EasonEasonLee's Profile

因為有傳單有coupon所以2個人去食，2個人食lunch可以一齊減$30！原先最平嘅course係每位$69加一，可以揀牛/雞/豚，肉類份量係一碟，而配料區的所有野菜、丸類、麵/飯等等就任食，仲可以任飲汽水/coffee，任食雪糕。本身食量唔算大，都係食$69 Course好啲。原本以為勁多人，點知真係唔多，午市只有半滿。一入座就即揀course同湯底，有6款選，因為一人一鍋，唔駛同friend share。我選了壽喜燒鍋，味道都唔錯，幾有日式風味，而雖然個course咁平，牛肉份量唔算少，質素唔差唔會係食肥膏咁。至於出面野菜區食物質素唔錯，refill得都幾快，如果有多少少丸揀就好了，我呢啲勁鍾意食菇，所以食左好多金菇、秀珍菇、冬菇、雞腿菇，同埋估唔到有soba，口感煙煙unun，勁正！粟米就通常度度都有，都幾鮮甜。其實如果keep就大約$60位真係超抵！可以再回頭食！…Read More

上openrice到搵大埔有咩餐廳推介，發現呢間放題都幾多好評，打去問過價錢，價位都ok，再問埋有冇位，之後就book左位嚟食啦。因為有book到，所以好快就入得啦。發覺佢哋食物種類好多，真係花多眼亂。刺身果度我就淺嘗啦，因為本身魚生就唔太好，見朋友叫咗拖羅、三文魚呢啲佢地都話正，而我就覺得佢地有橙色果隻赤貝超正！赤貝喺出面好難買嚟食，比較少見，有都好貴，所以依度有任食真係抵到一個點！同埋壽司真係幾有特色唔係得啲HEA款，而且款款都吸引，抵食！炸物同天婦羅都冇得輸呀，好似芝麻雞翼原先每人order一隻但都真係唔夠皮，又香又脆，最怕出面食天婦羅同炸野有油益味，呢度即叫即炸，上檯仲熱辣辣。爐端燒相當有特色，好似原隻嘅燒墨魚、串燒牛舌、燒軟骨等等，勁有風味。而且大家一定要試下河豚魚乾，好似食魷魚乾咁，因為出面放題真係極少有，而且烤過後更加香口，仲有得任飲日本啤，就好似去左日本居酒屋咁。雖然得2小時好似唔係好夠，佢地又有咁多款式真係好難試勻，咁有個藉口，下次再嚟食啦，哈哈～…Read More

都有一排冇食呢間餐廳，但都係一貫多人，加上因為係mothers day，所以相信仲人多左。最後等左約50min，睇睇餐牌，有驚喜，多左一兩樣新野，例如果隻鐵板大蝦真係之前未見過。所以都叫左嚟食，但係係勁！失！望！因為隻蝦一啲都唔大，大約係無名指咁長啦，真係勁唔抵！反而果啲鐵板蜆，香腸，pizza都有保證，難食有限！不過今次，竟然望到牆上面有兩隻小強，好恐怖，雖然係喺隔離檯，但諗諗下如果食食下跌左落嚟都幾得人驚，衛生情況真係有待改善。…Read More

將軍澳好多食肆都係連鎖店，終於有日式小店嚟啦，朋友話早前見到呢度開間放題，就book左嚟試試，佢話落咗9點，諗住8點半去搏吓有冇位早入早食，點知，嘩，人~全部都係人~全部都係人~最後都等到9點3先有位。一入到嚟即刻送左杯藍色嘢飲嚟，係送嘅，甜甜哋果汁咁，唔識講。只限一杯。店員提我哋話可以先交左刺身啲紙先，以免唔夠位。刺身超多款揀，三文魚正，仲有拖羅，赤貝，牡丹蝦，松葉蟹，青口等等。不過首先送嚟咗2隻鮑魚，原來係送㗎。當然唔係好大隻但送嘅都冇咩要求啦。我覺得拖羅正，仲好過三文魚，蝦我食完會敏感，所以冇食，朋友就話好大隻超好味，唔知啦，不過青口同花螺就......壽司都值得攻，海膽三文魚子正正，海膽唔腥又滑，一排壽司排得超靚，算唔錯。一口手卷細細件，幾有特色。花之戀壽司都好抵食。天婦羅都值得推介，蟹棒天婦羅同蝦天婦羅啖啖肉。ps呢間舖個位都好入，唔易搵，沿平台行到最入就係啦。以將軍澳呢個美食沙漠終於有間食得落嘅放題啦，而且都幾多人等位! …Read More

第一次寫呢間食評，都食過第3,4次，唔揀食開嘅豪華海景井，見到有生薑豚肉井寫住個new字，咪試下。點知係大伏。豚肉淡而無味，而且鞋口又唔滑，汁醬又唔多。唔推介大家揀呢個。今次排隊唔算耐，不過原來有入座有限時，夠鐘有人會提你走，另外味噌湯好好飲，但refill速度唔夠快。…Read More

因為早食飯呢，所以仲有quota食埋個糖水，見到餐牌有勁多選擇，對於有選擇困難症嘅我嚟講真係幾難選。叫咗雪曲哈囉，雪糕話有得揀味，餐牌又冇寫有咩揀，店員又唔講，咁真係鬼知咩，最後求其揀左曲奇味。落完單唔駛90秒已經嚟到(新光速餐?)駛唔駛咁快呀。不過好細兜，幾啖食完，啲細細粒嘅奇亞籽口感唔錯幾正。但幾啖嘢收35蚊? 唔抵囉，超唔抵。同附近嘅金滿堂比，後者好好多啦～…Read More

