RebeccaPu的個人專頁

聽講油麻地有間高質素西餐，今日同朋友黎，果然係鬧市中的美食綠洲，值得推介。我地黎得較早，未有太多客人入座，但食食下竟然滿座了，真係好受歡迎。餐廳內係簡約工廠風格，安靜，舒適。👇🏻叫了兩個set，今日餐湯係【椰菜花忌廉湯】湯比較清，唔會太飽肚，開胃。【蒜香牛油法包】烘得十分酥脆。👇🏻【蒜蓉蟹肉龍蝦扁意粉】蒜蓉味啱啱好，蟹肉同龍蝦好足料。意粉裹著醬汁，鹹甜適中，十分入味，擺盤亦很精緻用心。👇🏻【七成熟肉眼牛扒】火候掌握不多不少，牛扒好大舊，鐵板紋路清晰可見，牛扒下藏著薯菜。牛扒鮮嫩多汁，好易切開，好易入口，好易咬爛，外面煎得小小脆，肥膏一啲都唔膩，反而好軟糯，同牛肉一齊入口，肥瘦搭配，鹹香味美，每一啖都係享受。好特別嘅係，薯菜的選擇不是普通的大舊薯仔切細舊，而是直接用細個薯仔，呢啲薯仔口感更軟糯，更粉更滑，細節見高招。仲有秋葵，zucchini，都非常清爽可口。👇🏻最後係甜品【朱古力cheese cake】甜度適中，朱古力醬香濃幼滑，蛋糕口感唔膩，反而有些顆粒感，更好食。一餐飯，有美食，有舊友，有舒適的環境，有友善的服務，真係好值得。…查看更多

八妹雞煲聽朋友介紹左好多次，今日終於得閒，入大埔一探究竟。餐廳行懷舊風，幾得意。除左雞煲都有其他特色鍋底選擇，不過既然一場來到當然食最經典的八妹秘製雞煲喇👇🏻【雞煲（半隻）】登場！大大啖雞肉，洋蔥係未熟嘅，咁慢慢食雞，食完雞洋蔥差唔多熟，又唔會太林，呢個食法好特別值得like。雞肉細嫩多汁，入晒味，啖啖肉，好滿足。我諗雞煲好食嘅真正原因，係佢令人無法拒絕的麻香味，同其他雞煲唔同，呢度嘅口味食完有回甘，加埋縈繞在口的麻香（好多花椒，係「真」麻！）真係食完返唔到轉頭！我地叫左微辣，辣度啱啱好，適合唔太食辣嘅朋友。食完雞打邊爐，醬料台都係經典辣椒油。👇🏻【手切肥牛（大份）】牛肉肥瘦均勻，厚度適中，鮮嫩彈牙，有濃濃的牛肉香味，高質素肥牛。👇🏻【竹蓀】爽脆多汁，竹蓀壁好厚好長，打邊爐一流，真心推介。👇🏻【淮山】好滑，厚切，易入口，煮一陣軟林林，口感特別。👇🏻【即炸響鈴】超大份！個形狀好特別，炸過的豆腐皮酥脆有口感，每個響鈴都大大個，齋食已經好香脆，吸左雞煲汁後更入味，必食！👇🏻【白菜仔】擺盤精緻，白菜仔鮮甜大棵。👇🏻【大大杯飲品】超大杯，夠晒飲！其實叫多左送，好滿足，值得再來。…查看更多

食過黃大仙分店，知沙田都有一間，今日探老友，正好同佢一齊黎幫襯。7點幾已經要排隊，咁火爆😆終於坐低，雖然店面不大，室內裝飾都幾精緻。餐牌選擇真係好....豐富！睇到眼花花👇🏻【田園野菜沙律】紅綠配搭，清新爽口，陪有黑醋汁，啱晒開胃菜。👇🏻【5點刺身】三文魚、油甘魚、帆立貝、鮮蝦、吞拿魚。三文魚厚切，肉質滑嫩。帆立貝新鮮軟糯，夾在中間的青檸片提高了鮮味。鮮蝦刺身肉質鮮嫩，蝦頭多汁。所有刺身都好新鮮，高質素！👇🏻【大阪豬扒丼】好似係期間限定，上菜時真係好震撼，個菜絲堆到好似山咁，鋪滿魷魚絲，又係一路食一路尋寶咁😂 炸豬扒外酥內嫩，仲有炒滑蛋，內容幾豐富。👇🏻【黑豚燒腩丼】豬腩燒得好入味，不過好似過火了小小，有小小lon味，但豬肉肥瘦均勻，配上清新蔥粒，不錯之選。串燒👇🏻【千迴火鳥】燒雞全亦，火候啱啱好，雞亦外焦內嫩，小小辣，幾入味。👇🏻【日式炒雜菜】份量十足，鐵板熱辣辣，配白芝麻、魷魚絲，清爽之選。我地眼大肚細，最後食唔晒要打包，但食得好滿足，會再黎幫襯。…查看更多

