鬼神童子 Zenki's Profile

朝早去開附近，諗緊邊度食早餐。個人突然～叮！左一聲，諗一諗 好多年冇去名寶石餐廳食野，又可以坐得舒舒服服唔洗食完即刻起身走。精美早餐：咸牛脷香腸:)正常普通西式早餐，咸牛脷烚到口感軟淋，腸仔唔係死咸有d香草胡椒味，著角上枱仲暖，$105食個早餐，味道/價錢就見人見志啦！有杯橙汁/蘋果汁/蕃茄汁加件多士裝飾吓我聽到好多枱都係叫牛扒，我估牛扒應該唔錯，咸牛脷腸仔真係冇乜特別，除非好似我咁特別鐘意食啦。上去食個早餐真係想想從前嚟用餐既光景；今時今日連鎖茶餐廳$5x一份扒餐相對比較抵食，不過就懷舊feel同埋座位冇咁舒服。今朝見場內一般用餐既客人都4、5十歲居多，三幾個後生都係陪屋企人嚟…Read More

南昌站附近搵食，想平靚正，我諗得海達邨同南昌薈比較經濟，一上Vwalk就全部都係連鎖店同價錢貴少少（以午餐及下午茶計）。泰原味既炒粉麵，即炒午市碟頭飯及咖喱都唔錯，夠獲氣，重味。唔知係咪我咁好彩，海南雞飯兩次都瀨野，一次油飯唔熱，一次就油飯生米，雞就非常一般。星洲豬頸肉炒河炒得乾身，少油，獲氣夠，豬頸肉亦都唔錯，做得比商場內茶餐廳好食，價錢實惠。同事就次次都乾食乾炒牛河，話好得。泰式咖喱雞扒飯:)椰汁咖喱，極少辣少少甜，份量足味正常，成件大雞扒比晒你，冇呃秤。呢度食午餐仲有碗足味精例湯你嘆下（好重味/但好飲）加$10-$13蚊仲有椰汁冰，珍多冰等等，都幾爽㗎！見到隔離枱，馬拉棧肉碎炒通菜，肉碎炒茄子，豆腐等等都係熱辣辣又靚仔，可以試下，係海南雞飯唔推介，焗豬又係普通。溫提：如果比較大食，就唔好叫下午茶餐，爭幾蚊，份量少成四份一。（午餐＋少食）串燒沙嗲豬肉-$22/兩串，又平又好食。…Read More

每次經過呢度，都會心大心細去食個車仔麵定去食燒味飯，畢竟選擇真係太多！10次入面，總有5-6次都會揀新聯豐，快靚正，又好食。豬膶撈麵豬膶微滑＋彈牙爽口，幼麵爽口冇乜梘水味，加埋薑絲蔥段，再加碟辣椒豉油，冇得頂。粥品亦係唔錯既選擇，另外豬手，雞腳，雲吞亦都唔錯，推介！…Read More

帶比較細個小朋友出街食飯，想搵個地方坐得舒服少少，又要岩佢口味，選擇會比較少。呢間Outback一定幫到手。二人餐有忌廉湯，黑糖包，沙律，意粉，西冷及龍蝦，我望過餐牌，應該算抵食，同埋份量都算多；湯＋沙律（個汁）味道正常，個大蝦偏意粉 （類似芝士忌廉汁）份量多又好食（蝦爽彈＋汁又濃），件扒同隻龍蝦普普通通，份量贏晒。兒童餐:)有燒豬助骨，腸仔，炸雞，每樣一兩小件＋薯條及芝士長通粉，正常味 岩小朋友食。件豬助都幾淋 個醬好開胃。最緊要肯坐定定食。仲有包蘋果汁。薄荷青瓜沙冰，飲落去涼浸浸好fresh。士多啤梨沙冰亦都唔錯，解暑之選。個個排隊等隔離間壽司郎，我食完仲見到人等緊位😆等少d人先去啦.....哈！7點分左右去到，位都唔洗等。…Read More

經過呢邊搵地方醫肚，行左幾間茶記都唔吸引，直至行到呢間........冰室 feel喎，食個午餐＋個例水......都應該好正丫（自己諗）。黑椒雞扒火腿飯🙄請唔好誤會，味道冇問題，非常之正常，雞扒一般茶記既味道，黑椒汁夠濃夠辣，上枱仲熱辣辣添，個份量就真係震撼......半塊雞扒＋半塊火腿（或者係2/3塊）開二，我見到隔離枱碟炒飯非常之精緻（碟細/份量亦不多）我叫左多飯先有咁大份，可能習慣左茶記碟頭飯抵食夾大件，呢度果份真係少得離普，$59。凍奶奶亦都一般般。地方企理光猛，坐位窄dd；可能蛋撻好好食掛.......但食完碟飯都費事買。而家係租貴食材貴，定係食水太深呢？？好多茶餐廳都會改靚/細塊雞扒，可以做雞球或雞皇，都冇半塊上枱咁誇吓嘩…Read More

