包包v's Profile

我的天空今天有點灰🎶🎶🎶，所以黎到呢間深水埗以灰色為主題既店舖。已經連續多天親嘗深水埗Cafe，對比起貴夾唔好食但狂做promo所以人很多既咖啡店，我更喜歡呢種靜靜而又有想法既鋪頭。Openground係一間同New Balance crossover既咖啡店，帶有藝術展覽，書本及影音配件同創意小物於一身。店內仲展示左New Balance灰色系列嘅鞋款，擺設簡潔而有味道。黎既時候未有客人，然後係短短既半個鐘內就坐滿左晒。客人較年輕，大部分都帶左電腦黎做野，因為場地好闊落，枱Size都比較大，絕對適合黎打躉既後生仔。Cafe可以點嘅餐點唔多，以咖啡同牛角包為主。今日唔想點甜食，於是就嗌左個牛角包+芝麻，再配一杯Flat White，價錢只係52大元，係我咁多日係太子深水埗呢區食過咁多間cafe最平既一餐🥲。點餐後店員會送一個白色幣比你抽Yes Card用，呢啲歷史文物到底有幾多年冇扭過😭，滿懷童心走到去扭卡機面前，當然內裡既卡都係openground系列畫作，但扭一扭真係會打從心底滿足左一下。野食整好店員就會嗌你去open kitchen到拎，開動前先黎個大合照！牛角包🥐非常酥脆，咬落去帶有嚼勁既一層層口感，配上炒過既黑芝麻係面，香口而不膩，令牛角包提高一個層次。各位黎食Croissant既朋友就記得要加芝麻啦。Flat white用玻璃杯上，形狀有少少似做實驗時用既Beaker，散熱較快，令熱飲比較快變涼。咖啡味偏淡口，奶味重，由顏色同拉花都可以感覺到大部份都係奶黎。餐廳適合黎工作/溫書既人黎，如果講到食物，仲未需要專程黎試，但絕對係經過想放鬆飲杯咖啡既好地方。…Read More

同朋友係觀塘餓餓地，原本想去另一間Cafe但full晒，於是又黎高興食個平TEA，依家真係當左高興係茶餐廳咁，平靚正又少人可以傾計又唔催交枱，掂！今次試左Nutella巧克力榛果西多士，同點左杯Latte。比起迷你豬扒薯條嘅份量，呢個西多真係似返個Tea set。一口西多好常見，西多炸得正正常常，再用朱古力醬鋪面，但西多內既Nutella醬很少，所以比起平時充滿糖漿／煉奶既西多既口感乾身好多，唔太特別，不試可也，性價比高，醫肚為上！…Read More

近排報左個興趣班喺太子上堂，睇黎要成個月都係附近發掘新Cafe啦。第一日就黎到依間好有格調既coffee shop，到左門口仲懷疑緊係一間畫廊定餐廳，因為全場得我一個🥴，可能係啱啱開舖。然後見到貓貓店長係入面，即刻衝入去！店內佈置好簡潔乾淨，到處都係打卡位，但店內冷氣都幾勁，於是嗌左杯熱熱既Hazelnuts Chocolate Latte，同無乜熱食選擇底下揀咗個Seafood Quiche，再見到凍櫃啲蛋糕件件都好靚，忍唔住嗌多件Cheese cake食下！首先黎到既係藝術感滿滿既拉花咖啡，拉得好靚心情大好😍，飲落去榛子味好香好香，但咖啡味道偏淡。另外個seafood quiche味道正正常常，海鮮既選料係急凍帶子同蝦仁，都好難整得唔好食，但略嫌細舊左啲，食左幾啖就食晒仲想繼續食😭。另外件餅就係覺得賣相好靚，食落去係多甜既cheese cake🥲。餅底落好重牛油，餅身太甜，唔算滑溜，唯一既優點係餅底上面加咗合桃，咬落去更香口。頭先有提到既貓店長，喺嘆嘆下咖啡嘅時候行過去每一個食客身邊，於是我即刻拎起手機影相，貓店長竟然跳咗上我隔離坐，然後神奇嘅事就發生了......！！！！！！！！！！！！！！！！！！！！貓店長竟然爬上我大脾幫我踏踏！我係咪有幻覺？定係飲咖啡附送按摩服務？真係好驚喜，佢幫我按摩完到我幫佢返佢拍屁屁，然後佢就坐定定係我隔離陪住我呢個孤獨的人，好感動，當日心情滿分。雖然我都想做唯一被選中既人類，但寫得呢篇食評就要分享，我係坐對住廁所嗰兩個位置，如果都想試試運氣，可以坐返同一個位置❤️。…Read More