灣仔太多好嘢食，今日又發掘到一間潮州菜，樓上坐，雖然店面不大，食物環境卻都超水準，請客作東都不失體面。餐廳就在地鐵站附近，大大個招牌好難錯過。室內全部都係大台，兩人前來可能需要搭檯。近窗處好似仲有包房。餐牌製作精美，食物選擇眾多，都算係潮州特色。價錢適中，不過不算是平價。👇🏻【鹵水鵝肉】睇餐牌原來有鵝肉同鵝片嘅分別。鵝肉即厚切，鵝片薄切。可能薄切易入口，所以價錢貴小小。我地叫左厚切的鵝肉🙈😆幾驚喜！鹵水十分入味，鵝肉鹹香，肉質唔柴，啲皮唔會太肥膩，同埋好大份，墊底的豆腐都鹹香多汁，推介！！👇🏻【方魚炒芥蘭】芥蘭青翠欲滴，菜頭爽脆，方魚細細片，提鮮，色香味俱全，驚喜之選！👇🏻【蠔仔粥】潮州菜經典 怎能不食。好足料！好多蠔仔粒，同埋有細細片方魚調味，肉碎豐富，加了香菜提鮮，粥同水比例正好，好滿足。👇🏻兩人三送好飽，埋單$400有找。…查看更多

今日帶家母外出請佢食餐好，正逢大雨，火鍋啱晒。👇🏻估唔到呢間火鍋舖頭咁大，店員帶我們行去露台就坐，好似行極都未到。店內裝飾十分雅緻，用木製屏風隔開一間間，坐大堂都有包房之覺。露台亦有紅燈籠、紙燈、竹屏風裝飾，環境非常舒適。個名叫老鍋火鍋，上台的鍋又真係老式銅鍋，幾有心思。👇🏻餐牌幾豐富，四種特色鍋底，肉類、海鮮、丸、餃、蔬菜應有盡有。飲品亦有清酒同自家製烏梅汁、菊花茶，幾好飲。👇🏻【膠原蛋白美人鍋】真系有原隻烏雞，雞肉索晒湯汁，用料十分足，湯底鮮甜，飲足三碗，淨係湯底我地都食到半飽😂冇幾耐就上菜了。👇🏻【精選手切牛肩肉】肥瘦均勻，睇落幾新鮮，擺盤精緻。煮熟後入口，雖唔似雪花肥牛咁易咬爛，不過肉質勁道，有淡淡牛肉特有嘅香味，同埋大大份，好抵食。👇🏻【皇牌魚肚】推介！厚切魚肚，下鍋後索晒湯汁，十分軟糯，魚肚質地細膩，好似食竹蓀咁，鮮美彈牙。👇🏻【黑松露蝦丸+鵝肝墨魚丸】手打丸，彈牙，最緊要呢個配搭好新穎，黑松露味又唔會壓住蝦丸味，兩者結合係特別的鮮味。墨魚丸入面包著鵝肝，咬一啖好似尋寶咁，幾得意。👇🏻【鹹蛋黃炸魚皮】現炸魚皮，熱辣辣，好脆，鹹蛋黃包著成塊魚皮，稍帶粉質嘅口感，同鹹蛋黃嘅鹹香，忍唔住好快比我地食晒成碟。👇🏻呢個【冰菜】更是特別，原以為菜葉上的係水珠，原來係好似鹽粒咁長在上面的，煮熟後都仲見到「冰粒」，食落十分爽脆，值得一試！👇🏻【稻庭烏龍麵】其實就係烏冬，不過有鐵網濾水，方便食客。每碟送都份量十足，兩人食多左啲，不過食到好滿足，坐得闊落，環境清幽，店員服務友善，如果想食餐好，推介黎呢間。…查看更多

