F.W.T.1028's Profile

之前都係食尖沙咀嘅Doraya,今日過海就嚟呢間食。每次例牌都叫三併魚生飯，一定要叫甜蝦他他、藍鰭吞拿魚腩，另外兩款今次就叫吞拿魚腩蓉同三文魚。另一半就叫炸豬扒定食。我個飯好快到左，先講我最愛甜蝦他他，佢望落去就似打邊爐叫嘅蝦滑，食落非常鮮甜，一份有30g,真係有衝動想叫兩份😍呢度出名藍鰭吞拿魚扒，梗係要叫啦。呢款個面輕輕煎過，一咬落去好香又唔會好漏，雖然得三件，每件都係厚切。至於吞拿魚腩蓉當然冇藍鰭咁香，唔雖特別好味，三文魚係厚切，但係魚味偏淡。另一半嘅吉列豬扒定食就等左十分鐘，塊豬扒應該唔係一塊過，佢兩邊啲肉有啲唔同，就咁睇都睇得出係併出嚟。而啲炸粉唔算厚，但唔係好鬆化。就於唔係專門食炸豬扒，所以佢整得算係咁啦。…Read More

星期五晚同另一半食晚餐，見呢間餐廳評分都幾好，嘢食相都唔錯，又喺Open rice 訂到位就試試。餐廳喺亞士厘道啲舊商廈，環境唔係好好，餐廳屬於causal 嘅cafe ，地方唔算大，未夠7點其實都8、9成滿。我哋坐低問waitress有咩推介，佢係咁講晒menu每項....最記得話個湯新鮮食材打成，好值得一試，我哋睇一輪揀左二人餐。揀餐湯時侍應已經講唔慣凍湯真係唔好揀，但另一半唔食蠔，只可揀凍湯。蠔湯好重蠔味，有忌廉但唔漏，有機會再嚟都想試佢嘅栗子湯。但另一半話凍湯就好怪，唔係話好青味，但真係飲唔慣，侍應果然夠坦白。小食我哋揀咗田螺薯蓉，配青醬嘅田螺肉油左少少但味道係好嘅👍🏻底嘅薯蓉好好味，知會肥都要食晒。主菜牛臉頰唔會太大舊，兩人分係剛剛好。紅酒汁令膠質重嘅臉頰肉食落冇咁漏，牛肉燴得非常嫩滑👍🏻👍🏻👍🏻羊架有四件，食左兩件先記得影。雖然叫5成但有兩件煎到7成，但肉質都okay，味道好香👍🏻另一半食完一啖即刻叫我快啲趁熱食。周圍配菜亦烤得好好，唔會油到你唔想掂。仲有甜品香蕉班戟，我唔記得影，但成口cream麻麻地喜歡。整體嚟講係有驚喜嘅，細細間樓上cafe，食材有呢個質數，實在值得一試。…Read More

試過因為唔同原因都係差少少先食到呢間麻辣火鍋店，今晚終於訂左檯又出席到喇。訂檯時見到佢有啲優惠卷，不過以海鮮為主，一買要買二人份的，我同另一半都食唔到咁多，如果中意食火鍋有海鮮嘅其實都真係幾抵架。我哋訂左6點，未夠鐘就入去食，竟然已經有幾檯食緊？！好生意到呢。點菜喇，有得雙併實在太好，我哋揀咗麻辣少辣併半隻醉雞鍋。火鍋料揀左薯仔片、薯粉、牛肉併豬肉，黑栢葉，鴨血。鍋同料都好快到，醉雞嗰邊好香酒味，好足料咁。麻辣嗰邊滾起左，我哋即刻淥下牛肉先。個湯麻同辣好balance，少辣又真係少辣，雖然我怕辣，但都係忍唔住好多嘢都淥麻辣嗰邊😆醉雞嗰邊聲稱半隻雞，梗係冇半隻雞咁多啦。啲雞肉都好嫩，雖然唔係好入味，應該都係就咁擺落去個湯。湯底好香酒味，淥菜最好味，啲菜梗加甜。講下啲料，份量唔算好多。要讚個黑栢葉，淥耐啲都好爽口唔靭，又夠大片👍🏻鴨血浸耐啲入味啲，都算滑嘅。薯粉雖然大片又厚，但係好快熟，好Q好好味👍🏻豬牛冇乜特別。整體嚟講係好食嘅，呢間店開左都一段時間，比起而家乜乜過江龍佢啲食物簡單啲，冇話擺得好精緻，地方都唔係好企理。我哋叫咗唔算多嘢食，埋單每人3百幾蚊，唔係話好抵食咁啦。不過都想搵次試下晏晝啲小菜。…Read More

