wong0911's Profile

今日天氣不似預期，成日都落雨，加上喉嚨唔舒服，決定食一碗熱辣辣嘅粥作為今日嘅午餐。嚟到呢間老字號，我諗咗一陣，本身諗住食粥，但又驚唔夠飽，最後決定嗌一碗泡飯。呢度嘅泡飯有好多唔同種類，我就嗌左一碗喺餐牌上面冇嘅泡飯-豬雜。除咗白飯係預先煲定之外，所有材料都係即叫即整，加上大量嘅薑蔥，碗飯一上到台就聞到香味。介紹吓碗野入邊有啲乜嘢先，有豬心、豬肚、豬膶、粉腸、肉丸同埋肉片。豬心切到好薄，食落去口感非常之爽脆，加上預先已經醃好，可以話係做得非常之出色。豬潤方面，雖然唔係厚切，但係都唔薄，火候掌握得非常之好，食落去非常之粉嫩，而且有事先醃製過，非常之好味。豬肚同粉腸就做得不過不失，食得出有事先醃製過，而且處理得非常之乾淨，屬於水平之作。肉片同肉丸方面，冇乜特別，但係都係因為有事先醃過，所以食落去非常之香。最後要講嘅就係佢個泡飯嘅湯底，非常之香，而且食完之後唔會頸渴，呢碗泡飯屬於近期滿意之作。…Read More

呢幾日不斷都有啲驟雨，個人覺得濕氣好重。今日晏晝決定食啲辣野，驅一驅身上啲濕氣。經同事介紹吓，嚟到呢間位於灣仔大有商場入邊嘅四川餐廳。餐廳入邊裝修非常之古色古香，座位都十分寬敞，未食嘢，環境已經贏咗先。今日我哋嗌咗三樣餸，分別係麻婆豆腐、口水雞、同埋呢度嘅招牌菜之一水煮魚。　麻婆豆腐方面，食落去非常之香，唔會太辣，拎嚟送飯真係一流。麻婆豆腐入邊嘅肉粒份量都非常多，唔會偷工減料。口水雞方面，識落就骨多過肉，同埋個辣係死辣，完全唔香口，呢碟非常之失望。至於招牌嘅水煮魚，魚肉份量都好多，煲底都仲有其他配菜，例如芽菜、薯粉、青瓜麵筋等等，雖然係辣，但係辣得非常之香，應該係三碟入邊最好食嘅。另外一人嗌咗一杯豆漿，普普通通，冇乜特別。三個人，嗌左三樣嘢食，三杯豆漿，加埋三碗白飯，成為每人$120。呢個價錢係灣仔來講，屬於不過不失。…Read More

今日工作實在太忙，連午餐都冇時間食。晏晝做完嘢，非常之肚餓，唯有喳喳林去大家樂食個下午茶。睇完個餐牌之後，就揀咗西多拼炸髀。嘢飲方面，要咗杯熱齋啡。由於係下午茶嘅關係，食物嘅份量唔算好大，西多剩係得半舊，濃濃嘅蛋漿包住查咗花生醬嘅麵包落去炸，點埋糖漿同埋牛油，以茶餐廳嘅質素黎計，只能說是一般般。至於炸脾方面，真心說，炸得有點過火。但係size來講，十分之滿意，唔係好似一般茶餐廳cut咗一半咁，而係成隻落去炸。雖然雞髀揸得有啲過火，但係雞肉就真係調味調得唔錯，唯一有啲失望嘅係肉質有啲雪味。嘢飲方面，買咗杯熱齋啡，睇住佢即刻喺咖啡機即磨出嚟，非常唔錯。整體來講，成個餐$45 ，只能說不過不失。…Read More

大熱天時，冇乜胃口，午餐唔知食乜嘢好，突然間諗起灣仔有間三餸飯，標榜住家菜食，既然口淡淡，一於就試試佢。首先講講價錢，三送飯連一杯熱嘅即磨咖啡，盛惠$45。喺灣仔來講，實在非常之抵食。食物方面，揀咗三款餸，第一種係蒸鯇魚，第二種係炒四季豆，第三種係涼瓜排骨。蒸魚味道普通，冇咩特別，同一般茶餐廳嘅貨色冇分別，唯一值得一提嘅就係佢嘅size實在非常之細，所以買呢個價錢係有原因嘅。炒四季豆係三款餸入邊最好食嘅，但係都係普通貨色，冇乜特別。涼瓜排骨方面，一擺入口，已經係感到非常之甜，應該落咗好多堂。但係涼瓜食得出係新鮮嘅，至於排骨就一般般冇乜特別。即磨咖啡就冇乜特別，由於係一早已經磨定，所以冇咗嗰種即刻磨出嚟嘅咖啡香。整體來講，食物味道唔算太出色，但係價錢搭救，喺灣仔呢個地區來講，還是過得去的。…Read More