陪舊友行尖沙咀，兜兜轉轉黎到呢個好似旺中嘅商廈，不想竟邂逅如此文藝氣息的咖啡小舖。見到郵筒、各式明信片，仲有隨性擺放的茶座，腳步就放慢了。去叫嘢飲，見櫃面前寫道：本店不設服務，請自律保持清淨，自行收拾碗碟。好，一切從簡。簡簡的服務，嘢食選擇卻不少，大都以紙碗紙碟呈上。餐具自行在隔離檯拎。【煙三文魚沙律】份量十足，厚厚幾片三文魚，新鮮蔬果清爽開胃。【蘆筍帶子意粉】三粒帶子好大好厚好吸引！食落有蘆筍的清香。不過意粉好似鹹左啲，不過這個價錢這個環境當然也可接受。【全日早餐】驚喜之選！配料豐富，炒蛋同牛角包都超過期望的好食。雞腸同煙肉又是鹹左啲，不過配搭沙律菜都平衡返。食完後我地靜靜係度坐左一陣，享受這不多得的愜意。呢度係一個打發時間，睇書寫文，飲嘢悠閒的好去處。…查看更多

紅磡好多好嘢食，今日行過見到街邊有間安安靜靜嘅餐廳，唔多人啱同老友傾計，啲嘢食都幾吸引。主打花膠海參等等魚類製品，有套餐又可以散叫。老闆話遲啲仲有新menu推出。黑板上有廚師推介，係menu紙上冇嘅，菜式可能會定期轉。見呢個湯做緊特價，老闆話包好飲，冇味精，好似阿媽煲嗰啲味，我地就叫左一盅試下。個湯真係好足料，花膠大大件，最重要係冇塑膠味，係海鮮味，係靓花膠黎，好開心。蟲草花，冬菇，雞肉，一樣不少，個湯好鮮甜，應該煲左好耐，真係好飲！小菜清新爽口，賣相都唔錯【皇袍鮑汁飯】個飯係秘制醬汁炒過再林鮑汁，多左啲鍋氣，好似鐵板飯。又係大大件花膠，個炒蛋係滑蛋，色香味有晒！一個飯已經好夠飽，真心推介。【雞湯煨麵】好多雞肉！個麵係闊麵，唔易索汁，唔會太林，味道甜甜地，唔鹹，食完暖粒粒。最後係甜品。表面睇係桂花糕，其實個底有花膠架！最鍾意係佢唔甜，清爽可口，有淡淡桂花香，加埋花膠好彈牙好爽，輕奢甜品兩人埋單$216，食左咁多足料好嘢，抵食…查看更多

老友就黎搬屋，話佢最唔捨得就係呢間蛋包飯。夜晚7點零去到，要等位。舖頭細細，得10個座位度，等左十幾分鐘。製作時間大概10-15分鐘，呢餐都算等得耐。但食到好味的蛋包飯覺得係值得嘅。首先，個蛋包飯唔係蛋皮而係炒蛋，滑嫩嘅炒蛋包住日本米，已經好吸引。再黎和牛漢堡扒，秘製燒汁唔甜唔膩，送飯一流，牛肉肉質鮮嫩多汁，厚切，好滿足。忌廉雞，雞肉滑嫩，白汁唔會油膩，甜度啱啱好，係難得嘅味道。我又試過朋友嘅咖哩豬同鮮茄牛，牛肉入口即化，茄汁濃滑惹味，咖哩甜辣平衡，如果有三個胃我想下次食三拼😂今次蛋包飯好令人驚喜，我諗我會再黎幫襯…查看更多

筲箕灣好似有啲唔錯嘅餐廳，煮打肉餅攞晒獎，今次終於過黎探朋友有機會一試。門口好多明星合照餐廳係大排檔風格，有冷氣，可以坐得舒服啲。好多人排隊呀，8點去到都排左差唔多半個鐘首先點了拿獎菜品【銀魚蒸肉餅】，肉餅好鮮，多汁，銀魚好多，好大份，肉質滑嫩，鹹淡適中，不愧是拿獎菜品。【潮式爆花蠔餅】蠔肉好大隻，份量超足，外層炸得好脆好香，堅好味。一啲都唔鹹，一啖啖停唔到口。【蜜椒薯仔牛柳粒】牛肉易入口，很鮮嫩，薯仔炸得外皮好脆，入面又十分鬆軟，蜜糖汁有小小甜，甜中帶鹹，送飯一流。埋單兩人$318，好抵食呀！…查看更多

