山區麵包王's Profile

老友知我好食羊，專登搵我食晏，仲要食晏喺食火鍋，真喺估佢唔到喎！地點都近我，就晌士丹利街嘅「新京熹」，主打老北京涮肉火鍋，小弟就唔喺好知點老北京，重點喺話佢啲羊好出色，高檔質素，真喺要一探究竟。走進餐廳，裝潢摩登時尚，非常之雅致，配合埋啲燈光，就算日頭，都蠻有氣氛喎。另外一邊，間咗多個廂房，同樣雅致，但私隱度就更高。而入門口時，見到牆上有唔少獎狀，細心睇，有啲應該喺集團旗下嘅其他餐廳，雖然小弟向來唔喺太信呢啲嘢，但作為一其中一種參考亦無防。正所謂工欲事其善，必先利其器，涮火鍋最緊要喺有好嘅醬料。枱上一早就放咗傳統芝麻醬，而旁邊另有3款醬料：內蒙沙蔥椒麻醬、昆布豉油汁、豉油海鮮汁，都喺用作食唔同肉嘅時候作配搭:)。此外，侍應仲會奉嚟一大盤醬料，包括香芹粒、芫荽、沙蔥醬、蠔油、花生碎、韭菜花、辣椒、腐乳，自由取用，多少無拘。一人一鍋亦喺佢哋嘅賣點之一，用上傳統嘅北京「暖鍋」，夠晒老味道。而湯底有傳統塞北口蘑清湯鍋、有料麻辣鍋、黃蕃茄酸湯鍋，我哋就選咗清湯鍋，泡着小小藥材包，湯頭味道清爽，涮羊喺唔錯選項。錫蒙草飼180天羔羊肉一字長形成幾呎長嘅長盤，排滿一片疊一片羔羊肉片，色澤嬌紅，夠晒氣勢，真喺輸人唔輸陣。侍應教路，灼15秒就夠，果真口感嫩滑到不得了，羊味濃得嚟帶少少羶，沾上啲沙蔥椒麻醬真喺幾特別，有啲麻辣之感，跟羊肉好搭配。鮮切寧夏羊梅花肉既然目標在羊，再嚟嘅喺羊梅花肉，切成一條條，同樣色澤好睇，呢款肉就要灼夠佢30秒喇。跟上述嘅羔羊肉片唔同，羊梅花肉口感比較紮實啲，但不失腍滑，一樣滿滿有羊肉香，羶味不太重。經典大片脆毛肚唔喺講微，片片毛肚片都大過我哋嘅手掌，灼熟之後，一咬真喺爽到嗦嗦聲，口感果真有份脆口感，牛肚本身無乜味，所以，靠沾醬料，小弟沾上自家製混醬，味道更算一級。原產地蔬菜鮮菌店家對食材頗有要求，要新鮮，要靚料，呢份蔬菜拼盤亦如是，唔單止種類多，而且，確喺非常新鮮，味道鮮甜，啱晒平衡一吓食咗咁多肉。老北京糖油餅加多份糖油餅，小分應該喺第一次食，咬落超香脆，裡面卻好軟熟，又一啲都唔油膩，師傅炸功了得，而味道帶甜，頗特別。桂花山藥酪侍應姐組話晌大眾點評寫寫評語，就送甜品，呢啲着數嘢當然唔好錯過啦。所送嘅喺山藥酪，有啲似糊咁，但再稍為稀少許，味道幾清爽，味道微甜，涼涼哋幾清爽，只喺覺得桂花味弱啫。其實，店家嘅火鍋食材仲有好多款，唔喺單單得羊肉，仲有好多牛肉類，睇落亦喺好精選嘅貨色，有機會下次再嚟試試。…Read More

又喺為屋企裝修要出嚟長沙灣睇睇啲傢俬，梗喺順便食埋飯先返歸啦。但裝修事宜真喺好煩，所以，都無太多心思搵咩地方食嘢，一出間傢俬鋪行幾步無耐，見到呢間「德記粉麵茶餐廳」，有啲人氣，都真喺嘥時間再搵，隨遇而安就食呢間。鋪位呈長形，好深，而地方細細，簡樸嘅裝修，格局好街坊，嚟幫襯嘅亦喺街坊多同工友多。啲餐枱本身已經唔大，挨牆一邊仲放咗筷子同多款調味料，都整齊企理嘅。餐牌睇得出有歷史嘅痕跡，表面就以為只賣粉麵，但其實有唔少選擇，仲包括湯粉麵、各式各樣嘅碟頭飯。此外，好鍾意呢啲老鋪，尤其啲手寫價錢單，依家咩都電子化，呢類單已比較少見。牛筋米 $33老婆話近日行得多，補補腳筋，所以，揀咗碗牛筋米，其實都喺講笑，但佢確喺幾鍾意食牛筋。果然平靚正，碗米粉有好多牛筋，最正喺炆得好入味，柔韌得嚟又好有咬口感，好食。牛腩粗 $33食親粉麵，小弟對粗麵就情有獨鍾，呢碗牛腩粗亦都喺有好多牛腩，件件牛腩咬落都好鬆化，甚具肉香，而且，帶點點油脂香，個湯頭濃而不濁，好唔錯。腐乳通菜 $20老婆食乜嘢都講健康，所以，點都要嗌多一碟菜，而腐乳通菜就覺得比郊外油菜有啲個性，尤其個腐乳汁，夠晒香濃，仲一啲都無手緊，俾咗好多，啲通菜仲幾爽口添。熱奶茶 +$7加$7有杯熱飲，無理由唔要杯熱奶茶過吓口癮架，雖然感覺有機會唔及啲茶記，但色澤幾對辦，茶底亦喺香濃，喺柔滑度差少少而已，但小弟都已經好收貨。目測所見，嚟「德記」嘅人都喺匆匆食完就走，猶如大家嘅飯堂一般，加上定價確喺幾相宜，絕對深得人心！…Read More