今日晏晝去中環做嘢，正當唔知食乜嘢好，抬頭一望見到譚仔個招牌，決定一於喺嗰度解決今日午餐。望勻個餐牌，都諗唔到食乜嘢，突然見到有個脆肉鯇皮蛋米線嘅poster，立即就落order。首先講吓啲配菜先，由於係清湯底嘅關係，所以腐竹同埋芽菜都冇乜味。好彩有芫荽喺度調一調味，整體來講都還可以。跟住講吓主角，脆肉鯇非常之唔錯，但係啲份量就少到可憐，加加埋埋都唔知有冇五片。然後米線來講，軟硬適中，口感唔錯。皮蛋方面，都係份量非常之少，味道就一般般，都係普通貨色，冇乜嘢特別。嘢飲方面，噬咗杯凍檸茶，冇乜嘢特別，為一個缺點就係我有叫少甜但係都係太甜。…Read More

喺灣仔返工，日日被迫食貴價午餐，同事介紹去駱克道街市熟食中心，話有一間叫中記嘅熟食檔好唔錯，今日一於試一試佢。餐牌上有好多選擇，叫咗涼瓜斑腩飯加凍檸茶。先講吓食物質素，涼瓜斑腩即時落鑊炒，之後連埋個hin汁一齊淋係白飯上，新鮮滾熱辣，成個碟頭飯望落都好吸引。涼瓜非常之新鮮，食落好爽脆，又唔算好苦。斑腩因為預先炸咗，所以外皮唔脆，魚肉就好似一般嘅冰鮮貨色，冇乜突出。嘢飲方面，揀咗凍檸茶少甜，飲起嚟同出邊嘅茶餐廳貨色差唔多，冇乜特別。令人有驚喜嘅係竟然有例湯送，飲得出應該係冬瓜煲排骨湯，飲起嚟非常之清熱，令人有喜出望外嘅感覺。一碟飯，一杯凍飲，加埋一個例湯，價錢盛惠$35。喺灣仔來講，呢個價錢真係非常之抵食。…Read More

琴日放假，中午時份入咗去香港仔探朋友，撞正午飯時間，朋友建議一齊食lunch。佢介紹呢間位於田灣嘅餐廳，一入到去，地方尚算寬敞，客人都係以附近返工嘅人為主。疫情關係，我哋決定外賣返朋友屋企食。入到黎望一望個餐牌，都係大路嘢，一般茶餐廳會提供嘅食物。包括炒粉麵飯，常餐、蒸野等等。望咗一輪之後，決定揀餐牌上嘅印尼炒飯。食物方面，個印尼炒飯係廚房即時炒嘅，加入左咖喱粉，咖喱味濃郁。飯上面有荷包蛋一隻，同埋雞扒一塊。塊雞扒尺寸好大，基本上一定夠食。然而，美中不足的是塊雞扒雪味好重，相信係未完全融雪前已經落扒爐煎，要扣分。嘢飲方面，要咗個凍檸茶，茶香檸檬味重，非常唔錯。成個餐價錢係$49，以今時今日嘅物價來講，不過不失。…Read More

星期五收工，約咗幾個好友一齊去打冷飲啤酒。有人介紹梅花村，話呢度啲打冷幾正宗，抱住一試無妨嘅心態，山長水遠由港島南去到長沙灣試食。試食咗幾樣野，包括豪餅，滷水拼盤，蝦棗拼蟹棗，小炒王，鵝片，鵝腸。味道黎講，尚算可接受，但係一定唔突出。印象最深刻嘅一定係豉油王鵝腸，份量唔細，肥膏香口，鵝腸爽脆。值得推薦俾各位。至於其他菜式來講，味道只屬一般，價錢亦都唔算太便宜。:(環境方面，一早已經book咗枱，但係侍應仍然安排我哋坐喺樓梯位， 不太理想，好多人行嚟行去，明明見到仲有其他位，亦都唔會主動安排我哋轉枱，有啲失望。:(值得一讚嘅係，食到最尾，侍應會睇我哋仲有10分鐘左右要離場，亦都會主動奉送甜品。…Read More