PurpleSaSa's Profile

喺旺角食晚飯好麻煩，週圍都好多人。見呢間上野有位，睇Menu又好似唔錯咁，就入咗去。由於食飯之前食咗少少嘢，所以我地只係Order咗3樣嘢：燒羊架、燒雞軟骨、牛油炒金菇。等呀等呀等，等咗20分鐘都未有嘢食，叫個侍應幫我地催催，佢先喺廚房拎D羊架出嚟比師傅燒。再等多10分鐘都未有嘢食，再催，個經理就比碟牛油炒金菇我地。我地等到冇晒胃口，就同經理講話如果未煮就Cancel咗未上嘅嘢，佢又話煮緊，但係都要等多10分鐘先有。牛油炒金菇 $38幾香牛油味，不過份量好少。燒雞軟骨 $48$48嚟講算細碟，仲要係用叉燒醬嚟燒！雞軟骨配叉燒醬，好怪呀！我地食咗幾粒就冇食...燒羊架 $98呢個算係比較好，師傅將羊肉切好一粒粒先上碟。羊肉好肥，食頭幾件都OK，夠羶，又入味，不過食多幾件就好油好漏喇。埋單二百幾蚊，本身食物已經唔值，等咁耐更加值得比個喊佢。…Read More

星期六，去咗大埔新達廣場嘅潮江春飲茶。雖然同商場有另一間平好多嘅酒樓，不過潮江春檯與檯之間都算鬆動，樓底夠高，又唔駛搭檯，所以就算星期六下午茶冇特價都揀呢度。一坐低就已經有一碟涼拌前菜，有青瓜、荀、花生同豆乾，竟然意外地好味。2個人叫咗4款點心，有鳳爪、芋茸春卷、煎蘿蔔糕同芫茜牛肉腸粉。鳳爪即叫即蒸，熱辣辣，夠入味。芋茸春卷咬咗一啖忍唔住大叫「好好味！」皮好薄好脆，入面嘅芋茸同豬肉碎好香，超級好味！煎蘿蔔糕好足料，有臘腸、臘肉、蝦米、冬菇，不過蘿蔔糕本身唔係好夠滑。芫茜牛肉腸粉呢個自稱為「芫茜牛肉腸粉」有D搞笑，佢根本就係腸粉包D壓扁咗嘅山竹牛肉！你想唔想像到條腸粉入面有幾粒馬蹄係有幾奇怪？唔算難食，不過好冇誠意。雖然2個人下午茶都要過百元好似有D貴，不過佢嘅食物質素絕對值！…Read More

今日又係喺太子返工，唔想食茶餐廳，唯有行遠少少去始創。有諗過食和花亭，不過一個人食壽司得好少選擇。行下行下，見紅蔥頭有下午茶餐，就入去食啦～入到去，侍應好有禮貌咁安排咗個窗口比我，同埋比咗下午茶同午餐嘅Menu我睇。最後我Order咗個下午茶餐：五香肉丁炒公仔麵+凍檸水。五香肉丁炒公仔麵等咗大約5分鐘，都唔算太耐嘅。公仔麵好明顯唔係出前一丁，而且炒得唔夠乾身，不過調味幾好，夠惹味。五香肉丁份量可接受，麵入面仲有芽菜、椰菜同蘿蔔絲，有D菜食下，都叫健康少少。凍檸水正常Standard啦，唔會話有苦澀味，始終檸水好少出事～呢一餐要$35，我覺得喺始創嚟講算係比較平。同埋我留意到，呢度大部份侍應都係男仔，仲要著到好似跳拉丁舞咁，唔通佢地專做中女生意？哈哈～…Read More

要去太子返工，但係附近多數都係茶餐廳，誤打誤撞入咗呢間逸悅。入到去，一個客都冇。不過見裝修光鮮，而且侍應有禮，都唔太擔心。Order咗招牌紅燒牛肉湯麵同熱玫瑰花茶。招牌紅燒牛肉湯麵賣相尚可，有牛腩，又有牛筋。牛腩夠腍，牛筋有咬口，都算入味。湯底微辣，唔太濃，亦唔太惹味。最可惜係個麵底，竟然係上海麵！煮得耐咗少少，一D都唔彈牙。熱玫瑰花茶侍應一放低就聞到好香玫瑰花味，感覺好Fresh！飲落去有淡淡玫瑰味，少甜，食完個麵飲返杯即刻冇咁滯。雖然食物質素麻麻，不過我都幾欣賞呢度。因為牆上面寫住佢地參加咗「展能計劃」，會請一D有少少語言障礙嘅員工，好有社會良心！…Read More

