foodieve's Profile

朋友話要去「勝香園」朝聖，一聽到勝香園呢個名，就會諗起TVB曾經喺到拍過茄牛通嘅戲份。勝香園係以排檔嘅形式經營，十二點八左右去到，等候嘅人非常多。餐廳唔係排一條隊咁等，係要客人自己搵枱等位。由於有唔少外國人到訪，言語不通嘅關係，令到餐廳有啲混亂。最後等咗20分鐘左右先有位。餐牌嘅選擇超級多，建議趕時間嘅大家可以睇定個餐牌先。番茄碎牛炒蛋通粉 （$29）湯底嘅番茄味濃，有唔少番茄肉，不過個湯有少少酸。個人覺得個蕃茄湯未算係太驚為天人，但以性價比嚟講就算係唔錯嘅碎牛炒蛋係類似奄列咁整，蛋炒得唔老，配合碎牛好好食！牛油檸檬汁蜜糖脆脆（$16）呢個係勝香園嘅熱門小食，製作需時，要耐心等候。個包焗得勁脆，牛油味唔重，重點放左係個檸檬汁蜜糖度。檸檬汁唔太酸，令到個脆脆有一種好清新嘅感覺，同蜜糖配合得非常夾，值得推介！勝香園嘅定價非常進取，幾廿蚊就可以食到豐富兼美味嘅午餐，的確好值，唔怪得有咁多人排隊…Read More

「茶芝味」喺葵廣已經開業一段時間，以前奶蓋茶嘅熱潮冇咁瘋狂，行過都唔會見到有人龍。最近，小編迷上咗奶蓋茶，聽朋友講呢間唔錯，所以今日就去買杯試下。晚餐時間去到，有唔少人喺舖頭外面等候，廚房係俾塊簾遮住，出面竟然一個收銀都冇？？？為咗一試佢嘅奶蓋茶，我哋都等咗陣。排隊至到拎飲品大約用咗十零廿分鐘，都可以接受嘅~茶芝味宇治抹茶 （$29）喺openrice見到唔少人介紹呢杯飲品，鋪頭嘅menu亦都標明咗呢杯係「必飲」嘅飲品， 令我對佢都有幾大期望。外觀睇落都唔錯，有一層厚厚嘅奶蓋，奶蓋面曬咗啲抹茶粉，可惜飲落就覺得中伏啦奶蓋嘅芝士都幾濃，鹹鹹哋，味道係ok嘅。茶底就好一般，味道唔算濃，加咗冰仲溝淡咗。小編完全飲唔到宇治抹茶味苦回甘嘅味道，只係清一色得甜味。當然呢樣嘢都唔足以扣曬所有分，芝士同抹茶唔夾先係一大敗筆打芝士嘅時候打到密度太高，如果唔用飲管飲嘅話，係難以一層芝士一層抹茶咁飲。每啖好似淨係飲到抹茶，芝士仲停留咗喺上面。 咁樣形容好似有啲抽象，大家可以想像係凍咗嘅湯結咗層「衣」喺表面，兩者冇辦法一齊飲落肚。飲咗半杯之後，層芝士都好似冇點少到。個人覺得用飲管攪勻嚟飲會好少少。飲到最尾都有啲膩。小編飲過內地嘅「喜茶」，芝士同宇治抹茶係可以配合得好出色，「喜茶」嘅抹茶亦好甘香。因此我覺得「茶芝味」嘅奶蓋茶的確有好大嘅進步空間。…Read More

喺落住滂沱大雨嘅工作天，我同朋友選擇到就近嘅華星冰室。下雨天唔使等位。華星好窩心咁準備咗遮袋，令到大家唔使濕住咁食飯。我會形容華星嘅設計係「現代嘅懷舊冰室」。雖然佢冇陳舊嘅擺設，但係佢嘅設計都有一種令人回到過去嘅感覺。華星冰室都有各種常見嘅冰室美食，不過我都係叫左最常食嘅常餐。常餐 ($42)價錢喺灣仔區嚟講一啲都唔貴，所以平日都吸引好多打工仔嚟排隊等食。常餐可以揀叉燒意粉/通心粉、煎蛋/炒蛋，跟牛油多士，包熱飲。叉燒係半肥瘦，通粉嘅軟硬度適中，湯底幾濃，唔多味精。炒蛋相當有驚喜，炒到滑嘟嘟，仲有好多蛋汁添！！牛油多士係兩面烘底，唔算烘得好脆，但夠鬆軟，ok啦。熱華田沖得唔算濃，適合我呢啲唔鍾意太甜嘅人。華星係唔錯嘅午餐選擇平靚正兼快…Read More

