RL1218's Profile

Bookmark 咗呢間餐廳好耐， 咁啱朋友想幫我老婆慶祝生日， 就一齊試下佢。佢有Set Dinner， 包括8選3前菜， 1個Main Course 同甜品。先嚟每枱一籃自製麵包， 可添加意大利醋。 前菜我哋分別揀左巴拿馬火腿、生蝦多士、沙律、帶子多士 (+$18) 、 鴨肝多士 (+28) 。主菜就揀咗龍蝦西班牙海鮮飯、 和牛肉眼同羊柳貓意粉。甜品則揀咗意式燉蛋同Tiramisu。除咗喺甜品碟上寫Happy Birthday 外， 最驚喜係再奉上一杯有貓貓圖案的朱古力俾壽星女， 呢個位超細心， 因為唔係個個都飲咖啡的。服務員招呼唔錯， 亦唔會有任何催趕。餐廳亦無限時， 可以好舒服好開心咁食一餐👍🏾…Read More

朋友話出嚟聚聚順便食生日飯， 就搵啲平日唔多去的地方。 咁啱見到大埔呢間， 超過380個笑的食評， 應該唔會伏卦， 就試試佢。半個月前用open rice app訂位， 首先冇打嚟reconfirm 時間， 唔緊要， 反正自己有mark 低。 跟住寫咗Birthday Dinner，冇提冇問， 唔緊要， 反正男人老狗。今日嚟到， 眼見餐廳幾細間， 只有5~6張四人枱+bar枱， 不過後來隱約聽到好似有二樓。因為只收現金， 朋友就出咗去㩒錢而我哋就睇下食咩， 唔夠10分鐘之內已經問咗我哋兩次食咩， 駛唔駛落單先。 Ok， 咁揀好就叫啦，原本點咗四個前菜， 因為唔知份量，就話主菜之後再叫， 點知居然聽到 “因為我哋用餐時間只有70分鐘， 所以可以order定先再上”。 我真係打個突， 70分鐘？ 連個半鐘都冇， 而家係返工午飯時間定做節高峰期？ 定係旺角大排長龍米豬連？ 計埋我哋諗的時間咪得番一個鐘， 嗰刻真心想起身。 另一個女侍應就話， “其實都會睇番食物出的時間同客人等位情況的。” 咁都正常啲。。。 不過好戲在後頭。我哋前菜點咗 “蟹餅”、“虎蝦沙律”、“香腸拼盤” 同 “法式田螺”。 個香腸拼盤有三款唔同的種類， 配上薯蓉同少少酸菜， 味道正常。 虎蝦沙律就裡面有啲黎麥， 一堆沙律菜同三隻細蝦， 係咪虎蝦就唔知， 但就得三隻， 可能係預俾三個人share卦， 唔緊要， 我對海鮮冇咩喜好， 讓俾其他人食， 啲菜都幾清新。 個田螺有六粒，都係正常嘢， 有薯蓉墊底。 前菜以個蟹餅最好食， 個面有少許煎過，蟹肉亦夠多夠香。嘢飲我哋就點咗4杯夏日推介的特飲， 個名幾好聽 （只記得其中一杯），顏色亦夏日， 但味道就。。。 杯 “美女與野獸”， 有青瓜、橙汁、檸檬汁之類， 張相係橙色的， 但最後出嚟居然係綠色， 亦完全冇橙味， 朋友話似藥水。 而另外3杯就不過不失，但就幾甜，我溝咗三次水。當黎個蟹餅的時候侍應又再提 “用餐時間只有70分鐘， 不如開始準備主菜”， ok， 又再提醒我只有一個鐘， 即係叫我好快啲食吖， 咁就講冇問題啦。 跟住一等就等咗差唔多15分鐘， 我哋都擔心食唔食得切。先嚟過 “卡邦尼意粉”， 中間有隻糖心蛋同幾片Pama Ham，睇食評好似話啲意粉係手工做的， 比一般的粗身， 亦幾煙韌， 所以都幾有口感，但個醬汁有啲淡同浠， 分完第二叉俾朋友已經見到水滴滴咁， 而且分量偏少， 到我碟已經得番一啖， 直頭分唔到第四注。食完個意粉又再等多10分個牛扒先到 （即係用咗25分鐘整）原本係好事，可以俾我哋傾下計， 但以 “70分鐘用餐時間” 黎講就只會係壓力囉， 因為期間班侍應已經不停行嚟行去喺度望住。 好啦， 終於都到，首先 一望配菜又係薯蓉 。 連薯條都唔俾， 可能簡單快趣， 又或者牛扒配薯蓉夾啲卦， 不過有其他選擇會好啲囉。 個牛扒味道其實ok的， 不過只有大概8oz，薄切只切到5.5塊， 已經連埋兩邊的片頭。 我哋用咗唔該10分鐘KO咗碟牛扒， 因為侍應又走埋嚟， 今次已經唔講70分鐘， 係直接話Last Order， 仲有冇嘢加。 個時只係差唔多8點， last order? 算吧，都已經冇mood，當然回應唔駛。 跟住唔駛5分鐘就隊張單埋嚟埋單差唔多一千， 呢餐只能講不過不失， 冇咩特別囉， 但以“70分鐘” （起碼被提醒4以上）， 絕對有更多同更好的選擇，亦唔會有第二次。 出到門口，鬼影都冇隻， 根本就唔駛咁催囉。 嬲嬲地加上完全唔飽， 最後走咗去食碗蛇羹+糯米飯， 仲滿足。…Read More

