50胃's Profile

香港既上海菜餐廳食過唔少，但講到正宗既上海餛飩，我都仲係會諗起上海弄堂。今日收工之後同男朋友黎到歌賦街搵食，再次比呢間精緻既餐廳吸引，隔咗幾個月再食，等我睇下有冇保持到一貫既水準先。糖醋魚塊侍應姐姐好貼心咁先上左糖醋魚塊，味道酸甜醒胃，而且魚塊大大舊，啖啖肉，好適合作為第一道菜。西洋菜餛飩（季節限定）終於輪到主角餛飩出場，姐姐話西洋菜餛飩係季節性限定，其他日子冇得食架，我50胃又點會錯過呢個機會。餛飩皮好滑，浸係鮮甜既湯汁入面，食落去鮮嫩多汁，好好味。原本以為8隻餛飩都幾多，但食完發覺都唔夠喉。菜飯平時出街食得比較少菜，最後叫左個菜飯。但係相對餛飩，菜飯就冇乜特別，同男朋友一人一半啦！埋單一共二百幾蚊，兩餸一飯，食得好飽好滿足，下次會再幫襯。…Read More

天氣已逐漸轉涼，無阻我對酸辣野既喜愛😂 男朋友話見到某channel介紹金亞淶，表示想食，咁好啦，就去啦。 金亞淶位處工廈，空間比較闊落，我地平日既晚餐時段黎，都唔算多人，坐得ok舒服。講下d野食先～火山骨據聞係必叫，上枱大大份，因為呢道餸既精粹係噒骨，餐廳好貼心咁提供埋手套等我地唔好食得咁狼狽。味道黎講係好有東南亞風情，可以幻想下自己係小島攤係沙灘一手揸住個椰青另一手撕住d豬肉食既畫面！佢個種泰式酸辣味係偏酸少辣，配埋d都算煮得好淋既豬，很開胃！生蝦刺身大大隻，厚肉爽口，如果鮮甜d仲好。菠蘿炒飯發揮出應有既水準，飯既濕潤度岩岩好，料亦都好足，食極都仲有餸，食左幾碗！椰皇三重奏話說我係椰皇既die heart fans, 食呢味野前我好似已經連續食左兩晚椰皇甜品，但係呢個椰皇三重奏仲係驚豔到我😍講起又想食！佢既三重奏層次感十足，味道好濃郁。頂層既椰子碎，中層係椰奶味重而口感比較似燉蛋既，底層係質感比較爽滑既椰子jelly。食完好滿足。加埋兩杯野飲埋單400蚊唔洗，食飽飽，服務又ok, 未試過既朋友可以試下～…Read More

冬天凍冰冰最啱就係打邊爐。記得上次嘅一鍋堂體驗非常好，所以今次再食多次。原來佢地嘅LUNCH係有一人60分鐘午餐，半放題方式出面有啲熟食、菜、丸同野飲可以任食!而且價野好平，食一個餐都係70蚊左右，真係好抵食!!我50胃出名大食，所以都係選咗90分鐘嘅午餐放題。今次我地就叫咗豬肚湯同沙嗲湯，一如以住個湯底都係咁足料，而沙嗲湯味濃加埋啲竹苼食根本就是一絕。佢既火鍋醬料都算多選擇，仲有我最鐘意既柚子醋，加埋多茜同多蒜好正，口臭都要食了。介紹返啲食物先，係煮食方面我就特別推介黃金炸魚皮同埋牛腩。啲魚皮係啱啱炸好!卜卜脆加埋好嘅蛋黃係個面，好鬼好食。牛腩就好入味但又唔會好淋有口感，我自己都食咗2碟!打邊爐又點少得牛肉，我比較喜歡封門柳同埋安格斯牛肉。我地只係叫B餐唔係最貴，但D肉都非常高質肉味濃，口感都相當好。另外加左每位20蚊要海鮮，最欣賞係d蜆，新鮮無沙，鮮甜又大隻，抵食既。飲品方面好多選擇，偶爾愛好健康既我次次黎都係飲薄荷烏龍茶，好清新解膩既感覺。而且仲有芝麻雪糕食，佢質地比較杰身，比較似Sorbet, 好香濃既芝麻味又不太甜，推介的。總括一鍋堂係火鍋連鎖中一個好唔錯既選擇尤其係荃灣店翻新左之後，坐得好舒服。…Read More

