曲架小狗's Profile

係香港大部份餐廳都係西式或日式佈置為主，有同事講開旺角有間餐廳係古代佈置，仲有得任著古裝衫，太座最鐘意呢D玩意，就問左同事餐廳名，帶太座黎試下。餐廳地點都易搵，MTR一出行幾分鐘就到。升降機門一開，就見到全間古代特色的客棧，呢點有驚喜，所有裝潢都有傳統風味，環境好得！枱凳都同電視古裝片相似，升降機旁邊仲擺左好多酒壺，睇得出花左好多心思。夾公仔機同間客棧格調就差少少，不過就好受小朋友歡迎，要黎安撫小朋友都唔錯。本身都預左係食中式野食，估唔到都有唔同類型野食，除了點心之外，仲有串燒、中式糖水、花冰。太座話樣樣都想試下，諗好耐淨係話一定要試象棋牛奶凍，其他野就交俾我決定。叫野食仲有茶飲，茶壺真係同古代果d好似，仲配埋d細杯，俾客人慢慢品嘗。可能當晚太多客，野食就上得慢d。重慶酸辣粉 $28 及 稻庭烏冬 $28本來打算食蒸飯，飽肚d，估唔到7點已經賣晒，就叫左兩碗粉食，兩碗粉份量都夠，一人一碗平平地食都填都肚，酸辣粉對我黎講就唔夠辣，但太座話味道都夠，稻庭烏冬食落都好有口感，唔會太淋。瑞士雞翼 $28 及花雕醉雞翼 $34兩款雞翼上枱時都聞到好香，瑞士雞翼夠入味，不過食食下就覺得4隻唔夠喉。花雕醉雞翼就比較配合雲來客棧的環境，而且呢款花雕醉雞翼係熱食，太座非常欣賞，仲話花雕好香。原條蒜香燒茄子 $32應該係其中一道招牌菜，見好多枱都有點，我就隨波試下，上枱好吸引，大大條食落好滿足，唯一差少少就係d茄子肉比較難夾。象棋牛奶凍 $88太座指定要食，亦都係呢度招牌甜品，好有心思同特色，都幾得意，真係好似捉棋咁，牛奶凍唔會好甜，淡淡牛奶香食落口，不過要逐隻整，真係要等好耐，要俾d耐性等，而太座就選擇去試唔同古代服飾，著住古裝衫食飯，好似拍戲咁，店員仲好有心提醒太座d衫點著。…Read More

同太座食lunch，話要試新野，係德福一期行左1圈，見呢間日式丼飯門前多人排，應該唔錯掛，就囉飛仔排下隊。等緊無聊時都有研究下餐牌，主睇熟食set，款式都多，價錢係德福黎講唔算特別貴。每個餐都基本有凍果茶送，想飲其他或要小食就再加錢。等左15分鐘左右就有位，原來內籠都幾大，仲有吧位，如果download個apps，仲可以預先囉飛，唔駛企咁耐。太座要滑蛋炭燒雞肉丼，果茶走冰，我就要黑咖喱吉列大蝦飯，加$5轉雪碧。食飯擺得好靚，唔係求其放，仲有湯&沙律跟，都算抵食。可惜我唔太喜歡沙律醋，所以個沙律對我黎講真係麻麻地，食埋d蟹柳就算，我亦唔太喜好個湯，太座鐘意佢多海帶&有金菇，幫我KO埋。黑咖喱雖然香，但味道比較淡，就算用好多配飯都淡，有D食唔慣，成個set最抵讚就係d蝦，好香脆可口，係即炸，不過得三條，真係唔會夠喉。太座個滑蛋炭燒雞肉丼就比較普通，d蛋唔會太熟，雞肉都大塊，但佢就覺得乾身左少少，要囉我d黑咖喱去配d飯食。呢個價錢有湯、沙律&主菜都唔算貴，食物質素都普普通通，但一定夠飽。…Read More

