小小嬰兒's Profile

嗌咗個酸菜魚飯同埋傳統雲南米線。先講米線，問佢裏面有咩材料，佢答唔出，要入去問廚房，之後先至答有啲腩肉，有啲菜咁樣，上到嚟份量好少，有兩嚿肉，兩塊火腿，重點係好難食。然後個酸菜魚飯，佢上錯咗酸菜魚米線，我話你比錯咗我，佢仲話咁你可唔可以照食，我話我要食飯，然後好明顯佢只係將個酸菜魚米線嘅米線撈走咗，然後比多碗飯俾我，都唔緊要，唔係咁大問題。問題係乜嘢，問題係真係好x難食，冇辣味，剩係得醋酸味，魚肉又係得幾舊，其實唔知係咪應該多謝佢份量咁少，因為都真係幾難食。。應該係我人生之中食過嘅酸菜魚裏邊top one難食。難食到我夜晚瞓覺都會諗點解今日要食呢兜咁嘅嘢。難食到我想比正評佢，等大家一齊中伏。當我對面食緊米線個位喺度狂講佢碗米線好難食嗰陣，我叫佢試吓我個酸菜魚，就知你嗰個其實都唔係咁難食㗎啦。問心價錢又唔算貴，兩兜嘢+2杯嘢飲$150有找。但係份量同埋味道真係$50都比多佢。…Read More

原本係OpenRice嗰度訂咗食生日飯，亦都準時到達，最後餐廳應該冇mark到寫咗我缺席，都幾無奈。。（寫咗一次話未能刊登要我提供訂座編號，但係冇一個位可以提供，除咗寫喺呢度我都唔知寫去邊度啦，其實OpenRice應該係會有record，如果我冇食到嘅話邊度嚟嘅相請問？20230129551483-1）食物質素還可以，係上菜速度比較慢，好多嘢食晒一個餸，下一個都仲未到，有時咁啱個餸係青菜，咁我好難食晒成碟青菜，之後等完一輪，先至到下一個肉菜咁。所有食物中規中矩，其實係OK嘅，個人來講就覺得還可以，同行兩位朋友就覺得幾唔錯，所以都冇乜特別評價。侍應幾位姐姐嘅態度都好好，如果想同班朋友食下中菜，其實成個體驗應該幾好嘅，真係最大缺點係上菜速度慢。但我就唔知係咪淨係我哋嗰台先係咁，因為見到其他枱都可能係起碼兩個餸同時到達？最後一個黃金蝦球因為我哋係食晒所有嘢之後先至加嘅，有叫佢盡快上菜，反而呢個好快就出咗。…Read More

