Bigmouth Kin's Profile

Fusion菜大家都食得多, 但冇諗過每一味睇落似中菜,食落去又另外一回事🤪醉蝦大家食得多, 刺身級生嘅醉蝦大家又食過未呢？最勁係個蝦頭內臟已經清曬, 但又保留完整蝦頭殼, 五加皮浸製嘅刺身蝦鮮味提升, 一啖食落去冇蝦頭內臟, 感覺清新瀟灑！煎堆內餡唔係蓮蓉, 而係黑松露, 配上康提芝士同蛋黃醬, 好高級嘅感覺！傳統黃金蝦, 鹹蛋黃同炸漿覆蓋隻蝦炸完之後油淋淋, 原來簡單咁將鹹蛋黃醬加黑松露放喺炸蝦上面, 成個感覺冇咁油膩, 味道更加有層次感！睇落最唔似中菜嘅鵪鶉蛋, 畀彩色脆米包住, 完全認唔到, 上面嘅吞拿魚、青瓜片、海膽、三文魚子同黑魚子, 構成好複雜嘅味道！唔講畀你聽嗰隻係煙燻乳鴿, 食落去你以為係超級多汁嘅鴨胸！用 dry-age 處理過嘅馬友, 肉質保持嫩滑, 但係佢哋唔知用咩方法, 煎出嚟嘅魚皮, 出奇地鬆脆, 而且擺成個鐘都可以保持好脆！仲有 dry-age 三皇雞都係好好食, 雞肉嫩滑, 外皮焗得好脆, 最神奇係下面嘅新潟日本米吸收咗啲雞油之後, 變成好似糯米飯！不過個擺盤就唔係個個接受得到🤪睇落明明係和牛扒配焗蒜頭, 但係舊和牛咬落去係叉燒嘅味道同質地, 究竟我食緊牛定係豬呀🤪甜品有 Crèam Brulee , 但明明個賣相係西多, 咬落去又真係法式燉蛋, 好亂呀🤪最精彩係金色嘅透明波波, 竟然係薑汁湯圓, 超薄嘅水晶皮包住薑汁糖水, 好特別！餐廳氣氛一流, 前衛風格配合強勁音樂, 好適合一大班朋友歡聚！而且多啲人一齊食冇咁貴。侍應每一度餸都會詳細介紹食材同整法, 整個用餐感覺良好！如果冇佢哋嘅講解, 真係估佢唔到！…Read More

要搵達摩祈福, 唔使飛到日本咁遠, 旺角都有！一出𨋢, 成埲牆都係達摩祈福牌, 喺窗邊仲有一大隻達摩畀你喺度祈福！講返正題, 達摩堂話曬都係一間餐廳, 除咗祈福, 食物都好重要！一場嚟到, 當然要挑戰下佢哋嘅達摩岩鹽燒寶盒！個名咁有氣勢, 其實即係盲盒挑戰, 唔知畀啲乜嘢你食！個盒打開嗰陣時有張紙封住, 店員要用火燒咗張紙, 先至知道有啲乜嘢喺裏面！好有儀式感！寶盒裏面總共有八塊肉, 照睇就應該有兩塊五花腩豬肉卷, 兩塊牛脷, 兩塊好似係牛橫隔膜, 同埋兩塊好似係牛柳！點解我話「應該」、「好似」呢？因為我問侍應佢都唔知係乜😱 雖然係盲盒挑戰啫, 擺返塊牌仔喺啲肉嘅隔離, 等啲顧客知道自己食咗啲乜都好呀🤔用塊岩鹽嚟燒, 真係要有啲技術！侍應已經再三提醒, 要不斷反轉塊肉, 如果唔係就會吸收太多鹽, 會好鬼鹹！所以成餐飯都好忙🤣牛脷、牛柳都好腍, 用鹽燒嘅方法唔會燶, 所以香氣會少啲, 但就可以保存肉汁；至於五花腩豬肉卷, 雖然保存到啲肉汁, 但有少少韌！呢個價錢, 咁大陣象, 都對得住啲顧客！午餐時候仲冇加一！不過啲服務真係可以再好啲, 例如主動畀隻碟仔我, 等我可以裝住燒完嘅肉塊；又可以畀多對筷子我, 等我夾生肉同熟嘅肉唔使用同一對筷子；同埋主動同我哋添加返啲綠茶會好啲（因為鹽燒真係有啲鹹）！同枱都有叫「和牛挽肉丼」, 舊免治和牛燒到燶燶哋, 上面有隻蛋黃, 賣相好靚（唔記得影相😭）, 但有少少乾, 同埋調味比較普通, 唔係好突出到舊和牛嘅香味, 又或者唔係太多肥膏, 所以冇乜肉汁！總括嚟講都係一個特別嘅體驗, 同埋門口裝修真係好靚！…Read More