東廣場地下有好多餐廳小店，見呢間新開冇耐，見到門口寫住有下午茶餐就俾佢吸引住，2隻鹽水雞翼，2種配菜同小份冷麵，都係30蚊，所以就想試下。配菜都有好多選擇，我最鐘意食菇，另外雞腎都好食，自行剔辣度，落完單係即刻整的，整起上嚟都算大兜，但始終男人胃口唔夠飽，可加$5轉大麵。今次揀左小辣試試，但就真係幾辣，但超級惹味。下午茶係由3pm開始，如果唔係下午茶，見佢地價錢都幾貴。…Read More

嘩，大熱天時，呢間舖都咁多人排隊，因為今日好想食車仔麵，所以熱都排呢間，行開就見得多，食就第一次食。佢哋食物放晒出嚟，真係花多眼亂到一個點，先揀粉麵，除咗粗/幼/河/米呢啲大路嘢，好少見車仔麵有薯粉，所以叫呢個。餸就揀左鳳爪，螺肉，豬油渣。作為一個健康寶寶油渣呢啲嘢有機會梗係叫，佢同隔離專賣油渣麵果間周記啲油渣唔同整法，文記呢啲大舊啲，切開小件再油炸，口感是爽一些，咬落有油花，口感不同，好獨特。佢哋湯底幾好飲，唔會咸到痴線。但咁多人排隊又真係誇張咗少少。…Read More

lunch諗唔到食乜，見報紙介紹西西里脆雞新口味，所以就去試吓。先介紹呢個1人餐，包2件雞(1雞下脾+1雞胸)，1個磨菇飯，1件葡撻，1杯汽水。今次啲雞好香脆新鮮，炸出嚟係勁辣手，第一次食kfc食到咁熱嘅雞。佢話係西西里風味，即係雞皮多咗羅勒香去炸，都算可口，其實個重點係個蕃茄醬，但真係好hea，就咁俾一包你，正路都應該搵個碗仔裝起喇。隻醬都算辣辣地，總結而言，呢隻新口味麻麻哋，只有6分。同原味雞比會揀返原味雞。另外要批評呢間kfc排隊花時間勁長，足足等左15分鐘，餐廳環境都好差，位置好窄，員工想抹台都唔得，有人食野唔小心掃左落地下又掃唔到，搞到好污糟咁。…Read More

買咗飛夜晚睇寒戰，襯早啲搵嘢食先，行過見到呢間漁屋，原來係食放題嘅，朋友見話有松葉蟹想食，都真係少見嘅，不過walkin唔知有冇位，原來有人取消咗booking，咁啱有位俾我哋，lucky。一入座已有蟹剪同蟹醋ready咗，一定要叫蟹喇。刺身都幾多選擇，除咗啲大路嘢，仲有玻璃蝦，赤貝，花螺，帶子呢啲罕見嘢，啲蟹唔差嘅，肉唔算多同厚，但限時真係好難食蟹，食得蟹嚟又食唔切其他嘢，所以係試咗一round，花螺就細細粒，一般喇，寧願食螺肉。大推玻璃蝦，正過蟹，肉質爽，鮮甜唔腥，食咗起碼廿隻，大件夾抵食，赤貝超爽甜，10個正。壽司都正，有火焰壽司，整得出嚟都靚仔唔係hea，燒和牛壽司，牛肉都有少少入口即溶，唔係話常見。料理推介金菇牛肉卷，肥牛唔會死得個肥字，金菇唔痴牙。燒物炸物種類好多，但試唔晒囉，好似芝士焗蠔，鐵板九菜，羊架，炒蜆都唔錯。 飲品方面都係無限任飲，汽水就skip喇，估唔到有asashi啤酒，啱晒我個酒鬼fd。我，就飲烏龍茶喇。落單後上枱好快手，員工冇西面，值得支持呀喂。喺正商場入面，都算方便，不過我又唔係成日去荃灣。…Read More

嚟到太子，本來目標係下面果層嘅京華，但真係好多人等位(其實“好彩”都多人等)，之不過攞咗張飛之後竟然好快入得，所以轉飲呢間。好彩酒家都叫有好多分店，但呢間食物質素都唔係太高，餐廳入面面積都幾大，有好多張枱，但枱與枱之間好貼，待應上菜時都好難行入嚟，所以感覺一般。叫咗雪菜火鴨絲窩米，都幾有驚喜! 火鴨絲都有足料，好多鴨肉都連住層皮，我就最鐘意食層皮㗎啦，而且層皮都燒得香口，帶少少肥但又唔會太膩，可以一試。份量方面都分到6-8碗左右，$88，份量足。另外叫咗份燒肉例牌，第一口就幾好食，燒肉皮勁鬆化，肉質都淋，但再食落去就有啲瘦，少少un，有10零件左右，唔算多。點心方面叫左燒賣皇，叉燒腸，馬拉糕，叉燒包，金錢肚，較為欣賞嘅係燒賣同金錢肚，金錢肚個沙嗲汁都叫入味，唔算un。燒賣都幾大粒，但蝦就唔大隻，豬肉都唔算好肥嘅。但最怕就係點心唔夠熱，啲點心出到嚟都好快凍。 到最後埋單等咗成10幾分鐘，得1個人負責埋單，仲要每次一大疊單埋幾張枱，希望可以改善吓。(另外呢間酒樓唔收AE)…Read More