Plan左黎復活節市集順便黎呢間cafe，冇諗過人多到咁，莫講話搵個靚位打卡，淨係想有位坐都要排足半個鐘。天氣太熱真係頂唔順要坐下，所以都等足半個鐘搵位。嗌左件朱古力餅、cappuccino同peach tea with sparkling water。雖然很熱，食物飲品都偏一般，但都好認真試味😤。件餅朱古力味不算重亦不算濃郁，餅身偏乾，雖然就咁睇cream既portion好多，但唔會話好膩。Peach tea with sparkling water 的確好解渴，但茶味都有少少澀，甜度適中唔會話成口糖水味，不錯。Cappuccino同連鎖coffee shop既質素差唔多，奶量唔多，唔知係漏左定點杯飲品冇加甜，不過咁更合我口味。整體而言，大概係因為今日有市集所以太忙，留意到大量減分點，例如煮意粉既員工有時會除口罩（佢係open kitchen，煮野食既地方隔離已經係客枱），枱與枱距離超級近，空間只能容納一人行走，餐廳內仲有蜘蛛，嚇到隔離枱位姐姐大跳起身，比港男一腳踩死拯救。所以大家想黎打卡絕對要揀平日晏就，整體衞生需要加強，但服務員態度都很有耐性，覺得可以再戰，希望老細睇到會改善一下。…Read More

係太子做完facial，見仲好早就行足15分鐘嚟到呢間bookmark左一段時間既cafe。黎到門口大約3:30pm，猶豫咗一陣有冇搵錯地方，因為入面一個人都冇，可能係地方比較偏嘅問題。餐廳有兩層，冇想像中咁「青花亭」既感覺。門口同上層都用小拱牆設計，但內裏嘅牆壁反而用中式既青花瓷磚，感覺似中西港式混合咁，談不上格調，但仍搵到少量打卡位置。見到menu得lunch set，於是就指住openrice既相直接搵店員落單嗌佢地既打卡食物- 水清沙幼使乜坐飛機，同埋奶蓋鮮奶焙茶。同預計一樣美美的！！！設計分比滿分，擺盤好有心機。本住打卡既心對味道冇乜期待，但估唔到都發現到小心思。簡單黎講呢碟就係一碟水果yogurt，但似乎唔同日子黎入面嘅餡料會唔同，我嗰碟既水果有火龍果、士多啤梨、黑加倫子、blackberry，鮮水果都有雪過，所以食落口冰凍冰凍的。另外仲加上粗幼椰絲、燕麥、不同果乾包括橙、香蕉、提子乾等等去增加口感，食落去每一啖都有軟硬分別同冰凍感，令到成個dish由平平無奇既yogurt變到好豐富，係心思之作。另外點既焙茶Latte不得了，好香好香，店員一上枱已經聞到誘人既焙茶味，令到我差啲未影相就想一啖咕嚕落肚。焙茶上仲有拉花，但似乎係不小心倒了太多既鮮奶冇位繼續拉大隻雀，形狀不算美觀😂。飲落去就如我所說奶倒太多，有一點遮蓋了培茶原味，但也很好喝，黎Cafe既各位必試。…Read More