星期五食晏，好彩早嚟搵位唔使等，晏晝有定食所以好多人食。我叫了千兩刺身飯。上菜時見到兩隻蝦真係相入面咁大！超新鮮！蝦肉鮮甜，食埋蝦頭都得，正明夠新鮮👍🏻其他刺身都好味。吞拿魚都唔係俾平日cheap cheap位喎，都okay👍🏻連件蛋卷我平日怕佢甜呢度都整得剛剛好。埋單128加一，呢個價錢算係咁。…Read More

不溜唔特別好有機嘢，但有人介紹呢間餐廳好好味，於是決定晏晝嚟食Lunch。好彩有book檯，食飯時間都幾full。舖頭裝修好舒服，唔會好作狀好多木同花花草草。左邊有啲櫃賣有機product。右邊掛左好多貓同雀仔嘅畫，仲mark左價錢。欣賞完畫就點餐，我叫左個燒春雞set跟藜麥沙律，加$18有雪糕或咖啡。先講係藜麥沙律，我好似冇試過藜麥，都知佢係啲super food 有N樣好處，食落冇乜特別味道。個沙津醬似芝麻醬加醋，好開胃👍🏻烤春雞啲肉夠嫩，加埋個磨菇汁好夾，啲薯仔都重薯仔味👍🏻呢個期間限定嘅榴連雪糕，食落唔算好濃榴連味。平日食有好多榴連肉嗰啲雪糕會有胃氣，呢個食完又冇胃氣又唔臭🤔唔夠真材實料？呢枝黑麥好過癮，冇酒精架😂😂😂只有啤酒嘅小麥味埋單其實每人真200幾，好耐先食一次都幾好嘅。…Read More

星期六喺中環買完嘢就同另一半過嚟食嘢，我哋食過佐敦嗰間，雖然嗰間唔就腳但好好味。今日試中環呢間，地點方便過佐敦，舖頭就細過嗰邊，好彩唔使等位。我哋點左麻辣大盤雞加兩條biang biang 麵，同埋炒薯絲，兩樣都係小辣。感覺上中環呢間嘅大盤雞好似俾佐敦店麻味重啲，同埋啲麵林身啲，佐敦店好似煙靭啲。呢碟炒薯絲都唔錯，酸酸辣辣，炒得爽口嘅。食完我哋傾左一陣偈，由於冇佐敦店成日有人等位，所以我哋可以坐左陣先走。…Read More

今晚同一班同事一行6人過嚟食飯，本身決定叫兩個鍋加碟泡椒炒菜同辣子雞，但個waiter話驚我哋叫太多，減做一個鍋，另一個啲送加落辣子雞，我哋兩個鍋都叫香辣，雖然呢間嘢叫麻辣派對，但佢啲香辣好食啲🤷🏻‍♀️不過我哋覺得唔應該減個鍋，加左落辣子雞嗰啲送好少lor!唔夠食！午餐肉每人都冇一舊，啲薯仔就夠多，而且真係好好食。下次咁多人要叫兩個鍋先得。…Read More

