chengpearl's Profile

食店位於沙灘入口附近，店面細細，但門口都有兩至三張檯俾人堂食用。試左佢嘅紅豆餅，餅皮適中唔算厚，紅豆餡都幾多，味道啱啱好，唔會甜到漏。不過因為整起一段時間，件餅只係暖暖地，我諗如果可以熱D應該更好味Anyway，$7可以食到好味紅豆餅同見到店主親切有禮嘅笑容，已經非常超值！…Read More

個個入黎長洲都話要食大魚蛋，但幾乎檔檔小食店都有大魚蛋買，都唔知揀邊間好🤔最後揀呢間位於碼頭附近，好似多人幫襯、網上好評亦比較多😉扮做咁多research，其實兩粒大魚蛋都係$10🤣佢可以揀兩粒唔同味，包括四川麻辣、勁辣咖喱、中辣青咖喱、中辣黑椒、小辣沙嗲、小辣咖喱、不辣燒汁、不辣梅汁同原味。試左小辣咖喱同黑椒味，兩款汁都好惹味。魚蛋彈牙得黎係爽口果種，唔似陳皮魚蛋彈牙得黎較實在，我自己本身就較鍾意陳皮魚蛋嘅口感喇😅但爽口都好味嘅，難得入黎試下影張相都唔錯丫👍🏻😉…Read More

見好多食評話呢間炸兩好好味😀但因為要留肚食其他嘢，所以兩個人只係叫左一份炸兩冇試佢地嘅粥😅雖然疑似運吉🍊，但店員都好好服務👍🏻炸兩上檯時忍唔住「嘩」左一聲，因為好多醬呀🤣🤣腸粉真係好滑👍🏻👍🏻😋但油炸鬼就唔係好夠熱同脆身😅同埋雖然好欣賞食店不計工本俾咁多醬我地，但有半碟炸兩浸住咁多醬，食時唔撇走都幾重味下😅…Read More

甜品製作需時，如果同朋友仔話題已經相當乾涸，建議可以叫住餅櫃啲餅款食住等。我去果陣餅款唔算多，大部份係芝士餅，最後揀左紐約芝士餅🧀，另外再叫多份玉桂蘋果酥配雪糕🍎紐約芝士餅唔會太甜、芝士味啱啱好唔會太漏😋覺得唔夠甜嘅話，其實碟底淋左幾圈焦糖醬，可以試吓醮住食。食物份量適中，同朋友share黎食，唔會太飽之餘，食完過一陣就差唔多上第二道甜品喇😎玉桂蘋果酥啱啱整起熱辣辣😙酥皮用酥皮紙整，較薄同脆身。玉桂蘋果唔會太甜，粒粒果肉再加上脆身酥皮，口感幾豐富。碟底同樣淋左幾圈焦糖醬，唔知裝飾定真係俾你加甜用，anyway，兩款甜品嘅甜度對我黎講啱啱好😋…Read More

