傻妹為食世家's Profile

平時行過見佢好多人等位，所以一路都無試過，今日路過可能時間尚早，見唔使等位就試下，叫左個午餐B 餃子拉麵加凍檸茶走甜，55分叫，到15分麵到左但一路唔見野飲，20分鐘都沖唔到杯野飲唔知想點，但對面搭台遲過我叫都已經飲緊，追左兩次，我個位望到水吧，見到佢有出凍檸茶但唔係我既，嬲嬲地唔要了，叫佢扣番3蚊埋單走。餃子有四粒但麵份量極少，女仔都覺得有啲唔夠，男仔應該會好似無食過咁，而且炸餃子無分碟上，來到已經淋晒。味道一般正常無特別突出之處，試完呢次已經唔需要再俾機會。我諗成日見到佢咁多人係因為午餐有學生價，見到等位好多都係學生。…Read More

朋友話想係尖沙咀食韓燒, 咁啱之前睇到蘋果日報黃秋生介紹呢間, 好似幾正 ,咁就試下啦!環境都幾闊落, 去到都係7點可能時間尚早, 得幾台, 但全部都講韓文, (8點後已經開始滿坐, 9成都係講韓文)服務生當然識講廣東話, 但都唔太正, 而且見佢地同其他人講野都係講韓文, 應該都係韓國人, 即刻好似去左韓國咁!!3個大人1個小朋友, 叫左個套餐, 有幾款肉+菜, 另外再加多左份牛肋骨, 一份燒餅同黃秋生推介既鰻魚. 全部都有人幫你燒, 唔使驚燒燶, 一來就上左鰻魚先：燒得幾靚跟一碟薑絲同紫蘇葉包住食, 紫蘇葉係有醃過既, 酸酸地幾特別! 鰻魚油份都幾夠, 好食!跟住原本服務員係想燒牛先既, 不過因為小朋友唔食得牛,  所以我地就叫佢燒豬先:豬肉就正正常常普普通通, 無咩特別~跟住就燒牛：牛肋骨都幾好食. 佢係預先醃好左既, 味道唔錯, 肉質夠嫩, 而且燒得剛好~!最後燒餅都有驚喜, 好香但唔油, 好食!!跟餐既菜藍, 都幾多款式~當然一坐低就已經上左好多韓式小菜, 食到中段服務員主動拎左碟泡菜嚟俾我地試, 原來話係今日醃既, 食落又真係唔同嫁喎原來, 菜味濃啲, 食到菜青味, 幾特別! 而且佢啲泡菜全部都係自己醃, 感覺又更正宗~最後叫左唔知3支定4支燒酒, 埋單應該2千頭(因為朋友請客, 唔知實際幾錢, 偷望下張單望到2字頭),呢個價就一定唔係叫做經濟嫁喇, 但野食質素OK, 環境闊落坐得舒服, 服務員又幫你燒埋,而且啲野食份量其實幾多,我地3大1小其實最後係食唔晒, 如果多個大人就剛好, 所以我覺得都唔係叫做貴, 起碼價錢同質素成正比~ 有機會會再帶其他朋友去試~!…Read More

