wct917's Profile

農曆新年前想和朋友來吃，一來約不成，二來幾次打來都Full Booking,越食唔到越想食，是日把心一橫，6點半殺入去，要求7點半前交枱，完全無問題。幸好漏了「蠔爽」，根本食唔曬，兩人埋單約$340，3碟加兩碗飯同汽水，會再來…Read More

蛇年大吉，搵地方同一班大學同學食飯，朋友介紹話呢度雞煲好食，又可以打邊爐，所以早幾日訂位。上到16樓人頭湧湧，無訂位要等。先上雞煲，落咗單等好耐，個煲好大。雞肉好入味，芫茜又香，不過唔係人人都鍾意食芫茜。但d雞斬得唔好，好多碎骨，肉比較少，骨多。2小時任飲任食（打邊爐）飲品無限自取有姐姐自動幫我哋換碟，食完雞，個煲加湯變邊爐，雞汁味好濃好夠，打邊爐食物都唔駛再沾豉油，準時7點入座，8：45有姐姐叫我哋埋單先，望到9點時段一群人係出面等緊。148/位，全包又無再加一，明碼實價:)好多時出面其他地方講就一個價，到埋單就另一個價。9：15比姐姐叫我哋走，如果有2個半鐘會好d。唯一唔好係個位窄，張櫈好細，個地有點滑…Read More

富亨村向來出名「百無」，無咩野食、係原位的「大排x」集團太難食、由開村住到依家終於等到佢執，對新餐廳抱有期望。食之前上網搵定呢間集團的資料，出名「漏單」，所以特登早D出門口食完早餐去上堂。黎得早所以唔駛點等就有位坐，坐低落單，刻意記住個待應個樣，咁「好彩」漏單有得追。我坐卡位，之後對面坐咗個婆婆遲我十分鐘入黎落單，佢D野食仲嚟得快過我，即刻問個待應(同我入單o個個應該聽到但唔行埋黎)，佢check完話電腦無入單，搞錯!!!我即黑面話我趕時間，個待應話同我即落即整。果然大聲同黑面係有用，好快就有得食，攞起刀叉…咩胃口都無，有灘蛋黃漬係度(影相可能唔係好清楚)，洗碗個阿姐咩事?刀上面的印同漬明顯係洗得好求其，自己用紙巾抹完無咩改善，攞過一把刀算數。講番食物，四個字形容﹕平平無奇如果我有時間，自己係屋企煮好過，等別係荷包蛋唔知點解有一陣水喉水怪味。食食下個類似經理的攞住同我食緊一樣的餐行過嚟，就係我之前落的單，個經理即刻話待應如果追咗單、舊的單要掉。最好笑係我食到尾，本來同我落單又漏單的待應黑口黑面、語氣又惡咁走埋嚟問我「你D野齊啦嘛!」，因為食緊又趕時間，唔係我實嘈。因為坐近廚房，一路睇到聽到佢地好混亂，人手係夠、但都係新手，聽到經理話「晏D會有個新人返工…」，又見到有個人新返工企埋一邊等人教，但個個都咁忙無人教佢…如果有街坊想試，建議唔好食住，等佢運作順咗先，我就對佢早餐失去信心，屋企人就話佢午餐的海南雞飯ok，但我未試過。…Read More