Green Common喺香港有唔少分店，今次試呢間位於旺角波鞋街The Forest一樓。餐廳裝修幾靚，靠窗有高檯俾你邊食邊望街景（即係對面棟大廈）但地方唔算大，好彩去果日人唔多，可以自己揀位坐。餐廳同時會賣素食零食、煮食食材同個人護理產品，等食物時可以有嘢望下都幾好。餐牌以西式菜較多，但都有其他嘅，好似日式湯麵、港式西多士、咖喱三寶等⋯⋯估唔到素食可以咁多選擇，而且樣樣都好吸引😋餐廳仲幫D嘢食起左D幾得意嘅名，好似「茄醬膳良肉丸」、「改邪歸正西多士」，最後分別叫左未來漢堡Plus跟沙律、未來熱狗腸無花果薄餅跟炸薯條同樂樂雞配蜜糖芥末醬。未來漢堡Plus取餐時餐廳已經幫你將個包切開一半，等你容易D同人分黎食👍🏻👍🏻但個漢堡本身都相當厚身，即使有着溫室櫻桃大嘴嘅我👄都冇可能一口咬哂咁多層🙄有支牙籤篤住係會好D嘅，冇咁易邊食邊飛哂D餡料出黎。味道方面我覺得幾好味，芝士好香仲熔熔地、素肉味道同口感亦同真肉幾似，但茄醬就落得太多同幾甜下漢堡可加$18配雜菜沙律，份量都唔少，略嫌佢D黑醋都係甜左D未來香腸無花果薄餅配炸薯條，薄餅落左純素水牛芝士，熱辣辣有拉絲效果，無花果微甜同熱狗腸都幾夾，餅身鬆軟，好好味😋薯條係厚身Mos Burger果種，可以食到啖啖薯肉，但冇得走鹽，對我黎講就鹹左少少樂樂雞無論食物外型、味道同個包裝都跟足麥樂雞，但就比麥樂雞油左D。揀左蜜糖芥末醬，好味，但份量太多，DIP唔哂有D可惜😅另外雖然包裝係幾得意、影相一流😎但最好都唔好再用即棄包裝盒，始終餐廳除左推廣素食外，都係希望大家環保D嘛😉…Read More

好耐都冇去過長洲，今日特登入去長洲做一次賓客，掃下街頭小食黎慶祝初七人日生日。令人意外既係當日都有唔少人入去長洲做賓客，人數都仲要幾多添。言歸正傳，向來鍾意食撻既我，出發去長洲之前已經做好資料搜集，正所謂機會係留比有準備既人。一到步我就去到康蘭餅店，去試下佢地既蛋撻。餅店既格局比較舊式，地方都唔大，佢地將各種麵包展示係門口既麵包櫃入面，雖然地方細，但就令人一目了然，焗麵包同西餅既香味，加上各種包餅精美既外型，真係一場視覺同味覺既盛宴，吸引住每一位經過既賓客。 一去到就正好有新鮮出爐既蛋撻添，餅店有曲奇皮同酥皮蛋撻兩種，有睇開我食評就知我比較鍾意曲奇皮，因為酥皮好容易食到啲皮散晒，跌到一地都係，所以今次我都係揀曲奇皮。餅店既蛋撻同一般餅店既蛋撻唔同，啲度既蛋撻外型小巧玲瓏，一手就能掌控得晒，未食已經令人感嘆，雖然我地不能夠掌控自己既命運，但原來我地可以一手掌握成件撻！正當我想試下一啖食晒成件撻既時候，店入面既阿姨即刻提醒我唔好，我當堂嚇一跳，原來佢話啱啱出爐好熱。 蛋撻細左，撻皮同蛋漿既比例反而剛剛好，每一啖都能夠食到撻皮同蛋漿，加上蛋漿甜度適中，食完唔會令人覺得口渴或肥膩。當然有聽阿姨既諫言冇一口食晒成件撻，件撻啱啱好可以分兩、三啖就食晒，食完啲餅碎仲唔會成手都係添，既然係咁，我覺得可以試埋酥皮添，可惜既係當我食完其他小食，想返黎再買蛋撻既時候，餅店既蛋撻已經賣晒啦，真係令人感慨機會唔單止留比有準備既人之餘，仲會留比有機會既人。不過正向啲諗，證明康蘭餅店既蛋撻好受歡迎，有機會入長洲做賓客的話，都推薦各位去品嘗一下。食啲件迷你蛋撻，令我發現有時候唔一定要追求大，反而小巧既野，更容易掌握之餘，亦都可以好好味，可以更令人享受呢！…Read More