剛剛去完日本, 仲未夠喉, 返到嚟即刻搵返間壽喜燒填補空虛！用 OpenRice book 枱好鬼方便！（唔係告白嚟㗎）十侍 雖然喺旺角豉油街, 但個入口就喺後巷, 一出𨋢門, 見到一個紅色盔甲日本將軍守門口, 氣勢磅礡！同樓下入口形成強烈對比！佢哋餐牌嘅套餐, 主要係兩個人或者四個人嘅份量, 我哋三個人, 唔需要我哋叫四人餐, 只要叫個二人餐追加牛肉都可以😍棉花糖壽喜燒已經唔係啲咩新鮮事, 但做得好, 先至可以脫穎而出！呢度啲師傅手勢純熟, 所有牛肉都幫你燒曬, 全程唔使自己旭手👍👍👍牛肉雪花紋理好鬼靚, 每塊都係用膠紙獨立包裝, 唔會黐埋一嚿, 仲好細心咁有一張明信片放喺牛肉上面, 介紹牛肉嘅來源產地👍明確知道自己食緊乜。A5鹿兒島黑毛和牛, 入口即溶, 有豐富牛肉味, 但唔係好肥膩, 師傅仲好細心問你想食幾熟, 每個人都可以有自己嘅選擇😍配菜都好豐富； 有油豆腐可以索曬啲味； 豆腐輕輕煎過, 煮完之後都可以保持形狀； 仲有四條高質蟹柳, 煮完之後都仲好靚仔！如果可以再多啲蔬菜就好啦。澱粉質可以揀飯或者烏冬, 用飯嚟送和牛一流, 烏冬可以放入個鍋裏面索返啲味😋最後仲有杯雪糕, 雖然我哋只係叫咗二人餐, 師傅好慷慨咁送多咗一個雪糕畀我哋😍咁好服務價錢都好合理（同喺日本食差唔多）, 主要係因為樓上舖； 所以喺旺角要食好嘢, 識食一定要揀樓上舖！後記：隔離枱父母無好好看管佢嘅細佬, 俾個細佬喺地下枱底捐嚟捐去, 好鬼危險, 帥父好細心提點, 而且煮嘢時候好小心, 咁嘅服務態度, 香港越嚟越少！…Read More

香港大部分食到嘅醬油拉麵, 都好鬼似自己屋企煮公仔麵！所以冇乜人識欣賞！新開嘅麵屋New Old可能會改變你嘅想法！傳統日本木系裝修, 感覺好「日本」, 仲有真正日本師傅坐鎮！拉麵底係爽口而且好彈牙, 好有實在嘅感覺, 當然同公仔麵或者出前一丁冇得畀啦！醬油雞湯底鹹味十足（醬油湯底梗係鹹㗎啦, 唔鹹都唔叫做醬油湯底啦）, 清雞湯冇咁滯, 夏天食一流！煙燻叉燒絕對係一絕, 可惜得兩片有啲唔夠喉😜碗拉麵係唔包溏心蛋, 不過就咁叫一隻都係18蚊, 蛋白嘅味道比較淡, 不過蛋黃濃鬱！服務好好, 店員會詢問你係咪第一次嚟食, 並且有簡單介紹！張濕紙巾真係靚到一個點！最犀利係佢冇加一服務費嘅！如果想尋回日本醬油拉麵, 呢度絕對一個好地方！…Read More