老婆話約咗朋友食飯，既然是夜無飯開，要食自己，當然「嗱嗱淋」趁機約啲老友出嚟短聚吓，食餐飯，傾吓偈。地點無所謂，茶記就最無負擔架喇，一來平靚正，二來啱我哋啲麻甩佬。踏入餐廳，一室以湖水藍為主調，樓底亦較高，以茶記而言，空間感很好，加上地方企理，夠光猛。話就話香港經濟唔好，但唔喺講笑，接近坐滿，聽到店員跟顧客啲對話，就知街坊多。基本茶記設定，枱面放咗啲調味包，枱側枱桶就放滿餐具，排列整齊。講到食物，茶記勁就勁在乜都有，由鐵板精選，到常餐、蔥油系列、日式蛋包飯、世一金牌炸雞、西式碟頭、秘製馬來咖喱、皇牌焗飯、意國風情、健康蒸選、鮮魚湯泡飯、小食，以及各款飲品。晌門口仲見到有啲二人小菜套餐、二人蒸餸套餐，定價亦好實惠。羅宋湯啲套餐寫明奉送基本熱飲，不過，落單無耐，店員就奉上例湯，真有心，雖然無得揀，喺羅宋湯，但我哋都啱飲，而且，味道夠濃，酸香醒胃，裡面又多料喎，真唔錯。豉汁蒸倉魚 $70老友向來食嘢比較健康，所以，瞄準晌健康蒸選度揀，餐牌都標明蒸魚需時15分鐘，食好嘢當然等吓無所謂。揀豉汁就特別惹味，條倉魚好大條，望落去色澤閃閃爧，食落去真喺蒸得啱啱好，啲肉無黐骨，而且，肉質挺身而嫩滑，又好有魚嘅鮮甜味，當然啲豉汁都好正，撈飯真喺無得輸。梅柚子梳打 +$9老友話想試特別少少，就揀咗呢一杯梳打，有相你睇，真喺落咗好多柚子蜜，所以，佢話入口已好有柚子香，口感清爽，再將粒話梅篤爛去，再入口帶點酸咪咪嘅感覺，多添加一份酸香感，佢更建議食鐵板餐配呢個一流。花膠三黃雞魚湯泡飯 $62肥隔離枱啲鐵板餐咋咋聲，都想試試店家嘅鐵板餐，不過，顧及老友，我都揀咗個幾健康嘅鮮魚湯泡飯。雖然話泡飯，但上菜時喺湯飯分開上，所以，小弟倒大半碗飯落湯，小半碗就撈豉汁食。講番個泡飯，啲雞真喺幾滑，以為份量唔多，卻喺越食越有咁，個人而言，花膠都OK，再炆腍身啲就更好，且有很多菇菌，而魚湯滲入少少雞油，就更加正，伴上飯，真喺好味。紅豆冰 +$9朝早早餐飲咗咖啡，晏晝午飯整咗杯奶茶，夜晚就節制少少，改試紅豆冰，因為見佢加$9都唔喺貴。杯紅豆冰一睇就知有非常多紅豆，而且，煮得又綿，味道好清甜，撈勻啲奶水，好飲又好食。雖然兩個人試嘅嘢唔多，但都食到有質素，招呼又唔錯，地方企理，食茶記好就好在又無加一，所以，真喺值得翻兜。…Read More

老表剛去完台北一行，話有啲拌手禮醒俾我，順便約出嚟食餐飯，佢就我，所以，就過到嚟中環呢邊聚一聚，中環食飯一向唔易搵位，故此走上少少嘅「歌賦街」，到訪「知延屋」食餐日式丼飯。雖然門外有少少人等位，但剛好上一輪嘅客陸續離座，我哋好快有得入。裝修簡約，但一室深色木系枱櫈，加上牆上吊燈，有種日式嘅懷舊風:)；枱上嘅玻璃杯，更喺滿滿日式復古風格。餐廳主打喺丼飯定食、鍋物定食，前者款式不少，並分唔同嘅份量，豐儉由人，後者有日式昆布柴魚湯或關東風壽喜燒湯可選，而每款定食都包咗時令沙律菜、日式醃菜、味噌湯同日本白米飯；此外，仲有啲滋味小食供選擇。溫馨一提，高峰時段用餐時限為60分鐘。雖然，所賣嘅都喺較傳統嘅日式丼飯、鍋物，但卻有幾款特調飲品，分為雪奶酩系列同梳打系列，彩繪圖片睇落頗為吸引，不過，我哋就無試。除上述嘅一人前，店家仲提供一款二人餐，包指定丼飯定食黑毛和牛丼套餐L份量、鍋物定食（2揀1）、小食（3揀1）、飲品（3揀2），做緊特價$370，計落真喺幾划算。炙燒牛肉丼定食 $108我哋都唔喺咩大食之人，所以，揀個M份量已經好夠。整份定食嘅外觀都幾靚仔，尤其碗丼飯，啲炙燒牛肉鋪到滿滿，打下成隻日本蘭王生蛋，加上一朵食用花同啲芽蔥，賣相別致。開開胃，先食啲沙律菜，襯上一橙一紅車厘茄，淋上柚子醋，簡簡單單，卻清新開胃。熱焫焫嘅味噌湯除咗麵豉味夠香之外，湯底更有少少昆布，味道幾好，食完個沙律再嚟暖和一下腸胃。日式醃菜方面，有本菇、泡菜同海帶，本菇富麻油香，泡菜酸香微辣，海帶爽脆鹹鮮，用嚟伴飯食真唔錯。而啲炙燒牛肉真喺好正，肉質本身已經好嫩滑，經過炙燒，有少少焦香之餘，逼出更出油份，感覺更富油香，拌勻隻雞蛋，沾滿蛋漿嘅牛肉就更加滑口；此外，將啲蛋漿拌飯食，除有蛋香，令本身帶黏糯嘅日本米味道更豐厚。宮崎黑豚肉、日式昆布柴魚鍋定食 $138老表份鍋物定食睇落都好吸引，宮崎黑豚肉大大鍋，份量真不少，而且，啲豚肉好嫩口，又唔會話好肥，鍋底仲有唔少洋蔥、豆腐皮、野菜……等等，至於個昆布柴魚湯味道清香；加$15可以轉烏冬，老表話食得出烏冬唔喺平價貨，唔會有陣陣酸味，入口滑溜，咬落卻好有韌勁，且有麵粉香。餐廳嘅招呼都好唔錯，雖然有時限，不過，無人在外排隊，店員都唔會催客埋單。聽老表講唔少旅遊趣事，可惜放飯時間有限，不過，大家短聚一下都開心嘅，至少都知大家都別來無恙嘛！…Read More