喺openrice見到呢間人氣頗高嘅西餐廳，於是book定枱去試佢嘅lunch。:)餐廳裝修偏復古，燈光柔和，幾有氣氛！可能空間唔算大，會有少少嘈吵。Lunch Set包含蒜蓉包、餐湯/沙律、主菜、咖啡或茶，可額外加錢叫甜品。佢嘅lunch menu定期會轉吓，今期嘅食物種類、肉嘅種類（海鮮豬牛雞都有）都算多，除咗有比較輕盈嘅沙律、意粉，仲有大大件嘅Ribs同肉眼扒蒜蓉包焗得幾香脆，蒜蓉味濃，正！餐湯（唔記得咗係咩款式）味道濃郁，有少少粒粒喺入面。帶子香草忌廉汁扁意粉 ($98)香草味重，忌廉汁濃，個醬汁係無得頂帶子嘅數量多，煮之前有醃過味，略嫌有少少鹹。紅黃椒令個意粉鹹得嚟，都帶有甜味，唔錯！甜品Chocolate Brownie (+$10)味道不過不失，唔算太特別。整體嚟講，呢間餐廳嘅西餐有水準，偶爾想食餐高檔少少嘅lunch都可以揀呢間…Read More

作為深水埗No.1嘅甜品舖，當然要去試試佢啦。「甜入心」嘅座位好寬闊，適合一班人聚會後去食宵夜。呢間甜品舖有鹹嘅食物，包括各類吐司（當日冇吐司，試唔到）、鹹味芝士窩夫、碗仔翅、長洲大魚蛋等等，啱曬唔食甜嘢嘅朋友。碗仔翅+魚蛋套餐 ($28，可散叫)好少甜品舖有長洲大魚蛋食，既然甜入心有，就梗係要order啦！魚蛋配好濃、好惹味嘅辣咖喱汁，冇得揀其他汁，大大粒魚蛋好彈牙，辣得好過癮碗仔翅嘅味道就正常，多啲翅會好啲。黑松露撻 (2件$24)黑松露味極濃，配合蘑菇真係超好食！玄綠是你 ($24)心太軟做到流心效果，流出嚟嘅綠茶漿味道好濃，share嚟食就唔會太漏，雪糕嘅綠茶味就反而比較淡。芒果心連心窩夫 $39份量超大，熱辣辣嘅窩夫好鬆軟，芒果雪糕好香滑，芒果醬甜。做飯後甜品有啲heavy😂芝士焦糖布丁燒 ($32)呢個係店員推介嘅甜品，底層係芝士蛋糕，上面嘅布丁滑溜溜。焦糖味就唔係太出。戀上椰王 ($48)唔記得咗佢嘅全名，只記得佢係新系列嚟。裡面啲料好豐富，有三色芋圓、芝麻湯圓，個底係好嫩嘅燉奶。以為食完燉奶就完？少年你太年輕了~最尾仲可以刮返曬啲椰肉出嚟食佢個椰子係細size，一個人都唔驚食唔曬。呢個甜品好有層次感，幾特別，值得推介！如果芋圓冇咁粉，會更好味。咖啡出浴椰皇子（暖暖地）$36甜品分為上下兩層，上層有個滑溜溜嘅布丁，配合超香嘅椰奶。下層就係啫喱包住啲椰皇，啱曬唔想自己刮椰肉出嚟嘅懶人。咖啡味唔太重。自助果茶 (免費)酸酸哋，食完甜品飲啖會冇咁漏。整體嚟講，「甜入心」嘅食物選擇超多，甜品好有特色，味道唔錯，值得推介！…Read More