McGriddle 初初出嗰陣時, 全城搶購, 但好多人食過都話麻麻地, 梗係啦, 始終連鎖快餐店預先整好, 芝士溶曬, 班戟包皮又淋曬, 點會好食呀！其實香港好多cafe都有類似嘅菜式, 新鮮整出嚟, 用料又靚啲, 完全兩回事！「大和堂」嘅「豬柳強」絕對係熱香餅豬柳蛋漢堡嘅天花板！首先啲pancake雖然冇楓糖粒, 但新鮮整出嚟嘅pancake軟熟又好味, pancake索咗附送嘅楓糖漿, 正呀！最重要塊芝士完好無缺, 小小溶咗喺豬柳嘅中間, 邪惡得嚟非常好味！流心煎蛋當然好過一嚿熟曬嘅煎蛋啦, 啲蛋漿流咗落去pancake同啲豬柳到, 冇得彈啦！鹹甜加埋嘅味道啱啱好！價錢當然係貴過麥當勞好多啦, 但其實有兩層豬柳同兩層pancake, 等於食咗一個豬柳漢堡加一個豬柳蛋漢堡啦！去大和堂點會少得咖啡, 我叫咗杯自家製黑糖鮮奶咖啡, 黑糖味唔係太濃, 咖啡body豐富！呢個先至係真正嘅熱香餅豬柳蛋漢堡！…Read More

之前都食過岩鹽啲套餐, 質素中上！見咁耐都未食過佢啲釜飯, 即管試下！我叫呢個係北海道海鮮釜飯, 個餐跟個沙漏, 要等個沙漏漏曬先至開蓋, 好有儀式感！賣相其實唔錯, 跟餐有沙律、三舊魚生、麵豉湯同一啲漬物！仲附送甜豉油用嚟撈飯！有一杯免費果汁。啲海鮮焗完之後變咗半熟, 但因為本身冇落調味料, 所以成個飯其實冇乜味, 但啲鮮味焗完之後又流失咗, 其實都唔知自己食緊乜, 尤其是海膽, 冇曬原有嘅質感同味道, 最失敗係嗰隻蟹腳, 又乾又柴（唔記得影添）🤮 我覺得佢應該將啲海鮮分開上, 咁就唔會嘥咗啲新鮮海產！雖然佢啲飯有啲驚喜, 有蛋絲、白飯魚同栗子, 但加咗佢哋隨餐附送嘅甜豉油, 啲味變得更加古怪, 只有嗰嚿鰻魚係同啲甜豉油夾。後來我加返正常點壽司嘅豉油落去啲飯度, 味道即刻提升曬！我仲試咗兩啖雜錦角切魚生丼定食, 啲飯完全冇醋味, 而且有啲硬, 完全失水準！侍應服務有水準, 不過一入去就講用餐時間只有90分鐘, 每樣食物食完就收曬啲碟, 好似好趕咁樣, 其實出面都冇乜人等！其實唔明一間開咗咁耐嘅連鎖店, 味道調教咁失手, 質素又唔穩定, 又成日趕人走咁, 你叫我哋點樣唔返大陸😅…Read More