近來因為要搞裝修嘢，所以，不時都嚟到荃灣睇睇家具之類嘢，行到咁上下，咁就要搵飯食啦，晌海之戀遇到「湯加」，都好耐未幫襯過，老婆就好鍾意佢哋嘅百秒鱸魚，我就慳慳哋晌下午茶餐度埋手。從門面已睇到成個場嘅環境，都喺好慣常類似茶記嘅格局，少部份喺卡位，大部份喺4人格，枱側抽櫃擺放餐具。而枱角貼有點餐嘅二維碼，同埋列明注意事項，點先為止確認點餐，以往就聽到唔少客向店員投訴好耐都未嚟嘢，不少情況都喺差最後一步作確認送出。此外，仲印埋wifi出嚟，好多餐廳既然要客人掃碼點餐，理應提供埋wifi，因為有少量上年紀嘅，手機真喺只打出打入，無數據架。另一邊，仲有個茶水間，自行斟凍水、熱水，更備有數款醬料，自由取用，既然自己顧自己，餐廳都無收加一。主餐牌好大本吓，加上小弟打算食下午茶餐，就只影低老婆所嗌嘅百秒鱸魚。而午後時光嘅下午茶餐，就底面兩頁，不過，已經有好多選擇，有輕怡嘅，有大份量嘅，有湯飯DIY，抵在包埋餐飲，又有啲加配小食。平常老婆就只會揀熱檸水，但睇到枱角有張「健康天然果汁」做緊推廣，佢一向都講永健康，加配又有少少優惠，當然一試啦:)。百秒海鱸魚配米線 $69一整條海鱸魚喺原鍋咁上，而米線則另上，非常之大碗，所以，都要幫佢包底。魚肉嫩滑富魚鮮味，魚湯底亦好鮮甜，墊底嘅蘿蔔清甜無渣，米線入口滑溜有米香，時隔咁耐再食，水準一啲都無跌。果醋豬軟骨撈公仔麵配潮汕豬肉丸浸紫菜 $43雖然喺嚟食下午茶餐，但當喺正餐，所以，嗌咗款飽肚嘅撈公仔麵，餐飲仲升級埋特飲。先講講個公仔麵，啲麵條煮得啱啱好喎，爽爽哋身，夠彈牙，加上撈埋啲果醋汁，酸酸甜甜好醒胃；啲豬軟骨都炆煮得正，肉質鬆化又入晒味。跟碗潮汕豬肉丸浸紫菜湯，俾足料喎，豬肉丸好彈牙，絕對唔喺溝粉貨色，而紫菜好爽口，湯頭清甜無欺場，成個餐抵食。仙草紅豆冰 +$9老婆好鍾意食紅豆，所以，升級呢杯仙草紅豆冰，杯嘢亦交足貨，仙草紅豆份量有超過1/3，仙草「滑嘟嘟」，紅豆亦算香甜，不過，紅豆就偏少，大部份都喺仙草，至於個奶水底就OK啦。鮮桑葚葡萄汁 +$13老婆點嘅百秒鮮鱸魚喺散點嘢，唔包餐飲，不過，都有加配優惠，幾款天然果汁就相中呢款。其實鮮桑葚真喺唔知乜嘢，上網睇睇先知其實就喺黑桑子，味酸甜，功效多多，如抗氧化、補血、護眼、助消化、延緩衰老……等，而加埋提子，飲落酸香醒胃，確喺舒服好飲。今次再訪，幾樣嘢都好食，老婆嘅鮮鱸魚固然鮮甜，小弟嘅豬軟骨都好唔錯，加埋兩杯嘢飲都好味道。…Read More

正所謂偷得浮生半日閒，平常周六、公眾假都會專登出街食早餐，但大多數一喺茶記，一喺快餐店。老婆話佢出咗少少獎金，今次就要食餐好，一於食番餐全日早餐啦（都好耐無食喇），晌美孚有供應嘅唔多，第一時間諗起「PHI」。平時就算星期六經過都見唔多人，但今次真喺有啲意外，全場近乎坐滿。一室日系淺木色裝修，配以柔和燈光，感覺蠻寫意舒服:)。我哋被安排坐晌較入位置，有種自成一角感。目測所見，好多家庭客，當然唔少喺街坊，撻住拖鞋落嚟。多年前嚟過食午餐，早餐都喺第一次，話晒比較少花成嚿水食一個影早餐。呢度嘅早餐重點，主要都喺全日早餐同梳乎厘班戟早餐，此外，都有啲意粉類、沙律類早餐。全日早餐梳乎厘（兩件）$75梳乎厘可以揀1、2、3件，老婆原本話食一件就夠（因為佢有麩質敏感，都喺間中偷雞食吓。），但見俾多$13就多一件，當然嗌夠兩件啦，一人一件，而基本嘅組合會包埋煙肉同煎蛋，老婆就再額外加咗牛油果同煙三文魚，整份組合就盛惠$105。啲食材質素高，牛油果夠晒熟，口感綿滑，煙肉煎得脆口，又唔肥，唔好以為煎蛋煎過籠，喺老婆唔鍾意食生蛋黃，呢隻人煎到全熟正正合佢心意；至於件梳乎厘班戟絕對保持水準，淋上糖漿，純甜美味，好有蛋香，口感綿密輕盈。香煎雞扒全日早餐 $92小弟就叫番一個較傳統樣嘅全日早餐，有沙律菜、車厘茄、炒蘑菇、煎太陽蛋、多士同雞扒，唔好話睇落普通，一樣喺有心恩晌裡頭。啲車厘茄應該喺焗過，因為咬落暖暖哋，多汁清甜，用上丹麥多士，食落自然更具酥香感，雞扒仲俾到兩大件，煎得香口，肉質夠嫩，絕對交足貨，咁嘅價算得上性價比高。鮮奶咖啡、朱古力咖啡餐飲可選任何一款意式咖啡，冷熱同價，嚟得呢類咖啡店點可以唔嘆杯靚咖啡吖，小弟就鍾情鮮奶咖啡，而老婆就揀杯咖啡味無咁重嘅朱古力咖啡，兩杯嘅拉花都好唔錯，平滑而花紋細緻。前者沖泡手勢好，晌無攪嘅情況下，每口口感、味道都好一致，順滑醇香；後者濃郁嘅朱古力，帶少少咖啡香，啱晒老婆喜好。我哋入座後嘅早段時間，全座近滿，但只得一位後生女侍應，佢真喺堅，傳菜、沖咖啡、收銀一腳踢，忙到不可開交，但依然有禮且面帶笑容，咁嘅服務真喺讚得一讚！之後多一位後生仔返工，自然運作更流暢，佢都喺好有禮貌，所以，服務方面俾夠佢哋滿分。…Read More