聖誕節book咗去呢間餐廳食飯，佢之前有問過有冇Christmas set，佢哋答覆就係24號同埋31號先至有，咁我哋正日去呢就純粹食返平時呢一期出嘅dinner set，平時好似預約咗會有20% Off，聖誕當日就冇嘅，不過冇特別劏你一筆，我覺得都算係咁啦。我哋嗌咗兩個378嘅set餐，另外再加咗個薄切八爪魚前菜，連埋set裏便即係會有三個前菜，另外一個係魚湯同埋凍海鮮盤。好老實講，三個前菜我都覺得好一般，海鮮盤有凍蝦蜆肉螺肉同埋生蠔，每一樣嘢其實都好普通，唔甜。魚湯好鹹，後面有問過下侍應，佢哋話傳統做法就係咁，咁我哋冇去過法國咁就印證唔到啦。個八爪魚就冇味，其實我最期待係試呢一個，但就真心冇乜特別。所以食完三個前菜之後係真係有啲失望嘅，開始對成間餐廳冇乜信心啦，但係佢個主菜有驚喜喎！帶咗一個鴨肉同埋一個肉眼扒，鴨好食，原本我對呢個冇乜特別興趣，因為我唔鍾意煮到林晒嘅肉，但係佢呢個面頭唔知係有煎香過定係焗過定係點樣，總之佢個皮係有少少香脆，唔係滷水鴨嗰種皮同肉成個林啤啤，薯蓉都好食，係嫌佢有少少太濕，因為佢嘅汁其實都幾水下，落咗落去就會更加濕。講埋個肉眼，其實我哋原本都有糾結要唔要嗌呢個，因為肉眼扒周圍都有啦，特登食間法國餐廳食肉眼扒好似好傻咁。但係佢呢個肉眼扒又係好正，雖然佢就唔係好重肉味，但係唔知點解佢整到真係好多肉汁，香港好多地方煎牛扒無論你嗌幾多成熟，出到嚟都唔係你想要嘅效果，但係呢個真係正，唔知係Lucky定係乜嘢，但係當日食嘅時候廚師係真係處理得唔錯。甜品方面就正正常常啦，第一下入口會覺得好正，因為個可麗餅其實都仲有少少脆邊，然後第二啖已經開始林左，同埋食食吓其實都幾膩，可能兩個人share一個會好啲。整體呢間餐廳俾人嘅感覺都好好，侍應嘅服務態度都好好，其實節日要開工真係要體諒多啲侍應，畢竟人人都放假嘅時候佢要返工其實真係慘㗎，但係佢哋全部都好Nice嘅，我嗌咗杯酒最後冇飲晒，佢哋都會關心問係咪唔啱你口味，其實呢間餐廳嗌 set 餐嘅話唔算貴，但係佢哋整體俾人嘅感覺都唔差，其實係可以再試，但係咪話超班？就肯定唔係，個前菜真係一般嘅，下次可以試吓其他嘢睇吓會唔會好食啲。…Read More

聖誕節嗰日lunch去飲茶，喺利舞臺嗰邊搭電梯上去，見到有分5樓同埋5M，因為5樓一開門嗰度我哋淨係見到似後廚雜物房咁嘅樣，所以我哋就上埋去5M嗰度，一出就發現佢應該係VIP房嚟嘅，但因為個電梯仲有人所以我哋都被迫出咗嚟先。然後就有個職員好大反應咁樣衝過黎話你哋唔可以咁樣出嚟，快啲入返lift啦！落返去5樓啦！我哋完全係進退兩難，因為架lift其實已經係有人閂緊門，冇可能咁樣沖返入去，然後個職員又好似當你係狗咁趕走。因為佢成層都係得一台客，其實應該係人哋book咗嘅，隔離其實有個樓梯係可以落返去5樓人哋飲茶嘅地方，即係好多人影相嗰個水晶燈隔離嗰條樓梯。咁我就問個職員可唔可以喺呢條樓梯落去，問咗兩次佢都冇答，淨係係咁好大反應咁話快啲走啦快啲走啦！總之好冇禮貌。然後佢就直程閂咗樓梯嗰對門。我就真係完全唔明囉，你唔俾人上樓梯，咁係因為樓梯上邊嗰層係5M VIP房姐，咁我而家出錯咗，我用返樓梯落返去，有咩問題先？唔得你都話聲俾我聽啊，唔係咁嘅態度下話！OK，之後我哋等lift落返去5樓，其實等咗15分鐘已經有位。先講嘢食啦，因為啲嘢食其實都冇咩好講咁一般，講完。另外其實都仲有個插曲，我哋嗌咗個香片同埋滾水，然後上到嚟，個香片茶壺裏便其實都係清水，佢完全係冇放到茶包，我哋同返其他職員講，佢哋淨係搵個碟仔裝住俾返茶包我哋叫我哋自己放返落去。成件事完全唔知啲職員想點，我理解喺節日要返工可能大家心情都未必好？但係我有俾錢我係客，唔應該受到啲咁嘅對待。又唔係話平，又唔係話好好食，又唔係服務態度好，做飲食最重要都係呢三樣嘢姐，但係呢三樣嘢都冇嘅話，咁就真係差囉。…Read More

