Lazy Cube's Profile

約咗一班朋友喺佐敦食大排擋，沿住地鐵站行出去，呢間店個可愛Logo吸引咗我走埋去...原來係新店，應該係試業中... 同朋友仔揀咗一輪，先至決定到叫乜嘢... 由於就食飯，決定唔點珍珠，點咗杯推介（兼喺台灣會飲）嘅「冬瓜鮮檸檬」，刻意叫正常甜正常冰，咁就知道，會唔會係甜到離晒大譜😏結果 - 得喎！個人認為唔會太甜，好飲👍🏻 朋友就試「苿香黑糖珍珠」，都係點正常，評論係都係好飲，啲珍珠口感又真係唔同啲👍🏻下次等我都試吓先（唔知冬日限定嘅薑薑可否加珍珠呢？🤔）…Read More

之前聽講過呢一間鋪頭，好多時都排長龍，尤其是啲大時大節，例如新年要買角仔和蛋散等；端午節就買糭。今日終於行嚟買咗啲小食。包括半磅雞仔餅、一包雞蛋餅，和一件小的燒餅。燒餅一啖食哂，價值$3，唔會好甜，下次可以再買。雞蛋餅有兒時味道😆 好香口，好有蛋味，價值＄12 ,而家唔係好多地方可以買了。半磅雞仔餅，價值＄17，數過一共有19件，味道正宗，會拎啲畀老爹試吓。整體而言，老餅店味道好正宗，值得推介👍🏻…Read More

純粹在佐敦要醫肚，同友人入咗呢間車仔麵食。環境算好乾淨，始終位處一棟新大廈的地下，新裝修唔會太差。服務算中規中矩，落單算快（雖然漏咗份小食，可能無諗到三條女咁大食😆），車仔麵出得都好快。價錢亦可接受，一人一碗車仔麵（兩餸一碗、三餸兩碗）、一碟西生菜，再加兩杯熱飲，總數$156。味道亦算唔錯，辣汁唔算驚喜但中規中矩，魷魚好味；辣魚蛋ok；豬紅唔夠「林」；蜂巢豆腐唔夠入味。整體而言，唔錯，中規中矩😌…Read More

今日係小組久別重逢的日子，本該向外走遠些... 但現實是要OT，還是打算求其附近食餐聚一聚... 心血來潮記起bookmark呢間串燒，提議試吓，當中有人話食評信唔過🙄 但都可以試吓...一行六人，概括是笑著離開，約定重來！整體好滿意，連挑剔的J先生也主動讚好，提議下次再來。上傳了收據，價錢方面可自行評價，但至少我們六位滿意😊👍🏻四款清酒任飲，每位$108，個人認為最後的「男山」太「燒酒」，反而第三款的「松竹梅」為推介。注意最後供應約是晚上11:30。燒芝士年糕六件，一人一件，趁熱食，個個都讚！😋雞尾雖然俾友人歧視我柯打，但至少嚟到清哂😎 唔騷，要求高啲的話係再燒乾身啲。其他食品質數都好高，未能一一細數，可以自己試吓😌…Read More

呢餐目的係同妹夫補祝生日，由於咁啱好人齊，連同姨媽、亞姨、姨丈、表弟等人一齊食～坦白，突然咁多人一齊食，都有啲擔心落樓會好貴... 結果係被我評論為「性價比高」的餐廳，如果再去屯門，呢間絕對係我推介😊由於係午市時段，好多餐都比散叫抵！跟餐嘅蒸蛋大家都讚不絕口，我個人覺得好滑，裡面都有唔少嘅料，好味！而魚生都好新鮮，件吞拿魚腩正到不得了～ 就啱午餐時段，好抵食呀！以呢個價錢同食物質素，我覺得係好划算，亦好多嘢都好好味！…Read More

今日午餐主題係「朋友仔生日飯」，原本想去遠啲，誰知臨時有會開，唯有喺番平時都會光顧嘅Shiro~ 由於唔方便講電話，唯有經OpenRice訂枱，並順道揀埋「生日」呢個已提供嘅選擇...首先要讚，第一次用呢個途徑訂枱，好方便，乜都唔洗講，開會都可以用極速靜靜地訂枱～😜 去到習慣講姓氏，但佢哋都講埋我個英文名去確認，原來感覺幾良好👍🏻一如以往，服務好好，嘢食都好好食。今日同朋友都想食熱食，所以點了「銀鱈魚西京燒」，冇令我哋失望。抱歉冇提供相片係因為平時都有去開，冇特別影😅正當差不多想同朋友叫甜品，當生日蛋糕時，突然送來一份甜品！😲 好nice & 不斷幫我加茶嘅侍應話我地知，係經理送嘅😱 估唔到呀！我都唔好意思，唔知係咪我個「碰杯+生日快樂」太大聲？😅所以真係要寫返個食評讚一讚！👍🏻😆抵我久不久都去食！😋…Read More