拉麵控試新野 - 樸一拉麵！位於通菜街夠方便，餐廳細細，估唔到都坐到around 20人。今日我單拖黎食，諗都唔洗諗就叫左蝦海老。至於麵底就選左博多（白）比較幼身。$90蚊既蝦海老包左叉燒、木耳/芽菜同蔥。如果要溏心蛋就要另外加$13，所以價錢以拉麵黎講都算中價啦。食物方面睇相都知賣相好吧，面頭有剝左殼既燒蝦。因為叫左厚燒叉燒既關係，所以成碗野個感覺係惹味但偏向油膩。至於味道是幾唔錯的，櫻花蝦極足，蝦味濃，唔會過咸，大概是我係香港食過蝦拉麵既no.2。隻蝦就好厚肉彈牙，個人認為調味重手左D。厚燒叉燒好淋幾好食，係偏濃味同肥肉比較多。不得不提係每枱都有既魚仔，覺得咸咸香香好好食，辣辣地用黎餸麵都幾好。加埋啤酒更好啦😀平日食食下7點幾餐廳多人喇，我都快快手食完走人。所以想食既朋友仔可能要早d黎，如果唔係夜d可能要等下位。…Read More

港女家母問我有冇餐廳可以食飯順便打卡，問一問原來佢已經搵到間😾好囉咁我負責去俾錢同幫佢影相囉餐廳位於K11 musea，格調實足，而且佈置幾有時代感。佢既牆身係360度HD screen，一進場既時候既花海圖我估計係荷蘭花田吧！絕對係可取悅媽媽級人士。明明我好肚餓，佢野都未叫就叫我幫佢揸機打張卡先呀，我都好配合🥱講下d野食先，我地叫左tasting menu唔洗諗唔好煩：前菜- 西班牙鯷魚蕃茄配水晶麵包：賣相很好吧，很適合打卡。咸咸地又帶鮮既魚蓉再配上酸酸地既蕃茄，幾夾的，都起到開胃作用。順帶一提中途轉左轉背景做楓葉，映照到成間餐廳一片紅色，冇得去日本都可以頂住先。水果紅酒好飲😎湯- 黑松露磨菇湯：creamy而且香濃，刨左片黑松露係面，味道亦突出。點湯既多士都非常脆又夠薄，掂。主菜- 意大利紅蝦意粉：呢碟賣相坦白講唔多得，但味道是不錯的。紅蝦味道鮮甜，鮮味亦都融入意粉當中，再加點蕃茄既甜酸味，幾好食！加上意粉是偏咬身，估計係手工意粉（？），是my type😂又順帶一提食主菜中途換左幾次背景，伯母真係好唔得閒咁瘋狂打卡。其中換左個雪景既時候，隔離枱嗰幾位女士仲問侍應哥哥「你地係咪效凍左冷氣？」👩🏻‍🦳😂睇黎相當投入，差返首let it go咁最後甜品係檸檬雪芭，賣相好可愛😎今次到我打卡。外圍係白朱古力，裏面係cream再加酸酸地既檸檬Gel, 估唔到咁好食。總結係唔錯既打卡點，冇得去旅行可以止下癮。我最鐘意係雪境同流水境，聽住d流水聲都幾relax。…Read More

話說喺灣仔返工既朋友同我講，佢附近有間養生湯麵幾好食，作為藥膳同碳水化學物之鬼，我始終都係去試左。睇一睇餐牌，價錢非常合理，平均50-60一碗麵。我地兩條友仔叫左個二人套餐（$138），包兩碗麵、一款小飯同兩杯野飲。注意凍飲是要加3蚊的。又講下d野食先：藥膳農場雞配竹笙銀耳養生湯米線 - 個湯絕對足料，香甜既紅棗味，但藥膳味不算濃，大部分人都易入口。雞件有兩件，都係髀呀！好滑好有雞味，都好多肉下，但如果俾多件雞就正了。畜生（竹笙）都爽口，賣相好，唔會揦埋一舊。鮮茄雜演（丸）米線 - 男友表演藥膳係佢敵人，所以叫返個雜演米線算，我試左d貢演同勿演（墨丸）都係爽口彈牙的。藥膳雞腳 - 跟餐的，男朋友竟然話藥膳野好味，佢表示唔多重藥材味，雞腳林，唔會咸，好好啃。埋單一百食十幾，坐得舒服，食得飽，算不錯。…Read More