又喺一年嚟一次鑽石山青掃墓，事後就會晌附近搵食，細佬妹對食喺無要求嘅人，茶記就最啱佢哋。雖然，知道附近都有啲好人氣嘅茶記，不過，小弟就唔多喜歡等位，偶然遇到「時代冰室」，就隨遇而安試一試佢。一般茶記格局，無話咩特別唔特別，裝修平實，都喺卡位為主，我哋就揀咗靠窗嘅卡位，一來對住落地大玻璃，光線十足，二來感覺開揚啲。午市時段嘅選擇有特色套餐、全日套餐、超人氣招牌蛋包飯、鐵板熱賣、經典熱賣……等等多個系列。例湯再睇多次餐牌，都只喺話所有套餐只包餐飲，呢碗例湯喺額外免費送，雖然唔值咩錢，亦都只喺普普通通嘅中式例湯，飲落似喺「青紅蘿蔔煲豬骨」好例牌嗰種，但夠老火，亦喺份誠意。日式咖喱雞扒飯 $58日式咖喱向來用上較多蔬果去煮，味道無咁辣之餘，亦有點甜味，細佬嘅雞扒飯就完全反映出日式咖喱嘅精髓，試咗一小口咖喱，確喺唔錯，幾香，而啲雞扒煎得甘香，亦幾軟滑，且份量甚足，睇相都見有唔少件雞扒。咖喱雞脾飯 $61細妹同樣食咖喱，雖然都喺咖喱，但呢個絕對喺港式樣，無論捧出嚟嘅賣相，抑或味道，都好港式，啲咖喱辣度強勁，甚為刺激，而裡面嘅薯仔喺炸咗再煮，所以，唔會又腍又散。至於件雞脾，堅大隻，大隻過隻手掌，試就無試，但細妹就話炸得外皮甘脆，肉滑多汁，唔會炸到「乾爭爭」，正呀喂！招牌和牛漢堡蛋包飯 $63諗住叫得招牌，就一於試試佢，可是，同餐牌嘅賣相就有啲距離，主要喺蛋包飯部份做得有啲hea，「蛋皮」都包唔晒啲飯，好求其煎好片滑蛋冚上去而已，當然，食味方面就唔差，有蛋香又幾滑，至於件漢堡就確唔錯，既有肉香，又有油香，口感鬆化唔死實，同麥記嗰啲喺天與地。熱奶茶細佬妹飲嘅喺凍奶茶，通常掃二維碼落單都會有好多細項可選，估唔到奶茶可以揀濃啲，不過，小弟飲熱奶茶，後而無呢個選項。講番杯熱奶茶，個人嚟通，感覺就淡咗少少，少咗嗰份茶葉嘅幽香味，所以，你見色澤都喺偏淡少少。年年嚟掃墓都順道試吓唔同餐廳，今次嘅「時代」都唔錯，至少喺啱食，啲妹妹招呼好唔錯，依家有禮貌嘅後生女好難得架喇，喺原先坐埋邊啲位有啲污糟，無留意嗰個位喺咪近廁所，有少許異味。…Read More

老婆向來晌飲食上都偏素，雖然未至全素，但可以揀到嘅都會盡量揀素食菜式，今晚就專登帶佢嚟試一試「素某」，因為從食友嘅食評所見，菜式精緻，配搭具心思，環境又舒服，值得走訪一試:)。一入門口先睇到嘅喺開放式廚房，可見店家對自已廚房衛生方面極有信心。呢度唔單單喺間素食餐廳，仲喺間身心靈療癒嘅社區空間，內裡嘅佈置非常特別，一室簡約風，白色為主調，天花掛起一片片如波浪般嘅輕紗，加上燈光柔和，地方闊落，空間感好唔錯，加上客人都比較斯文，顯得更加寧靜盎然。周圍又放咗好多圖書供閱覽，甚有一股書卷氣息！最搞嘢晌門口棟咗個牌，有個相機標誌，初時仲以為唔可以影相，原來寫住「正在營業請亂拍照」，哈哈，真鬼馬！此外，一邊牆上投影不斷播放店家嘅訪問，介紹到佢哋喺結合健康素食+社區療癒為核心概念，晌香港呢個吋金呎土之地實屬少有。晌度真喺唔單單食餐飯咁簡單，仲喺一處讓人可以沉澱吓嘅空間。菜式只供應套餐「素某晚宴」，定價$298，包括席前小食、素某沙律、是日湯品、野菜天婦羅、主食指（5揀1）、甜品（5揀1，但部份需加錢）及特選拼配茶或配方茶，亦可加錢改配特調飲品。無論甜品物，還是飲品，名字都改得頗有詩意。翻完餐牌一轉，仲留意到有一版專登介紹店內嘅餐枱，原來所用嘅木材都喺嚟自香港打風時倒冧嘅大樹，依家喺分拆成全店12張枱，最神奇喺可以拼番埋一齊成一張順紋理嘅大餐枱，好在餐牌下端都有合併咗嘅樣睇睇，真喺有意思。嫩芽草本拼配茶先嚟兩杯餐飲，一杯揀番草本拼配茶，風味選上由單欉、歐薄荷、香茅、桂枝組合成嘅「嫩芽」。侍應細心介紹飲用方法，原茶葉泡約1分鐘後，倒落大杯，然後分小杯享用，而傍邊已備有一大個熱水壺，按自己飲速再泡。而茶色琥珀棕，透徹，飲落味道複雜富層次，薄荷香讓口感清爽，令人感覺舒服。展開特調 +$18老婆向來熱愛百香果，所以，一眼就相中呢款加入百香果嘅特飲，從餐牌所見，成份包括烏龍茶、乾薑、百香果、豆蔻、丁香、薑味汽水，組合非常特別。賣相很有層次，甚具夏日風情，口感清新，百香果嘅酸香，夾雜陣陣香料嘅香氣，好有特色。席前小食食物方面，先上枱喺豆角條，樣貌似喺平凡，但細節位有啲心思，加咗啲紅椒粒、蒜粒同巴馬臣芝士碎，仲用啲食用花瓣做裝飾，好睇又好食，爽爽脆脆為今餐有個好開頭。素某沙律清清哋嘅田園沙律，再加上清甜嘅橙肉、車厘茄、鷹咀豆，淋上胡麻醬，雖然簡簡單單咋，但勝在食材夠新鮮，令胃納大開。是日湯品今晚嘅餐湯一片綠油油，喺菠菜湯，有別一般西式嘅忌廉湯，無咁重奶味，但口感保持一貫嘅滑溜度，濃濃嘅菠菜味，真喺幾好飲。野菜天婦羅一次過上晒二人份嘅天婦羅，野菜包括有紫蘇葉、茄子、大花菇、蕃薯、秋葵，有幾個位真喺值得一讚，一來粉漿又薄又脆，炸得香而不膩，二來非日式佐以蘿蔔蓉，而有啲台式佐以梅子鹽，鹹鹹酸酸，襯天婦羅真喺頗特色，加上裝飾用嘅楓葉，都喺用威化紙做，可以入口，頗有心思！香草素雞•烤野菜•山藥慕絲整道菜嘅賣相好別緻，色彩艷麗，尤其是配上大量烤野菜，如野菌、車厘茄、青瓜、黃瓜、薯仔，啱晒我老婆，仲烤得頗為香口。素雞如大部份相類似嘅食品，都喺豆製品，霎眼望上去都有幾分似雞件，當然食味喺另一回事啦；而山藥慕絲小弟就覺得稱之為山藥泥比較似啲，佢嘅質感較似食薯蓉咁，又帶點粗粒感，原以為喺熱嘅，原來喺冷菜，就變得有啲似食薯仔沙律般，再者，山藥夠健康嘛。日式咖喱•素肉漢堡扒對比起個香草素雞，呢個素肉漢堡扒就八、九分似真肉嘅漢堡扒喇，大大件好厚身，煎得焦香，甚有口感，加點幻想，真喺好似食緊件漢堡扒，味道確唔錯；同樣加入咗大量烤野菜，更多咗櫻桃蘿蔔、甘筍仔、魔芋同幼滑到不得了嘅薯蓉；仲有一大個煎飯糰，焦香有咬口，飯粒又鬆軟，最正啲日式咖喱香味十足，微辣帶香，襯薯蓉，襯飯糰都好好味。麗楓秋栗 +$28最後梗喺甜品壓軸登場，侍應都幫忙換上新餐具。呢道栗子甜點賣相非常之靚仔，杯內喺紅茶啫喱，軟硬度啱啱好，又有紅茶香；杯面嘅栗子蓉打得柔滑，栗子香味十足，加埋原粒糖漬栗子、楓糖脆餅，真喺無無得輸。題外話，栗子蓉上嘅一串小葉，初時以為假嘅，試試嗒吓，再咬一口，有少少如花椒般味道滲出，煞是有趣。椰香琥珀雪燕另一道甜點雪燕喺凍食，最有心思喺將盛器都雪凍埋，而雪燕可講平民燕窩，如桃膠般，晶瑩剔透嘅雪燕本身無乜味，不過，加咗椰汁、杞子、紅棗，食味自然唔同晒，入口好潤，口感清爽，最緊要更喺健康富營養。今晚所食到嘅菜式，果真別出心裁，甚有心思，素食也可以食得精彩。用膳完畢，無需趕住走，可以繼續細嚐香茶，舒緩一下，可將煩惱一掃而空:)。…Read More