不用多說，見到有3D拉花，打卡女表示即到！黎到門口，醒起以前曾到訪過一次，嗰陣非常出名既三眼仔同千與千尋隻龍貓拉花，但似乎已經轉手，仲加咗3D拉花，實在令人期待。冇預約但好彩咁啱有位，要坐對街景既bar枱但位置實在相當細，細到就黎連碟都放唔落🥲。Cafe望落都有返咁上下歷史味，牆身都爛爛的，而且好地地嘅街景窗比佢地貼滿A4紙，食嘢就對住A4紙食😂，視乎店主對Cafe裝潢冇乜心機。黎完一張廣角就逐一介紹下啲野食啦。3D拉花既公仔如果冇特別request都係隨機，未上碟一路喺度諗會有幾多隻柴柴，結果來了兩隻超可愛一大一細的！❤️❤️點影都係咁靚，來一個top view，柴柴變到好似求救咁😍。還有一點小心思就係3D拉花下既咖啡面都係拉咗心心架👏🏻。唔捨得飲到放咗15分鐘柴柴已經沒落，如果早一點”畢”起嘅話應該可以成隻柴柴撈起。玩完呢杯飲品，老實說咖啡味真係好輕口，因為要拉花，奶嘅份量非常多，所以嗌黎打卡就好，想好好品嘗既話都係點其他飲品。然後就到Egg benedict，不過不失，三文魚偏鹹要搭着成件食，隻蛋略嫌太熟，冇其他人所講嘅無敵流心，似糖心蛋多啲。（可看看我其他食評嘅相片就知咩先叫煮得靚好既Egg benedict）然後就到All day breakfast，拉返高影埋店內嘅公仔構圖就靚晒。味道亦不過不失，炒蛋可以再多啲調味，同埋個個都讚嘅蕃茄，但我入口係凍身嘅好似冇煎過咁既樣，少失望。總的來說如果想同閨蜜去飲杯靚靚咖啡絕對可以一試，有3D拉花嘅cafe都數得晒，所以黎玩玩打卡無妨喔。…Read More

新年前想去市集，咁啱朋友放假，就約佢去市集前飲杯咖啡。呢間cafe我bookmark左一段時間，樣樣嘢食都好心心眼😍，難怪黎坐既都係一眾靚女。點餐都係開openrice既相比佢睇就直接嗌，店員話好多都係舊相，奶樽杯都冇再用，咁就等我黎幫手刷新下呢間cafe既食評啦！黎到只，重點我放左係野飲非野食到，雖然價錢略貴而且冇跟餐飲品半價呢回事，但無論你嗌咩每杯都係整得非常靚咁上枱😍。清楚見到杯野分三層，面頭仲會撒花😂，唔止外觀靚，味道都一流，抹茶撞鮮奶味道相當濃郁，而且唔會話有抹茶口感好粉嗰種情況，呢杯抹茶鮮奶我能夠比滿分，讚讚👏🏻。咁樣放跟托盤影，突出logo令飲品更日式🤤。而呢個waffle就有的咁多傷心。黑色waffle令整碟甜品顏色更出，係靚既，而咁啱我又配到豆腐雪糕，比起其他人嗌完配以不搭既是日雪糕我都算好彩，而waffle係脆身waffle唔係厚實嗰種，我亦鐘意，但個醬真係好酸，係梅肉嗰種酸，我搭上一口口cream同雪糕都解唔到種梅酸味，係好食既其實，但實在係唔啱我口味。淨係杯嘢飲已經值得黎試下一次，希望下一次發掘到其他啱口味嘅嘢食啦👏🏻。…Read More