星期六都要返工，七點三先收工，就去大家樂買埋飯返屋企食～2個人，叫咗：1) 五層脆燒腩多寶飯　$302) 一哥焗豬扒飯　$34外賣都算快，大約5分鐘就攞得～返到屋企，一打開盒「五層脆燒腩多寶飯」，我簡直呆咗。D燒腩全部都冇皮！！！望住盒飯，我真係火都嚟埋。點解大家樂D員工可以咁無良？如果堂食的話，客人見到咁嘅情況一定會即刻叫師傅換過碟。但係我買外賣，要返到屋企先可以打開盒飯，唔通要我特登走返去換？近都話丫，我屋企來回呢間大家樂要成30分鐘！各位如果去呢間大家樂買外賣，最好喺員工面前打開Check Check先好走～費事又好似我今次咁～…Read More

聽聞譚仔的米線十分出色，剛好她在大埔開了分店，就去試試。要了一碗豬膶腐皮米線，加$1轉酸辣湯底。米線一到，感覺蠻差。一般店鋪的雲南米線都會有一些配菜如蔥花、酸菜、芽菜等，但我這個什麼都沒有，真的只有豬膶、腐皮和米線，似乎不夠豐富，也跟我印象中的傳統雲南米線有異。吃下去，米線不夠彈牙，湯底酸多於辣，吃不出酸辣湯底的精髓。最最可怕的是，其中一件較厚的豬膶中間帶紅，似乎不夠熟。其他肉類未煮至全熟我絕對能接受，但是內臟嘛，未完全煮熟似乎不太衛生......食物以外，店內環境擠迫，而且待應態度不甚友善，再加上價錢並非特別低，實在沒有什麼可取。…Read More

近十幾年，香港到處都是$6-$8一杯珍珠奶茶的小店。不過嘛，不是沒有茶味，就是珍珠都黐成一塊。今天走過McTea，見它門面不錯，就試一試。要了一杯榛子珍珠奶茶，$14。價錢比一般小店略貴一點，但個人認為物有所值。榛子味極濃，而且充滿茶香、奶香，配合得很好。珍珠沒有黐成一塊，粒粒分明，而且很有咬口，不會太焾或者太硬。大埔的珍珠奶茶店不少，例如大埔墟、昌運都有好幾間，不過我認為McTea的珍珠奶茶做得特別出色，可能是「一分錢、一分貨」吧！…Read More

大約七時半在朗豪坊看完電影，Monster Sushi竟然少有地不用大排長龍，當然要試試。雖然近來Openrice多了很多對Monster Sushi的劣評，但我認為這裡的裝潢是不得不讚的。我們被安排坐在看到天冪的位置，燈光較暗，感覺很愜意。餐牌上的選擇不多，而且當中有很多創作壽司都看似怪怪的，我們還是選了較穩陣的壽司：三文魚壽司2客：雖說是Monster Size，但其實三文魚只是比一般的長了少許。三文魚色澤有點怪怪，不知道是否燈光問題，但吃下去又頗肥美哦！玉子壽司：相信這個是自家制的，因為它是我們吃過最淡的玉子......燒三文魚壽司：這個有點失敗，吃不出微焦的香氣，也吃不出三文魚的鮮味。海膽壽司：紫菜脆卜卜，而且海膽的份量一點也不吝嗇，可是海膽味道很淡，大概因為不當造吧！軟殼蟹手卷：整頓晚餐最喜歡就是這個，軟殼蟹夠鬆脆，而且有不少蟹黃，特別的是它內裡並非純沙律醬，而是芥末沙律醬，少了酸味，多了點點的芥末香。A5和牛卷：雖然和牛只是薄薄一片，但牛味濃郁，在舌頭久久不散。可惜和牛卷上那點點的洋蔥末(還是蒜蓉?)味道太強了，有點嗆鼻，可放在碟邊讓客人自行添上。枝豆：它是用鹽水煮熟，並不是清水煮熟再在上面撒上鹽，所以頗入味，不過可能煮得過久，有點過焾。鰻魚壽司：這個我沒有吃，不過男朋友說有點苦味。總括來說，以這個價錢，在旺角可以有更多的選擇，只能說是環境搭夠。另外，這裡的壽司有一個通病，就是飯太散，很難夾，要改善喔！(由於燈光較暗，相片又是用手機拍，所以質素麻麻，請見諒！)…Read More

晚飯時間，要在旺角朗豪坊找個位子真難，見近又門口等位的人不多，餐牌也吸引，就試一試。我要了吉列豬柳定食，男朋友則要了吉列豬扒定食。吉列豬柳定食：豬柳本身應該較軟較嫩，但這個豬柳不但不軟不嫩，而且又乾又韌，男朋友影容其質感為「煲湯豬肉」。吉列豬扒定食：豬柳又乾又韌，豬扒反而好一點。跟豬柳一樣，比較乾身，一點都不Juicy，不過因為切得較豬柳薄，所以還不致太韌。總括來說，這裡的吉列產品是夠脆夠香口，可惜卻忽略了內裡的肉質。而且其他方面也要改善，例如那兩個醬汁(一為蘋果味,一為青瓜味)，味道很怪，跟食物不太相配。另外定食的椰菜絲也不夠新鮮，有很強烈的青澀味。還有我的湯，裡頭有一塊焦了的蘿蔔......跟同樣是吉列專門店的井吉相比，近又的確被比下去，有待改善喔！…Read More