招牌pizza正，我諗大部分人睇食評都會嗌呢款，特別係芝士控。先講炸雞，我地嗌左六件芝士味，本身冇乜抱興趣，但味道又比想像中好喎，幾香同入味，又唔會好咸，不過佢似係用春雞黎整，所以其實冇乜肉，同有骨，有骨我接受到，但當然同韓國正宗個種無骨大大啖肉有落差，單純講但味道我覺得ok既。Pizza拉絲出嚟個下係幾爽，食落都幾好，不過因為蕃茄醬唔多，其實食到後期就好似係芝士三文治既feel ，同埋都幾滯，我同友人食咗一件都話，明明只係食左一件就飽左咁。總結，整體而言唔差，經過又諗唔到食咩應該會翻兜。pizza係特色黎，但建議人多再嗌，雖然睇落唔大但兩個人食真係會好滯。炸雞ok既，唔差，但一定會有其他更好選擇。…Read More

今日嗌左個「辣三枚肉沾面」，同行人嗌左個「招牌豚骨拉麵」。先講拉麵，同行人表示同一蘭嘅味好似，其他就冇乜特別講，見到舊紫菜同平時一片片嘅紫菜好似唔同，比較似阿媽煲湯嘅嗰種紫菜，我冇食到就唔評論好唔好食。不過個沾麵就一言難盡，本身中意食日本凍麵熱湯嘅感覺，但首先，佢個麵唔夠凍，似煮完就咁放左段時間涼左既感覺，而且麵質都唔彈唔煙韌，反正就好普通。然後個湯係唔熱既，只係微溫，本身啲麵係涼，沾兩下個湯已經完全凍晒，個人都唔太buy筍用黑椒調味。舊肉我覺得正常，同行人就讚好食。另外一提既係上菜次序好怪，最先到既係可樂同我另加既筍，之後係餃子同同行人既拉麵，我個沾麵最後到，就唔明咁快比個筍我做乜。同埋入面咁細，但就有好多職員係度，個個態度都好似唔係好想睬你咁，唔係話差既，但就好似掉低碗野就走咁，見到有個應該係老闆既日本人係入面，但員工態度令我以為自己去左茶記，就真係太唔似日本餐廳既水平。總括嚟講，食物質素，餐廳環境，服務態度，都冇一樣特別吸引之處，應該唔會再翻兜了。…Read More

同朋友慶祝生日book咗坐室外位兩個人都嗌左today‘s special羊肉 178一份其實整體味道都唔差，都係簡單調味不過個羊肉份量其實好少，得薄薄三塊本身自己都算係細食嗰啲，但係同朋友兩個都食完覺得唔飽感覺觀塘區lunch呢個價錢其實應該要分量多番少少同埋有見其他人嘅相，好似呢間餐廳入貨嘅質量唔係好穩定，有啲同一款餐點明顯睇得出個份量每日都唔同咁，今日唔好彩份量真係細然後每人追加左一份蛋糕，芝士蛋糕普通tiramisu係我同朋友都一致認為比較好食。同埋喺OpenRice book位嗰陣我有寫都係生日，落order嗰陣我冇再特別講，不過佢哋都有係個碟度寫咗生日快樂同埋有點蠟燭，呢樣其實都幾貼心嘅…Read More

講真..d野食真係一般同''漢陽圓''分別唔大個人認為d海鮮個個都一樣味其他肉都係差唔多期望唔高都可以去下既不過呢間野真係好衰囉之前我有打過電話去book位既順便問佢5個人有冇大台佢話有問佢有冇附加費又話冇點知去到得張細台雖然話就唔洗等姐但真係好鬼迫囉我個fd仲要另外加多張椅佢左右都係走廊有冇搞錯呀出入都難真係把鬼火都算啦成班fd出黎玩要開心嘛點知到最後佢比張單我地我地係未食完既佢叫我地比左錢先再食囉火到黎埋算我地比左先但其他野食都收晒仲要本來係話$75@1結果變做$85@1$85我洗食你??我可以去間好d啦仲要我地都未拎好錢我地放在$500零$7但佢要唔知幾多$xx9佢話"你比$7我點找錢比你呀?!"乜料先??…Read More