今次一早出嚟荃灣就唔喺睇早場，而喺陪老婆搞銀行嘢，幸好都好快搞完，就晌附近搵地方食個早餐。遇到「新生記」，清清哋食碗粥都好喎，老婆就話想食糉，啱啦，粥鋪滿足到大家。地方細細，簡樸嘅裝修，好街坊，嚟幫襯嘅亦喺街坊多，最正喺有部大電視播新聞，邊食邊聽早晨新聞。餐牌黃底黑字，分類藍底白字，非常擔搶眼，而選擇非常之多，唔喺誇張，叫人睇得眼花撩亂，而且，佢哋唔止賣粥，仲有湯飯同粉麵供應，真喺一日3餐過嚟食都唔怕悶。此外，好鍾意呢啲老鋪，尤其啲手寫單同菜式簡稱，好有趣，依家咩都電子化，呢類單已比較少見。魚腩粥 $41老婆就好鍾意食魚喇，所以，雖然餐牌有非常多選擇，但佢一眼就相中魚腩粥，上次晌「靠得住」又喺揀魚腩粥。店家啲粥都好夠份量，而且，有唔少料，魚腩堅喺大大件，老婆就話好鮮甜，粥底又夠綿滑。公司粥 $36公司三文治聽得多，算小弟才疏，公司粥都喺第一次遇上，就當盲盒試試佢。粥到，撈一撈，其實就喺艇仔粥+皮蛋瘦肉粥+魚片粥放埋一齊，非常多料，師傅絕無手緊，啲料好似食極都有，抵食。牛脷酥 $11去到粥鋪，小弟對牛脷酥情有獨鍾，有油炸鬼嘅酥脆，但又有陣甜甜哋嘅味道，最貼心喺幫我剪成細件啲，夾起就食，新鮮炸起即食，更喺特別香脆可口，部份沾粥再食，又另一番風味。五香鹹肉糉 $22而老婆情有獨鍾就喺糉，雖然鹹肉糉就唔似得裹蒸糉咁多料，但正正喺咁先啱佢，因為佢主要想食就喺啲糯米同綠豆，加少少鹹蛋黃，而呢隻都算合格，加上少豬肉肥膏，一夾就丟走，小弟就略嫌鹹蛋比較乾身，無乜油。本來嚟食早餐，但因為搞完銀行嘢都10:00am，食埋餐粥都近11:00am，而啲份量真喺好堅，仲加埋今次食糉，勁飽肚嘢，所以，最後一餐當兩餐，妟晝餐飯都慳番，哈哈！…Read More