喺灣仔區，偶爾想食砵仔糕就會諗起呢間小食店。無他，只係因為佢好抵食，每個只係$4。砵仔糕 ($4)可以揀白糖或黃糖，我就揀咗白糖，唔太食得出椰香味。豆嘅數量唔算好多，堆曬喺一邊。味道OK！…Read More

Dazzling Cafe嘅熱潮已經過咗，而家去食晚餐都唔使排隊，咁就即管去試吓啦晚餐限時1個半小時，每人一定要order一杯飲品。餐廳嘅裝飾好有宮廷嘅感覺，坐得好舒服，唔限時嘅話應該會係一個密密斟嘅好地方。晚餐有二人set，但對兩個女仔嚟講份量太多，所以我哋只係散叫兩個意粉同兩杯飲品。明太子意大利麵 ($98)呢個意粉好值得推介！Dazzling Cafe一啲都唔吝嗇醬汁同明太子，落咗好多，成個意粉都好creamy。明太子好有咬口，意粉都煮到好彈牙紫菜就令個意粉擺盤靚啲，對味道影響唔大。黑松露意大利麵 ($98)相比之下，呢個黑松露長通粉就遜色不少。黑松露味足夠，但長通粉煮得太硬，令到成個意粉有啲乾。白巧綠薄荷歐蕾 ($45)呢杯歐蕾係夢幻嘅粉綠色，好靚！上面嘅泡泡好綿，白朱古力奶味較重，有淡淡嘅薄荷味。烤布蕾栗子拿鐵 ($50)泡泡有啲炭烤味，都唔錯。每人$160整體嚟講，Dazzling Cafe嘅味道唔錯，價錢中等，唔限時會更好:)…Read More

Espuma一向係女生聚會嘅好地方，偶爾都會有朋友話要去食😂今次已經係第三次去食，不過係第一次試佢嘅tea set。餐廳限時兩個鐘，每人最低消費$150。我哋3個人叫咗一個Cotton Candy Fondue Tea Set + 一個意粉 + 散叫一杯飲品，盛惠$466。Cotton Candy Fondue Tea Set ($248)呢個係二人用tea set，除咗有一般餐廳tea set嘅鹹甜食，仲有一個迷你火鍋，我哋揀咗紫米露火鍋。成個tea set靠顏色嚟點綴，擺盤可見用心 佢個底係一個轉盤，方便大家夾到想食嘅嘢。 影相出嚟嘅效果好靚，適合女仔去打卡。食物： 大大粒棉花糖：唔夠鬆軟，好難先扯得開。紫火露火鍋：好甜，建議倒啲芋圓落去一齊煮。鬆餅：會分開上，係第一樣送到嘅食物 。我同朋友都覺得好難食，好似濕咗嘅餅咁， 冇辦法食曬成嚿。炸雞格仔餅：呢個配搭唔夾 ，又鹹又甜，不過雞炸得幾香脆。八爪魚鮮芒莎莎：所有配料都切到細細粒，夾埋一齊幾好味幾開胃，不過就食唔出每樣配料係咩😂迷你炸魚薯條筒：呢個配搭好得意，將三樣脆脆地嘅嘢食加埋，又出奇哋幾好味！係最好味嘅一樣嘢食忌廉粟米肉碎脆卷：個底就唔係好脆，不過啲配料夾埋幾好味。香脆窩夫：唔夠香脆，一般。自家製藍白雲棉花糖：兩種顏色一樣味，棉花糖太濕，一啲都唔好食。 馬卡龍波板糖：只係用竹籤插住馬卡龍，味道正常，中間嘅忌廉應該係加咗食用色素，兩隻顏色食落都係普通忌廉味。雜果：正常燒鴨胸紅菜頭意粉 ($98)原來紅菜頭可以用嚟煮意粉，醬汁整得好食，紅菜頭嘅甜同意粉嘅鹹夾到，調得幾好味。可惜鴨胸太太太韌，咬唔開，大打折扣！飲品： 朱古力榛子瑪奇朵 (熱，$42)泡泡唔夠綿，咖啡味比較濃，唔太飲到朱古力榛子味。水果茶第一啖有啲酸，之後味道好淡:(整體嚟講，espuma係名過於實嘅餐廳，tea set嘅食物味道好一般，飲品亦不值得推介。另外，餐廳服務同衛生有待改善。員工覆咗兩次單都係落錯我杯嘢飲，食食下野廁所條渠仲塞咗，搞到成地係水，我哋要一路望住佢通渠一路食嘢餐廳價錢稍貴，規定最低消費都令到食客缺乏自由度，同價格可能有更好嘅選擇。…Read More

