較隔涉，首先要經過一連串賣衫嘅舖頭，轉彎再轉彎先至揾到。木系嘅裝修令人一入到去覺得好舒服，男經理帶我哋入去坐低响window side 嘅位置，感覺好relax。男經理轉頭就拎個水壺嚟斟水，點知整到一枱都係水，但佢就施施然行返去水吧度同另一男同事，水吧男同事傾偈，正所謂3個女人一個墟，原來三個男人圍埋都好多嘢講😳即刻扣咗分。叫咗個牛腰肉蛋包飯加帶子牛腰肉淋滑，旋風蛋香滿滿賣相討好，打咭一流❤️白灼西蘭花冇味👎🏻白烚粟米冇味👎🏻👎🏻急凍帶子唔熱又冇味👎🏻👎🏻另一個係芝士牛肉漢堡橡果黑豚扒芝士用火槍燒到燶晒😵‍💫牛肉漢堡又乾又硬👎🏻👎🏻黑豚扒個粉撲得仲厚過我扒裡面都係唔熱嘅😵‍💫另外仲追加咗一堆小食難食到冇心機影相👎🏻👎🏻👎🏻食物方面只有炸薯餅同個白飯係熱，其他嘢都係室温甚至唔可以稱得上係暖。但最最最令人失望嘅係，從頭到尾，只有一位女服務員係工作緊，男經理，男同事，男水吧，甚至中途有位男廚房同事，4個人圍住响個水吧度，一路嘆住佢杯水果茶一路傾偈，傾到我都知佢上次送咗部電話俾女朋友，上次放假去咗邊度玩🤷🏻‍♀️而個女同事就好似被排擠咁自己默默做默默做，落單，傳菜，收碟，斟水一腳踢。而呀經理只係負責帶位同埋單收錢🤦🏻‍♀️香港地越嚟越多連鎖大集團嘅餐廳，想搵一啲小店已經唔多，有好嘅環境好嘅位置，但係食物質素同服務質素咁差嘅話，好難會有回頭客，好難經營落去。希望貴公司真係可以好好改善一下，從食物做起，從員工入手。…Read More

疫情前，好多朋友都知道呢間嘢，食物唔差，地點方便，又收得夜，又有蠔食，多唔敢講，但應該嚟過超過20次。。。都大大話話2,3年冇嚟，一入到舖都覺得怪怪地，好似變咗劈場咁😵😵係，係劈場，咩解究一間西餐廳變成咁？一個貌似老闆定經理嘅女人披頭散髮傳菜，轉頭又响我地隔離同班男人猜枚😧無錯係猜枚，真係估你唔到。。。講返嘢食，加咗價貴咗，菜色高級咗，多咗熟食海鮮菜色，但餐廳以生蠔做主題嘅生蠔竟然可以差成咁你地不如cut咗佢啦，薄到好似X夫芝士咁，不過我明，實有人衝出嚟話:「$10一隻仲想點？」所以我地再叫咗一打正價$39一隻嘅生蠔🦪，12只裡面得一只冇碎殼，係一只呀，主打賣生蠔嘅餐廳可以開到咁，真心建議不如正正經經做好餐廳食品先，人均消費差唔多600，咁嘅用餐經驗真係冇下次👋🏻👋🏻:(:(…Read More

成日搭車經過見到門口好多人排隊，今日收工特登去試下，門口超多人。等咗大慨1個鐘終於入到去，但明明眼見入座率大慨只有6-7成，究竟係人手問題？安排不當？定係生意技倆就真係唔知。。。入到去地方好闊落，環境亦好乾淨，待應充足到連加茶都可以行孖必邊做邊傾偈😂😂2個人5個餸，食完只係可以講名大於實，唔可以算得上鑊氣小炒大排檔。亦都唔知點解會有咁多好評🤭只有茶餐廳質素，但公道啲講句佢價錢都唔算貴，總之試過就算😇…Read More