咁多國家菜系中，日本菜算喺較多食嘅之一，然而，日本菜中，就以日式放題比較少食，大抵無以前咁食得，就好似自助餐都食少咗。最近，有朋友就極力推介呢一間新開嘅放題店「極．大瀛喜」，所以，就趁機同朋友嚟聚一聚狂野哋食番餐。成日話香港飲食業生意唔好，但嚟到真喺好大反差。先講個環境，地方好大，樓底又高，最欣賞喺間開唔同區域，分為A、B、C、D……朋友嚟到都易搵啲。雖然以金色為主調，有種金碧輝煌之感，但一啲都唔俗氣，通道、座位都好闊落，令用餐體驗更好:)。我哋揀食中午，平啲吖嘛，12:00pm開始陸續入座，一區一區坐滿，最後，近乎全院滿座。星期六、日、假期午市做到5:30pm，我哋食完離開時一樣見有人入座。而且，可以食足3小時，夠晒時間慢慢嘆。餐環境講咗咁多，順便介紹埋自助食物區，就晌入門口左邊，地方都好大，通道同樣闊落，唔怕人撞人。掃視一番，絕對令人花多眼亂，非常多元化，睇相你都見，照顧到唔同年紀層嘅人，包括有30多款冷盤小食、沙律，以及自助餐常見嘅凍海鮮，仲有燒味、炸物、熱湯、點心、生果、甜品、雪糕雪條、軟雪糕搭多種配料、自助茶啡、果汁、自家製健康飲品，同埋一大櫃多到數唔晒嘅飲品。淨喺呢個自助區都可以食飽人啦！除咗出面自助食物區之外，呢一款「放題A」可以點嘅食物分類有刺身、創作刺身、串燒、燒物、卷物、軍艦、壽司、創作壽司、火炙壽司、炸物、天婦羅、一品料理、煮物、蒸焗鐵板燒系列……等等，相信計計埋埋晒有超過百款食物。價錢就分日子、分時段，自行研究研究。如果貪心少少想食多啲貴價菜式，可以選「放題B」，等同「放題A」加多$80，就有近10款特別嘅菜式任點任食，例如：拖羅、北海道帶子吞拿魚蓉魚籽杯、上湯芝士焗龍蝦伊麵底、油鹽焗奄仔蟹……等等，等陣再分享！掃二維碼落單成為趨勢，一來減省人手，亦減少人為出錯，二來點咗乜可以睇番，一清二楚少咗啲爭拗，好老實，今日成餐飯都無漏單，至多有一、兩款食物上得較遲。更值得一讚嘅喺，有咩要注意晌單度都溫馨提示埋，所以，頭2.5小時主要食二維碼落單嘢，剩番30分鐘，就主攻自助區嘅甜品！飲品喺自助食物推影完相，第一件事就喺順手攞埋嘢飲，小弟一起手就先試柑桔青檸汁同洛神花檸檬茶，兩者都喺自家製，喂！有誠意喎，前者酸香清新，後者酸爽清香！放題B精選既然選咗「放題B」，第一轉就梗喺試晒所有菜式啦，包括：鱈魚乾海膽吞拿魚蓉Taco、拖羅、火炙A5和牛伴海膽、海膽三文魚籽親子杯、北海道帶子吞拿魚蓉魚籽杯、鯛魚薄切、魚籽醬配餅乾、上湯芝士焗龍蝦伊麵底、油鹽焗奄仔蟹、皇子糯米乳豬。款款都賣相精緻，一啲都睇唔出喺放題出品，同晌日式餐廳食嘅無分別，而且，用料新鮮，食材嘅配搭亦有心思，個人推薦鱈魚乾海膽吞拿魚蓉Taco、北海道帶子吞拿魚蓉魚籽杯、火炙A5和牛伴海膽，當然其他都好食，但呢3款晌食材配搭上好有驚喜，味道豐富。刺身、創作刺身食放題，唔易飽肚又較回本，唔使多講都喺刺身啦，10多款就揀啲少食、又貴價啲，包括松葉蟹腳、大赤蝦、藍鰭吞拿魚、北海道鮮帶子、北寄貝、象拔蚌，師傅更擺得好靚仔，更以冰鎮住，絕不馬虎。整體食落質素唔錯，蟹腳有海水嘅鹹鮮味，魚生鮮味十足，貝類又具咬口，值回票價。另一分類嘅創作刺身，都試咗4款：酒醉鮑魚、醬油乳山蠔、泰式虎蝦及櫻桃鵝肝，款款都做得的的骰骰，而且食得出食材高質，味道、口感都上佳。串燒、燒物、炸物再落嚟呢一轉就試啲熱氣嘢，一口氣點咗6款大家都最想食嘅：鹽燒牛舌、香草燒羊鞍、燒溫室甜菠蘿、極品金枕頭榴槤燒、榴槤炸彈及3.6牛乳脆皮鮮奶。牛舌、羊鞍真喺無得彈，燒得恰到好處，濃濃嘅獨有味道，而兩款榴槤嘢食，真喺滿足到我哋好榴槤之人。凍海鮮食完幾輪嘢，又加一堆熱氣嘢，喺時候回回氣，所以，出去自助區拎咗少少凍海鮮謏返嚟過過場，估唔到又幾唔錯喎，蝦肉、螺肉都好爽口鮮甜，而青口口感柔軟，唔會好似擦紙膠咁韌。蒸、焗、鐵板燒呢個系列其實都好吸引，不過，去到近尾聲，真喺食唔落咁多，仲要留肚同甜品搏殺，故此，精選咗3款一試，包括：甘鯛立鱗燒伴黑松露忌廉汁、金銀蒜蓉粉絲蒸蟶子皇、川式珍寶生蠔燒。以前食過立鱗燒，專登嗌嚟俾朋友一試，佢大讚好正，魚鱗脆到不得了，而蟶子鮮甜惹味，生蠔辣而不嗆，蠔味夠濃。甜品大募集小弟向來都好鍾意食甜品，所以，臨尾點都要留番兩乘空間俾甜品，先試噝二維碼落單嘅海燕窩椰汁燉木瓜同法式麵包開心果誘惑，前者燉得夠火喉，木瓜又腍又甜，加埋椰汁，好潤；而後者賣相極具打卡感，麵包外脆內軟，襯上雲呢拿雪糕同開心果醬，絕對喺甜魔誘惑。終極一戰喺晌自助區拎番嚟嘅「拼盤」，有Häagen-Dazs雪糕、Dreyer’s雪糕、榴槤雪條、榴槤大福、芒果糯米糍、芝士撻、芝士餅、焗榴槤布甸及蜜瓜軟雪糕配Nutella榛子朱古力醬，原來呢部Nutella機暫時喺全港獨有，加咗當然好食好多，至於其他甜品，都同樣好味，實在大滿足。今餐真喺食得稱心滿意，不單地方大，環境好，食物選擇多，供應充滿，而且，上菜快，又無漏單，招呼好好，啲店員好有禮。由頭領放到尾，除咗我哋嘅食力有番咗上下，點菜策略亦得宜，自知無可能試晒所有嘢，重點出擊啲心水菜式，先可以食得咁盡興！…Read More