今次係我第一次去深井，當然要試吓總有一間在左近嘅燒鵝飯店。於是我哋隨意咁揀咗陳記。下午茶時段只有小貓三隻，叫咗兩碗燒鵝瀨，好快就送到。燒鵝瀨 ($45，免茶芥，免加一)下午茶冇特別的優惠或套餐，燒鵝粉麵同飯同價。燒鵝瀨有大約七件燒鵝、兩條菜。瀨粉係正常份量，面頭嗰啲有少少碎。燒鵝只有幾件塊皮係燒得脆，有三件左右係厚肉，其他都係薄薄一件。鵝肉係比較肥，每件都有一層厚厚嘅肥膏，開頭食一兩件係OK，後尾就要咬走肥膏，太膩了。整體調味做得幾好，燒鵝再靚啲會更吸引！未試過其他深井燒鵝，所以比較唔到…Read More

元朗有唔少質素唔錯嘅街坊小店，我最鍾意就係openrice碌到底，發掘兼支持呢類小店:)「奴地方」第一樣吸引我嘅地方唔係佢嘅食物，而係佢嘅故事。兩位店主都係狗義工，佢哋致力為流浪貓狗搵個好主人，非常有愛心。大家可以去「奴地方」嘅Facebook page睇吓佢哋嘅故事架！餐廳舖位唔大，但裝修溫馨，啲咕都有狗狗圖案，好可愛。星期日六點半嘅時候食客唔多，但七點幾左右已經坐滿咗。因為有啲位預咗俾客人嘅狗狗坐，當時細小嘅店舖已經坐咗三隻狗狗，所以建議大家book咗枱先去。以小店嚟講，餐廳嘅食物款式都算多，有意粉、日式咖喱飯、豬手、各類小食等等，價錢亦唔貴，四十幾蚊起，加$25可以轉套餐。日式咖喱炸魚柳飯 ($58)咖喱滿佈成隻碟，味道幾濃，唔辣。魚柳炸得香脆，唔錯略嫌個飯有少少硬（呢樣睇各人口味，朋友覺得啱啱好）紅酒燴牛肋條飯 ($78)紅酒味濃，食落有一點葡萄嘅澀味，頗特別！牛肋條亦好入味，呢個飯值得推介同場加映：呢隻狗狗係店主新接返嚟，好乖好痴人，偶爾會喺店內同大家玩。仲重要嘅係，佢同其他兄弟姊妹等緊個好主人帶佢哋返屋企呀，有愛心有責任感有耐性嘅你就帶佢返屋企啦呢間餐廳俾到我好warm嘅感覺，店員好有耐性去介紹餐牌，以及同客人講佢哋點樣幫啲小動物，係好有愛嘅小店食物味道都唔差，值得再去呢！…Read More

「極尚大瀛喜」係我近年覺得好高質且價錢唔算貴嘅放題，試過一個月內食兩次。夜晚九點半後仲有八五折，加埋一都係$230左右。呢間食物同飲品種類多，除咗menu上嘅野食，出面仲有幾十種野食可以拎。飲品就有四五個雪櫃咁多，隨時選擇困難😂呢度啲壽司同手卷都係細細件，可以俾大家試多幾種掛住食淨係影咗刺身，以下幾樣都係推介：刺身：三文魚、甜蝦、赤蝦、帶子芒果蟹肉加洲卷：特別嘅配搭咖喱炒蟹：有半隻蟹咁多，咖喱味極濃，頗辣，食得好爽牛舌、燒菠蘿榴槤炸彈：榴槤又香又甜，炸完都唔會膩乳酪雪糕：香滑，仲可以任揀toppings，不過唔好加熊仔糖，會硬到咬唔到。等等......數唔曬不過可能人太多，員工試過將我同隔離枱啲野食撈亂咗性價比好高，推介記得book枱！…Read More