到底要有幾高興先加咁多個sssss係Happiness上面呢？去觀塘區買野，順路食一個Tea，見到餐廳名就二話不說去試一試味。鋪面喺工廠大廈入面，見到停車場再行入去就對了。鋪面好似一般嘅茶餐廳，店員服務都似茶餐廳嘅店員😂。燈光偏黃，發現有個美美的位置只有兩張枱，旁邊放住好多舊物同行李箱，成個書架放滿漫畫、CD同冷門嘅figures，右邊中空嘅磚頭都好靚，打卡嘅朋友推薦要坐呢張枱喔👏🏻。顏色tune藍懷舊味就出晒黎，加上突出既笑哈哈波畫兩筆就又可以出多張呃like post啦😇。雖然唔算肚餓，但價錢太平，忍唔住一個照食炸雞薯條同檸檬pancake。呢個拉花唔講得笑，同平時啲心心拉花等級差太遠，未試味都讚左先。呢個炸雞薯條一樣好有茶餐廳嘅水準😂，Menu話迷你但同正餐一樣咁大份，炸雞外脆內軟唔淋但幾乾身。而件pancake就好厚身，味道可以，但一般加果乾或果肉既甜品都會預件餅都係同一味道，而件pancake絕對係普通pancake冇加任何檸檬汁入去，令到塊檸檬同件餅係兩樣完全分開既野，再加糖漿，又酸又甜又苦仲要係分開既味道入口，唔算係一件可口既作品，結論係塊檸檬為咗美觀先加入去，想食味道配搭好啲嘅反而可以試其他味。影完發現張相全部都係圓圈😇。必須強調餐廳價位都低，而且樣樣都相當足料大大份，所以我會用抵食黎形容，水準就係一般茶記水準，會再黎試下有冇其他值得推介嘅嘢食。…Read More

呢間係工廠大廈既cafe相當之隱世，但進內仍有不少客人，相信一定有啲料到令人一試再試，於是同男友去一探究竟。Cafe算係半自助式，用既都係即棄餐具。見到餐廳入面好多茶具，先知道好多熟客仔都係黎品茗，喜歡飲茶既朋友可以一試。呢道細細既門就係通往廁所。唔好以為地方偏僻價錢會相對地相宜，餐廳入面嘅抗疫套餐（午餐）圍埋都要二百蚊。我地嗌左個抗疫套餐- 蟹肉牛油果忌廉汁意大利麵，同埋普通午餐- 吉烈魚柳。魚柳脆皮唔淋，上枱時超熱，炸得唔錯。一排排既粟米就知用原條粟米唔係罐頭。唔好睇小呢pat薯泥，好重奶味，well seasoned 令人一啖接一啖。蟹肉意粉個sause好足，蟹肉鋪到成個意粉都係，味道creamy不膩。呢個蟹子蟹肉Tart滿滿既美奶滋🤤，配左粟米味道很夾。飲品冇咩特別，係梳打同荔枝伯爵冰紅茶。總括而言所有食物都不過不失，未去到必試既地步，但出到門口見到啲相先知呢間cafe最出名係乞兒雞，要試嘅話記得要預訂呀。…Read More

ULURU出名就所有Cafe迷都知，今日專程着一身黑白去感受店內滿滿既設計心思。ULURU既門口位係巷仔角落，唔熟港島既朋友可能要搵兩搵，但門口既黑白佈置一經過就會見到。去到既時候係lunch hour大約1點零，相信我，唔好揀lunch hour去享受呢個美美既cafe，真係超嘈，超嘈，超級嘈。一黎因為灣仔工作既人都會黎食，二黎樓底較矮，好應聲，同行朋友有提餐廳地址前身係間雀會黎。野食都未嗌，都嘈到想直接離開，幸好頂到2點鐘打工仔開始離場，唔係真係會直接打包走人。嗌左兩個set lunch，啲打卡甜品都係要另外叫，食物一齊就影張大合照先。連墊枱紙都有小心思，一黑一白仲有放上餐具同碟既線條，大家可以對稱咁影，美美的❤️。又或者拉wide angle影埋人同牆上既背景，也是美美的😍。入返正題，嗌左呢個鰻魚泡菜意粉，必須說所有野都做得好「正確」，鰻魚原條上，鰻魚汁味道唔會太咸太甜，配以泡菜開胃，同軟硬度適中嘅意粉，唔會食濟。但問題就係三樣完全唔搭既野放埋一齊，明明味道賣相份量各項都係啱啱好，但都唔能夠用好食黎形容，因為真係唔太夾。然後係呢個海鮮意大利飯，好開胃既顏色，粒粒飯都好均勻。蟹肉係即拆蟹肉，份量都相當多。另外兩杯要加錢既飲品。打卡滿分，但飲落味道非常一般。最後就係個打卡甜品，已經係一黎就叫，但食完成個lunch都仲要等多半個鐘先上。雖然我知拉糖都好考技巧，仲要配搭唔同顏色，但呢個甜品我真係比唔落分。一黎真係拉得唔靚，二黎裝飾亦非常節儉，再講，呢碟野真係會令我懷疑咩叫甜品。全碟甜品就係一啖啖餅碎同餅碎，生果就係嗰三粒小小既berries，然後入面既朱古力係吱出黎既軟身朱古力，testure差之餘個樣都相當似poopoo（有圖）。如果你預$88就係為影相唔為品嘗既話先好嗌。到等完甜品食埋都三點半，場內得返兩枱客，發現每個位都好靚下，店員見冇人會由你影，仲會suggest一啲打卡位，有心去影相既記得晏少少tea time先去visit🤘🏻。…Read More

