Dauma's Profile

平時經過都會聞到呢間鋪傳出嚟嘅香味，今日終於的起心肝嚟試，因為平時總見好多人喺門外等，所以一直無試，近排趁凍凍地就試吓！老公叫咗個雲川米線，包括有墨魚春卷、墨魚頭同麻辣腩片，可揀大中小辣，小辣都已經好夠味，一次過可以試哂3樣餸，都好抵食！墨魚頭爽口，墨魚春卷彈牙有口感，非常唔錯，腩片肥瘦參半，好味！我唔太食辣，所以叫咗個清湯墨魚春卷米線，雖然話清湯，但湯味都好濃好美味，見到佢奶白色就已經知，唔似有d小店淡而無味！小食我哋叫咗個口水雞翼，本來想叫烤魚腐，但原來烤類要4點後先開爐，所以要食就要晚餐先食到！呢個口水雞翼看似好辣，但連我呢個唔太食辣嘅人都食到，所以絕對可以一試，雖然唔係好辣，但都夠味，有8件單骨雞翼，方便客人食！鋪頭排隊總有原因，價錢合理，老板娘有禮貌，食物質素好，就係赢嘅原因！…Read More

疫情之後都好少出街食飯，趁住而家疫情緩和d, 當然要同d好耐無見嘅舊朋友聚聚！今次揀咗食西餐，環境同食物質素都算唔錯！食物除咗質素，賣相都好重要，因為會影響食慾！呢個沙律認真唔錯，雖然蝦肉有點太實，但蟹肉夠甜，橙肉又唔會酸，加埋d菜蕃茄同柚子汁，整體好夾好味！呢塊要2百蚊嘅肉眼排就感覺麻麻，即使半成熟都感覺有點兒“韌”！之不過佢嘅薯條就非常出色，佢個醬係非常好味，值得一讚！呢個青口就非常唔得，極之細粒，粒肉同隻指甲咁大，完全食唔到任何味道，真心失敗之作！卡邦尼意粉，味道ok，個汁都夠味，不過不失！甜品時間！呢個可麗餅我非常欣賞，焦糖香蕉加埋雪糕已經夠正，塊可麗餅都非常好味！讚呢個蛋糕賣相一流，我其實俾佢張相吸引咗先叫，食落唔差嘅，不過檸檬味完全蓋過蘋果味，但質感係唔錯嘅！可以一試！總括嚟講，除咗個青口真係非常失望之外，其他都不過不失，不過以咁嘅價錢，就可以有其他選擇！…Read More

好耐無約朋友出街食晚飯，今晚放工就去近近地嘅淘大食泰菜，之前食過午餐唔錯，所以encore食晚餐!一坐低就送你一碟蝦片，俾你邊食邊揀嘢食! 我本身唔太食得辣，但又幾鍾意食咖哩，今次叫咗個椰香青咖哩牛腩，都比我想像中辣，但尚可接受，咖哩好香，牛腩都好腍，我哋另叫咗蒜蓉包襯咖哩食，蒜蓉包非常脆口，淡淡蒜香，又唔會太濃，味道剛剛好! 沙嗲串燒係我另一至愛，4串串燒可選雞豬各2串，十分欣賞豬肉串，肥瘦肉各一半，同五花腩一樣，好好口感，加埋個沙嗲汁味道非常唔錯! 食泰菜最愛咸魚炒椰菜苗，平時自己較少機會食，不過通常出面都得咸魚香，好少真係有粒粒咸魚，今次終於唔一樣，咸魚竟然多到食唔哂，真係勁正! 另外都叫咗個細嘅小食拼盤，有春卷、蝦餅、魚餅同鳳凰丸，蝦餅外脆內爽，魚餅香料味濃，個人就麻麻喜歡! 飲品方面，我當然飲我最愛嘅椰青，椰子肉勁好味，朋友叫咗個龍眼冰，超多龍眼肉，好味! …Read More