假日嘅新城市廣場人來人往，即使係下午茶時段，每間餐廳都有六七成full。因為想同姊妹靜靜哋傾吓偈，我哋就去咗Greyhound Cafe。Greyhound主打泰式fusion菜，之前食過晚餐都唔錯。星期六冇下午茶set，餐牌應該同午餐/晚餐一樣，個人覺得以下午茶嚟講算偏貴，普遍食物都要80幾蚊起。馬沙文甜咖哩配泰式薄餅 (~$100) Massaman curry係CNN World's Best Food嘅第一位，亦係我最愛嘅咖喱之一。呢間嘅咖喱味道唔錯，有肉碎同細粒薯仔，但份量偏小，完全唔夠加落每塊薄餅。薄餅有兩種，一種係烤餅（Naan），一種係酥餅，可惜兩款都唔夠熱，食唔到酥脆的外皮，不過就煙韌有口感。感覺一般🤔🤔性價比唔高。…Read More

因為朋友有60幾蚊嘅代用券（每惠顧$20就會送$2），就去咗食沙嗲王啦。以前以為沙嗲王真係食沙嗲，所以第一次食係上年嘅事😂其實沙嗲王似係做fusion菜，但味道就港式啲。今次就揀咗兩個飯。鐵板嬌嫩巨脾飯 ($76 未加一)呢個飯相當有驚喜，巨脾佔2/3個鐵板，冇違反商品說明條例上碟時已經起咗骨，淨低條骨可以最尾先吮。雞皮燒得好香，雞肉極嫩滑，伴碟有少少粟米、車厘茄同西蘭花。巨脾飯會配一種醬汁（三選一），我揀咗招牌嘅白咖喱汁。建議個汁唔好倒落巨脾上面，用嚟撈飯仲好食！一碗汁係夠撈曬成碗飯。個汁好香濃，有少許椰香味，微辣，每次去沙嗲王都必點香芒啖啖蟹肉炒飯($72 未加一)呢個炒飯都好重料，蟹肉有成塊手板咁多，芒果就大概有半個大芒果。可惜一月唔係芒果當造月份，唔甜唔香。個飯仲落咗肉鬆、腰果、蛋、椰菜落去炒，味道合格。要彈嘅係個飯唔夠熱，似係一早炒定。整體嚟講，沙嗲王味道都算中上，但價錢唔算平。…Read More

「車仔麵之家」係灣仔區出名嘅車仔麵店，區內有兩間分店，另一間分店只會做到六點，夜晚想食就只可以去呢間。呢間麵店嘅環境好舒適，唔係一般車仔麵店嘅圓枱，而係有幾張長枱，仲有高枱可以揀，想一個人靜靜哋食碗麵都無問題。下午茶時段係星期一至五3點至6點，兩餸$25，三餸$30，連飲品。我喺接近6點到都買到下午茶。:)三餸車仔麵 ($30 連飲品)魷魚：係呢度好受歡迎嘅餸，唔韌，夠爽夠入味蘿蔔：好鮮甜，喺其他車仔麵未食過咁好味嘅蘿蔔，有意外驚喜！牛腩：較細粒，不過不失，建議揀其他餸。麵底：揀咗幼麵，軟硬度適中。下午茶嘅份量唔知係咪細咗，lunch食就未必夠了。飲品：當時只有紙包飲品同汽水揀。車仔麵之家自家製嘅辣醬做得幾出色，記得加辣呀呢間車仔麵真係唔錯，色香味俱存，仲幾抵…Read More

Jollibee近幾個月積極擴張，開多咗好多間分店，咁我梗係去試吓係咪咁值得食啦今次去咗灣仔軒尼詩道分店，有兩層，lunch hour都唔算多人。一件雞+肉醬意粉+汽水 ($42)呢個餐睇落唔多野食，相比其他快餐店，仲有啲貴添。件雞炸得夠脆，唔會皮肉分離，肉質唔會鞋十十，好食附送嘅醬有啲似KFC蘑菇飯味😂我覺得唔落仲好食。肉醬意粉就非常普通，個醬係甜嘅，啲意粉煮得太腍，唔好食。建議想食炸雞嘅朋友唔好叫呢個餐…Read More