第二次來呢間餐廳食嘢，真係要寫吓食評，推介一下。第一次來都唔需要等位，到第二次，就算訂6:15pm，都只係好好彩留到最後一張枱。第一次來，其中一樣係食咗份牛扒，唔喺餐牌上面而係類似廚師推介，可惜搵唔番張相，冇得分享😞今次有三樣嘢，食完之後下次一定要再嚟食！（1）Bruschetta 好耐之前有朋友教過我點整，中間有番茄粒、洋蔥、意大利黑醋同埋橄欖油，調味之後放喺多士上面食。呢間餐廳絕對整到正宗嘅味道！推介一號！（2）黑椒半燒薄切吞拿柳呢個其實自己要整都唔難，不過又係超級推介呢間餐廳，吞拿魚半熟，更重要係佢嘅醋汁調味非常好食！同行嘅朋友都讚不絕口，絕對係推介二號！（3）西班牙蒜辣風乾血腸脆煙肉尖通粉今次嘅主食，雖然冇乜配料，不過好夠味，配埋個sausage，一絕！三個人，其實唔係好夠分😅整體來講呢間餐廳好好食，值得再嚟👍🏻…Read More

食完晚飯，但係口痕，心血來潮買宵夜... （所以肥係有原因嘅😂）買咗一客四季豆，如舊 - 小辣，好惹味！個人必吃！份量差不多係出面嘅一陪（長度已經睇得出）👍🏻 另外唔叫「燒燒賣」，試咗串蒸嘅，反而覺得無咁乾，好味啲👍🏻 至於至愛嘅廚師腸呢... 呢晚老闆應該重手咗，略嫌重味得滯😅其實之前都有食過呢間，第一次叫純粹喜歡就叫，估唔到份量超多，一串雞翼竟然有四隻！但由於好好味，所以都食哂😋 燒鯖魚亦好大份，性價比超高👍🏻 另一推介係酸辣粉，個人選擇走花生🥜整體而言，屬推介的小店。如果揸車，其實可以打電話叫定，差不多時間到取，小店旁有停車處的😊…Read More

去了iSquare睇戲，友人選擇了在同層的這家店吃放題。原因甚簡單，食評不錯，而適逢有放題優惠，更重要係任飲紅酒、白酒、啤酒、梅酒及各類清酒！一到埗，職員便帶我們介紹一下任飲的地方，給簡介一下不同的清酒、梅酒等，亦歡迎我們先試飲。結果我們也很喜歡「角玉梅酒」，亦同時倒了兩酌其他的日本酒。當然少不了就是喝Asahi啦！回了枱不到一分鐘，出乎意料之外地，很快便陸續送上第一輪食物！送上的刺身很新鮮，同時送上的燒肉也看得出絕不求其！刺身拼盤每人有兩隻甜蝦、兩件三文魚、兩件油甘魚、兩件赤身(Tuna)、同埋一件絕不欺場亦無腥味的海膽！值得一讚的是，用的Wasabi是鮮磨的那一種，感覺上已經覺得好抵！牛肉有4款，每人有兩件；豬扒一件（好味）；五花腩每人兩件；一夜魚干每人半條，加一件帶子及鮮蝦！好味～我哋有加其他熱食，包括誠意之作嘅「泡菜豚肉鍋」，豚肉份量不算少，亦有配菇、粉絲、豆腐及菜，味道亦不會辣，正！亦有點南瓜、番薯、冬菇天婦羅，熱辣辣的到來，亦有配汁俾我哋，味道唔錯。食物有水準，飲品種類多，招呼都好好，限時食2.5小時，由於有信用卡推廣優惠，八折後每人$448，性價比高！一定會再去！…Read More