聽講呢間印度菜開了好多分店。尖沙咀匯集有名印度餐廳，今次又比到驚喜我。餐廳裝修明亮令人心情舒暢，菜品選擇也十分豐富。餐盤上會擺上一張荷葉，保護碗碟，也為每樣菜品增色。兩個人點了一個Parotta烤餅，一個特色Dosa，同瑪莎拉雞。【Masala Dosa】大力推介！三角形煎餅，入面係masala，煎餅非常脆，小小辣，配搭贈送的小菜，口感很豐富。【Chiken Masala】雞肉滑嫩，醬汁入味，masala不會太辣亦都唔鹹，配餅啱啱好。【Parotta烤餅】真心好食！外面好脆，入面好林，入口有香味，又唔會好乾身，如果食太多naan可以改食parotta兩人埋單$250，食得好飽，抵！最緊要好味，不輸重慶大廈的咖哩。…查看更多

今日過北角搵朋友，佢話附近有間雞煲魚鍋佢好想試，就陪佢黎到呢間「金樂軒」睇落好似街坊茶記，但原來個餐牌別有洞天。有雞煲，魚，小菜，任君選擇。我地揀左【酸菜桂花魚鍋】桂花魚冇骨，魚肉非常鮮嫩，入口即化，酸菜鹹淡剛好，開胃，越煮越入味。魚湯好鮮美，飲左三碗😂打邊爐怎能沒有健康飲品，餐廳自煲【竹蔗茅根】甜度剛好，解熱解辣一流。配菜加了【炸魚皮】【午餐肉】同【蟹柳】魚皮炸得好脆，係新鮮熱辣辣出鍋，齋食已經就食晒😂 午餐肉都好特別，好似比平日食嗰啲更有口感有層次感煙韌有肉感。還是不忘辣，【水煮安格斯肥牛】麻辣鮮香，最重要唔係普通牛肉係肥牛，更入味更易入口。配料也超級豐富，好抵食。香口【椒鹽鮮魷】份量足，魷魚好林但外皮好脆，推介。…查看更多

今日行旺角，路過一間好似冰室又賣緊火鍋嘅鋪頭，覺得好特別，就決定入去試下新嘢。一入到去已經被懷舊電影海報吸引，裝修好驚喜。成個餐廳係懷舊冰室，有埋收音機、油燈，唔知老闆從哪裡淘返黎。侍應好友善，一坐低即刻送上小食、調味碟。連飯台、碗碟都係行懷舊風，都幾得意。我地選擇了$258海鮮任食火鍋。個餐牌寫道好多嘢，原來真係好多嘢食。【餐前小食】係炸魚蛋、燒賣。細細粒開胃。然後係【鮑魚雞煲】，鮑魚一人一隻。鮑魚爽口，雞煲好惹味，小辣但比較麻，但越麻越香。雞肉嫩滑，真係好入味。洋蔥、青椒都煮得好林。我地以為雞煲食完直接加湯打邊爐，原來係要換鍋底上火鍋。好有心思。$258又食雞煲又打邊爐，真係抵。我地揀左【招牌沙爹湯底】。沙爹味濃厚，煮乜都惹味。未寫點菜紙，已經上了【海鮮拼盤】。幾隻大蝦，有魚滑，大大隻生蠔，魚片，好豐富。啱啱食了雞煲，現在有大量海鮮，好似唔洗另外叫嘢已經飽了。我地鍾意食牛，又追加了【安格斯牛小排】同【珍寶肥牛】。牛肉肉質細嫩，肥瘦均勻，香味難擋，又不會塞牙，仲可以無限追加，希望有兩個肚！【爆汁魚丸】原來係魚丸入邊包牛丸，係堅爆汁。餐廳安排一人一個丸，不會浪費，好好呀！【響鈴】同【炸魚皮】都係細細份，不夠再加，但至少不會浪費食物，鼓勵其他餐廳參考用呢個做法！小小遺憾，響鈴同魚皮不夠脆，不過打邊爐也沒所謂。諗住埋單，店員話仲有甜品。雖然好飽，但一定有第二個胃食甜品！係【椰汁紅豆冰】，有涼粉、芋丸，打完邊爐食冰啱晒。一人$258（其他時間仲有優惠），加埋醬料一人$12，計埋加一每人$300有找，雞煲，海鮮，小食，甜品，真係抵食！…查看更多

