funnel's Profile

一心去試軟雪糕，排勁耐隊，買完等咗十幾分鐘，條友完全忘記咗我，我見遲過我嗰啲人都拎曬，問佢佢先至醒起裝俾我，仲要一句sorry都冇！如果我唔問佢，等成世都唔會有！p.s. 我企正喺counter前面冇行開過個軟雪糕非常之杰，似食緊溶咗嘅芝士咁，食咗幾啖已經唔想食，最後勉強食一半就掉咗…Read More

西環的街坊食店, 津津係其中一間我最推薦既. 來過兩次都係買外賣, 第一次叫了皇牌飯, 有齊香茅豬扒, 雞翼, 扎肉, 腸仔, 都只係 $29, 拎到返屋企都仲熱辣辣, 明顯即叫即做, 連腸仔都有煎過, 好香. 唔洗30蚊食到飽晒.第2次叫左豬扒飯, 一樣好味. 最好既係佢個飯有好多菜, 平時出面D飯盒最多得一條, 甚至無菜, 有都係勁霉, 呢度的飯盒健康好多!!睇黎以後屋企無飯開的時候, 會不斷ENCORE呢間...…Read More

之前同朋友食生日飯, 因為得3個人又全部都係西環人, 想食日本野, 我FRIEND話來呢間, 我都話左聽人講好差架啦, 佢話都唔算好差既, 所以就試下, 點知真係食到一肚火囉...我地8點左右來到, 都唔多人, 我諗有1/3吉位. 我地全左埋邊的BAR台, 因為唔多食生野, 魚生我地只食三文魚, 所以主要都係要三文魚. 點知, 第一碟來的三文魚, 一入口係腥既... 第2碟, 係蔥三文魚, 食落就只得D蔥味... 第三碟仲離譜!! 係臭既!!!! 我地即刻唔食, 同佢投訴, 佢話換過碟比我地, 唔洗啦, 食左咁多碟一碟衰過一碟, 仲邊敢再試?? 轉要安全D既加洲卷, 但碟野來到, 見到D蟹子痴實晒舊飯, 好明顯係勁唔新鮮, 我地想整走D蟹子, 但佢痴實到整唔走架囉... = = 最後, 我地只係食左入面的蟹柳, 就算未飽都唔想再叫啦, 拿拿聲走人去食糖水補數算啦...三上最初開時勁多人, 而家到DINNER HOUR都勁少人, 真係事出必有因囉..... 倒貼我都唔會再來!!!!…Read More

今日所有同事都無帶飯, 所以決定一齊出去食. 想食日本野, 0係openrice搵到呢間lunch有九折的, 一於去試下.一點鬆d去到好多人等緊位, 不過多人等證明呢間野唔差啦. 我地無訂位, 又有6個人, 所以都等左幾耐下, 抵食嘛, 當然多人去. 星期一至五每日都有一個special set, 今日係朝鮮醬牛肉飯 / 烏冬 / 拉面, 配3件壽司無得揀的, (三文魚, 芝麻反卷同一個手卷), 仲跟麵豉湯, $43好抵! 我就叫左便當, 仲抵, $39就有牛肉飯, 前菜, 三文魚壽司2件 (好厚身), 湯, 仲有雪米滋! 我唔想飲湯, 可以+$6將個湯轉可樂一罐, 咁都係 $45咋, 真係好抵! 個飯係有汁0係上面既, 而d牛肉份量都幾多下, 我唔算妯食, 都食唔晒... 可能一開始食左三文魚頂住左個胃... 我d同事食朝鮮牆牛肉, 其實似係燒汁, 不過都好食, 個烏冬都唔錯.總結真係值得再去, 王永慶再去就要預先訂位, 唔係等到頸都長呀!! (唔好預計環境會好好, 不過咁既價錢, 去邊度搵丫)…Read More

最近呢兩個月去過兩次美麗華商場的麵屋一平安，第一次去完感覺驚艷，所以之後有朋友生日我都提出去呢間。食左兩次，覺得絕對值得encore，假如你識揀野食的話....呢度的豬腩肉的確係超正，就連我d朋友怕肥的，見到都忍唔住要食！肉質好正，哎落好鬆化，而且醬汁又入味，食過番尋味呀。除左豬腩肉係必食之外，個滑蛋豬扒飯都好ok，蛋唔係煮到乾晒果d，而係仲濕濕地，撈飯食一流。另外抵讚的係個玉子卷，好甜！講完必試既，就要講下有d咩我覺得試唔過，例如魚生飯同燒餅，兩樣都好一般，餃子只屬不過不失，以後如果再黎，最穩陣我覺得都係食返豬腩肉同滑蛋好了。…Read More