公司附近食lunch食到悶，同事提議去遠少少APM食，我本來以為APM一定多人，肯定有排等，點知同事帶路直上樓上4樓食，到本陣門口，仲要完全冇人等位，正！Lunch可以選擇BBQ Set 或 Rice Bowl，去到本陣，就梗係BBQ。大家諗法差唔多，分別點左本陣牛三品同豚三品，利用pad點，唔駛等人黎幫手落單，方便又快捷。肉未到之前，仲可以去沙律吧任食，女同事就開心，覺得食烤肉前食d沙律健康d，我本身為食肉獸，對個沙律吧真係冇咩興趣，不過聽其他同事話，沙律吧d食物偶爾都會有變，之前佢地食有任食蟹棒，我冇緣，太可惜。我係食牛三品，質素唔錯，望落係新鮮吸引，有牛肋肉、一口牛等等，醬汁醃製好惹味，配白飯都唔錯，不過依我自己食量，食完係唔夠飽。同事食豚，望落就乾身d，但同牛一樣，一d都唔會薄切，食落都係有質感。以呢個價錢食到質素唔錯的肉，雖然唔夠飽，但真係滿足。…Read More

星期六要開工，梗係食個早餐提提神，去開附近見呢間評價唔錯，試下無妨。剛入門就見到「職工飯堂」4字，好配合我呢d週末返工人士心境，超舊式電話同裁縫機，夠晒復古。呢個大櫃後面全部都係枱，都容納到唔少人。收銀附近係放雪櫃同賣麵包的地方，望到都覺得懷舊，好似睇電視果d講早期香港既電視劇咁。牆上擺設都係復古，等野食時候可以留意下黎打發時間。叫左個蕃茄牛腩米 $29，上枱時好香，食第一啖時，真係「咦」一聲，係有重蕃茄的羅宋湯味！好食喎！除左牛腩，仲有唔少蔬菜、紅蘿蔔同蕃茄，好豐富。我偷偷望過其他枱，原來其他單餸係冇咁多配料，食果下覺得自己選啱左！真係好開胃！加左$12蚊，有豬扒煎蛋及牛油多士，食評果然冇介紹錯，呢個多士冇得頂！真係食完一塊仲想再加呀! 超級鬆軟，鹹鹹地好入味，又唔乾身，係食咁耐多士以黎，比較好食的。豬扒擋住左睇唔清，但其實好大塊，同多士長度差唔多，煎得啱啱好。呢個夾糖盒真係好少見，而家仲係一粒粒方糖更加少見，懷舊feel就係要呢d！加糖時覺得自己好似以前d大老闆咁。…Read More

本身想食韓式，見餐廳好多人，反而平時好多人等位既麻布今日冇咩人，諗諗下決定入去。店內唔太寬敞，D枱都擺到密密麻麻，好彩時間都算早，都唔算逼。員工好快送水/茶過黎，個杯有d似平時茶樓果d，個人覺得同環境及食物唔太襯。餐廳有3張大menu，不過我地對定食冇咩興趣，感覺太貴又普通，唔抵食，就主力望另外兩張。我想鋸扒，太座想火鍋。鋸扒有4款選擇，我選擇左$94 安格斯西冷(8安士)，再加$29連三款小食/飲品。太座就選左雞肉火鍋+宇治金時霜淇淋刨冰($74)。三款小食/飲品之一，炒煙肉波菜用左好多蒜去炒，所以都好入味，份量都好大碟，太座好鐘意食，話夠晒味，食肉前食d菜都健康d。三款小食/飲品之一，薯角好味！熱辣辣，外脆內軟，我地呢份唔會太鹹，反而隔離台叫薯條就投訴薯條太鹹，而且份量都唔少，覺得係抵食。安格斯上枱啦! 黑椒汁+5成熟望落唔算細塊，食落好有肉質，算係鬆化，兩邊比較熟，食到中間就再生d，覺得只有3-4成熟，太座唔太喜歡，不過黑椒汁好配，唔會好辣，但佢用細樽上汁就唔係好夠，食到一半d汁就俾我用晒咁。冇晒雞肉，就轉左豚肉，餸份量一般，連埋白飯都夠飽，豚肉質素就麻麻地，薄切，仲有獅子狗+龍蝦丸，款式唔多。不過火鍋都要夠早先有，因為爐唔夠，我地食到一半都冇，已經話唔夠爐要停火鍋。刨冰唔記得影相，但唔好食，唔建議食。…Read More