又係到九龍灣搵食嘅時候，天氣開始涼，終於可以行去離公司遠d嘅地方搵食，呢間花果園lunch time次次都企滿人，我當然唔會錯過啦！今日去食佢嘅特色沙律餐，可以揀一款包連一款美食，再揀兩款沙律，份量充足，水果沙律新鮮好味，食到飽飽! 推介! 我選咗香芒雞肉配牛角酥，再配花果園沙律同雜果沙律，真係超滿足! 仲有飲品奉送! 抵食之選，唔怪得日日都咁多人排隊! …Read More

朋友介紹話呢間好味又抵食嘅海鮮粥底鍋，愛食好嘢嘅我又點可以錯過! 約咗幾個好姊妹一齊去試! 首先選粥底鮮味靈魂，有蟹或龍蝦，龍蝦每人只需加$20，當然要龍蝦，而且好快無哂，要快快手落單留起先! 跟住可以自選5款海鮮，樣樣大大隻，勁新鮮，食完之後d湯都變得勁鮮味!雖然主打食海鮮，但呢度嘅牛同豬都非常唔錯!加埋其他配料，例如丸呀餃呀咁，同最後嘅粥底，望落去好似唔係好多，但食完真係好滿足! 二百幾蚊可以食到咁多新鮮海鮮，真係好抵食!…Read More

之前嚟過食晚飯，覺得都唔錯，所以諗住做節都嚟食，點知勁中伏，價錢唔平之餘，仲要等半個鐘先嚟第一味菜，叫咗半隻燒鴨，45分鐘都未嚟，問侍應，竟然話燒緊? 真係唔太接受到! 跟住聽到隔離枱都係食完都嚟唔齊餸，結果唔要就走咗! 咁樣同趕客無乜分別囉！d嘢食好唔好食都已經唔係重點，價錢貴咗分量少咗，味道又唔特別出色，根本無再幫襯嘅理由!…Read More

作為一個愛味濃嘅人，串燒絕對係我嘅至愛! 不過唔係間間串燒店可以有好味又抵食嘅串燒! 呢間燒烤堂有幾間分店，口啤好似唔錯，當然要去試試! 一睇餐紙，嘩!真係好多選擇喎! 兩版紙滿滿的，而且樣樣都好吸引咁! 不過我哋今次得兩個人，就揀咗最最想食嗰幾樣試! 我哋呢d食肉獸，無用不歡，豬牛羊都要食! 呢個黑毛豬串，肥瘦參半，外面燒到小小脆，又腍但又好咬口，肉汁夠多，真係超好味!牛小排厚厚咁，但一口咬落去非常腍身，完全唔會黐牙，肉汁豐盛，真係多多都食到!老公話羊架好味唔羶，不過我都係免了!食串燒又點可以唔食牛舌呢？燒到剛剛好，唔會韌又好咬口!蒜蓉燒廣島蠔，勁多蒜蓉燒到勁香，蠔肉大大粒脹卜卜，熱辣辣超超好味!雞泡魚干絕對係我至愛，基本去親串燒店都一定叫，燒到少少脆，加埋沙律醬絕對無得輸!燒白鱔啖啖肉，外脆內軟，加埋醬汁又係正!呢份牛仔骨絕對有驚喜! 用生菜包埋青瓜，蘿蔔，蒜片連牛仔骨，同單食塊牛完全兩個感覺，各有各正! 牛仔骨非常香口，腍軟多汁，超級好味! …Read More