餐廳裝修幾靚，但位之間較逼，去果日遇上一位喜歡拉近人與人之間距離嘅店員，明明唔算多人，硬要安排人地坐喺只隔一條10CM GAP位嘅COUPLE隔離。幸好另一店員恩准我地可以坐返開少少嘅位置⋯始終性格較內向嘅我，未READY認識新朋友，暫時希望將注意力放喺嘢食方面先墨西哥脆片幾好食，同doritos差唔多，除左價錢唔同。佢嘅純素芝士醬幾好味，雖然食唔出芝士味，但同脆片幾夾。佢地加左D墨西哥辣椒，青色果D，好辣唔食得辣嘅朋友就無謂特別去挑戰自己。沙嗲雞肉串，沙嗲汁甜甜地幾好味，但雞肉嘅味道同口感都唔似雞肉，食物亦唔係好夠熱。牛肝菌忌廉長通粉，芝士味好濃烈，長通粉味道唔錯，但唔知點解都係佢地D熱食都係暖暖地唔夠熱。…Read More

餐廳位於雅蘭中心5樓，識得上去嘅人就會知道點樣上去，但唔識得上去嘅人就未必知道點樣上去就好似我咁⋯首先一開始去錯辦公室大堂入口，兜過幾個圈終於搵到商場入口，因為朋友已經去到就急急腳搭扶手電梯，點知上到2樓先發現扶手電梯只可以直達2樓，2樓以上嘅樓層係要搭地下嘅升降機如果大家唔想食嘢前做太多運動就要記得喺地下搭升降機喇講返餐廳，佢係Goji Fitness Studio旗下嘅，餐廳隔離就係健身室，等人GYM完可以過黎補充體力，又或者好似我呢D有少少同理心嘅，可以一路食一路望住人地做GYM當自己都GYM左。餐廳環境唔大，但去果陣唔多人，可以自己揀位同坐得鬆動。餐廳另一邊仲有D健康食品賣。主MENU分瘦身能量碗同高蛋白能量碗，其實仲有自選能量碗、甜品同沙律等MENU。根據佢地所講，餐廳食物都係由註冊營養師同專業健身教練精心設計，餐牌會顯示卡路里同營養成份。我揀左韓式健康素食碗跟湯同叫多一份羽衣甘藍蘑菇沙律配芝麻醬。食物份量都幾多，佢地本身冇特別調味，靠自己撈醬，如果唔想要佢跟餐嘅醬可以落單時同店員講轉其他醬。試左佢地嘅韓式辣醬同芝麻醬都唔錯，湯就有啲鹹。…Read More

新一年希望少食肉多食素🍽香港近年都愈黎愈多餐廳供應素菜，試完可以同大家分享下😉呢次介紹嘅係荃灣新開冇耐嘅天·悠蔬食，明明唔係樓盤但唔知點解個名要起成咁🤔佢喺銅鑼灣同尖沙咀都有分店。幾間裝修都唔同，但都係走少女、公主風格，見到網上好多人話靚，只可以話各花入各眼，對我黎講真心覺得娘同核突，正面少少係乾淨企理同有裝修。價錢方面佢都唔算平，晚市最低消費每位$200，但晚晚都爆場，想食最好預早訂位😉年三十訂位同我又娘又核突嘅屋企人食團年飯。新年menu同平日唔同，叫左個四人套餐：前菜：八彩撈起、四喜烤夫、大吉大利紅菜頭蘋果合桃沙律撈起有四款醬：醋、麻醬、花生醬、泰式辣醬，四隻都好好味，好想叫佢整份格仔餅俾我用埋啲花生醬添🧇烤夫吸哂啲滷水味，好味，沙律就有啲甜主食：紫薯金瓜白松露蘆筍焗千層麵、羊肚菌黑木耳炒小卷心菜配上湯百寶鴛鴦菜餃（冇影到）手卷：蘆筍素香鬆苜蓿芽、香芒牛油果苜蓿芽薄餅：和風照燒汁數鰻魚手製薄餅（散叫，套餐唔包）幾樣都好好食😋推介招牌菜：佛跳牆鮮蔬一品鍋、燜冬菇燴豆苗素翅幾有咬口，豆苗好味嘅但濃味左啲甜品：純素花開富貴蘋果撻、鮮磨腰果露配湯圓、椰香紫薯千層糕蘋果撻啲蘋果太甜，但係撻底係好食嘅。腰果露唔會太杰同太甜，好味，我唔食湯圓，但弟弟話湯圓係芝麻餡、好好味。千層糕食唔到，其實食唔出有啲咩味，淡淡嘅甜味咁。湯：中可以揀茶樹菇竹笙蓮子紅棗黃耳燉湯、西可以揀菠菜桃膠忌廉濃湯雖然西湯綠到咁，但好飲，中湯都好飲，表弟話好甜以為係甜品😅飲品：熱可以揀天山雪菊桂圓杞子特飲、凍可以揀檸檬梳打整體黎講，佢啲食物同一般素菜唔同，唔會單單供應中式，亦較多款同有特色，味道同賣相都好好，可能咁就解釋到點解裝修咁核突、價錢又唔平下仍然咁多人幫襯😎如果過時過節、生日聚餐不妨試下👍🏻👍🏻不過佢地上菜非常快，我地仲食緊果3碟前菜，佢已經上左主菜同招牌菜，差啲冇位擺😅…Read More