今日同老婆搵地方食飯， 咁啱經過見到間試業的新餐廳， 就試試佢。入到去差唔多滿座， 不過剛好有個坐緊卡位的客起身， 我哋即刻就有位望下餐牌，唔算好多嘢食， 不過大部份都啱我食， 所以好快揀到幾特別的 “豬紅拼雞扒” 。 而我老唔鍾意食粉， 就揀咗 “豬軟骨拼糠心蛋”， 因為佢食得辣， 湯底就揀泡椒加木薯粉。 再配多個小食， 就要炆冬菇啦。首先冬菇同粉先到。 冬菇幾厚身，而且大隻 （居然同隻蛋差唔多大細），炆得都入味。個湯粉就好多配菜， 芫茜、炸菜、花生，再有一pat應該係辣醬的物體。 試一匙湯頭， 都唔嘢少， 真係幾辣。 個木薯粉就幾煙韌， 唔會煮到好淋。豬軟骨同樣煮得入味， 不過有啲碎， 而糖心蛋有酒香， 亦有流心效果。跟住就到我的飯， 魯肉飯底， 啲魯肉有少少咸， 不過送飯唔錯。 豬紅就有驚喜， 夠實唔會一夾就散， 又入味。 雞扒就正常， 冇雪味亦唔會煎到好乾。So far整體都係唔錯的一餐， 可以再Encore。 老闆極力推介有任食火鍋， 有好多唔同的鍋底， 好似現時好Hit的酸菜魚、麻辣雞煲之類， 較特別就有奇味雞同麻辣牛肋條等等， 下次有機會試下。…Read More

睇咗“Open Rice” 的食評咁多年， 第一次居然有咁大推動力寫食評， 因為想俾更多人知呢間極品！看到是台灣人專登嚟香港開店， 又有為數不少的好評， 咁啱嚟到觀塘就上去試試。6點鐘到步， 大概已有4~5枱客。 座位尚算寬敞， 但冷氣不夠， 以外面超過30度的高溫， 我食完9個字出番嚟都仲有汗滴緊。。。分別叫咗 “牛肉面”、“和牛薯餅配干面”、“鹹酥雞”、 檸檬多多” 同 “鮮果茶”。首先就係 “檸檬多多” 到 （亦係今次重點）。 剛倒出一小杯 （因為係壺上）， 就發現成個壺都係裂痕， 唔係一細條， 係由壼頂到底咁長，仲要入4~5條！ 我都唔敢再拎起， 驚佢成壼粉碎。 咁就叫職員嚟望下， 叫佢換過壺新的。 佢拎咗入去唔夠一分鐘就出番嚟， 然後話 “換過個壺俾你”， 我哋冇聽錯， 係換過個 “壺”， 唔係整個壼新的。我同我老婆 O 哂咀， 跟住同佢講 “你確定入面冇玻璃碎？ 可唔可以整個壼新的？！”， 佢好似好為難咁又拎入去， 今次仲快， 30秒俾番我， 仲要好明顯係用同一壺俾番我。 最後我哋成壺冇用， $40 杯嘢飲我唔想搵命搏囉。講番食物， “牛肉面” （$76）不過不失， 湯頭唔夠濃， 牛𦟌夠淰， 但唔入味。 “和牛薯餅配干面”， 個薯餅食唔到有牛， 似忌廉薯餅， 不過火喉ok， 唔算油。“鹹酥雞” （佢唔係寫鹽酥雞）， 就係一道普通的鹽酥雞， 冇特別。“水果茶” 居然係成晚我覺得最好味的， 果味濃， 有茶香。成餐食咗 $240， 咁的價錢我情願食春水堂台或其他更好的選擇， 起碼唔駛搵命搏。…Read More