真係完全唔知九龍灣淘大竟然有間茶木！據知九龍灣mega box 同德福都有，估唔到淘大都有！平時行開淘大只要都係一期果邊，好少過黎三期，今次因為想望下戲院有咩新戲睇先過黎行下，估唔到就發現呢間茶木。原本諗住等食下午茶，仲有半個鐘左右，不過朋友等唔切，就直入。過左食lunch最忙既時間，餐廳冇人排隊，可以直入。酥炸雞排麵食茶本真係唔可以唔食呢個炸雞排麵，炸得好好食，我覺得好食過德福，少粉之餘仲大大舊，唔會炸得乾身，仲有肉汁，雞排食落又唔會太瘦，肥肥地更加好味！麵份量對男人黎講會少d，我食晒成個麵都仲有炸雞排未食完，莞茜都好多，清熱都唔錯，湯底又係濃味，食完真係會好滿足！自選套餐︰四式拼盤(牛)，地瓜新竹米粉朋友最like自選套餐，每野少少食到好多款野食，前茶有蛋、泡菜及豆腐，朋友話個豆腐最好食，係煎過的，有d似玉子豆腐咁，外硬內軟。四式拼盤即係滷水拼盤，份量都唔少嫁，我都忍唔住試左，真係好抵食。食完濃味滷水，配個淡味少少的新竹米粉真係一絕。升級飲品lunch/tea都有呢個優惠，可以+$5升級飲品，仲要餐牌上咩都得(除新鮮果汁外)，我飲凍巧克力火山，大大杯超正！巧克力味濃，足料！朋友就飲熱帶水果茶，可以倒3-4杯，玻璃壺望到入面落左好多款鮮果，例如西瓜、奇異果、橙等等，超級抵飲，飲落都感覺健康d！…Read More

德福雖然都多餐廳，但係燒肉的選擇就好少，作為食肉獸，見6點牛角完全冇人等位，梗係要入去食。餐廳好寬敞，可能係時間仲早，D人都未收工，餐廳入面都好多空座位，員工安排獨立坐一張4人枱，有位放下袋，坐得舒服唔駛逼，正！餐廳其實分散都有D客人燒肉中，不過完全聞唔到味，抵讚！三味牛肋肉 $149冇想像中好食，三款有香蔥、黑椒蒜蓉、香蒜辣油，我唔太識欣賞辣油款，感覺燒完冇晒肉味，只係食到辣，當然唔係話好辣，但得辣味唔覺有牛味就失色少少，另外兩款係好食D，又香又入味，食完都想再食，細細塊其實唔太夠喉。丹麥雞胸肉 $52，味噌豬頸肉 $49難得機會當然要試下雞同豬，選擇左最普通的豬頸肉同雞胸肉。豬頸肉比較普通，問心真係覺得同平時BBQ個D分別唔太大，唔好太大期望去食就OK，亦可能因為我地選擇左味噌，本身有其他味道選擇，下次會選原味或燒肉味。雞胸肉反而有D驚喜，厚切得黎好有質感，冇醬料反而原汁原味，不過份量又係好少，每人2塊已經分完，係唔夠喉。石鍋香蔥拉麵 $52牛角最出名就係牛角飯，不過今次冇叫，就貪得意叫左個拉麵試下。個拉麵係冇餸，真係蔥+淨麵，抵唔抵食就見人見智，而我就最多叫一次咁。麵好快送到，比D肉仲快上枱，係好香好引人胃口，仲附有要自己動手磨的芝麻，想食幾多就自己搞，我磨左一陣就全部倒入去。食落係好味，湯底夠晒香，而且食得出味精唔算好勁，份量都唔多，每人食少少就清晒。總括黎講，牛角所有食物物量都好少，食物質素唔錯，價錢係一D都唔平民，就算食左拉麵，都好似同冇食野冇分別，食完仲走左去買小食填肚，想平價D食，就要搵時間lunch/tea食，如果只係過燒肉口癮，就真係唔錯選擇。…Read More