通常啲人嚟「胡同」, 都係食佢哋個 Tasting Menu, 今次挑戰下佢哋嘅 A La Cart 菜單, 睇下係咪一樣咁有水準。個無敵維港景唔使多講, 全港數一數二！好鬼鍾意佢哋個 Wine List, 封面係紅雙喜火柴, 好有懷舊感覺！（暴露年齡系列🧓）「聖旨到」冷盤, 蟶子好粗壯, 啲蒜蓉味啱啱好, 冇蓋過蟶子嘅鮮味！👍🏼「花椒金湯桂花魚」價錢都幾貴, 調味非常之好, 辣味溫和, 花椒麻口嘅感覺啱啱好, 只係略嫌佢啲魚唔係好夠滑, 但鮮味十足！個「鹹肉津白」擺盤真係一流, 成朵蓮花咁樣, 你影完相之後, 侍應先至會切開佢畀你食, 可能因為要做到咁嘅外形, 個菜頭比較硬, 醬汁亦都係比較稀, 唔會好似平時啲奶油津白咁醬壞壞！我反而鍾意咁樣嘅口感！薑米蟹玉蘆筍蛋白炒飯啲飯炒得幾好, 絕對唔油膩, 其實唔係好食到啲薑味, 但蟹肉同蘆筍處理得非常好, 味道令人回味！原來呢度啲甜品都有返咁上下！以為佢嘅酸梅雪葩好鬼酸, 但點知好好食！啲梅味好自然, 配埋啲生果, 感覺輕盈！荔枝雪葩正常發揮；白桃烏龍桂花mousse配烏龍茶雪糕味道都唔錯, 只係略嫌佢哋嘅烏龍茶雪糕茶味唔係太濃；反而個楊枝甘露千層酥有驚喜, 千層酥好脆, 楊枝甘露餡料令到成件事冇咁漏, 擺盤又好靚, 而且冇喺第二度見過！維港夜景無敵, 雖然音樂好大聲, 但氣氛一流； 服務亦都非常體貼, 最好預先訂位留到窗邊位置, 咁成件事就會開心好多！…Read More

唔係次次食午飯都想有人陪, 有時真係想自己靜靜地一個, 食自己鍾意食嘅嘢, 又唔使顧人哋感受！O:WOW 有一條好長嘅吧檯, 對住廚師, 最啱我呢啲國際給孤獨嘅午飯人士！今次叫咗個蜜糖豬手配白飯, 啲德國豬手焗得幾好, 唔會乾曬, 不過嚴佢啲皮唔夠脆, 啲酸菜又唔係好夠酸, 但係個蜜糖汁甜甜地, 出奇地同啲豬手好夾！聽講話呢度啲意粉先至好食, 下次試下先！服務都算唔錯, 上菜都好快, 我見隔離左右啲人坐喺度睇電話都冇趕佢哋走, 今時今日算係咁啦！…Read More

北上搵食成為大趨勢, 真係影響到香港好多食肆！平時要喺大公館假期前book到位食飯都幾難, 但今晚去到大公館見到只有四五枱客, 個心有啲酸！我哋真係自己book枱, 自費食評！今晚叫咗尊貴套餐, 其實每位都只係788蚊, 唔算好貴！頭盤有黑毛豬叉燒、黑魚子花雕醉南非鮑魚加麻香涼拌萵筍。叉燒好冧好好食； 個鮑魚真係不得了, 彈牙得嚟又好冧, 花雕味剛剛好😋；萵筍有淡淡嘅嘅麻辣味, 醒胃！魚汁白玉金勾花膠湯湯底好甜, 花膠真材實料！法國藍腳菇炒蘇格蘭蟶子皇啲菇炒得好香, 豉汁味亦都調教得啱啱好, 可惜只得一條聖子, 有啲意猶未盡！芙蓉豆酥蒸銀鱈魚球舊銀鱈魚好滑, 下面嘅芙蓉蛋白蒸得好Q彈😍鳳梨脆皮京都骨造型好可愛, 特製醬汁紅色好搶眼, 裏面舊豬扒其實係冇骨嘅而且好鬆化👍🏼, 下面嘅菠蘿用火燒過, 甜味大增！豆漿杞子黑腐竹浸時菜同埋金瑤櫻花蝦蛋白炒飯同樣高質素！見隔離嗰枱個啫啫雞煲好香, 我哋都忍唔住叫咗個🤪味道正常, 啲雞係雞柳, 唔係新鮮雞, 不過真係好香！甜品有造型可愛嘅南瓜金球, 唔係好甜, 煎堆皮亦都做得好靚！仲有童年回憶「菲林桶」金箔懷舊芝麻卷, 可惜啲芝麻味唔係好重！整體嚟講, 成個套餐質素都好高, 價錢亦都好合理； 服務非常之好（唔知嗰日係咪太少人）；裝修亦都好有中國特色而且座位寬闊, 地點亦都喺地鐵站隔離, 咁小食客真係有啲可惜！希望大家都一齊支持下有心嘅香港餐廳, 等佢哋可以繼續為大家提供美食！💪🏼💪🏼💪🏼…Read More