試完32，點都要試下18🤤前菜:帶子牛油果同小籠包(太肚餓漏咗影😅)好多人覺得小籠包皮要越薄越好，但我認為皮同肉要合比例，咬落去要有麵皮嘅味道先夾到小籠包嘅肉同汁，如果要皮薄不如食蒸肉餅😑呢個比例做得唔錯，但略嫌肉汁唔夠鮮味一鴨三食鴨身切咗3碟每人2籠麼麼皮，皮薄得嚟又夠熱，讚👍🏻皮：香脆，點白沙糖一流胸：略嫌乾咗少少，不過加埋醬汁同青瓜可以平衡返，好香鴨酥味腿：嫩滑多汁香口，佢仲有個自家製蒜泥，同腿肉好夾，減輕油膩感之餘有少少辛辣鴨架湯:好一般，鴨味唔特出，好似一般豆腐湯鴨鬆生菜包: 冇特別，so far我暫時都未食到好食嘅🥲始終鴨鬆同鴿鬆冇得比砂鍋黑松露班腩片:火候控制得好好，砂鍋餘溫唔會令到班腩over cook，魚肉嫩滑得嚟仲有滿滿嘅黑松露片，香氣十足甜品:焗西米布甸**必食必食必食**佢有好多自家製甜品，例如辣椒雪糕，腐乳芝士蛋糕，弱弱的我真係唔敢試😅，唯有試返啲傳統嘢，佢個布甸做到同太子X城名菜一樣，係一樣味！！焗到個面微焦帶脆，蓮蓉又香又滑唔會死甜，最重要佢個份量真係啱啱好，一個人一碗仔，唔洗食一盆😂個人認為中菜應該傳統嘅好，32唔係唔好，但有點名大於實，菜式比較上fusion，同埋班服務員成日圍埋傾偈唔理人🙂18嘅員工會不時行埋嚟換碟換茶，經理仲會行過嚟問下你食物滿唔滿意？有冇咩意見俾返佢地？呢樣嘢我覺得無論做飲食業或者服務性行業都係應有嘅態度👍🏻純粹個人意見，不喜物插😊…Read More

舊同事收早突然約食飯，就佢收工响Cwb食，我又想食壽司，佢又鍾意食蟹，就中咗去呢間蟹慶入到去人客唔算多，環境舒服，一坐低服務員例牌介紹下餐牌主打嘢。。。蟹見佢個蟹set都算抵食，但我始終唔好蟹，就叫咗2個普通set，再另加咗d小食。Set嚟了，好期待，個件擺盤都睇得出好俾心機。蟹膏豆腐好有驚喜，涼得嚟好濃好鮮。甲羅燒中每樣嘢都食得出好新鮮，相對個忌廉蟹肉餅就失色咗，只可以話不過不失。最期待嘅蟹腳嚟啦，我本身冇乜期望，因為唔係話特別鍾意食，但一放入口，嗰種蟹嘅鮮味，唔係吹水，真係耐一耐都唔散，真係食得出你係新鮮蟹拎去燒定係急凍嘢整俾我🤤🤤🤤食飯嘅中途，發現杯飲品個杯”黐立立”，問職員拎張濕紙巾，可以佢見我皺哂眉頭咁，問我咩事，我講完佢知，佢二話不說咁即刻拎濕紙巾俾我，仲同我換過杯新嘅嘢飲，雖然係好小嘅動作，但作為客人，都會食得好開心。下次一定會再嚟…Read More

朋友仔住大埔，話有間新開omakase想試下，咪入去試下新嘢傾下偈談下心入到去坐位不多，大概8-10個位，好有日本feel，師傅好細心問完有咩唔食，鍾意食咩，就介紹今晚有咩食先嚟咗小食，雪魚乾同銀魚仔，不過不失仲有好多，掛住食，掛住傾，唔記得影。師傅仲介紹咗支sake ，話入口甜甜地好啱女仔飲，仲要好細心咁用白酒杯嚟提升甜度，不經不覺2個人傾下傾下開咗2枝😄可能好多人會覺得1500/位咁嘅價錢洗乜入到大埔食，尖沙咀銅鑼灣大把有得揀，但呢度細心嘅服務，舒適嘅環境，同埋店員嘅笑容，出面1500未必有。呢間絕對係值得再試的隱世高質omakase…Read More

第一次寫食評，不吐不快一上到去，被安排坐低响角落，睇完餐牌咪舉手叫:唔該~~一位男店員拎住個電話掛住㩒，望都冇望我哋一眼話:落單呀？轉頭過咗一陣，又多2枱客入嚟，嗰位男店員就一次過幫我地3枱客落。。。食物都算上得快，嚟咗個吉列蠔同薯餅，我再問多句頭先嗰位男店員:唔該，可唔可以俾碟沙律醬，佢都係答:轉頭(當然係冇咗件事)咪問第二個拎囉食飯中途男店員亦拎住個茶壺四出斟茶，我仲聽到佢同隔離枱講:邊個要茶拎個杯出嚟丫😑😑😑眼見其他客d嘢食都上哂，唯獨我哋差個丼未到，我咪問下男店員係咪漏單，佢話:你有叫就應該會有，我地冇哂飯喇，如果再叫就冇，你地叫熟食喇唔知係我表達能力有問題定咩，我係想知我之前叫嗰個丼有冇漏單啫Anyway，嘢食嚟齊哂，魚生未解凍得哂之餘又冇索乾d水，食落一口腥雪水味。d飯又酸又爛，仲要完全冇服務可言。…Read More