又到星期五晚，喺完咗一個星期工作而最輕鬆嘅晚上，所以，兩公婆就懶煮出街食，亦想食餐好嘅慰勞吓自己。今次近近哋過嚟長沙灣尾食吓日本嘢，呢間「Yuyu Sushi」喺住晌附近嘅親友推介，讚其性價比高，其實之前晌樓上嘅酒家同一班親戚食做節飯時已留意過呢間餐廳。走進餐廳，一室燈光柔和，傳統日式淺木色系裝修，左右兩排喺4人座，中間兩行喺卡位，最鍾意喺啲間板加咗啲小屏風，同前前後後及隔離位都遮一遮，私隱度都高啲。我哋被安排坐晌卡位，感覺寧舍闊落，晌呢區嚟講，絕對喺頗舒適嘅居酒屋之一:)。餐廳尾喺壽司吧枱，如果單純嚟食壽司，又想跟師傅交流吓，喺理想位置。而事後想搵廁所時，發現壽司吧傍有條通道，可以通去另一邊用餐區，猶如一個半開放嘅私人廂房。雖然，餐廳嘅名字用上壽司，但翻一翻餐牌你就知點會得壽司咁簡單，如居酒屋般，種類包羅萬有，選擇非常之多，更喺圖文並茂，包括：晚市定食、刺身、壽司、卷物、手卷、前菜、沙律、湯品、串燒、天婦羅、揚物、鍋物、一品料理、食事、冰淇淋……等等一應俱全，定價亦好親民，所以，老婆話今餐食得豐富啲！用上二維碼下單，清清楚楚，減少錯誤或爭拗，呢個都喺飲食業嘅趨勢，加上介面易用，點餐方便。之不過，壽司都喺其主打，依家仲有啲推廣，任揀每4款手握壽司就有8折，可謂食得更抵。此外，晌唔同時段，店家仲提供多種優惠，例如午市唔收加一，學生午市定食減$10，歡樂時光啤酒、清酒半價，外賣自助9折……等等。食日本嘢，除欣賞食物之外，啲餐具都比較靚，值得多欣賞一下。講咗咁多，依家就去片，睇吓今晚我哋食咗乜，先嚟串燒，再試試啲定食！雞軟骨串 $26/兩串、活鰻白燒 $48雞軟骨純粹過過口癮，咬落咯咯聲，軟中帶韌，配啤酒就最過癮；而活鰻白燒喺店長推介，活鰻比起一啲冰鮮貨自然更優質，而且，雖然簡單燒香，唔加任何醬汁，但正正咁樣先突出活鰻嘅原味道，，味道油潤，口感更彈牙，外皮更脆口。牛舌 $48話時話，小弟確喺幾鍾意食燒牛舌，晌小弟嘅日本菜食評中，不時見其蹤影。啲牛舌燒到有啲焦香，咬落有韌勁，極具咬口，加上牛舌獨特嘅味道，再沾上少少芥辣，更具風味。田園沙律、味噌湯、茶碗蒸所有晚市定食都列明會奉送前菜、味噌湯、茶碗蒸，先講講啲沙律，都喺簡簡單單嘅沙律菜、日本青瓜、車厘茄伴胡麻醬，用料新鮮，清爽好食，叫人開開胃先；味噌湯除咗麵豉味好香濃之外，湯底更有唔少昆布，味道豐富，食完個沙律再嚟暖和一下腸胃，喺好好嘅配搭。而茶碗蒸好有誠意，唔單止蒸得滑溜，又好有蛋香，裡面仲有好多料，包括冬菇、雞肉、銀杏、蟹柳。銀鱈魚西京燒定食 $158老婆食日本嘢，壽司、剌身唔啱佢，佢最心水就喺銀雪魚西京燒，近乎遇到餐廳有供應呢道菜式，佢都會點，今次也不例外，而佢食過好幾間日本餐廳嘅銀鱈魚，呢間可以講最抵食，因為呢個價俾到足兩大件，坊喺少有。件銀鱈魚唔單止燒得外皮焦香，肉質細緻嫩滑，極富油香，絕對喺高質素嘅貨色，沾上少少沙律醬，風味更佳，而飯粒黏糯有米香，一口白飯，一口銀鱈魚，佢話絕對喺大滿足。事後店長問吓我哋對食物滿唔滿意，先知店家嘅銀鱈魚喺醃足兩日先再嚟燒，誠意十足。特上壽司定食 $205既然呢度明顯主打壽司，小弟就揀番款壽司定食，餐牌中共有兩款：精選壽司定食和特上壽司定食，相中後者，標明有吞拿魚中腩、帆立貝、海膽、鰻魚、鯛魚、甘蝦、油甘魚、三文魚、魷魚同青瓜卷共10款，喺一份非常豐富嘅壽司定食。啲魚生睇落好有光澤，雖然有話最好嘅次序喺由味淡食到味濃，不過，放鬆心情食，隨意盲選個次序，一樣好有特別嘅豋體驗。整體嚟講，食落的確好新鮮，唔同嘅魚生，有唔同嘅味道同口感，可謂各有亮點，如果要我揀最好食嘅，真喺好難落手，因為好幾款魚生都好高質；此外，幾鍾意飯粒細細，一啖過放晒入口，而飯粒捏得鬆軟，唔死實，師傅手勢好。冧酒提子雪糕、抹茶雪糕 @$18甜品一環就唔多選擇，就只有共4款口味嘅冰淇淋，有啲售罄，但剛好剩番嘅冧酒提子雪糕、抹茶雪糕都啱我哋口味，尤其老婆都算得上喺抹茶控。冧酒提子雪糕入口滲出陣陣冧酒香，卻唔太嗆喉，加上提子可以增加口感，而抹茶雪糕嘅抹茶味好突出，又富奶香，口感軟滑，唔會有冰感，老婆大讚超好食。今餐食得好豐富，加上各樣菜色都表現出色，讓我哋都感到大滿足。再者，環境舒服，侍應有禮貌，亦會主動幫忙、收拾用餐後嘅碗碟，令整晚用餐嘅體驗都好暢快，值得翻兜再幫襯嘅小店:)。…Read More

過咗小暑，都未到大暑，但近排啲氣溫已日日高升，加上天雨，又熱又濕，最好莫過於買杯凍飲返屋企慢慢嘆。路過「登打士街」見到「茶茶Go」，好耐之前試過其金鍠楊枝甘露，覺得有料到，再者，佢哋喺嚟自台灣嘅品牌，質素有番咁上下，今次就再試試店家其他嘢飲。飲品選擇十分之多，大類別分為牛乳入茶、4.3牛乳、純茶、一品咖啡、酸奶雪見沙、風味冬瓜茶、鮮果歲月時、台式茶沙冰及梳打。鋪面一角貼咗張「本季至Top銷售榜」，如果無心水嘅，又可以不妨着眼於此。除咗茶飲，仲有啲甜點，例如巴斯克芝士蛋糕、盒子蛋糕。晌牆上見到有一款「虎皮卷」，覺得幾特別，可惜賣晒，所以，退二求其次，選番上次都試過嘅「紫菜肉鬆小貝」。逮丸芋頭2號 $42黑糖鮮奶飲得多，反而芋頭鮮奶印象中好似未試過，加上又喺店家嘅招牌，所以，今次就轉轉試一試芋頭鮮奶。餐牌標明用上4.3牛乳，奶味自然夠香濃，杯底沉咗唔少芋泥，香滑細膩，芋頭味濃，此外，仲有唔少煙韌嘅芋圓，大大一整杯飲完都幾有飽足感。若葉百香玉子 $36老婆最鍾意百香果果茶，所以，呢一款鮮果茶飲喺佢嘅不二之選。以綠茶作為茶底，加入新鮮嘅百香果，味道冰涼清爽、酸酸甜甜，飲落零負擔，加上大量手工愛玉凍，爽爽滑滑，飲吓啜吓，絕對喺消暑奇「冰」！紫菜肉鬆小貝 $38一份有4件，唔好睇佢好似唔大件，其實，拎上手即刻感到好墜手，好有重量。蛋糕嘅口感幾軟滑，又幾有蛋香，裡面捲住啲蛋黃醬，再加上成件蛋糕四面都黐滿紫菜同肉鬆，味道鹹鹹甜甜，又帶點酸香味，難得又夾到喎。只喺飲杯凍飲，食個小貝蛋糕，簡簡單單嘅生活一樣叫人好開心。…Read More

