foodghost's Profile

下午3點零，tea time啦，但個人工作關係要tea time先食lunch. 見呢間嘢d相頭幾好，就特登過海去試下啦。一入去，叫一位，咁d姐姐好常都係安排搭枱，今次就安排搭坐中間d硬pan座位，我要求坐卡位，當時餐廳有零星客人，4分一滿，近門口卡位有留座牌，但入面卡位有人坐，佢就話兩邊卡位都係清潔中。。。跟住我轉身就走，去左樓下地庫台灣面(原來都有醉雞食) 。其實呢d單拖食嘢比人迫搭枱都係常見(但佢有幾堅持會反映待客之道嘅高低) ，而下午茶時間人少唔開某區亦係常情(省清潔，省冷氣，省送餐步程？，但省唔到租金), 但我做嘢做咁辛苦到tea time先食lunch嘅情況下就真係冇氣同佢去nego個坐位問題，因為個氣氛已經唔welcoming(唔聽姐姐指揮坐硬位), 食餐飯唔想頂住。咁冇氣點解又會有呢編評論？因為已經食飽飽…Read More

金鳳在灣仔區內都出名啦，尤其假日都好多人幫襯，店外都會有人龍。其實一年幾前都試過果時真心覺得冇特別，要排隊就唔值。咁呢期去試下佢d早餐掂唔掂，始終住近近地，希望佢ok. 連續試左佢兩日嘅c餐，第一日8 點幾到差唔多滿晒座，第二日 7 點到一半有人，睇黎都幾受歡迎。第一日叫左腸仔奄列，鮮油餐包，凍央。餐包凍凍地嘅，咁d鮮油自然唔會融，凍包加凍牛油，我就唔like喇，冇誠意lor, 其他地方食多士/餐包都會有温度，呢度個門面放咁多包好似好新鮮咁結果係凍嘅，真係意外。奄列就係即整，有温度喇，ok. 凍央就唔太甜，淡淡嘅茶味冇啡味，冇冰，一般啦。第二日，叫左餐肉煎蛋，oh賣god, 叫佢全熟蛋就冇理我，出左隻蛋黃唔熟仲要凍嘅蛋比我，擺明整定放涼左，唔好食，堂食早餐唔會想食凍嘢。今次個餐包有少少暖，但只係融到少少鮮油，唉，其實之前一日食左個凍嘅已經同老闆提過，佢話7 點就會暖，咁我咪7 點黎lor, 結果都係温度不足，其實佢似係冇保溫櫃，一出完爐就灘凍，方便外賣賣包卦，但堂食就唔好食lor, 老實啦，天氣開始涼，d包一定凍得快，呢間嘢唔方會有新鮮有温度嘅面包食。呢方面係差過其他早餐店，例如去旺記好好多，枉呢度仲標榜賣面包，失望。最後熱奶茶幾好，茶味香。結論，有温度嘅嘢食就唔差，但係包就唔會熱，除左有懷舊味，嘢食就真係唔太特別好味。…Read More

又黎到一間出名嘅燒味鋪，灣仔嘅再興。住咁近竟然未黎過，一於試試佢啦，真係正嘅話就發喇。本身想黎試叉燒，但見有燒鵝，就叫左雙拼飯，個人例牌加葱油唔要燒鵝醬。講叉燒先，份量唔多，但係精華，肥瘦適中，食落有少少咬頭，似係帶少少筋嘅感覺，味都好食，所以好滿意。燒鵝，一睇個食色水怪怪地，檢查下有冇鵝油，係有但分佈唔均勻，一舊成舊油，另一舊又冇油，奇怪。算啦有油咪好囉，一試點知鵝油竟然冇鵝味，只係普通一舊冇香味嘅油脂，再一個奇怪。即係有油都唔香嘅燒鵝，真係冇point去食。葱油方面，冇乜香葱味，一pat油，又係奇，明明有葱冇葱味，係咪燒鵝d friend? 總結黎講，今次試食有d出乎預期，就係d野冇味果下，叉燒就可以再食，所以下次叫叉燒飯就算喇…Read More