孤陋寡聞, 真係唔知道鹿兒島都有出名嘅雞白湯拉麵。月詠嘅雞白湯唔係傑撻撻嗰隻雞白湯, 有啲似豆漿嘅感覺, 飲落口有些小鹹, 但整體都係滑漏！我叫咗碗檸檬牛油雞白湯拉麵, 檸檬中和咗牛油嘅油膩, 牛油令到個湯底更加滑漏。佢哋用嘅係蕎麥麵, 畀傳統拉麵爽口, 加埋檸檬味令到成碗麵有清新嘅感覺。溏心蛋正常發揮, 雞胸肉嫩滑冇黐牙。廣島黑酢拌炸雞肉汁豐富, 炸粉都幾厚, 略嫌味道單薄左少少！反而個豆腐野菜煎餅略有驚喜, 質地好滑, 配埋青瓜絲一齊食, 口感好特別！用qr code落單, 其實都冇乜服務可言, 但裝修非常日式, 座位亦都坐得舒服, 咁嘅價錢, 其實都真係唔錯, 不過嗰啲鍾意濃厚雞白湯嘅人就未必鍾意啦！…Read More

一向都覺得 Interval Farmacy 啲菜好新鮮, 因為啲菜喺餐廳裏面溫室種嘅, 都知道成本會貴啲！今次見到佢哋有個墨魚汁海鮮pizza, 立刻試下啦。個pizza餅底都係佢哋一向好出名嘅酸種餅底, 烤到燶燶地好正, 再加上今次有墨魚汁, 黑上加黑⚫⚫, 都幾特別, 我諗住二百幾蚊個pizza, 加埋佢一響出名啲嘢新鮮, 諗住啲蝦應該係新鮮蝦啩, 點知都係雪藏蝦, 有少少失望😥。啲小八爪魚好爽, 亦都有好多隻, 彌補返少少失望。個餅底有少少辣, 都幾惹味同好襯啲海鮮👍整體嚟講係好好食, 而且個pizza都好大🍕, 兩個人食都應該得！我用咗35蚊加咗杯冷泡烏龍茶檸檬水, 都幾好飲, 可惜好細杯, 杯裏面仲有好多冰, 我覺得加廿蚊就差唔多！始終Interval 出品一定好食, 但今次食個lunch要三百蚊我就覺得有啲貴, 下次都係叫返普通意粉或者pizza算數！…Read More

雖然店名叫做 「平和拉麵」， 但佢哋嘅拉麵絕對 不平淡！佢哋只賣三款拉麵， 好多人覺得佢哋冇乜選擇， 但其實專心做好三款拉麵， 一定好過週身刀冇張利！ 而且價錢都唔貴！今次我選擇「平和黑蒜油味噌拉麵 」， 見佢哋啲叉燒好似好薄 ，我追加咗一塊叉燒。 湯底非常 濃郁， 蒜油味好香， 碗麵最重要嘅靈魂係嗰一湯匙辣味味噌， 小小辣但就令到整個湯底增加一點刺激感， 更有層次。 麵質彈牙有咬口， 只係略嫌麵比較細， 有少少唔夠喉（ 當然好食先至會咁講啦）佢哋啲筍係炒過嘅，所以好香。 溏心蛋雖然唔係 醬油醃過嗰啲， 但佢哋住得啱啱好！店員服務唔錯， 聽到我跌咗對筷子即刻攞過對新嘅畀我！佢哋嘅雞湯底都非常出色，下次一定要試埋！…Read More