見返好耐冇見的朋友，要傾計當然旺角樓上cafe係首選。呢間Station 3在少人的金雞廣場25樓，旺角E2行幾分鐘就到，方便。一進入餐廳，覺得氛圍好好，雖然燈光暗沉沉但好welcoming。裝修簡約時尚，水吧那裡幾得意。Dinner set選擇不多，但飲品就令人大開眼界。【燒牛肉沙律】份量十足，沙律菜新鮮，燒牛肉好大片，配上芝麻醬，鹹鮮甜，開胃一流。【黑松露帶子鮮菌燴意大利飯】好味！飯粒好林，醬汁完全包覆，非常入味。黑松露鮮味同帶子、鮮菌交融，好快被我地消滅。【煙三文魚野菌忌廉燴意粉】好足料好大份，擺盤好靓，意粉煙韌，配搭煙三文魚，經典。另外加左【海鮮小食拼盤】有魚柳、蝦、蟹、帶子、薯條，同時配有茄汁同沙律醬。小食炸得脆脆地，雖然有啲熱氣也不顧了。飲品係【奇異果乳酪】【奇異果沙冰】奇異果味濃厚，沙冰可口，乳酪酸酸甜甜，配炸薯條完美。兩人埋單$400，傾得開心又抵食…查看更多

朋友話好想食串燒，聽講呢間唔錯，喺尖沙咀地理位置好方便，L5出口行幾步就到。有幸坐到近窗口位，風光無限好。睇睇menu，選擇頗多，餐牌都幾得意。牛 豬 羊 雞 海鮮 小菜 啤酒，只有你想不到。總共叫了12樣食物同1杯涼茶。可惜朋友唔飲酒，如果配啤酒應該更有feel【燒韭菜】四川風味但加左小小甜醬，可能為了就香港人口味，但如果係純四川風味應該更好。另外，韭菜真係好難咬斷，大家食嗰陣要小心，我差點噎住。【鹽燒牛舌】牛舌比較硬，但幾入味，雖然睇落黑蒙蒙，食落幾好味。同樣請注意不要噎住自己😿【勁辣跳舞雞亦】真的好辣！係勁辣！唔食辣嘅朋友要小心。雖然辣得黎條利都痛埋，但都幾爽。【汁燒翠玉瓜】清淡解辣，瓜燒得爽口，火候啱啱好。同韭菜一樣有啲甜汁。【火辣牛丸】又係好辣！同雞亦一樣，但辣得開心嘅，因為牛丸彈牙。【微辣肉碎茄子】肉碎好多，好大份，係微辣，茄子好林好入味，加蒜蓉肉碎一齊入口，很滿足【西京比目魚】魚肉鮮嫩，西京醬入味，淡口，最鍾意係呢款。【燒羊架】羊肉夠鮮嫩，多汁，大件，冇乜腥味，但美中不足唔知係咪大廚唔記得落調味料，食落係冇咩燒烤味，好似食緊plain羊肉，要自己落啲辣粉同孜然粉。【牛油粟米】粟米好甜，牛油味唔多，解下辣幾好。【燒菠蘿】菠蘿好大件，厚切，多汁，唔酸，推介。另外還叫了【蒜蓉扇貝】同【金黃醬廣島蠔】，幾大隻，都唔錯。兩人埋單計埋加一$651。…查看更多

自從幾個月前來吃過這家印度菜後就一直念念不忘。今天正好有空又跟朋友過來這家特色北印度餐廳。熟悉的環境，友善的店員，誰說吃印度菜非要在重慶大廈那樣悶熱的地方。今次叫咗三樣嘢，一個烤餅，一個芝士菠菜，一個特色飯混合。【Mini Meals】辣豆飯，特色飯，乳酪飯，印度香料炒飯，甜品，薄餅，仲有pickle，十分豐富，每樣都有得試。我最鍾意係乳酪飯，好有特色，酸酸甜甜，唔辣。飯比較黏稠，飯粒很幼，易入口。冇諗過乳酪都可以煮飯食。【Palak Paneer 芝士波菜】最鍾意係呢個！芝士一啲都唔膩，好似食豆腐，菠菜醬好滑，食落好新鮮，好creamy，真係絕配。強烈推介！【Gobi Stuffed Paratha 椰菜餡薄餅】以前一直食印度烤餅Naan，今次見到有餡嘅烤餅，覺得好特別，就叫咗椰菜餡烤餅。烤餅外面睇嚟同普通烤餅冇分別，但切開之後入面係咖喱汁調味嘅椰菜同薯蓉，小小辣，好味。呢度每樣菜都非常有特色，令人回味，每次黎都有新嘅驚喜，我諗我會再來的。…查看更多