MK既高質西餐唔多，仲要係黃既少之又之，仲要係要坐得好舒服既，我諗LAB EAT算係不二之選。餐廳大既好處係方便搵位，就算星期日繁忙時間黎都唔洗驚！我係對上個星期六既lunch time去食既，咦，原來都唔係唔洗驚架喎。雖然個場真係好大，但已經坐左8成滿，令本人既期待指數標升！見個lunch set都幾抵幾多野食咁，所以立即去馬！講下野食先：頭盤方面我要左餐湯 - 南瓜湯南瓜湯很creamy，雖然好清楚嗒到南瓜既味道又有南瓜蓉，但都唔會影響到順滑感，不錯主菜 - 炭燒美國安格斯牛肉眼扒配薯條我睇完蘇樺偉套戲，套戲入面蘇媽話樺仔食牛生肌肉先拎金牌。為左響應蘇媽，我都要食返下牛。牛扒既水準幾好，叫medium無多無少，肉質嫩多汁，完全無筋，而且肉味香濃，點mustard 原汁原味。廚師應該有焗一陣，所以個面好香脆。伴碟既露荀以海鹽調味，都好鮮嫩。薯角上到碟已經唔脆，不過都唔錯。我媽叫既海鱸魚都好好食！尤其欣賞佢個sauce, 帶點酸，好清新。薯菜 - 炒野菌加30蚊有咁大碟，有磨菇草菇，調味適中，香味濃郁而且爽口，不錯。甜品 - 有機豆乳忌廉芝士布甸幾特別既甜品，欣賞佢唔會過甜，濃濃既豆乳搭配芝士既咸香。口感不是布甸，比較似厚身既mousse, 都幾好，撈埋d好香口既曲奇脆脆就好快食完。總結是理想的一餐。…Read More

阿叔泰貴為元朗其中一間最好食既黃店，一直是本人喜愛既餐廳，食船麵是無誤的。我次次黎都係叫豬肉船麵，每次叫唔同麵底，唔會食厭。個湯底係不得了地好食，牛味勁重，嗒落陣陣藥材味，忍唔住率先飲左好多湯😂唔係講笑，真心好飲金邊粉都真係幾夾，冇河粉咁滑，但比較健康。飲完原汁原味既湯，就會響應4大配料，缺一不可，去加甜酸苦辣4個元素落去個湯度。鋪頭會提供白醋、砂糖、辣椒粉、魚露。個人黎講就鐘意酸辣，咁我咪落多d白醋同辣椒粉，落完勁開胃。不得不提佢既豬肉片同豬肉丸都係好食。豬肉片係偏瘦，所以唔係油花香個種，但就好重豬味。豬肉丸都好彈牙香濃，想食多幾粒。而留到最後講既炸豬皮更加係邪物，沾少少湯，好食！我飲左唔少湯，但都完全唔會口渴，因為完全冇味精。飲品方面必須叫香茅菠蘿特飲，比例剛好，是真菠蘿既甜，好好飲。另外佢既裝修幾有泰國風味總結真心推介佢既船麵，黎到必叫😍不過除此之外都有其他選擇架…Read More