黎南豐紗廠，必去既打卡Cafe真係非Fleur莫屬。進入南豐紗廠地下嗰層一直行到尾就到。利用白同金色既裝潢，設計出充滿簡潔同時豪華既時代感。每張雲石枱面都放住Testtube小花，如果帶狗仔黎可以坐外面位置，冇寵物既話人唔多坐梳化位亦相當闊落同光猛，絕對係點影都靚既好地方😈。Fleur既餐牌比較特別，係按你既喜好黎揀食物。例如你係無肉不歡既，就可以揀Meat Lover，如果你係想食海鮮既，就揀Seafood Lover，入面既材料已經配搭好比你容易啲選擇。而我作好打卡既準備，緊係嗌佢個招牌Fleur Lover啦，同行友人就嗌左Beef Lover，再點左兩杯Velvet Latte同Superfruit。全部食物黎到都好靚，忍口唔食住影張大合照先🥰。Fleur Lover真人靚過上鏡，上面有多種水果同eatable flowers去佈置，仲有buckwheat同杏仁等等唔同咬口既食材放面，絕對係心機之作。食落去個味道其實相當不錯，而且內裡仲有用blueberry做餡料，唔會甜到膩。不足之處係比較乾身，硬度比起一般waffle更硬，所以要不停搭住餅面上既生果同Cream黎食，每啖都會有唔同配搭。我建議嗰啲expect個鬆餅係日式嗰種就唔好試，試完又唔啱口味就唔好浪費人地心機🥴，同埋唔洗分開件餅還餅食，生果還生果食，花還花食，咁你不如去食食材算啦係咪☺️。同埋件餅絕對係細食既女生三人份量，大家點餐前要預一預唔好嗌太多👏🏻。大頭一樣咁靚🥺啲顏色真係好有心機，唔洗點執都可以直接Post社交媒體👏🏻。Beef Lover件牛煎得幾香，個汁都好不錯，而且個薯蓉係特別season過，一樣都係落足心機。但牛肉質地比較韌，食落香口味道正確，但咬口就偏老。而我好少食牛骨髓，烤得幾靚，入口就係油淋淋既肥膏味同口感，如果加塊細多士就容易入口好多。牛骨髓記得趁熱食，唔係入口既感覺會更油膩。Velvet Latte都冇乜邊到可以出錯，Lovely pinky color相當吸睛，味道好濃郁。Superfruit邊倒邊影原本以為冇乜特別，味道酸酸甜甜非常開胃，點知飲到一半發現冰入面有朵紫花，到走一刻都未溶得晒，好有心思。因為太飽食唔到佢地既蛋糕，賣相一樣咁可愛。整體黎講感受到成間Cafe都係以設計為重，同時味道亦唔差，食物同擺設各樣都落左功夫而且感受到滿滿嘅心思。位置好多所以坐半天同朋友黎呢間Cafe傾計絕對係一件樂事，店員亦相當好服務。希望店主能多開分店，等我地可以時常黎幫襯❤️。…Read More