又係見叉燒出名，專程過去柴灣試試。本身睇完其他食評就對呢度冇乜特別期望，結果都係冇乜特別。叉燒，可能因為冇叫佢比肥或半肥瘦，就上左d瘦嘅比我，咁我唔鍾意瘦叉，就一定唔會高分。我見其他人好多都有指定要肥或者半肥瘦，可能係咁多人要左有肥嘅，咁冇特別指定就會比瘦叉。叉燒雖然瘦，但都不至於柴，只係普通"鞋", 邊邊有少少焦黑，我只能幻想如果係半肥瘦會好食卦，不過眼前嘅叉燒就唔太好喇。燒肉，咸香，皮脆但太硬，好多燒肉嘅通病。葱油係我like嘅冇薑淨葱，咁先有葱嘅香味，比得上鵝之極品嘅(亦係唯一方面). 地方就係預左咁窄，基本上都係快食快快走人，不過唔算dirty, 算係咁。總結黎講，就係冇乜再去食嘅動力，柴灣亦唔係特別近，過海去深水埗仲穩陣。完。…Read More

數中環早餐，裕興相信係最特色之一，終於夾得啱個時間黎試試。傳聞中嘅特色就係慢功出細貨嘅多士三文治，而今次試食結果亦乎合其他食評嘅口碑，加我自己少少個人意見，就係鹹牛治幾鹹，除此之外別無挑剔。新鮮出爐嘅多士夠脆，餡料夠多花式夠爆汁夠温度，有咩好食得過呢份坐等左40分鐘先等到嘅新鮮熱辣香噴噴三文治？仲有果杯凍檸啡，實在係驚喜，估唔到係可以咁夾。以食物質數嘅角度，43蚊係超值，但係食嘢並唔係唯一嘅重點，因為食嘢10分鐘，等待係40分鐘，呢40分鐘點運用就係另一個重點。好在有秋天涼爽嘅天氣，否則相信街邊檔環境坐40分鐘並唔會咁好受，呢個天氣啱啱好，一邊啜檸啡，一邊感受同其他一齊都要等幾十分鐘嘅朝聖者果種眼神上同精神上嘅連結，就好似一個集體街頭冥想嘅聚會，素不相識嘅人，焗住要圍爐幾十分鐘，各自修行，自尋仙境。有情侶打手機game而爆粗，有OL静讀有關compliance嘅study notes, 有眼不離手機嘅上班族少少心急咁等嘢食，仲有好有禮貌又出貨好有條理同次序嘅一腳踢姐姐，當然仲有好多路人。冇人催促要快d, 因為一早講明要30,40,什至50分鐘。食好西，就係要花時間，心甘情願先好坐低。叮，好似領悟到d玄機。都話食嘢唔係唯一重點。…Read More

工作做到攰，就會想食下d開心舒壓嘅好嘢(唔代表要貴嘢) 。今次又loop返到燒鵝，就要返黎呢間鵝之極品。見個店名就知道係對鵝有自信嘅鋪頭，鵝有兩飛，滷水鵝同燒鵝，個人暫時只愛好燒鵝咁今次就食個燒鵝燒肉飯，順手試埋個燒肉。其實對上連續兩次黎食叉鵝飯都好好彩咁師傅切左隻鵝脾比我，今次就比左鵝身，其實都好，可以試下唔同位，好happy都係幾好食。點好食呢，就係keep得住鵝皮同皮下嘅鵝油，當然肉要有d, 黎加重入口嘅質量，但肉唔可以太霉或太韌，軟硬適中先可以配合到鵝油嘅美味。鵝皮呢度就唔係脆果種，可能因為唔似好多其他地方咁燒得太乾身，什至連脾嘅油都燒走晒，而呢度嘅就唔會太乾，食兩次脾都有油，所以幾滿意，鵝身都一樣，油雖然少過脾位，但一樣係足夠，滿意；) 咁綜合3次嘅燒鵝水準都保持到一致嘅質數，咁至叫有料到。雖然重點絕對在於燒鵝，但其他方面都講下啦。燒肉都係好食，適當咁肥同咸，都係好食。之前食嘅叉燒就一般，太瘦同冇咩香味，係食得嘅，但唔會回味。每次都係下午時間去，地方任坐冇壓迫感，而衛生就ok, 見阿姐keep住有打掃，而且態度係feel到親切而對工作熟練嘅街坊味。本身就一間門面同食物選擇都唔起眼嘅食店就冇咩需要寫食評，但就之前去其他有名無實嘅燒鵝店嘅經驗，就感覺穩定地好食嘅燒鵝其實唔易揾得到，加上呢度唔貴，53蚊雙拼飯，又有葱油，又送例湯，又有油菜，又唔迫，又唔串，所有細節位都滿意，去邊度再揾到？所以對我黎講係safe choice, 咁就介紹比大家。…Read More