因為店長經常去拯救世界, 不定時休息, 所以有緣先食到！今日我有緣😜主打台式地道小食, 冇花巧裝修, 但滲出一點點台灣味道！🇹🇼咁難得, 當然去到盡, 叫佢哋嘅月見海路阿仔滷肉飯！有酸芽菜做前菜, 零舍開胃； 生蛋黃喺正中間, 賣相一流！啲蠔仔粒粒都大到嚇死人, 完全冇沙； 嗰三隻蝦新鮮彈牙； 滷肉味道啱啱好, 唔會太鹹； 當蛋黃、滷肉、阿仔同啲飯混合起嚟, 誇張啲都要講句,真係好食到飛起🛫同時叫咗佢哋都幾出名嘅鹽酥雞, 調味剛剛好, 唔會好似街邊嗰啲鹹到死； 雞肉炸完都好嫩滑多汁,脆皮好薄兼且脆卜卜！「唔小心」叫咗杯冇冰芋泥鮮奶, 賣相一流, 絕對適合打卡； 半杯都係芋泥, 真材實料, 甜味適中, 飽死我都飲埋佢😜雖然有緣先至食到, 望落價錢好似貴咗少少, 但真材實料, 而且味道真係非常之好, 就算要排隊我都覺得值得！咁啱坐咗喺老細隔離, 偷聽到有人撩佢做宣傳佢都唔肯, 真係有性格😜…Read More

冇諗過可以喺尖沙咀露營😜未入門口先興奮！成間餐廳嘅佈置都係以露營為主題, 餐檯、座椅、餐具通通都係露營用品, 每張枱都有一盞露營燈, 入座時侍應就會幫你點著佢😱仲犀利過去迪士尼😜食物主打燒烤, 但都有其他熱食, 例如牛肉烏冬...當然係叫佢哋嘅燒烤套餐, 相對嚟講平啲！呢個套餐有兩塊雪花肥牛, 兩塊牛肋肉同四塊肥豬肉, 有啲唔係好辣嘅kimchi做前菜, 有一碗真係有蜆嘅麵豉湯, 有一條珍珠粟米, 一條秋葵, 一塊好薄嘅南瓜, 一塊茄子同一塊雞髀菇； 因為我都估到唔夠飽, 所以加咗50 gram雞肉！雪花肥牛同牛肋肉質素都幾好, 不過就唔係太有牛味； 嗰四塊肥豬肉, 有少少韌； 反而雞肉連住雞皮, 燒起上嚟好香😋唔知點解我條秋葵好老, 燒完之後咬唔到！燒嘢食點可以唔配啤酒, 我叫嗰杯 Crazy Rich IPA 手工啤酒好細杯, 甜酸味比較重, 係好飲嘅, 不過58蚊有啲貴！臨尾用25蚊加咗個黃豆粉雲呢拿雪糕, 裏面仲有兩粒mochi, 好大杯好抵食！整體食物質素中上, 但氣氛真係一流, 玩味十足😍喺正尖沙咀K11 價錢又唔係超貴, 都食得飽, 都係一個唔錯嘅選擇。臨走見到佢哋有戶外用餐區, 冬天喺嗰度食應該一流, 但現在夜晚都成30度, 有啲浪費咗嗰度嘅地方！…Read More

門面格局好似一間潮版日本拉麵店, 亦都唔係好顯眼, 行過咗都唔知！睇餐牌你就會知道, 其實係韓國嘢食, 要叫梗係叫最特色嘅人參雞湯拉麵！附送嘅韓國泡菜唔係好辣, 應該係為咗適應香港人口味, 冇咁重手。雖然個湯係人蔘雞湯, 但係我真係飲唔出有乜嘢人參味, 似鹽味清雞湯多啲； 拉麵系幼麵款式, 都幾爽口； 最精彩係嗰幾塊雞卷, 非常滑溜, 雞味十足！個溏心蛋食得出佢用好多心機整, 醬油滲透去到蛋白！誠意之作, 有啲似清淡版日本白雞湯麵。服務唔錯, 靚仔侍應都幾貼心！如果想食清淡少少嘅湯麵係一個唔錯嘅選擇, 重口味嘅食客就未必覺得好食！…Read More