幾個麻甩佬想去鋸扒，有人提議去牛屋，從前......10年前有多，都係10點後去牛屋飲酒，以前有卡位。而家就變晒4人枱，7點入去，7成滿，坐多陣已經全滿。肉眼扒 （$258 果個肉眼扒餐）唔記得影menu件肉眼唔會乸/醃到冇晒原本個肉質/好多平價牛扒醃得重手得濟，食到好重梳打粉味，呢度牛扒味道唔錯，個黑椒汁好重味，煎7成亦做得剛好，個色又煎得靚。薯條又夠熱。威靈頓牛柳朋友話唔錯，比較細份（同肉眼比）所以唔敢抽佢水試下。羅送湯，餐包上枱熱辣辣，好過去果幾間連鎖餐廳食牛扒。用餐時間90分鐘，因為到8點半仲有人係門口等緊，所以就要埋單走，亦証明佢幾多捧場客。場面就比較舊，真係食平靚正。…Read More

食後感其實一般般，可能期望高。菠蘿煙肉和牛漢堡扒 - L和牛漢堡除左比較油膩之外，我本身期望係牛味重，香口既，但係食完就一般，感覺只係一件比較油膩既漢堡扒，味道上冇驚喜，放係熱石上面煎，一上枱唔可以煎太耐，因為舊石仲好熱（好易燶，入面唔夠熟），煎左3次左右，熱度下降會易煎d，鐵板上既蛋汁同菠蘿會好快乾，唔好食，睇相係岩岩上枱即刻影，已經開始焦邊，所以等多陣就會比較硬，店員見到石頭唔夠熱，會主動幫你換。試過之後我寧願去食個貴價少少/同等值既漢堡包來得滿足。呢個餐唔包飲品。午餐就包一罐飲品，另外椰菜絲配芝麻沙律汁及麵豉湯亦普普通通。炸雞:)我揀左有汁既，個汁好甜，件雞就大大舊，正常味，食肉獸大滿足。埋單$212（純粹係大食＋想試埋炸雞），呢個價錢係商場食lunch應該好多選擇。…Read More

炸豬扒定食做得幾好，肉嫩，外皮鬆脆，同出面專門做吉列豬扒既連鎖店比較，差唔多，如果同等級比較，呢度唔算好大份。麵豉湯正常味。炸雞扒另外加$3x嗌既，真係比半塊雞扒你，可試可不試，份量真係少得可憐。宮崎和牛野菜火鍋睇相就精神，嚟到見到........唉，d份量又係少得可憐，諗住2個半人（2歲幾小朋友），一個豬扒 一個火鍋 加件雞扒夠啦，係個鍋最貴又唔抵，我寧願你比f普通牛我多幾片，都冇心機寫佢乜味:($400，叫做2人午餐，性價比真心一般，我諗嗌2個豬扒餐會好d。地方闊落，座得舒適。之前食過另一間係石門，有得揀豬扒份量，我覺得貼心及抵食好多。…Read More

經過見到有新店，試下啦！下午茶時間，人唔多。牛雜雲吞河牛雜炆得軟淋（但味道就偏淡），草肚牛肺牛腸算入味，牛膀就一般，雲吞細粒，而且味道只算合格，可試可不試，河粉既份量好少，真係就番個碗（好淺），幼身河粉（似越式湯河粉）較淋及滑身。同另外三間粉麵比較份量真係最少。見另外幾個食評，都話牛腩/崩沙好食，如有機會再食，嗌撈麵應該穩陣d/我指份量。咖啡就大大杯，冇特別。光猛，地方乾淨企理。雙拼粉麵加凍飲$50（好似係下午茶包冷熱飲），反而飯餐都係$50＋$3。睇下係墟內有冇競爭力，呢條街同d食店，都轉得幾密。…Read More

係宜安街搵地方食晚飯，好多間小炒飯店，打冷，泰國餐廳，都算有d選擇不過時間尚早，見到有間糖水舖，入嚟試一試先！凍核桃糊入口核桃味濃，又夠滑，甜度適中，可能真係太多年冇食，覺得味道唔錯，仲賣緊$27，係略嚴個碗細隻少少，我覺得有d似大良八記d味道手功磨出嚟果個幼滑程度係好食好多！:)凍燉蛋朋友話好食，唔太甜，即係穩陣啦好少去食中式糖水，有時試小店，好多都一般或者差；呢間入到去見到阿姐係度剝白果，挑個芯出嚟即刻嘩左聲，手功野喎（可能我大驚小怪）掂啦！總結，未好食到專登要去試咁誇，但想食傳統中式糖水，又經開食番碗過吓口癮都唔錯😁小店地方有限，目測2X個坐位左右。…Read More

