fanny yanyan's Profile

話說銅鑼灣個間執左，心血來潮，諗住想再食下就去左尖沙咀呢間，當日唔算多人，唔使等位既，咁安排左入面坐，但係我地覺得冷氣唔夠，所以問可唔可以坐餐廳出面既位置，職員話可以啦，但係要我地自己拎返杯水，但係我地係一坐低就想轉枱，掂都冇掂過個杯，咁都算，之後坐出面，一張奇細既二人台，個職員又擺d餐具係隔離張枱，又唔係放我地坐低個度，之後我地以為可以拍埋隔離張枱啦，點知一拉張枱就走過黎話品得，但係一路企係度又唔講野都唔知做咩，咁既服務都要收加一，真係唔會再去。…Read More

當日是星期三的晚上約8時到餐廳，可能是平日所以很少人完全不用排隊，因為這間餐廳沒有訂位服務，只能walkin。我們係兩個女生，都能安排坐一張四人枱，舒適很多。主要我地點了兩籠小籠包，分別是蟹粉同原味，每籠有六隻，皮薄多湯汁，仍然保持到鮮味👍不過就建議趁熱食，我地之後太飽，等到涼左再食就口感差很多了。另外點了蘿蔔酥餅，外面係鬆脆的酥皮，入面有熱的蘿蔔絲，真係好味😊每次我都係必點的小食。我地再點了炒四季豆，比較乾身，但味道都算不過不失。最後重有兩碗湯，分別係酸辣湯同青菜黃魚湯，酸辣湯就味道剛剛好，辛辣度適中，唔會太辛辣到不停想飲水，我本人喜歡食酸既食物，所以酸度可以再酸一點點。另外魚湯就好濃郁好有魚的鮮味，不過湯內有莞茜，可能有人會不喜歡。整體都唔錯，保持到水準。…Read More

我今次其實係食旺角新世紀廣場的分店，星期五晚上約9時到達，但係由於係星期五所以要等位，我同老公兩個人大約等了15分鐘就可以入座。今次叫了個晚餐set，前菜有沙律，黑糖麵包，栗米忌廉湯，個湯好多栗米好甜好好味👍主菜有龍蝦尾配鐵板牛扒，叫左5成熟，肉質都軟身好味，配菜的露筍都好味😊雞肉蝦芝士寬麵，好香芝士重可以拉絲。另外，我地重加左個炸磨菇，好好味，炸粉唔算厚磨菇重好多汁👍呢個set都好夠兩個人食，我地最後都係食唔哂，依家匯豐信用卡重做緊優惠，不過星期一至四就抵食d。…Read More

我一向都好喜歡泰國菜，甜甜酸酸真係好開胃，今次我地一行6人，可以試到多點款式的菜，首先泰國菜點可以冇生蝦，雖然唔係大隻，但係都算係新鮮蝦👍生菜包就不過不失。炸蝦餅好正，脆卜卜好有咬口。菠蘿炒飯就有點驚喜喇，以為唔會好特別，但係又好入味好香，好快就比我地食哂😊另外，叫左黃咖哩雞，呢個咖哩加埋薄餅一齊食，真係好好味👍要數最特別應該都係呢個燒豬脾肉，肉汁鮮味，唔會好多肥肉既感覺，好香比平時食開既串燒更正，呢個一定要試。呢間餐廳d姐姐真係泰國人黎，如果有客人咁岩生日，佢地會唱泰文生日歌比你聽，芒果燸米飯做生日蛋糕，好好氣氛架。…Read More

今次係我們一家四口同爸爸慶祝生日，本來傳統的他說要吃日本菜，我就係附近找了這家評語還不錯的試試。當天是星期日晚上6點半，我預早一天就預訂位置了，我怕會很多人要等很久呢。餐廳的服務很不錯，我們早到了10分鐘都可以進去，一坐下就有人給我們倒茶，他們的煎茶很好飲👍之後我叫了燒鰻魚丼，新鮮好味加埋醬汁很好吃，雖然細細碗但已經飽了。另外，媽咪叫了玉子蛋牛肉丼，她很餓呢，幾分鐘就吃完，我還來不及試食呢，不過她說很香很好吃呢。我弟就叫了招牌北海丼，因為我不能食生的東西，聽他說魚生都很鮮味，很多種，感覺還不錯，他還另外叫了個日式蒸蛋，味汁很濃，好食的。最後，我爸叫了個烏冬套餐，前菜選了蝦沙律，主菜有鐵板炒雜菜烏冬，另外再加個迷你魚生丼，他的套餐最豐富最划算呢，可是他食不完，我幫他食了炒烏冬，都好食，不會太咸剛剛好。總結來說，食物味道都不錯，價錢在太古城來說算便宜，服務不錯，不停會有人幫你加茶，人流也算多，上餐也很快。…Read More