朋友食過話好好食，所以即使地點係我最討厭既銅鑼灣，都決定一試。可惜最後都係失望而回。首先一去到，已經打左個突，門口超大個字寫只招待會員，又係呢啲拎會所牌做生意既古惑野，我估唔到銅鑼灣區都會有，度門仲要鎖住要禁鐘，一禁鐘有人打開門口窗仔睇左你係咩人先開門俾你，唔講以為自已去做賊... 入到去，環境算ok，坐低左叫左支清酒，飲左兩杯準備叫野食，點知個侍應話今日有一個爐壞左，啲野可能會耐少少，問我地趕唔趕時間？唔趕時間先好叫... 我心諗，點解你唔係我地叫酒前講，我酒都叫左如果趕時間係咪可以唔飲唔俾錢轉去食第二間？呢個時候先問真係有點多餘囉...講下啲野食啦，失望位真係好多：1. 燒茄子：超快到左，好明顯係一早整定跟住微波爐叮番熱，熱到出晒煙既... 我真係接受唔到咁拿西既質素2. 燒青樣仔：一樣，好快到左，明顯燒得唔夠3. 燒尢魚筒：個size係平時街市賣廿蚊三條既size，手指公粗少少... 我朋友話上次食成隻碟咁大，可能而家休魚期？如果係咁我寧願你唔好賣啦，當無貨咪得... 咁細條你又無收平啲4. 燒多春魚：呢個係正常既，問題係價錢，$3x一條，如果唔係朋友想食我先唔會叫... 痴線！$3x一條多春魚！唔係一份！咁食左咁多野，都總有啲好食既：1. 燒飯團：特登叫佢燒燶啲，好食，有飯焦2. 燒雞肝：我好鍾意食雞肝，而家出面好少有得食3. 前菜炆牛腩：好好食，我覺得全晚最好食係佢... 好淋，但肉唔鞋，唔係平時食既牛腩既口感，好特別4. 燒牛舌：其實得唔係牛舌愛好者，我自已覺得ok，肉質好爽，但我朋友超鍾意，話好好食最後要講服務，呢個其實係我會俾喊喊既主要原因，樓面有兩位中年女士服務，有笑容亦有禮貌，上菜時自已搵位上，唔係要我服侍番佢，但有位比較年青既女士，佢主要係廚房做野，間中先出黎幫手上菜，無笑容都算，佢個面口黑到，唔知以為掙佢錢，都算，唔笑唔緊要有服務就得啦，但最最最令人唔滿意既係，成台都係碟，佢上菜時拎住碟野係半空中，等！我！地！執！開！俾！佢！放！咁不如我自已去廚房拎埋自已上埋菜自已執埋碟再自已洗埋啦好唔好呀？仲要之後係一句唔該都無呀！另外兩位中年女士，係會自已執位上菜，我地幫手時係識講唔該嫁！西面都算，連基本禮貌都無，大排檔阿叔都識講唔該啦！你咁既價錢，我要求你有啲禮貌都好基本啫下嘛？我希望果位年青女士會睇到，可以檢討下啦！最後埋單，四人3200蚊，咁既服務咁既食物質素，只可以講句：同價錢唔成正比！…Read More

價錢經濟, 款式都叫多, 5個大人2個小朋友, 叫了幾個小菜, 啤酒, 埋單$8XX(啤酒好抵飲, 朝日大啤$50/3支, 藍妹大啤$33/支買2送1)一舨小菜無咩特別所以無影相, 呢個熱石醬烤乳豬比較特別先影左, 叫左半隻試下, 個碟好大, 份量其實一人得兩舊, 睇個樣仲以為會好熱, 原來只係暖暖地, 但皮好脆, 味道都OK, 尚算可以啦~環境都叫闊落, 唔會話要坐到背對背, 都見到有幾多3-4人卡位, 但佢張台太高, 櫈同台高度差太遠坐得唔係幾舒服, 其他整體上OK, 有機會會再食~ …Read More

2人一早訂了台, 又是而家啲餐廳一慣既作風, 小小的2人台, 一邊同隔離台貼住坐好似搭台咁, 另一邊去廁所都要側身先出到果種, 幸好當日唔滿人先坐得無咁辛苦,而且所有侍應都係譚仔阿姐腔 (可能因為係新加坡來既?)小食拼盤：水紫菜, 酸酸地ok, 幾醒胃, 右上滷水嫩豆腐, 甜甜地都ok, 左下水晶豬蹄凍, 好似水晶淆肉咁, 不過就淋好多, 我自己就覺得水晶淆肉好食啲, 右下九轉小腸, 幾好食, 好淋, 無腥味百秒黃花魚：魚幾滑, 一條2個人食剛好, 可以再食其他野極品椒鹽豬手：唔！好！食！個皮唔夠脆, 淨係得個皮有味, 入面係無咪既, 而且完全無肉, 全部都係得啲唔知肥膏定骨膠原冰浸苦瓜：苦瓜就梗係苦嫁喇, 但佢果種苦係澀果種苦, 唔係甘果種苦, 點蜜糖都中和唔到果種苦味....阿元香草雞：肉質同味道都似金華火腿, 不過唔係好咸, 都ok埋單$44x, 減左openrice $100 coupon $34x後就ok啦, (如果450會覺得唔抵食)整體不過不失, 但如果計埋佢個米豬連1星就會覺得失望, 有得揀唔會再去,另外有點可以改善, 佢茶芥只有一種就係菊花茶, 要知道唔係個個人都飲菊花茶, 問佢有無得轉, 佢話要加$$, 唔使加$$得菊花茶.....(留意菊花茶都係有收茶芥)…Read More