HARA我食過幾次，因為係一間pet-friendly既餐廳，次次都同埋狗狗黎食，門口打卡位無論for人定for狗都係一流。今次同媽咪食的，所以同長輩就免了打卡位（設計對白：呀女呀，我唔知有冇影到呀😂），所以還是專心享受野食吧～去相：鮮活紐西蘭托托蜆 - 配香茅椰汁（$138）托托蜆size巨型，鮮味爆發，隨蜆附送bb蟹在殼內（陰公），新鮮就是咁簡單。煮法方面都有3種選擇，呢款是清香帶點creamy既感覺，欣賞佢既調味同烹調中和左海水既咸味，要知道鮮味同腎虧咸只是一線之差呢。。香烤鴨肝配燒菠蘿 （$88）賣相都贏了，鴨肝微帶焦糖色，烤得脆身，配上新鮮沙律菜同燒菠蘿，中和點油膩感。睡蟹意大利飯 （$208）HARA的signature菜式，似乎是必叫的。發現今次不是以蟹蓋作擺盤 ，而是碟上，有點失望。但味道依然好，每啖混和蟹羔同三文魚子，很鮮味很creamy。意大粉飯熟度剛好，口感實足。伊比利亞黑毛豬T骨扒 ($228)睇相就是好食吧，生熟程度岩岩好，粉嫩既肉再加微脆既外皮，一啖放落口，肉質爽口，油香爆發，超級滿足。點埋佢個汁都好正，撈上大量蔥同蘿蔔蓉，生色不少。煎芝士蛋糕配海鹽焦糖汁 （$68）外層像是酥片，内層是煎得微暖帶點融化感既芝士蛋糕，配上水果同海鹽焦糖醬，不會太甜，喜歡。總括HARA既A LA Carte水準不錯，服務水平好，環境氣氛適合三五知己把酒談心，推介。…Read More

男朋友成日都嘈住要食烤魚😤唔多食魚既我結果都要陪佢食🤭你開心咪得囉可睇睇餐牌呢度除咗有烤魚食之外，仲有干鍋同小炒。咁我地今次都係主用食魚，魚都有五種口味（香茜皮蛋、麻辣、清椒、酸菜同水煮）。我地先點一個酸菜魚，店員都好快攞咗個爐俾我地，一盤勁多酸菜同草菇嘅烤魚都隨即送到！我就即刻試咗一啖個湯，清甜但就唔夠酸，我地鋪平啲酸菜再煲佢5分鐘正式開餐！條鰓魚多肉而且小骨，同酸菜一齊食好夾，外皮佢炸過，食落好香口，條魚啲肉好滑好好食😋（因本人唔多食魚的，魚既部分由男友處理，我食過兩啖，覺得腥就放棄了）另外我自己就叫左杯神泡sapporo再叫左個餸食，干煸四季豆是必食的，極之惹味，又平又大碟，我自己隊左大半碟。辣辣地，用黎佐酒一流。另外為左令自己食飽，我仲叫左碗酸辣粉食，極之辣又有麻香，可惜唔多覺有酸味。不過唔怕！我有酸菜魚，浸落去食瞬間變酸，得左。男朋友話佢下次可以帶朋友黎😂我表示認同…Read More

因為男朋友係大胃皇，佢就成日嘈住要食放題。見啲間野做緊第二位半價就陪佢試下啦！我地點咗M5和牛餐，我地簡完湯底之後，就即刻送咗個刺身同海鮮拼盤俾我地。我地今次叫咗豬骨湯同沙爹湯，個人比較中意濃湯，所以推介沙爹湯俾大家。湯一黎到就即刻倒曬啲海鮮去煮住先，同時整啲牛肉食，牛肉半肥瘦啱啱好，食落好軟有油香好食！海鮮種類都算多，蝦好新鮮彈牙，見到隔離枱點咗廿幾隻食真係好誇張！呢度仲有蠔可以俾大家整黎食，食落好鮮甜，食多十幾隻都回哂本。刺身方面好新鮮，樣樣款式都有。我尤其鐘意赤蝦，大大隻賣相好，而且好鮮甜，重點係任食，我地都忍唔住食左好多隻。炸物方便全力推薦天婦羅蝦同炸饅頭，見到流轉都快，店員keep住新鮮炸起d野食。熱辣辣又脆點會唔好食。天婦羅蝦外脆內爽口，炸饅頭點煉奶面頭脆卜卜都冇得輸。甜品方面，款式有雪糕雪條，自制甜品。男朋友係啫喱控，佢就食左兩杯。我個人黎講就好滿意個奶凍，奶味實足，超級正，如果唔係食太飽我會食多一杯。總結黎講食物款式真係好多，無論係打邊爐料、串燒、炸物、壽司、刺身定甜品，樣樣都有，係幾正既。…Read More