呢間食台灣菜嘅餐廳都幾出名，因為大家都係主要為影個裝修嚟食，懷念以前喺小學嘅日子。一兩年前嚟食過幾好味，今次係我第二次嚟，就帶另一半嚟食嘢。我哋叫左豬手、滷肉飯、滷水拼盤，飲黑糖啫喱奶茶同熱mocha。豬手滷得唔入味，滷肉飯都係一般，唔算整得好香令你好想食啲滷肉嚟送飯。個黑糖奶茶係真係幾好味，黑糖整做啫喱好特別，都唔會太甜嘅。呢個滷水拼盤算真係好一般，味道偏淡～啲食物唔入味酥炸雞扒都係好一般⋯炸得唔香。雖然係即叫即整，只係熱辣辣但唔好味總括嚟講，我覺得佢哋嘅水準係差左，而且喺觀塘工廈嚟講啲食物價錢唔平添，希望佢地雖然出左名都可以提升返以前嘅水準啦。…Read More

星期五夜晚同另一半喺公司飛uber過嚟，好彩7點幾仲有位，由於佢媽咪有會員優惠，所以有啲嘢可以半價食，嘢飲又可以upgrade 大杯👍🏻等等下Auntie 太肚餓而最快嚟嘅係薯條！OMG新鮮熱辣辣焗起係完全停唔到口，啲芝士真係要趁熱拉到絲就好食，一凍左變一舊舊就唔好味喇。呢個沙律一般般啦。拼盤有薯皮、水牛城雞翼、炸蝦同炸雞柳。我最想讚個雞柳！我未食過炸得咁嫩架喎！非常好食，至於個雞翼都幾夠辣。薯皮又係要趁熱，芝士一凍又唔想食。炸蝦就冇乜特別，炸粉好厚。牛扒有半價超抵！Auntie 中意熟啲咁就叫左7成，都燒得啱啱好。不過埋單時真係要睇清楚，錯左兩次喎！三人食飽飽都係幾舊水👌🏻…Read More

喺大坑呢頭其實都唔少嘢食，我同另一半喺人哋ig見到呢間小店新開嘅，又係我哋最中意嘅酸辣粉，所以開喺一個都幾吊腳嘅位都想去試試。我地由天后地鐵站行過去都要十分鐘先到，舖仔細細好彩仲有位姐！店內裝修係走懷舊路線，睇得出係好用心佈置，仲要播埋N年前啲港產警察片。點餐係喺過膠餐牌上圈你點嘅菜。我同另一半都點酸辣粉、青檸梳打，同一個麻辣手撕雞。酸辣粉我哋叫左牛柏葉、午餐肉、鮮腐皮，另一半嗰碗都係，佢仲叫左娃娃菜添。碗粉其實湯底唔算好出色，酸辣都有但唔係好香好惹味嘅湯。鮮腐皮好滑，係起其實某啲米線店嗰啲似膠質嘅腐皮好食得多。麻辣手撕雞都唔錯👍🏻個汁夠香。我見到有人點炸雞扒，好大塊好神似唔錯喎。不過由於小店新開，店員落單、埋單有點混亂，佢哋好似係家人朋友夾份開做埋樓面，所以唔似做開飲食。而且用那張過膠餐牌點餐有個問題係，店員要再寫單，點解唔印落單紙呢？另一半嗰碗漏左娃娃菜，野飲都係漏左要開聲追佢先有。值得讚的是店員忙都好有禮貌，希望佢地多啲經驗之後會有進步啦。…Read More

由於好晏先食完午餐，而且嗰餐超級漏，所以另一半提議我哋清清地食碗粉麵。嗰陣係大概六點，但入面都係九成滿座。我試過晏晝嚟係排隊架！入面嘅伙計都唔少，而且手腳快，又唔會話出名多人幫襯就鬧人。今次我叫左四寶河，另一半食魚角魚片河。四寶係唔止四樣嘢架喎！豬肉丸、魚皮餃、墨丸、魚片、魚旦、魚札。特別想講講魚皮餃同魚札，魚皮餃個皮唔同一般食到嘅，個皮係一塊厚嘅魚肉做嘅，而且冇平日食嗰啲咁漏！魚札係我未喺第二度見過，都係魚肉做皮卷住啲長條型嘅肉、木耳同一舊嗰知係蕃茄定紅椒嘅蔬菜，食落幾特別，我見到有人外賣魚札添。另一半嘅魚角又係好好味，厚厚的，連佢怕魚鯹味都好中意食。兩碗河粉每碗30幾加9蚊有嘢飲，如果想平平地喺銅鑼灣呢頭食一餐都係唔錯嘅選擇。最好係食完唔口渴…Read More