一行六人訂了台, 給了靠牆位置, 負責人主動加多左台俾我地方便我地放野, 好細心!(要知道而家已經極少餐廳會咁做, 只會想你有咁迫坐咁迫, 即使佢都係坐唔滿)睇餐牌比一般泰菜多款式, 價錢也太眾化, 大支裝啤酒都只係$30, 平過大排檔,仲有特價雞軟骨串燒$10/3串, 超抵食, 即刻叫左2客送酒, 仲要好好食, 又無限叫幾多(只限堂食), 所以之後再encore多左4客...XD因為有6個人, 所以都叫左好多野食, 生蝦刺身, 柚子蝦沙律, 泰式拼盤,冬陰公,  炒花甲, 燒烏頭, 鐵板蠔仔奄列, 生菜包, 泰式炒飯, 炒通菜(希望無數漏)味道全部都ok, 作為一個由細食泰國菜大既人我可以講句好好味, 重點推介： 燒烏頭 - 好大條, 但肉好滑唔鞋, 平時食開明爐烏頭, 今次食燒又有驚喜, 而且$128又唔貴炒花甲 - 真係用花甲(唔係平時出面果啲沙白就話係花甲=,,=), 好厚肉又新鮮, 個汁又好味鐵板蠔仔奄列 - 唔油, 又食到蛋味, 我覺得好食過潮式蠔餅6個人食飽飽埋單都係$1200, 一人@$200, 抵到喊~ 拎左蛋糕去切又無收切餅費(不過切餅時發覺個蛋糕有啲溶溶地, 唔知係佢個雪櫃唔夠凍定點)如果真係要彈既就係佢得一個負責人負責落單, 其他伙記淨係做傳菜, 所以佢好忙成餐飯漏左幾次單, 要自己mon住有咩漏囉~但服務就好好既, 換碟收野果啲做到足, 咁我覺得ok啦~ 環境又坐得舒服, 唔趕時間咪當慢慢食囉~ 一定會再去!!…Read More

如果你係想食泰國菜而嚟係絕對會失望既, 因為佢係好港式既泰國菜,叫左：酸辣鳳瓜沙律：唔酸唔辣, 仲有啲偏甜 (無影相)小食併盤：有春卷, 魚餅, 蝦餅, 牛同雞串燒. 春卷幾特別, 入面係肉碎, 同平時啲春卷唔同, 幾好食生菜包：唔夠味, 好淡, 但生菜好新鮮 (見佢話係自己農場種)燒豬頸肉：唔講以為自己係緊叉燒...... (無影相)食物質素真係一般般, 啲侍應仲要「幾醒目」, 不過環境OK, 地方大, 坐得幾舒服, 適合三五知已飲下酒傾下計…Read More