今日就去左試呢間個早餐，由於太肚餓喇，所以決定黎食個豐富既all day breakfast再加個通粉，實在係太邪惡喇。我就叫左個炸魚柳，魚柳炸到脆卜卜，魚質都還可以，沒有太重的急凍味，炒蛋好香好滑，麵包就邊面脆皮入面好鬆軟，咬落去似蛋糕，另外加左個羅宋湯細通粉，湯味都濃郁唔淡味既，蘿蔔蔬菜都有幾足料，雖然咁既早餐要45蚊，不過就食得好飽，值得既，媽媽話最重要係食個飽既早餐嘛，我都推介間中黎食下滿足下自己。…Read More

雖然最近幾日的天氣都開始熱，都係無阻我地打邊爐的決心架。今晚就一行三人去左觀塘打邊爐，我地book左夜晚7點，雖然都重係放工時間，但係餐廳入面就唔係多人，都係得幾枱客唔係爆場，不過咁重好，唔使爭野食又冇咁嘈。我地食放題打邊爐90分鐘，揀左最平個款$168黎食，因為我地三個對食物質素都唔高要求，最緊要食得飽唔會肚痛就得喇。講到明係放題就自助式，醬油同蔬菜個d就自己去夾，呢個價錢黎講款式都算多，湯底我地就揀左蕃茄同泡菜，正正常常既味，冇咩特別。我地都唔算大食，都係再叫左兩次加肉就冇再加喇，之後甜品係milk top既雪糕，我就重有d咳所以就冇食到雪糕喇，不過朋友就話都ok架，整體黎講呢個價錢都值既，夠鐘都冇趕我地走，我地都係食飽傾飽自己走既。…Read More

今日同老公兩個人諗唔到食咩，又唔係好肚餓，就食下份量少d既餃子啦。呢類餃子店通常都係地方細，坐得唔太舒服架喇，所以大家就唔好太大期望可以慢慢坐慢慢嘆喇，但係都係衛生乾淨既。我地叫左個牛展飯，個飯底好硬，冇咩汁，食得有點辛苦，太口乾，但係又唔想叫野飲。再叫左個煎芹菜豬肉餃，黎到個樣係炸既，咬落去都脆皮，唔算好多油，味道還可以，豬肉係多過芹菜，兩樣野加埋100蚊，不過不失啦，又唔係會想返轉頭再食既野。…Read More

依家呢種非連鎖集團既小店真係賣少見少喇，我本身都鐘意食餃子，有時間都會同阿媽偷下師學黎包下自己食。今次呢間就叫左個湯既白菜肉餃，粒粒都脹卜卜，又足料同入味，個湯底又濃郁但係又唔會好口渴。另外再叫左個煎既韭菜餃，粒粒都煎到金黃色，咬落重脆卜卜咁，好味，加埋d惹味菜浦真係無得頂呀，價錢真係唔貴重好抵食添，40幾蚊真係可以食得飽我喇，係環境唔會坐得好舒服個隻，食開茶餐廳既我就當然冇問題喇，如果鐘意坐得舒服既朋友就可能未必鐘意喇。…Read More

因為咁岩去大埔玩，就近近地去大埔墟街市熟食中心食午餐喇。係街市食野真係好熱鬧好有風味，餐牌上面都有好多選擇，一個粉/飯包野飲係五十幾蚊，我就叫左個泰式菠蘿炒飯，一黎到個份量嚇死我，係成個碟滿，都好高身，有穫氣都幾好味。另外朋友叫左濕炒雞肉河，份量都係好大，不過就太多汁唔夠河粉喇，但係味道都可以重有好多伴菜，套餐包凍飲或者熱飲，都抵食架。…Read More

兩個女仔心血來潮想食小炒小菜，就近近地去左呢間，係附近住左廿年都未食過。我地8點入到去，唔算多人可能重算早，我地叫左個豉椒炒蜆，蜆都唔係細細粒，d肉手指公頭咁大到啦，個汁就唔夠辣，唔夠野味。另外叫左豉汁皇炒鵝腸，都算爽口入味，口感不錯。重叫左碗蠔仔肉碎粥，一碗都夠哂我地兩個女仔食，好彩冇叫一鍋，料就足夠既，不過就粥底較稀，味道就唔太夠，我地要落好多胡椒粉先食到。整體黎講食物味道一般，但係d職員係咁狂sell佢地既孖寶套餐，多數都係海鮮，我地都食唔到，又成日走過黎收野，好似想趕我地走咁，個感覺就唔係咁好呀，呢樣就有待改善。…Read More