一田大減價，收工即刻衝去觀塘間一田掃貨，快速完一輪，銀包大出血後，就要搵下野食醫下肚。APM都食得多，就走左去東廣場，近呢幾年東廣場都多左好多小型餐廳，各有特色。逛左一圈，見到呢間鴻師傅比較大間，食野位置都比較多同寬敞，始終手囉住好多戰利品，就特別留意下。因為估唔到夏天都仲有煲仔飯，太座一聲令下，就呢間。餐牌好多選擇，有選擇困難就麻煩啦！侍應好主動問係咪第一次黎，話可以做推介，見枱枱都有咁問，好少見。煲仔飯有6款，太座點左最基本臘味煲仔飯。$68 唔算貴，最重要係好大煲，太座食左一半就投降，用料充足，油鴨大大件，菜都有好幾條，成個飯面都係臘味，仲要每樣都有好幾件，飯都有臘味香。唯一不足係，冇左炭香，始終同街邊餐廳有分別，對我黎講飯焦都唔夠，但太座話好滿足。我自己就叫左健康之選——蟲草花蒸雞配飯$58+例湯+$10凍OT外觀望落吸引，食落D雞好滑，肉都多，有雞味，夠食晒成碗飯。太座覺得味道鹹左D，唔夠健康，但我覺得送飯黎講係適中，呢個蒸雞絕對可以再食，一個大男人食都夠飽。例湯飲左3份1就停，飲落覺得都有味精，又係偏濃味，試左就算。杏汁蓮子燉白肺  $58太座另外叫的補湯，用料充足，好香好味，杏汁唔算太搶，我唔太LIKE杏汁都飲左幾啖，覺得可以接受，不過價錢就偏貴左少少，見都冇咩人額外叫湯。…Read More

估唔到星期日都有下午茶，又唔駛等位，即刻試下。望到餐牌，都係$5、60，價錢比起lunch & dinner差好遠，真係好抵。必食的有豬肋骨，$66，有飲品，仲有薯條，，真係好抵食。雖然豬肋骨望落細細舊，但都有7條骨，肉質都鬆化，薯條份量都好多，美中不足係薯條唔夠脆口，有少少失色左。另外叫左個蕃茄肉醬意粉，外觀唔多吸引，不過有蕃茄，so好入味好開胃，肉粒都唔少，仲有少少芝士，上枱時覺得份量好少，食食下其實都夠飽，見到好多枱都叫呢個意粉，但個人觀感太普通，下次可以試其他特色d。下午茶冇免費黑糖包食，要加$10，食outback真係唔可以唔食佢，所以都加左，熱熱地鬆軟好味，朋友唔太好麵包，我個人食左3份2。下午茶基本包1杯飲品，朋友加左$15轉飲特飲，亦見好多人加錢轉啤酒，下次可以再試下。食物質素係值得一讚，但服務質素就有待改善，一坐低，侍應囉2杯水，超大力放係枱面，搞到濕晒。另外送餐太急，放低時差d連個包都跌出黎，但明明當時冇咩客人，完全唔明急d咩。…Read More

5點幾近6點先肚餓，下午茶冇咩選擇，見呢間未試過仲有TEA，就決定食越式野。地方都幾大，呢D時間反而冇咩人，侍應提醒要快D落單，就CUT下午茶，所以望兩望，好快就決定左2個餐︰香茅雞鎚湯檬 及香茅豬扒、春卷加細撈檬，再加小食粉包。飲品先到，巨鋒梳打超多冰，味道偏淡，不過唔駛加錢轉都算ok la。粉包熱口，同老婆一人一個都讚，餡料都好豐富。香茅雞鎚同香茅豬扒都炸得唔錯，唔算多粉仲脆脆地，食落都係即整咁，湯檬份量都好多，老婆食唔曬，不過撈檬就差d，太細碗，幾啖就食完，一d都唔夠飽，食埋老婆碗湯檬先好少少，呢個餐就唔太抵食。…Read More