三五知己相聚，最開心當然就係傾吓食吓玩吓，不過而家好多餐廳都限時趕人，傾到興起又要轉場，好掃興! 呢d樓上cafe就唔同，任坐任玩傾到飽，大大張梳化舒舒服服，又有board game 玩到夠!嚟cafe當然唔少得食，呢度有得散叫，亦有party set 叫，我哋一行4人，叫咗個party set B, 有沙律、小食、主菜、飲品同甜品，每按返你幾多人份量整，唔怕太多食唔哂或太小唔夠食!凱撒沙律，落咗好多沙律醬，個人覺得好好味，因為我比較鍾意味濃😋小食有8種咁多，豬頸肉肥瘦參半，咬落去好爽口，加埋泰式醬，味道剛好!雞肉串甜甜地，好好味! 咖哩角脆卜卜，非常香口! 雞翼外脆內嫩，蜜糖香甜! 最欣賞就係芝士薯條，香濃芝士醬真係無得輸! 主菜可選兩款，我哋揀咗卡邦尼煙肉扭扭粉，煙肉粒香脆，扭扭粉唔會太腍，幾好咬口!當然唔少得我最愛嘅黑松露海鮮意大利飯，好香黑松露味，海鮮有青口、魷魚、大蝦，大大隻非常足料! 飲品可選兩款，我哋揀咗是日特飲「菠蘿乳酸」同荔枝紅茶，兩款飲品都唔會好甜，荔枝紅茶仲有非常香濃嘅荔枝味!最後係甜品「一口雪米糍」，淡淡紫薯味，食落透心涼!…Read More

每次去台灣都總要食一餐麻辣火鍋，知道香港都有正宗嘅台灣麻辣火鍋，當然唔可以錯過，試過正嘅話咪唔駛特登去台灣食囉! 去"夫妻沸片" 梗係要同老公去撐枱腳啦！話得食麻辣火鍋，當然點都要叫一個鴛鴦鍋，由於我唔太食得辣，所以叫咗小辣麻辣鍋同埋一個唔辣又補身嘅美人鍋，即係養顏嘅花膠雞鍋! 佢真係無呃你，有大大舊花膠同埋足半隻雞，侍應會即場幫你剪開隻雞，等你容易d食! 第一樣當然係試吓啖湯，好濃好鮮嘅雞湯，d雞都好嫩滑，非常好味! 小麻辣我係完全接受到，勁鍾意食佢嘅鴨血，超好味，少少辣，剛剛好!淨係鍋入面嘅嘢都已經好多同好正，但當然唔少得另一主角~牛! 我哋兩個人，叫咗碟細嘅手切牛小排，份量其實剛剛好，牛小排好重牛味，可能脂肪均勻關係，食落非常腍，唔會韌，正!另外非常推薦海鮮拼盤，尤其係兩個人，真係食唔多，海鮮拼盤每種食物有兩件，又可以食多種類，又唔怕食一樣食到飽食唔到其他，所以呢個拼盤非常好! 佢嘅蝦非常新鮮，蠔非常大隻鮮味，鮑魚唔會韌，其他海鮮都非常唔錯，真心推薦!團團丸丸有4款丸，每款兩粒，都非常啱兩個人食，每款丸都非常爽口彈牙，蝦丸有好重鮮蝦味，墨丸口感特別好，梅菜豚肉丸就真係未食過，好似食緊梅菜蒸肉餅咁，鯪魚丸就應該加蜆芥呢！雖然呢碟丸都有點貴，但咁嘅質素都貴得有道理!最後點都要有個菜嘅，咁先叫食得健康嘛！…Read More

朋友相聚，最緊要搵間坐得舒服又唔會趕你走嘅餐廳，因為一傾就停唔到口!朋友喺openrice揀咗幾間西餐廳，最終我俾呢間嘅甜品吸引咗，所以決定嚟試吓!食物賣相真係好緊要，樣靚就想試吓味道如何! 呢個帶子非常精緻，食落好鮮滑，加埋芒果粟米汁，味道好有趣!薯條配茄汁就食得多，配黑松露醬原來都十分好味，薯條炸到剛好，口感同味道都非常唔錯!Pizza個皮又薄又脆，真係食多幾件都得!蝦丸賣相好特別，一嚟嘅時候有一層煙霧，食落有淡淡芝士香，好味!醬燒豬筋骨有淡淡柚子香味，好特別!最後點少得甜品，話哂我都係俾佢甜品吸引嚟，不過由於已經飽飽，所以食唔落個流心鬆餅，只試咗個半份嘅窩夫，新鮮整窩夫果然特別脆，加埋玫瑰烏龍，味道特別，平時真係無乜機會試到!…Read More