家住大埔，一般連鎖式食店都吃厭了，而且較有特色及水準的食店都遠在大尾篤，這次就試試位置頗偏僻的鹿鳴居。兩個人，點了椒鹽腰果鴨舌、滷水鵝及豉椒炒蜆。椒鹽腰果鴨舌：男朋友超喜歡這個鴨舌，夠味，夠鑊氣，夠足料！鴨舌入味，面脆內嫩，腰果炸得香脆，超讚！滷水鵝：我們要了一碟例牌，鵝肉入味、嫩滑，沾上醋吃非常醒胃，墊底的豆腐、花生都充滿了滷水的香味，可惜的是有幾件鵝太肥了。豉椒炒蜆：蜆肉頗大隻，也帶鮮味，但當然不能跟長洲、南丫島的相比。值得一讚的是炒蜆夠鑊氣，汁也夠味，而且不會一整碟都是蜆殼，絕對真材實料。總括來說這家鹿鳴居的食物相當有水準，而且十分足料，人多的話還可以多試幾款菜！…Read More

11月12號男朋友陪我去Mr Steak食Buffet預祝生日～我地六點半左右去到，都已經幾多人，我地坐喺一個比較入嘅位。講下食物先！冷盤有長腳蟹、生蠔、蟹、翡翠螺、蝦同青口，我地食咗好多長腳蟹同生蠔，好好味呀！仲有魚生，不過就普普通通。熱盤唔係太多選擇，不過和牛幾好味，好肥美。鵝肝多士都唔錯，不過食得太多會好滯。其他仲有海南雞飯、小籠包等等，不過都冇試咯，好飽。最後係甜品，佢D甜品喺Buffet之中算係唔錯。好鍾意個焦糖燉蛋同栗子撻，好好味！唯一不足嘅地方係攞生蠔、和牛同鵝肝都要排隊，雖然可以維持秩序，不過貪心小孩唔鍾意等嘛！BTW，Promotion價$279真係好抵！…Read More

星期六同羊先生入長洲覓食，想食海鮮，但係度度都好多人，咁啱呢度有位，就揀咗呢間。叫咗豉椒炒蜆、豉椒炒聖子同避風塘炒蟹，每樣都係$45，都幾抵。豉椒炒蜆：第一碟上菜，幾大碟，不過蜆有少少沙，同埋個汁偏淡。豉椒炒聖子：豉椒炒蜆之後成半個鐘先嚟，都幾大碟，不過勁淡。避風塘炒蟹：又係聖子之後半個鐘先嚟，有成兩隻蟹，好辣、好好味，全晚最好！總括嚟講，如果唔怕隔半個鐘先有一個餸，呢度都可以一試嘅。…Read More

星期六興致勃勃同羊先生走入長洲覓食，之前見呢間師妹甜品一個喊都冇，所以就決定一試。要咗個心太軟同原味梳乎里，味道偏淡，不過都幾好味。咁做咩要比個喊佢呢？我地落單要原味梳乎里，但係佢比咗個薑味我地，我地同佢講，佢就話焗過個比我地。本來都冇問題，但係佢再送過個原味梳乎里比我地嘅時候，老闆(即係「師妹」)大大聲講咗句：「唉～賣一個，蝕一個！」我地覺得，呢種態度絕對不能容忍！自己出錯，竟然講到好似我地呃佢咁！…Read More

上星期六同男朋友去L'Eclipse食Lunch Buffet~今次主題係澳洲和牛~大約12:10pm去到，已經有幾檯人。環境幾舒服，而且食物擺得夠集中。講下D食物先，冷盤有生蠔、凍蝦、龍蝦仔、青口、螺同八爪魚仔，剌生有三文魚、劍魚同油甘魚。全部都唔錯，尤其係生蠔、凍蝦、龍蝦仔、青口同螺，好新鮮！另外仲有煙三文魚、幾種火腿、芝士同乾果鴨肝醬，推介乾果鴨肝醬！熱盤方面主攻佢D和牛菜式，有和牛壽司、和牛面頰肉、和牛薄切等約６種，都幾好，不過就似普通靚牛多過和牛～另外仲有瀨尿蝦、粉麵、粥同一盤魚、豬、牛菜式，我冇乜點試，不過男朋友就話D粥好味～最後就係甜品喇，本來我地好期待嘅，不過全部都係普普通通。有朱古力噴泉、Cheese Cake、榛子餅、朱古力雪梨蛋糕同大約10款迷你甜品，仲有4款Haggen Dazs雪糕～總括嚟講今次Buffet絕大部份食物都好味，可以一試～PS.侍應都好有禮貌，其中一個見我地得兩個人，主動幫我地影相呢～…Read More