心血來潮好想食麻辣派對，另一半又唔方便出街，於是我去買外賣。我唔知呢間同金百利店係咪唔同，上到去個餐牌都唔同，呢間冇干鍋嘅🤔咁我就叫左其他嘢，見到有酸菜牛肉，即叫，另外一個辣子雞。通常餐廳都係酸菜魚，好少有酸菜牛，因為另一半唔食魚，所以叫牛，牛肉都幾多，不過浸得耐都有啲老。主角酸菜好夠酸，成兜湯又夠辣，好開胃呀😆香口嘅辣子雞冇酸菜牛咁辣，又係好好送飯嘅，雞件唔算好多嘅。外賣味道質素都咁好，堂食應該都試得過。兩人埋單130，外賣有九折呢。…Read More

把口話要減肥但星期五又想同另一半食餐好嘅犒賞下🤷🏻‍♀️於是睇下有咩川菜(又)，係呀我唔食得辣但又中意香口嘢。星期五晚市時間都有8成滿，我哋係少數嘅香港人，差不多每檯都係講國語的，以佢地咁中意食辣呢間啲小菜應該都幾辣下，淨係開胃嘅兩小碟我都唔敢食咁多。我哋兩個都好餓又攰就好快落單，啲送都好快嚟到。呢個涼粉真係好開胃嘅涼拌菜，一啖食落去係好香口嘅辣味，初時唔覺辣但慢慢就好覺，食完覺得有好輕微嘅麻痺，其實幾送飯嘅。呢個干鍋雞件雖然餐牌都有兩隻🌶🌶，但冇涼粉咁辣。平日食麻辣鍋都係感覺個口麻，呢個係炒到花椒同其他香料好出味👍🏻不過呢個鍋係妹仔大過主人婆，入面好食嘅唔係啲雞，啲雞肉醃得有點咸而且食落有啲乾，最好味係索晒汁嘅粗條薯條👍🏻呢個泡椒牛柳落單時我哋叫小辣，又真係做到小辣喎👍🏻👍🏻我食得冇咁吃力。不過唔係話炒得好香口，而牛肉要讚佢炒得唔韌，啲肉有少少筋食落有啲彈牙添。老麻炒手嘅麻又唔算令人個口好麻痺，不過加埋啲唔知咩香料同苦苦地嘅蒜蓉食落有啲怪怪的。薯絲加左醋炒好香口開胃，食到都飽但都想夾多幾「住」入口。其實每碟都唔細架，兩個人都叫食得曬啲送，埋單人均280，都算中價啦。最尾有個扣分位⋯洗手間衛生欠佳。…Read More