餐廳位於荃新天地1期頂層，裝修幾靚，但可能位置問題，閒日同假期都唔係好多人。不過都好，可以揀位坐，兩個人如果叫多嘢食嘅又可以坐四人檯，慢慢食住傾計😎試過一次淨係點麵餐，覺得幾好食。見佢晚市有二人套餐，包麵、小食、飲品同甜品，價錢又唔貴就試下🍽小食都好多款，套餐本身已幫我揀左馬來香炸雞翼同沙嗲雞髀肉串，然後我再喺自選果堆揀左五香滷肉、一口脆豆腐、通菜配馬拉盞醬雞翼肉串惹味又嫩滑、豆腐同樣香脆👍🏻👍🏻馬拉盞醬好味嘅，但較鹹，食時要就住醮👆🏻麵就揀左蝦肉肉片油麵同蝦肉魷魚米粉，除左餸同麵底之外，佢仲可以俾你揀湯底，我就揀左辣蝦湯🌶蝦肉開半吸收哂湯味，魷魚亦好入味。湯只係少辣，想加辣就要自己落辣椒油，但係都好好味嘅，雖然佢好深色，但味道啱啱好，唔會過鹹😋邊食都忍唔住飲多幾啖飲品係冰糖檸檬薏米水同青檸梳打，薏米水唔會太甜，食完濃味嘢飲返啖啱哂😉仲好多薏米添甜品啲名樣樣都唔知係咩，試左桔子香茅凍同摩摩喳喳。見到摩摩喳喳果隻紫色時，其實有啲嚇親，但食落同喳喳差唔多😋無論小食、主食、飲品到甜品都好滿意嘅一餐👍🏻👍🏻…Read More

以前想食素，可能要去齋鋪或叫餐廳走肉，但而家多左餐廳供應素食，素食材料又唔再只係麵筋，菜式變化多左，唔會黎黎去去羅漢齋炒麵、齋鹵味、清炒時菜咁，想食素比真係以前方便😉但估唔到連大快活都有一啲特別啲素食可以揀🤔試左佢地嘅麻婆豆腐。佢用左其中一隻新興素肉：omnipork新豬肉（本身自己都有買黎煮嘢食用）味道方面，當一般豆腐肉碎食加埋佢個茨汁算係幾好送飯，口感同真肉亦相似，鍾意佢加啲紅腰豆令到有啲咬口👍🏻如果有啲辣味就更好😉…Read More