坐位舒適，酒店價錢，5星級服務態度，食飯傾計唔錯。煙三文魚冷盆冇太大驚喜，略咸，肉質厚淋，同早餐用既係一模一樣，唔錯。安格斯牛肉他他肉質鮮軟，上枱溫度偏凍（唔夠凍，驚食左會肚痛），調味帶微酸，咸味及其他調味適中，配埋蛋王＋兩舊脆既麵包＋沙律菜，兩人食半份當前菜岩岩好又開胃，如果一個人食就太大份。香烤雞胸/羊肚菌忌廉汁雞胸煎得夠香，肉嫩多汁，羊肚菌汁香濃，估唔到烹調得咁好，少食西餐唔多比較，我覺得好好食。燒阿根廷帶骨肉眼牛扒:)好鍾意食牛扒，想嚟試好耐，有朋友推介過，薯蓉極之軟滑可口，牛肉烤得剛好5成，但卻不是最好，睇相真係冇得輸，但係呢款肉，我個人推薦7成口感應該比較好，總括嚟講5成熟度，略略扣分。2人份，如果好似我比較大食，份量唔算好多。薯蓉就好好食＋有d膩（我估：薯蓉要軟滑應該要加好重牛油/忌廉去做）配菜：巴馬臣芝士薯條＋意式香草炒磨菇兩樣都幾好食，不過唔好一次嗌晒，真係唔夠食先好嗌，上菜速度唔算慢，假如傾下計慢慢食，d食物好快凍，會扣晒分，兩樣上枱既時候都好好食，擺耐左就嘥晒。涷咖啡及啤酒就普普通通…Read More

香濃枸杞豬雜湯（八刀湯），豬雜切得偏薄，可能易煮得淋或者易煮得出味，豬膶，豬心，豬腰，瘦肉全部都煮得岩岩好，食落去感覺係新鮮肉食，唔似雪藏，好食，啖湯好濃，枸杞煮得岩岩好，再加上重胡椒及薑既味道，幾樣食材加埋未嚟食果陣以為又係扮乜哥果d米線，入到嚟食有驚喜，原來係用心做既豬雜湯，連薑絲都切得好幼細，即叫即煮上枱熱辣辣，美中不足就係冇辣椒絲，如果碟豉油加埋辣椒絲就一流喇！米線唔算好大份量，剛剛好。另外試左：辣-蘿蔔牛腩飯，都好好食，完全係家庭式味道，有別於屋苑內茶餐廳，但小店既敝處就係座位問題，始終座位不足，繁忙時間店員會禮貌咁同你講調一調位等等，明白既-畢竟小店生意，都係做午市為主，張就張就啦。:)…Read More

行過幾次，之前以為係日式定食，因中午時段長期爆場，連行過睇下餐牌都唔想，之後上openrice望望，原來係食泰國菜。終於有機會一試。建議12點左右食晏會好d，12點半之後9成要等位。午餐紅咖喱牛腩賣相正常，問朋友仔好唔好食，話味道正常，好mild唔辣，有椰汁味帶甜。豬扒雞扒意粉正正常常，好茶記feel，因為全院滿坐，都等左一陣先到，賣相ok，個茄醬又唔hea，份量滿瀉，扒又煎得幾好。巨無霸定食登場海南雞飯＋冬蔭公湯底肉丸河＋3樣小食，海南雞冇隔離果間咁滑，冬蔭公湯底都幾好味，小食種類配搭多（我揀左炸帶子，雞亦，冬蔭公湯細碗/比朋友試下），＋$6又有泰式冰類飲品，記得記得記得.......好重要講3次，食得晒先好嗌呢個，真係堅大份。午餐性價比好高既餐廳，但我覺得隔離餐廳味道好食d，但就細份小小，不過呢邊就組合多＋有巨人定食。多個選擇/良性競爭都係好事。希望兩間都做得更好。…Read More

收工出旺角搭通宵車，又有d肚餓，想食個經濟裝宵夜，西記幫到你。d食物又即叫即做，價錢又合理，我覺得味道對得住個價錢有多。另有炒粉麵，糖水，油器，湯飯等等，目測都係街坊同埋收工人士居多。食過幾次，生滾粥都幾好食。個炸兩抵食夾大件，可惜岩岩賣晒。:(今次整個豬雜麵＋腸粉都唔錯。咸菜豬雜麵料算多，豬雜又好食，咸菜有處理過，唔會死咸，不過記得叫個麵唔好煮咁淋......當我係冇牙阿伯咁。叉腸和和可可，合理味道，宵夜時段＋地點＋價錢，不作多求啦。兩樣加埋先$70。…Read More

親友飯聚，上網搵地方，見價錢合理，食評又幾好，記決定一試。10人訂房，一圍（12人份量）$5000＋碟碟份量都好多，味道又唔錯，房內有大電視卡拉OK，好正。乳豬全體上枱仲有微暖，肉嫩皮脆唔肥，好食。:)上湯龍蝦煎米粉底龍蝦份量唔少，米粉煎得甘脆，點埋個上湯汁食，唔錯。炸蟹鉗略微蟹鉗打得太硬身，炸左出黎一陣已經覺得好實，唔好食扣分。荔枝柴薰燒鵝好香煙薰味，鵝肉都燒得幾好，唔會好乾，個豉油比較重味，幾好。蒸魚，鮑魚，海皇翅，飯麵等等，全部都正常水準，樓面又定時定候入嚟招呼下，換下碟，好過去酒樓食，價錢係貴少少，但就食得舒服好多。由於人少同埋多老人家，飯麵燒鵝加兩樣菜都有打包拎走。1樓係房，2樓應該係大廳，星期日晚都爆，可以坐到11點半左右。…Read More