呢間係由之前既細舖搬去大舖，依家光猛好多，座位都多左同闊落左。我同朋友係平日夜晚7點半到去食，都冇咩人，座位任揀，呢度我地食過幾次，最好食係燒豬頸肉，我就嗌左個豬頸肉飯。另外朋友就嗌左豬頸肉湯濛粉，叫湯粉既話豬頸肉係分開碟上既，唔會整淋哂d肉👍湯粉同飯既份量都夠食，朋友話個湯底好飲，飲完都唔會口乾冇嗌野飲，應該就唔係好重味精既。重點個豬頸肉燒到好香口，肉汁juicy，邊位有少許硬，但係味道都幾好，會想食哂佢，價錢方面就五十幾蚊，不過要加一，可以一試既。…Read More

我呢d港女諗住放假就去浦下cafe啦，係上網見到所謂既網紅開既，又見個裝修好似幾靚就去試下啦，點知就中伏喇😢首先個地點係好方便既，一出地鐵站轉個彎直行就到架喇，一出電梯睇到好嘈都知那野，雖然已經book左位，但由於d位係好近，我地兩個女仔打對面坐，但係同隔離枱係近到聽哂人地講咩。我地個日就好肚餓，叫左櫻花蝦意粉，個粉就唔夠煙韌，又唔夠汁個口感好乾，但係味道係還可以，但賣相就好一般。另外，叫左牛扒粉意粉，味道就香口d但係就好油膩，好似每啖都食緊油咁。最好味既就係兩杯沙冰，分別係芒果同草莓，雖然都係溝出黎但係唔會太甜。最後打卡cafe當然就係要影相啦，去得既都係狂自拍既港女，我地等左差唔多成半個鐘先影到，所以都等到冇哂心情喇，影左幾張就閃喇。小插曲，由於d枱係好近，我地隔離枱既兩個女仔叫左個綠茶梳乎厘，個賣相成pat綠色既米田共咁，一上枱個兩個女仔o哂咀，慶幸我地冇叫甜品。…Read More

本身滿心期待去食呢間養心殿，因為個個都話好正，去到個環境都算大，個裝修都叫靚，好中國風。講返食物，我地3個女仔食叫左個少辣既麻辣鍋，一黎到有好多紅椒，一開蓋個味好勁，本身都驚食唔到，但係食落都ok, 入到口既我都唔係好食得辛辣既人都可以接受，另外叫左個雜菜拼盤，份量細得可憐，一個人食都嫌少囉但係盛惠60幾蚊😫魚皮餃，貢丸同墨魚丸都係40幾蚊但係得4粒，真係唔夠分囉，個手切牛肉係最好味，但由於都偏貴，要成200蚊碟，最後冇預期咁好食，性價比低，職員態度差，叫極都唔應，尖沙咀呢間係地庫收唔到上網，個wifi又差，我就冇下次喇。…Read More

當日去既時侯係夜晚八時左右，都要排隊，但係我係兩個人就等左十分鐘就入得喇，雖然我地係兩個女仔，都叫左八樣野，流沙奶黃包（係豬仔造型，味道唔錯不過出到黎又唔係好流沙），蝦餃同燒賣都算新鮮好食，沙嗲金錢肚好軟身d汁又好入味👍菜苗餃，小籠包就好一般，可以唔使嗌。另外，紅油抄手就岩我地呢d食bb辣既人喇，小小辛辣味又甜甜地，易入口，正！最後食埋個原隻陳皮燉雪梨，味道好清甜，呢d天氣食黎潤喉嚨岩哂。整體黎講佢d野食唔錯，不過職員唔多，我地食緊第三籠野食都冇拎茶壺比我地，要我地叫左兩次先比我地。另外千其唔好嗌茶飲，佢個價錢係逐杯計，一杯成十幾蚊，好唔抵，好在職員都誠實同我地講係一杯既價錢，我地即刻唔要喇。野食上枱都好快，不過枱就較細張，我地嗌左八籠都唔夠位放要疊高，個場地就較細，如果多人去食就可能要分枱喇，依家佢算新開試業中剩係收現金，記得禁夠錢去喇。最最後，兩個女仔食八樣野係超級飽，完。…Read More