價錢雖然遠超麥當勞同subway，但味道方面真係好味好多，如果月頭有啲錢唔知點用都可以試下😋同朋友分別叫左麥當勞都有嘅魚柳包、而家好流行嘅素肉impossible meat漢堡，跟薯條同叫多個羽衣甘藍沙律🥗其實本身麥當勞嘅魚柳包對我黎講已經好好味，特別係佢嘅酸瓜醬，所以知道佢唔再喺超值套餐，都令我傷心左一排😞講返Triples O魚柳包，佢魚柳果層炸粉同麥當勞唔同亦冇咁厚，魚肉感覺係啱啱炸起大份嫩口，只係略嫌少少油膩。雖然佢只係用一般沙律醬(蛋黃醬？)，但配埋新鮮爽口嘅生菜等配料同鬆軟嘅麵包皮，真係好好味😋份量都係比較大，唔係好肚餓嘅可以同人share😘而Impossible meat burger不論口感同味道都同真牛肉好似，同樣大大份好juicy，素食朋友可以試下😋😋。沙律就落得太多芝士，口味重左啲。薯條厚身好味嘅，就同mos burger差唔多，如果想特別啲，佢仲可以揀其他味道嘅薯條或洋蔥圈添😎…Read More

荃灣舊式茶樓除左好出名嘅川龍街端記同彩龍，仲有啲唔駛上山嘅，好似今次介紹位於福來邨嘅海連，佢就仲係保留由姐姐推點心車嘅做法，令每次點心車推過都好期待（雖然大部時間都只有一架點心車），亦由於要時時刻刻留意有咩新鮮點心推出，成個飲茶過程都十分專注🤣除左點心車，門口仲會有包、盅頭飯可以叫。包仲可以單點，唔係一籠上，咁樣就唔駛迫全檯同你一樣叉燒包😎但唔太推介佢嘅奶黃包，吉士餡太甜亦冇蛋黃味😨其他點心都好食，只係款式就唔多，食果日亦冇炸物😅…Read More

位於荃灣德華公園對面嘅德發粥店，店舖轉角就有一間分店，大窩口又有一間。而荃灣果兩間無論天氣熱定凍都長期多人，近馬路果間門口成日會見到一條人龍等外賣，門口仲不時要加開檯俾人堂食🍽好誇張🙃佢餐牌雖然好複雜，但其實大部份都係傳統粥鋪嘅嘢，款式配搭會多啲。另外特別啲就係佢白粥可以分有冇味、又會有燒賣粉果賣。我多數會叫白粥，但今次見佢有蕃薯糖水就試下，好夠薑同蕃薯味，唔同其他糖水，夏天有時會唔供應，想試嘅話就趁冬天喇😉佢嘅炸兩都值得推介，味道其實冇乜可能有驚喜，因為間間都係咁做，但因為多人叫，基本上都係用炸起無耐嘅油炸鬼做，所以食時熱辣辣之餘油炸鬼仲會脆身👍🏻👍🏻另外，炒粉麵都係可以一試，同樣因為多人嗌，好快又refill一盤，較新鮮，同埋通常都夾好大碟，好抵食。一個人食嘅話，如果又想食炒米又想食炒麵，可以叫兩溝，咁就兩樣都試到😋…Read More

呢間開喺商場嘅水果店主要進口日本水果，但因為價錢唔平、隔離又有平到青衣人都專登搭車入黎買餸嘅楊屋道街市，所以一直未有機會幫襯😅近日經過發現門口擺左我搵左好耐嘅紫薯，一包大約4條都係$28😯無論價錢、包裝都同惠康賣嘅日本蕃薯好似，但惠康就多數賣黃肉蕃薯，較少見到紫薯。街市果啲我又唔係好分到紫薯同紫心蕃薯😅所以一見到就好開心買左包試下🍠紫薯味道冇蕃薯咁甜，如果想食蕃薯味重啲，可以試店內嘅時蕃薯，包裝類似都係$25👍🏻跟網上人地用焗爐整煨番薯，用左差唔多70分鐘先熟，雖然大滾水烚嘅話8分鐘已經搞掂，但用焗真係會香啲同保留到蕃薯嘅味道😋…Read More