今日屋企樓下裝修，懶洋洋的我連電腦都未叉完電都頂唔順要出黎食飯。就隨便搵一間近近地既Cafe kill time。入內最吸引我既就係白色磚頭牆，仲有啲西式格調既燈掛牆再配一整行既烏絲燈，真係好夾。個人大推最入既梳發位，背景既格仔櫃都好打卡able，各人枱面都有樽乾花打卡用，加分。嗌餐個哥哥仔個樣好QQ，又有禮貌，再加分。餐廳係呢個Location都算相當Busy，所以真係偏嘈吵，仲要唔好彩既我，隔離枱坐住兩位大媽。出到黎已經係下午茶時間，唔想食咁飽，於是嗌左個 Blueberry Muffin同杯芝麻Latte。半自助Cafe，要自己去拎刀刀叉叉，但D叉真係洗得好唔乾淨，換左兩隻入面都仲係有食物殘渣，後悔冇影比大家睇以正視聽。芝麻Latte真人靚過上鏡，又獲得心心拉花一個，哥哥仔非常小心地慢放係枱面。飲落去芝麻味都好夠，但因為用豆奶沖所以唔算濃郁，好啱我口味👏🏻。再試個Muffin，第一啖，Yummy！第二啖，Okay！第三啖，嘩頂唔順好甜呀😰😰......甜到想講粗口，呢個Muffin係咪整錯美國人口味，本身件餅已有一定甜度，Blueberry都用重甜唔用酸，中間仲有甜餡（非流心），然後表面仲有落糖，連我呢個無甜不歡既人都覺得太甜，呢舊糖餅分分鐘成千卡路里，真的受不了😓。最後，睇黎老細好等錢洗，就正如之前既食評一樣，每人低消$80，而我一個Tea set只係$73，即係要夾硬再買野食。另外每張枱都貼住呢張「快啲走」既告示將你既消費同進餐時間掛勾，Free Wi-Fi都淨係強制得一小時冇得Renew。呢一連串既暗示/明示，雖然店員冇實際執正黎做，隔離枱個大媽都淨係嗌左杯咖啡同我一樣坐3個鐘，但對食客黎講都幾反感。黃Cafe其實好多，心胸廣闊既我都覺得呢間餐廳幫襯唔落😓，等小氣既老細好好反醒下。…Read More

因為隔離間Cafe（ 上一篇食評）收4:30pm，仲有個幾鐘先搵朋友，經過左幾間Cafe，係門口見到呢間好似有少少Feel，門口既鋪名都油得好靚，就二話不說入左黎。裝修好簡約，好新淨，雖然地方唔大，但空間感都好夠。唔算嘈，至少呢類較文青既Cafe唔會有啲呀姨呀嬸係到大笑大叫（好重要）。一個水吧有4個Staff，Man power max👏🏻。一入去店員就好熱情地Welcome。啱啱食飽冇耐既我就嗌左杯Flat white。Woohoo又係心心拉花👏🏻，心情秒變好。可能放太耐先飲，咖啡味偏酸，明明冇salted但都帶一點點咸味，濃度正常，有回甘，我諗係特別既咖啡豆，愛啡之人真係可以一戰，但可能要店員介紹下試啱自己口味既咖啡。見到隔離既正餐賣相相當吸引，下次會再黎試一試。但係有個相當大既扣分位，就係個雪櫃真係奇臭無比，係十年冇洗雪櫃嗰種噏味。因為佢水吧唔夠位，所以我坐正雪櫃對出嗰張枱，每次店員打開我都會聞到，真係有少少趕客。希望店主睇到食評會去洗下個雪櫃，咁就Perfect👏🏻。…Read More