店入面既2人台係屬於超級迷你台, 而佢啲野食又部用鬼死咁大隻碟上, (留意, 係隻碟大咋)基本上只夠你一人叫一碟野自己食, 你想叫多幾碟同朋友share係無可能既事,(同一時間最多只能2碟, 而且已經無晒位)  台與台中間嚴重唔夠距離, 都唔好講話講咩都俾左右隔離聽到晒喇, 連侍應攝入兩張台中間service會撞到隔離台上面既野食, (我地就差啲俾佢個pat pat掃跌碟野, 俾佢嚇死)我覺得佢門面同店內裝修都幾好, 而定價都唔係好平, 既然係咁, 點解唔放少兩張台, 俾多啲空間客人? 我寧願俾貴啲坐得舒服啲! (見到咁既門面同價錢實在唔預計自己要好似搭台咁坐囉)講番野食, 叫左 - 松露帶子沙律, 白酒忌廉煮蜆, 燒蝦, 炸魚薯條-松露帶子沙律: 好食, 高水準, 全晚最好食係佢-白酒忌廉煮蜆: 一般, 白酒同忌廉都唔夠多, 而且用沙白蜆肉好削-燒蝦: 第一次嚟唔熟既, 同侍應講仲問我地點唔熟? (唔熟咪唔熟囉 要點唔熟先叫唔熟?) 拎走話再幫我地煮下喎(但啲蝦殼已經剝晒), 我地話好~ 轉頭先再走埋嚟話整過碟俾我地喎, 第二轉熟啦終於~ 但, 味道一般啦, 蝦肉仲有啲霉炸魚薯條: 中上質素, 炸魚粉漿夠薄講真, 呢個價錢, 叫四樣野得兩樣野ok, 仲要我坐得仲迫過茶餐廳, 我就一定唔會再嚟了~…Read More

屋企係附近, 所以都食過幾次, 可能因為位置問題, 每次去都唔會太多人,門面好似好高級, 但其實價錢唔貴 (LUNCH, 未食過DINNER)今次特登帶朋友去食~LUNCH SET 自選壽司8件 有湯有前菜 ($8X), 壽司比較細件, 但料好新鮮, 女仔食剛好, 男仔可能嫌略少,朋友選了三色魚生飯(海贍,三文魚,三文魚子), 都有湯有前菜 ($6X),都讚好新鮮好抵食, 特別係海贍,佢仲讚話好認真地魚生飯都有酸薑, 平時係出面食果D唔會有, 份量比自選壽司多, 男仔食都OK~自己覺得呢個價錢+呢個質素好抵食, 會繼續帶朋友去試~環境又唔錯, 起碼唔使排隊又唔使坐得迫迫夾夾(最憎),仲要讚下佢個TOILET, 每次去都好乾淨,係位置偏少少, 但可能都係咁, 先有咁既價錢~ 都值得行遠少少既~希望有機會試下DINNER去食啦~…Read More

同事見到團購lunch set $148(原價$3xx)，話組團去試下，個set連餐湯、餐包，飲品，其實$148都有點貴，但未試過就柴娃娃去試下，去到，環境ok既，但lunch time時段竟然得一台客(唔怪得知要做團購)，餐湯得一種，磨菇忌廉湯冇得揀，反而餐包就有幾種，服務員算有禮貌，牛扒上台時都有講解要點燒，牛扒有D"鞋"同"UN"，已經唔係燒到好熟(半成至七成)，淨係講塊扒既話，我覺得扒王仲好食....而且覺得舊扒有D細舊，D配菜又少，我女仔食都係覺得剛好，男仔應該唔會夠飽，埋單原來仲要俾加一(應該係同事之前冇睇清楚團購條款)，但加一係原價計(即係$3XX既10%)，最後埋單一人要$18x，有D俾昆既感覺，總括黎講，係得燒個過程有得玩下過下癮呢點吸引，價錢同味道都唔值呢個價錢，係團購價錢都唔值，都唔好講正價，試過一次玩過就算，唔會再幫襯。…Read More

星期六到西貢閒逛，人少少其實真係幾舒服。可能星期六同多外國人關係，三點半去到都仲有BIG BREAKFAST食，三點半都已經係TEA TIME了吧？BRUNCH都講不上了.....BIG BREAKFAST 份量都幾多，味道正正常常，不過不失。值得一讚既係餐包(烘方包)幾好食，仲跟牛油+果JAM，平時通常淨係跟牛油就算煙火腿蕃茄炒蛋三文治配沙律個麵包好好食，夠鬆軟。整體上呢間野係OK，環境亦都唔錯，但價錢有點偏貴，以上兩樣野話係LUNCH SET，$89但唔包餐飲(?)我都唔明唔包餐飲叫咩做SET呢....可能跟沙律同餐包就已經算SET掛....另外叫咖啡要30蚊杯，埋單差不多3百蚊... (因為叫左3杯咖啡)但值得讚既係咖啡跟熱奶(雖然跟果塊COOKIE好難食)。…Read More