經歷過上次嘅燒鵝得塊皮乳豬變燒肉嘅四寶飯，今次專心試真d個招牌叉燒同燒鵝，於是就叫左叉鵝飯。叉燒冇上次咁肥瘦適中，冇咁好食，始終叉燒唔會舊舊都靚同啱我心水，起碼冇超瘦都算係咁，但就算唔上No. 1,優點只係夠淋，冇特別香味，一般般咁樣，如果係帶住期望咁去試就多數會少少失望。燒鵝今次有肉食，yeah, 但就冇乜鵝油香味，肉都係夠淋，唔似好多其他地方肉會乾同韌，總合黎講都係不過不失，好多地方都會有更好嘅燒鵝(好似前幾日食過嘅深水埗鵝之極品). 油菜，夠大碟，但個人愛好西生菜，而佢係唐生菜，有少少苦味。總結呢個叉燒no. 1體驗，叉燒要食到靚，始終要撞手神，幾十蚊貨仔要保證最好食係好難，無論店家幾有自信都好。如果係有心做No. 1,不妨做最好賣最貴，有質數嘅嘢一定有市場。…Read More

睇左一條youtube片，果籽介紹一個衝出街市開燒味茶餐廳嘅招積老闆，自稱叉燒No. 1, 咁自信嘅態度燃起左我條叉燒癮，一於去試試。近中午時間，一到門口已經見到7,8人在輪候，好在只是等外賣，我一入就有位，但就係一張4人枱已有兩位大叔嘅搭枱位，我個人習慣搭枱冇問題，問題在於枱太細，我一坐下就已經對面隔離同自己都唔舒服想走人嘅感覺，加上走廊一地都係碎屑唔太整潔，環境上一定要扣分，因為差過一般茶記。講返嘢食，招牌一定係叉燒啦，個人因為貪心，叫左"豪得起四寶飯", 一次過試晒想試嘅叉燒，燒鵝同乳豬。份量見到每樣幾舊咁啦，98蚊想有幾多，但係就咁，明明餐牌寫乳豬就變左燒肉，我問待應阿姐，就得一句冇晒乳豬，喂，冇乳豬要同我講得架，換左燒肉就唔係咁嘅價錢啦。試返個燒味個味道，叉燒，係如片中所講肥瘦適中，邊有少少黑左嘅焦，係正嘅。燒鵝，全部冇肉得塊皮，皮下油都冇乜，所以好差，四寶飯分d骨比我，唔太掂，比一舊有肥有肉嘅都好過果幾舊骨啦，感覺被敷衍了。燒肉，皮脆，肉有帶肥花嘅一段，夠淋滑，係好食嘅。薰蹄就一般貨色冇特別。另外送個湯都幾特別，係有一大塊燒豬皮嘅清湯，少少甜味幾特別。總結黎講就氣氛好舊街市feel, 亂，地方唔太整潔(仍然乾淨過永合隆) ，服務態度十分街坊而隨性。埋單時同收銀妹妹反映左乳豬變燒肉嘅問題，佢都好友善咁灑lum同打左八折，識做嘅態度挽回左有得救及做回頭客嘅可能性。最後諗返，點解咁多外賣客，就係果種街市feel, 希望以後做好d個樓面，將單純好食嘅叉燒變成一種更好更高嘅飲食體驗。…Read More

呢間野一開已經見個招牌係"非一般"嘅設計，3個人像嘅油畫style大大張，樣好樣衰我就唔評論啦，個人眼光都唔同，但放得做招牌都似乎有d自信咁樣。個名叫難兄難弟2018,唔。。。真係唔睇餐牌唔知有乜食。原來茶記野加中菜啦。本來睇餐牌都唔係特別大興趣，因為真係冇特別，係有一日貪近同貪新想發掘下灣仔街坊店好去處，點知就試出一肚氣。點左個黑松露蝦仁炒蛋午市餐，小試下先，我叫走飯，食完埋單要收我小菜價，90 幾蚊，頭都大，感覺被老屈，又唔係特別大份，茶餐份量，點都唔似小菜份量。又唔係好好食，又亂收錢，真係難兄難弟，不知所謂，2018,希望2019唔好再見…Read More