放lunch時間，當其他鋪頭大排長龍，而呢間餐廳可以直入都知伏。其實以前我成日嚟呢間餐廳，因為抵食又通常唔使等，但自從有次發現佢啲酸菜魚退步咗好多就冇再嚟。隔咗一年幾經過唔想等，就諗住畀多次機會。友人嗌咗一份口水雞，本身係裝喺一個碗，下面墊住一個碟。上檯時，待應先放低個碗，繼而放低埋個碟，由於分開咗放，所以一放上檯就見到本身被遮住嘅碟上面有幾嚿食物嘅殘渣。我相信個待應都見到，但佢都係直接走開咗。我自己叫咗一份上海排骨拼重慶酸辣粉，再加$5跟一杯凍飲。食食下碗麵見到有一嚿米白色嘅嘢，一開始以為係腐皮，我仲咬咗一啖，點知原來係紙巾/紙制品，即刻吐返出嚟同冇曬胃口。個staff一開始話再整一份麵畀我，但我已經唔想再食，佢先肯幫我取消我自己份餐。點知見到張單佢收返我杯凍飲正價$22，佢話因為我取消咗個餐所以要收返正價，但明明係你哋嘅食物有問題我先去取消，理論完之後就改返收我$5。其實收錢完全冇問題，因為我的確有飲到，而且喺咬完呢嚿紙巾我更加淨係想瘋狂飲嘢漱口，不過咁計較嘅處理手法就真係少見。講返啲食物，碗酸辣粉可以話係冇味，我要𢳂我朋友份口水雞嘅杯先有返啲辣味。總括嚟講，呢間餐廳嘅衛生情況、處理手法同食物質素有好大改善空間，完全唔會推薦大家去。…Read More