近排搞裝修，不時出嚟砵蘭街睇吓啲地磚呀、廁所潔具呀……之類，有時都順道逛一逛太子呢邊。是日經過甜品小店「甜沁園」，再上網八吓，風評唔錯喎:)，忽然興起就買兩份外賣拎返去作飯後甜品。講明喺小店，入到去真喺好細，因為店家主要做外賣，不設堂食。不過，裡面有冷氣，總好過企晌鋪外曬太陽，吹熱風，而且，有少少櫈俾客人坐吓，唔使被罰企。餐牌制作好簡單，而糖水款式都唔少，包括香芒系列、桃膠系列、芋泥系列、豆花系列、豆漿系列，如搵唔到啱心水嘅，仲有一款自選系列。最估唔到，原來店家仲提供小食同粢飯。最後，買咗一份自選組合，一份香芒楊枝甘露。幾鍾意佢哋個外賣袋，賣相可愛，可以循環再用番。自選組合 $42甜品底要豆乳布甸，配料就揀珍珠、芋圓、紫薯泥，放滿晒整個食物盒，拎上手非常墜手，好夠份量，打開睇睇，真喺堅多料，好似啲紫薯泥有一大嚿，而且，薯味十足，軟滑卻具質感；珍珠、芋圓都好好食，煙煙韌韌有咬口；至於豆乳布甸幾唔錯，比起食豆腐花，佢就會口感挺實啲，卻不失滑嘟嘟，最緊要豆味足，食完堅飽肚。香芒楊枝甘露 $40芒果嘢一向喺小弟心水，無其他再特色啲嘅選擇，自不然揀呢一款甜點。未打開，單喺睇側面，已經見到餡料滿滿，到打開蓋，芒果大大粒又多，柚肉亦鋪滿面，一啲都無手緊。芒果果然超香甜，柚肉一咬有爆汁之效，用上大粒西米就更具咬口，加埋個椰奶底，香夾滑，實在回味。等候期間，都見有唔少外賣單，相信小店都幾受街坊歡迎，的確份量十足，用料上乘，好嘢就自不然有客識欣賞。…Read More

一班老同學好耐無見，改期又改期，卒之約得成出嚟食飯，不過，只喺約出嚟飲餐茶而已，雖然，唔喺好叫齊腳，但每山次聚會都難能可貴。今次揀咗少少冷門大角咀區嘅「海東軒」，純粹因為有舊同學晌附近工作，覺得環境唔錯，食物又幾好，午市亦可以訂枱。整體格局同一般酒樓分別唔大，夠光猛，午市時段坐滿客人。我哋一行其實得7人，都預咗坐大廳，但估唔到安排咗個細房俾我哋，令我哋可以靜靜侷傾偈無騷擾。除咗指定嘅點心紙之外，介有一張午市自選優惠套餐，包小食、3客點心、小菜、炒粉麵，定價$328，食得過，再加幾籠點心就夠晒。順帶一提，茶錢收$12位，另收加一服務費。金磚豆腐 $48呢個算喺餐前小食，喺舊同學推薦，佢話同啲同事嚟食晏都不時會嗌。粒粒丁方大細，一口一粒，粒粒炸到金黃，入口外脆內軟，有豆香，沾點喼汁，平衡番啲熱氣感，好食到一粒接一粒。海東軒蝦餃皇 $48套餐無得揀蝦餃、燒賣，同學又想食，散點番兩籠過吓口癮。分享籠蝦餃皇先，外型都幾工整，摺紋清晰，而餃皮煙韌唔黏牙，鮮蝦餡滿清，仲非常鮮甜彈牙。蟹籽燒賣皇 $39個人嚟講，燒賣皇比蝦餃皇差啲啲，一來你見面頭啲蟹籽都喺放得好隨意，雖然唔影響食味，但做得靚啲食起嚟都會不其然開心啲。幸而啲豬肉餡唔太肥，又幾鬆化。蜜汁叉燒（午市套餐）雖然唔喺咩燒味專門店，但店家所做嘅叉燒又確喺唔錯，一來口感柔軟鬆化，二來有甜甜蜜香，又有少少燶邊位，8分瘦2分肥，啱我，唔肥得嚟有微微油脂香。香煎蓮藕餅（午市套餐）墊塊竹葉，觀感都好啲，塊塊睇到厚薄均一，而煎得甘香平均，咬落外層香脆，裡面蓮藕味突出，唔喺話勁溝粉嗰啲。醬皇蒸鳳爪（午市套餐）排骨呀、鳳爪呀又喺近乎必點嘅點心，不愧叫醬皇，個醬汁好香濃，所以，套餐嘅炒粉麵就嗌咗炒飯，撈埋啲醬汁就更好食。而鳳爪炆得透，軟腍易食。香茜牛肉腸（午市套餐）食點心又點可以無腸粉呢？套餐只有齋腸同呢一款牛肉腸揀，當然要後者啦！有別一般常見幾3條腸粉疊起，而喺切好分成6件，仲塞滿晒牛肉，非常足料，而加咗芫荽，更添一份清香感。豉味涼瓜牛肉（午市套餐）小菜類估唔到大家會揀咗涼瓜牛肉，事實上，既大碟，又炒得幾好，幾惹味，好濃濃嘅豉汁，涼瓜苦得嚟帶甘，而牛肉肉質軟腍，炒得夠鑊氣，真心唔錯。鹹魚雞粒炒飯（午市套餐）炒粉飯麵就由小弟揸主意嘅，因為，都好耐無食過呢款碟頭喇。飯粒炒得爽身，食到尾又無話一碟底都喺油，加上好多雞粒，鹹魚蓉隱身喺飯粒中，食到陣陣鹹魚嘅鹹香味，卻唔會咬到鹹魚肉而出現過鹹嘅狀況。紅豆沙（免費）酒樓為咗吸客，對附近大公司嘅上班族都有啲優惠，上文都講過，同行有位舊同學晌附「獅子」銀行做嘢，出示工作證就送糖水，益大家有碗既免費，又起晒沙嘅紅豆沙食，味道仲幾清甜添。老實講，今餐午飯志在一班老同學一聚，友情無價，食都喺其次，不過，當然啲點心、小菜、炒飯都好食，大家就更加稱心啦！但願呢啲聚會枕住有，證明大家行得、食得、瞓得。…Read More

因為要到石籬商場幫手搞活動，到放飯時間就要搵啲地方食嘢，由於身體仲有少少抱恙，想清清哋食粥，就問在地老友附近邊度有粥食，就介紹我嚟專做街坊生意嘅「街粥」。鋪面、內籠都好街坊，裡面無咩裝修，簡簡單單似啲舊茶記，睇地磚都見留下歲月痕跡。唔喺嚟食裝修，所以，出品嘅定價都極相宜。餐牌都好簡單，一版喺乜粥第物粥，另一版就喺啲小食，仲兼賣少少港式甜糖水。蒸腸粉 $12/4條、$15/6條眼前呢兜喺6條嘅份量，真喺非常大碟吓，咁嘅價當然喺來貨啦，所以，無抱太大期望，志在食飽嘅。撈上大量甜醬、麻醬同芝麻，本應諗住好穩陣，但唔知何解，超鹹，再細味又唔似豉油嘅問題，反而，好奇怪喺甜醬嘅問題，甜醬好「鹹」，實在離奇囉！魚片雞粥 $26講明喺粥鋪，啲粥好唔好食先喺重點，先講份量，確喺夠大碗，仲有唔少魚片同雞肉，仲好大嚿，魚片都幾鮮甜，雞肉亦好嫩滑，但個人就覺得啲粥綿得嚟有啲餬，口感比較杰身。由於無期望，所以，就無失望，目標都喺填飽肚，不過，啲腸粉嘅味道確喺有啲奇怪，只可以講，咁嘅價錢，咁嘅份量，仲想點吖！…Read More