星期五係我生日，另一半專登搵一間有得食生蠔嘅餐廳❤️上OpenRice 見到呢間食fine dining，於是就訂檯喇。當晚我哋遲左半個鐘先到，因為唔會做兩轉檯，所以遲到張檯都唔會冇咗。首先我哋點生蠔先，本人中意食但完全冇特別要求，又咗啱淨返3種，咁就呢3種，餐廳做緊買一送一❤️咁就有6隻喇✌🏻然後我哋點菜係一人一樣，main course 就我叫牛面頰，另一半叫和牛首先上嘅麵包，啲麵包好食，但我想講嘅係兩隻醬，好特別啊！一隻係有孜然粉嘅茄子醬，一隻係辣肉腸醬！跟住我啲生蠔就嚟喇我都係嗰句，冇乜研究😆只係分得出濃淡，啲帶子位好鮮甜呀OMG😱Starter嚟喇，呢個鵝肝凍酥皮加咗無花果，配埋食唔會好漏，就咁食就香鵝肝味。我叫呢個煙燻鱔沙律，啲魚我又唔覺得特別好好食，最特別嘅係舖底嘅白酒啫喱凍，好refreshing 😋呢個係蝦清湯。我影到好似碗中藥😆話說我初頭睇餐牌以為係龍蝦湯😂waitress 提醒我係蝦咋。但飲落飲龍蝦湯味喎🤤不過啲蝦呢係就好爽，但係冇鮮味，莫非煲到冇味？另一半點蟹肉蘆筍忌廉湯，佢對海鮮敏感，比起蝦湯呢個加多啲其他材料應該好啲。佢飲到好重蟹味，我飲到重蘆筍味😂大家對抗拒嘅味道特別敏感吧。相入面黑色嘅係蟹鉗，我都係覺得唔係好鮮味，湯雖然係忌廉湯，不過飲完唔覺得好漏。到Entree 另一半嘅鵝肝好香口🤤加埋菠蘿食冇咁漏，但係呢種小菠蘿太甜喇，配酸嘅會好啲。我呢個蟹肉白菌卷都好好味，好似食春卷咁但唔漏，上面配黑魚子底部配中東米都幾得意，魚子味道重中東米淡口，味道好多層次👍🏻柚子雪葩係食main course 前俾人清清個口，好清新啊😋其實呢個做甜品都好好架。喺飽到7成嘅時候就上main course。呢個牛面頰炆到好滑好冧，入口即溶，個汁好濃，如果唔係咁飽我會食曬佢🤤另一半叫M8和牛，好香牛味，5成熟煎得啱啱好👍🏻肉質仲保持到好嫩滑，食到有脂肪嘅地方真係成個口都好香牛味🤤再點啲鹽冇咁漏上甜品時由於另一半有講係我生日，有一個點左百爵茶忌廉拿破侖，仲有張即影即有添❤️呢間餐廳除左菜色好味有特式之後，值得一讚係一位女侍應，佢應該係比其他侍應高級啲嘅，醒過其他人好多之餘又識得同人客傾下偈講下笑👍🏻我哋兩個都食得好開心😃…Read More

之前約好另一半喺佢屋企樓下食飯，諗住星期五夜晚都係打電話 book定檯穩陣啦，由朝到晚打咗幾次都冇人聽⋯算啦，橫掂諗住過8點先食，要等都唔會好耐掛。當我哋去到真係唔使等位，侍應安排我哋坐最角落近窗嘅二人檯。我哋好鬼餓所以好快叫嘢食。我哋嗌咗枝紅酒所以有碟crab cake送嘅。個crab cake本身啲調味都幾重，唔係好食到蟹肉嘅鮮味，由於係炸嘢我會expect佢個醬可以好似沙律醬咁解膩，但個芥茉醬就起唔到呢個作用。枝酒味道都好酸吓，另一半話唔好味所以唔影🤣跟住係青口，細碟百幾蚊都幾抵食，青口好新鮮（雖然另一半第一隻食到好腥🙄慘），係個汁⋯食下食下好漏⋯因爲白洒蒜蓉之外加埋忌廉⋯所以我都冇點麵包食用nacho 嘅醬焗薯條，初初食幾惹味，越食越覺得啲鹽落咗去啲薯條度灑唔混，有好幾條好鬼咸個生蠔喺上完兩個重口味嘅菜先嚟，三隻都好好味嘅，我係完全對蠔冇研究，侍應叫我順味道淡到濃食，最尾先食嗰隻好鮮甜❤️最尾到呢個牛臉頰意粉，啲牛肉煮到好腍，一咬即溶嘅意粉軟硬適中。係個汁⋯重味得嚟越食越酸，應該都係落咗同一隻紅酒去煮。其實餐廳食材本身唔錯，係調味重手咗，而且冷氣超級唔夠，想快啲食完走，而家夏天出面仲涼過餐廳入面😅…Read More