打開openrice搵嘢食，發覺近年多咗好多樓上cafe, 除咗食，仲會有d board game 俾客人玩，啱哂一班人開party! 今次同老公揀咗呢間食晚飯，佢有一個二人餐，不過無我哋想食嘅飯，所以最終決定散叫! 嘩! 呢度d食物真係份量十足，每樣嘢都大大碟，食到我哋非常滿足!頭盤係沙律菜，非常大碟同埋好多鴨胸，出面d鋪可能只俾幾塊你，呢度竟然有超過10塊，仲要好好味，鴨胸非常腍，非常入味，平時少食嘅我都覺得勁正!蜜糖雞翼竟然有8大隻，平時叫嗰d通常得3、4隻，雖然有少少過咗火，但外皮好香脆，蜜糖甜甜地好好味!呢份吉列海鮮炸得超級超級脆，真正外脆內軟，帶子、蟹鉗、蝦等等，加埋沙律醬，真係大滿足!我最愛當然係黑松露飯，香香嘅黑松露，有d食店只會聞香，食落無味，但呢度無論聞同食都充滿黑松露味道，蝦都算大隻，不過就淡咗d, 無咗鮮蝦味，但整體上都非常唔錯!飲品可以跟飯或意粉加錢配，老公叫咗杯薄荷朱古力，佢話如果甜多少少更好! 嚟到當然要試吓佢d特色飲品，我叫呢杯皇后，由青蘋果汁加芒果汁加乳酸組成，我覺得幾好飲，又唔會太甜，好香青蘋果味! 甜品出場，我最鍾意嘅藍莓芝士餅，唔太甜，夠實，有口感，讚!特濃朱古力，老公係朱古力控，佢話可以再甜d喎!…Read More

唔少朋友都話呢間金鶴拉麵質素唔錯，我當然唔可以錯過要去試試! 北角呢間分店地方唔大，但座位寬敞，坐得好舒服! 一坐低，店員就介紹邊款拉麵最多人食，同埋主打雞白湯拉麵同極濃雞白湯拉麵嘅分別，佢建議我哋第一次可以試咗個正常味道嘅雞白湯先，下次再試極濃，咁就可以作比較! 所以我哋就先試雞白湯拉麵，同埋叫咗另一招牌菜，就係活鰻蒲燒飯! 鰻魚飯即叫即整要等15~20分鐘，所以想食最好先落單，再揀其他嘢食，而我哋另外再叫咗個餃子!首先係雞白湯拉麵，即炸牛膀非常香脆，平時食嘅牛膀係無味嘅，呢度竟然可以炸到咁香口好味，建議大家脆食，唔好浸落湯，因為口感同味道都會唔同哂! 值得一提就係佢嘅慢煮白雞肉，以為會好鞋口，點知非常腍同鮮嫩，口感好特別! 仲有兩片半肥瘦豚肉，口感同味道都相當唔錯! 至於麵質都好爽口，唔會好腍，煙煙韌韌咁，啖啖雞湯味，真係好好味!另一主角出場~鰻魚飯，一打開個蓋就香氣撲鼻，急不及待要試吓有幾正! 鰻魚燒到外脆內軟，肉質厚，食落啖啖肉，最欣賞佢竟然少少嘅骨絲都無，平時食鰻魚飯總有d碎骨攝住牙縫，食嘅時候要好小心，今次係完全唔駛擔心! 讚! 稍為覺得唔夠嘅係鰻魚汁，可能我比較重口味，如果再多d汁就會更好喇!小食餃子內有啖啖麻油味，同平時拉麵店食嘅餃子好唔同，值得一試!…Read More