難得比平常早一點出來吃飯，選擇了這家韓式餐廳。今天想食清清地，點了個「蛤仔刀削麵」，蛤仔份量都唔算少（食完數數都有8隻殼），麵條如果下以再「林」一點會更合我胃口，但整體已經很不錯了。湯亦被我喝了許多，只是少不了湯底會有少量的殼/沙，但味道真的很鮮甜。推介！…Read More

印象中呢間舖已經開咗至少六年，之前的鰂魚涌以拉麵來說，沒有太多的選擇，這店可說是必然之選。從前可說是一位難求，唔早啲出去排隊，根本唔洗旨意食，尤其是佢係冇得訂枱嘅。但其實味道都算好ok，大家當然唔好搵日本嘅舖頭去比較啦！冇得話揀個麵質係軟定硬，但我自己就覺得佢適中囉。個人鍾愛味噌湯底，所以有時都幾獨沽一味😅 有朋友就會偏愛有牛油果種。最抵讚，係佢哋嘅水準好穩定。拉麵嚟講，性價比算好高㗎喇！小食方面，通常都會加炸餃子，套餐可以跟三隻，味道唔錯吖。近排去食，試燒牛舌，坦白說，試了就算。好硬...可能近年的鰂魚涌加開了其他拉麵店，不得不承認，那位懷疑老闆娘的態度變了和藹可親一點，少咗個種「寸寸貢」嘅感覺🙊…Read More

返鰂魚涌的人會好明白 - 買早餐係要排好長龍㗎！V8呢間屬於小店，無堂食，齋外賣。早餐有三文治，麵包，可配各式盒裝飲品，亦有提供基本的冷熱飲品，例如奶茶、咖啡、檸茶、檸水、華田等，個人好鍾意杯茶走，友人都覺得佢哋嘅凍檸茶都算好好飲。麵包選擇都好多，腸仔包、提子包、咸牛肉包、餐肉包、餐蛋包、菠蘿包、麥西哥包等等。好彩的話仲會係啱巺出爐熱辣辣！雖然只收現金，沒有八達通，但流程極為順利，找錢極快～ 朝早長龍都排得過！推介～ 但坦白，午餐的話太多選擇，所以一次都未食過😅…Read More

常常找尋好的happy hour地方，年多前經朋友介紹，偶爾成了這家店的常客😅環境：唔會似「劈場」，好企理，客人都係好斯文👍🏻 星期五及六晚會在下層有live，想靜的話，仍可選擇坐樓上服務：週到，貼心，話頭醒尾，亦會願意因應客人需要而特別作出調整。例如我喜歡吃pizza，但友人奶類敏感... 結果可以幫我們特別做「一份有；一半冇芝士的薄餅🍕」讚👍🏻（否則也不會成為常客）食物酒水：食物選擇以pub來說算很多，亦偶爾會加入新食品。推介一款有煙肉的蒜片意粉（如有需要可走芝士😁）、煙燻豬仔脾，仲有Salami Pizza🍕酒水除紅白酒啤酒外，亦有很多款cocktail🍸近期至愛是以Earl Grey為base的一款，新推的。再早期就喜歡Pineapple base的🍍值得一試，再試😁…Read More

星期五，去完會展睇展覽，順帶一行四人去咗happy hour 😁開左一支白酒，味道都唔錯，當中其實都有試一啲cocktail & mocktail，但冇咩驚喜😅叫咗兩個小食，個nachos好有誠意，有哂白綠紅三款sauce，送酒其實真係一流。或者今日選擇嘅係白酒，而呢間鋪出名嘅係啤酒，所以整體來講冇之前嘅驚喜。話雖如此，呢度始終都係喺灣仔飲嘢嘅一個好地方，因為環境好好，好舒服，服務都好👍🏻…Read More

心血來潮，又喺銅鑼灣南華會食午飯😋今次唔記得咗影個跟餐嘅沙律，同埋散叫嘅薯條，雖然冇影到相，但意外地個沙律嘅評分都好高，pepper去咗皮，除咗有菜、番茄仔、長通粉，仲有埋橄欖添，實在算係誠意之作！個大蝦配龍蝦汁意粉好好味，啲蝦好彈牙，個汁又濃郁😋塊牛扒叫咗medium，同行嘅另外兩位友人都讚口不絕，好「林」好味！三個人，兩個午餐包兩份沙律兩杯野飲，額外叫咗一個炸薯條，在額外叫咗兩杯麒麟啤，埋單唔洗$480，實在值得「再次光臨」😉…Read More