煲左兩日劇，今日想出黎呼吸新鮮空氣，於是專程搭車黎呢間打卡cafe。鋪外有一小個三角空間，可以直接係出面嗌餐/外賣，嗰張枱相信係寵物friendly。一進內就見到好似打杖咁，店員即刻同我講今日唔夠員工，所以慢少少唔好意思，善良既我見佢咁好禮貌，即使我等左十分鐘都冇人抹枱，企左係counter五分鐘都冇人同我落單（仲要落錯單出錯餐），都完全唔怪。但最重要係，我今日正餐都冇食淨係諗住黎打卡，喂喂喂，無面男Latte冇，原粒肥桃冇，櫻花系列冇，都算，咩味都好，求其比件拿破崙蛋糕黎影下相呀喂？冇錯，係是但一件拿破崙都冇。可憐既我唯有食個Quiche同點杯Caramel Latte填肚就算。個蘑菇Tart菇量好足，用南瓜湯係杰到細食少少既女仔應該飲完就會飽，沙律菜份量好多好多，但隻醋真係太酸，建議換隻黑醋會成件事唔同晒。咖啡味道正常，拉左個大心比我，都填補唔到我食唔到甜品既空虛🥲。…Read More

今日去何文田做野，於是決定去呢間Bookmark左好耐既cafe試一試佢。12點就到左，直接入座。一入門口就見到用仙人掌做主題既門口，好靚既LOGO啊😍。店面用黑白為主色配合線條感好重既擺設，好有時代感。進內第一個area係Bar枱同半Open kitchen，Bar枱用上白雲石面，對住落地玻璃，有些少自然光影相，用黎打卡實在一流。但千萬唔好對風景有太大要求，坐過一次你就會明白點解咁靚都冇乜人坐bar枱🥴。做好research既我緊係要試佢個打卡飲品，髒髒紫薯鮮奶同egg benedict。呢杯飲品飲落味道似milk shake多過一般飲品店既紫薯鮮奶。杯面放有不下十粒紫薯碎，好怕佢沉底所以一上枱我已經狂影post IG，點知隔左成個餐都冇跌入去，可見杯野既density相當之高，係足料之選，對得住個價錢。作為一杯招牌飲品，又打到卡又足料又好飲，真心讚。另外個egg benedict我原本冇乜期望，事關近排聽一位去國外學廚既朋友話egg benedict係最最最基礎既一道菜，煮法唔難，但因為佢既形態比較靚所以餐廳先會set到咁高價錢去賣一粒雞蛋🥴。當日唔想食咁飽，所以照嗌，點知...好好食呀！第一口咬落就食到滿滿既parma ham，味道濃烈但不咸。另外留意返，個蛋白係真係發得好有性格，cream狀既外觀係點做到？仲有松露味不多不少地點綴左個dish，成個餐味道都好夾。合格既egg benedict應該係要流到咁，有時去啲曳啲既餐廳係會變左溏心蛋。打卡人仕可影切開嗰刻，讚🤘🏻。唯一好食中不足就係，我一路影一路寫食評一路食，過左exact 60分鐘(1分鐘都冇比多，直頭以為佢set timer）個店員就走黎同我講仲有冇野加，半個鐘後要交枱。WHAT？我連隻蛋都未食完，仲要係講緊weekday afternoon hours冇乜客，目測仲有5/6張枱係空既😨。我絕對唔係嗰啲要死霸張枱既客黎，亦完全明白點解餐廳要有時限，但係非繁忙時間同仲有大量吉枱既情況，99%既餐廳都會照比你繼續，更何況90分鐘連食飯真係吹水都不夠，真心打個凸🥴。我就唔會好似上面啲偽食評咁話好坐，事實就係好食唔好坐，你當佢係一間餐廳比起一間cafe咁會感覺良好啲，建議佢將個樓上cafe既hashtag轉返西餐就算，或者希望呀老細睇到呢篇食評可以指導下啲員工點樣唔pushy地set用餐時間🥲。額外一提，見到有人客指住碟野彈回頭，可能啲生菜太新鮮🥴，建議用餐客人望清楚先入口。…Read More