日式放題曾經係我至愛，因為覺得選擇多，適合唔同口味嘅人，不過食得多都會厭，所以無食一排，今次同事們約食放題，見呢間主打鐵板燒好似幾特別，所以決定嚟試吓!放題點少得刺身，第一樣當然盡點刺身!刺身基本上算新鮮，但上台跟我哋俾嘅點菜單種類唔一樣，鮮帶子片又薄又細，無口感，食唔到鮮味! 其他刺身不過不失啦！壽司係幾精緻，細細件唔怕食得太飽，紫菜都脆嘅，料算新鮮，滿意!佢d燒物真心唔錯，個蒜牛仔粒同牛舌都好出色，唔會韌，夠味，欣賞!即使係瓜同菠蘿都燒得好好味，食唔停口! 蒜蓉蠔就參差d, 第一輪嗰粒蠔勁細，到第二輪就大大粒，最正就勁多蒜蓉，我至愛!牛肉鍋好甜好夠味，唔錯!清酒蜆就無乜酒味，蜆亦無乜鮮味，所以麻麻地!基本上呢度食物種類唔算特別多，但價錢相對偏貴，唯燒物確實唔錯!…Read More

近嚟好興呢d樓上cafe，喺鬧市中想搵一個寬敞靜靜地嘅地方同朋友相聚真係唔易，呢d cafe 地方唔會太大, 相對人流都無咁多，通常都唔會限時限刻，之前都去過一d樓上cafe, 感覺唔錯，而第三站俾我嘅感覺係好乾淨寬敞，白色梳化，坐得好舒服! 呢度有多款晚餐，有飯、意粉、通粉，可加$30配埋沙律同甜品，另送$34飲品一杯或加錢配其他特色飲品我哋叫咗兩個飯，其中一個餐配沙律甜品，另外叫咗個小食蜜糖雞翼。首先係黑松露帶子鮮菌燴意大利飯，一入口有淡淡嘅黑松露香，但味道唔太濃，燴飯口感唔錯，唔會太腍太爛，加埋粒粒小帶子，唔錯唔錯!另一個西班牙煙鴨胸燴飯，有小小嘅辣，食落好香好惹味，鴨胸又好咬口，軟硬度適中，值得推薦!呢度d食物份量幾足,兩個飯比想像中多，小食雞翼都有六隻，食到飽飽! 蜜糖雞翼炸得幾脆，但外層嘅蜜糖又感覺無咁熱氣，皮脆肉嫩，非常唔錯!跟餐甜品我哋叫咗藍莓芝士蛋糕，面層厚厚嘅藍莓，蛋糕有香濃芝士味，口感都非常好!餐飲我哋揀咗水蜜桃梳打同金桔檸檬，梳打好香水蜜桃味，但金桔檸檬就非常酸，證明用料十足!…Read More

茶茶唔喺旺角最熱鬧嘅街道，平時搵食真係未必識搵嚟呢度，朋友話之前試過，呢度d鍋物唔錯，所以帶我嚟試試!睇Menu都有好多種類嘅嘢食，我哋兩個人，想試多d唔同種類嘅嘢，所以叫咗一個鍋，小食拼盤同埋串燒!今日有少少唔舒服，所以無叫到辣鍋，叫咗個蕃茄豚肉鍋，感覺較清較健康，蕃茄湯底夠濃，d食材都好多好豐富，有菜、豆腐、冬菇同主角蕃茄同豚肉等等，份量足，一個人食絕對足夠! 豚肉嫩腍，口感唔錯! 小食拼盤有我喜愛嘅台灣腸、香甜嘅柚子雞翼同花枝丸，味道非常唔錯!我最欣賞佢嘅串燒牛舌，燒得剛剛好，厚薄適中，又腍又好口感，勁正!至於羊肉串，感覺味濃，可能為咗辟羊騷味， 醃料就似乎重手咗d! 雞串就不過不失!套餐加配咗飲品，蜂蜜綠妍，淡淡綠茶香，唔會太甜，啱哂口味!…Read More