原本想去三聖食小菜既，但尋晚開始轉冷，所以改左打邊爐，第一次食呢間，其實係是旦揀，見佢出面有台方便食煙就坐低左，睇一睇個打邊爐餐牌，湯底同火鍋料都幾少選擇，我諗佢都係做海鮮加工為主，邊爐都係睇天氣做埋咁解。原本想食羊腩煲，但個價錢有D嚇人... $238 冇大細煲之分....一來貴，二來兩個人冇細煲都怕食唔晒，最後叫左半隻醉雞煲湯底($168 跟時菜)，鮮牛肉($68)、 鲩鱼腩($68)、豆腐($25)、支竹($25)，就咁睇價錢都唔平，但黎到D野原來份量好大碟，叫多兩個火鍋料4個大男人都夠食了，醉雞湯底幾好，好有藥材同酒味，食完真係暖晒胃，鮮牛同鲩鱼腩都新鮮，而且鲩鱼腩切得夠厚啖啖肉夠抵食(一碟六片)，豆腐、支竹就正常啦(好難唔正常 )加多3支藍妹埋單$432，2個人來講其實少貴，但味道OK而且夠份量，有多D人會再去，如果得兩個人就要諗諗先，因為份量太多到最後都食唔晒，有點浪費。另外服務都幾好，食食下開始落毛雨，老細主動出黎幫外面D客搬台，有禮而且好快手，傳菜落單阿姐都幾有禮貌，整體感覺不錯，至於環境，因為坐出面，唔知室內環境如何，但望落入面都幾光猛同乾淨，另外佢鋪頭冇廁所，要行去附近公廁，雖然近，但公廁都幾污JO，因為附近幾間餐廳都不設廁所，全部都係用果個公廁....…Read More

大排檔一個，但又對住個海。(雖然個海幾污jo，不過夜晚唔覺既) 其實風味勝於一切~對得字個海，都係食海鮮嫁啦~點左椒鹽賴尿蝦同清蒸花蟹。賴尿蝦幾夠肉，幾新鮮。花蟹原隻蒸好鮮味。哎多左個菜，一碗賴粉，一支可樂，2個人咁就3百幾蚊了。以佢D海鮮既新鮮程度黎講，呢個價錢可以接受，會再幫襯~…Read More

閒日去西貢食lunch, 人少少, 優優閒閒,呢間餐廳好match到個mood!一坐底哎2杯hoegaarden先, 仲附送花生一大桶!! 花生仲好好食天!不過係bottle黎既, 唔係draught,因唔係好肚餓, 叫左個Caesar Salad同一個燒雞share,Salad就一般啦~ 個燒雞就唔錯~ 都幾入味, 但肉唔算係好滑,但D配菜薯條就好好食~野食雖然唔係特別好, 但本人就鍾意佢個環境! 夠hea呀!…Read More

加多加多沙律, 係網上推介必食既菜色, 個人認為一般, 未去到"必食"階段牛雞肉串燒各半打, D牛肉好肥呀! 一咬落去成口油....醬燒骨, 好食, 好入味, 全晚最好食既一個餸!娘惹印尼燒雞, 賣相比較...佢D醬汁整到好似X咁(大家明嫁啦).... 但味道係OK既! 肉都幾滑!印尼炒飯, 幾好, 炒得幾乾身幾均勻, 有水準之作炒蕃薯苗(冇影相), 好內冇食過蕃薯苗, 而家好多餐廳都冇賣喇!!總括黎講係OK既! 價錢又唔係好貴, 可以接受!環境就逼夾D, 但D阿姐幾好禮貌, 又夠笑容!有機會會再食, 不過要唔使等位先會囉~ ! …Read More