十年都唔去一次藍田, 去到都唔知有咩好食, 一出地鐵站除左個商場就見到呢間茶餐廳, 個名改得幾得意... 由於突然好想食牛河, 所以就入左去. 入面好光猛, d位好闊落, 同一般茶餐廳唔同. 可能係新開, d野都好乾淨. 未食牛河之前先要左我的最愛 - 奶醬多!! 果度有好多好得意的野飲, 有奶茶冰同阿華田忌廉冰, 掙扎左一輪之後都係決定要阿華田忌廉冰, 好好味呀, d忌廉好香滑, 加埋阿華田至岩我呢d鐘意甜既人. 之後到個牛河, 一上台見到係有芝麻ga, 太好了, 而家去好多茶餐廳食牛河都無芝麻ga!!! d牛河都炒得好香同夠鑊氣.... 拍得住我屋企附近已經執笠好多年果間聖羅蘭.... 仲叫左個豬頸肉炒公仔面, 我怕辣所以覺得辣左少少, 不過d豬頸肉都好脆又唔會太瘦, 岩我呢d食肥肉既人!! 埋單80蚊都唔洗, 勁抵! 最衰間野離我屋企太遠啦, 如果唔係一定會係平時食飯好去處.…Read More

想睇奧運費事煮飯，一家四口落街食飯，去厚和街睇下有咩食，見到呢間九點後八折就去試下啦，平時都聽聞呢度幾好食，果然見到d海鮮好大隻好生猛 (我見到有一揀左隻大大隻蟹仲比佢夾親添~)去到見到辣酒花螺 $49 不過賣晒，就要左豉椒蟶子，好快就上菜，d醬汁超好味，連我公公同阿媽都係咁用黎撈飯，d蟶子都好爽口彈牙再黎一個花蘭花蒜蓉花枝片，覺得淡左d，可能因為我係蒜蓉超級fans，所以覺得唔夠啦~之後個金莎椒鹽豬扒，d豬扒唔會好似平時d冰鮮豬咁炸到硬晒，比較軟身同有肉味，再黎一個瑤柱粉絲什菜煲，菜都有幾款，見到有大大粒瑤柱，ok！！總括黎講，樣樣都唔錯，貴d都食得過！下次會再黎食，不過一定會九點後... 下次要試糯米蟹！…Read More

這是我第一次來openrice寫食評，向來對食物只分得出邊d係「唔好食」，對於「好食」無咩standard既我，今日遇上令我不得不大叫好食既刺身...事源本來想食壽司，想試下板前因為成日多人話好食，自己都未試過，但8點幾呢個鐘數排到百幾位，我一定唔會等，行行下去左總統附近，就見到呢間好似幾靚又無人排隊既壽司鋪。一去到d staff都幾nice架，我同個fd兩個人點左8樣野，冷烏冬、綠茶麵、三文魚腩刺身、火x三文魚壽司、奶油薯餅、軟殼蟹手卷、火x帶子壽司、加州卷。先黎左兩樣三文魚，見到份刺身係好厚身，一入口，嘩，係勁肥美，又爽甜，我唔係食家都食得出好鮮好靚。真係咁耐以黎試過最好食既三文魚！火x三文魚都唔錯！第二樣要推介就係奶油薯餅，不過記得一定要趁熱食，趁d奶油仲係半液體狀，超正！之後仲有個冷烏冬都好煙un，綠茶麵就好清。我見到有個客人叫左手卷，個staff姐姐仲提佢要快d食，唔係d紫菜會lum (好似我果件咁=.=) 埋單個姐姐仲問我地係咪等左好耐，講唔好意思，好有禮貌！我fd話d師傅手勢好好，而且見到有日本人幫襯，我相信有得日本人去既壽司店一定唔會差得去邊！而且價錢都唔貴，同活壽司差唔多！抵食呀！真係要比個讚呀~~~~ 唯一唔好係迴轉d位窄左d!…Read More