本人是撚集團的常客，佢開餃子點點可以唔G支呢！佢既餃子味道同佢個名一樣咁新潮，搞到我都忍唔住叫左D異常口味試下🤪 順帶一提佢係有得外賣生餃餐牌如下：選擇多到呢好可惜既係期間限定西洋菜豬肉鮮蝦餃太受歡迎，令人相當難過。但結果好貪心既我都食左好多款餃，唔同整返（湯、煎、灼）都試過哂：香菇木耳豬肉配蕃茄薯仔蘿蔔排骨湯💛餃子皮厚度適中，香菇木耳好有口感，木耳原條爽口，口味相當清新健身。至於個湯係極濃，相信係餐廳考慮到唔少人會食餃子配麵。蕃茄味係相當夠，足料，味道偏甜，家母相當喜歡。灼螞蟻上樹餃💛好特別，香辣既肉碎加粉絲，帶黎味覺上既沖擊。煎椰香荔芋臘腸香菇餃 💛如此邪惡既組合我都不怕以煎既方法為佢加持，原因係呢d本身帶油香既餃配煎食會更加香口，將佢發揮到極致。煎雙重芝士粟米鮮蝦餃 💛 肥豬表示芝餃唔叫煎對唔住自己，一咬就爆汁了，咸香味好正。香煎鵝肝和牛烤菇餃 💛叫左一隻試，極之邪惡，4個字「齒頰留香」。差d唔記得提佢個菜甫，麻香重，夠脆夠辣，食左勁多。每啖餃都要餸😂總結係推薦，選擇多，味道好，服務好，環境都好。唯一意見係：我本人比較貪心，如果餃子4隻可以雙拼更好，可以試多d唔同口味🤪…Read More

元朗國係飲食界既All Blue (睇One Piece既人會明），住呢度既人從來唔憂食，well~唯一就係一到夜晚D好食既鋪係難搵位 。有日試左成日經過逸之燒，專登book位，7點左右已經開始多人，好彩我醒😂 我同媽咪兩個人坐梳化4人枱，坐得舒服🤟🏼餐牌勁多選擇，諗都諗左好耐，開始介紹野食：汁燒豚肉金菇芝士串 $24 - 汁燒味道跟豚肉很夾，超級大串，好多金菇菜，不錯。汁燒月見免治雞肉串 $38 - 雞肉串啖啖肉，當中混和雞軟骨，口感很好，點特製醬汁（有我最鐘意既生蛋）好滋味。推介鹽燒豚肉荔枝串 $28 - 鹹甜組合，粒荔枝好大粒好甜，燒到暖暖地又係令一種感覺，加埋豚肉食好夾。汁燒鰻魚串 $28 - 咁大串咁厚肉估佢唔到，蒲燒鰻魚燒得外皮脆身，肉質彈牙結實，帶點juicy，好正！雞泡魚乾（半客）$40 - 居酒屋必叫，好惹味，佐酒一流。活赤貝刺身 $58 - 呢個價算好良心。赤貝好爽甜，鮮味係口爆發。沖繩赤蝦刺身 （$98）- 呢個好抵，98蚊6隻日本赤蝦，好生鮮爽甜。枝豆 $28 - 同樣為佐酒名物，呢度落鹽比較輕手，light version既枝豆都好！和風魚生沙律 $48 - 我最鐘意既柚子和風沙律醬，清碟是必須。魚生厚切大粒，極度肥美，必叫。火炙三文魚壽司 $22 - 呢味相信好多人都鐘意嗎，三文魚本身咁美味，炙燒迫埋d油出黎個種香味太吸引。炸軟殼蟹手卷 $28 - 費時爭食，同家母一人一件，軟殼蟹又脆又多羔，大大件，唔會食到一半就淨食紫菜飯。店員姐姐好好咁提我要盡快食，因為襯紫菜仲脆個陣係最好食，好貼心。明太子雞翼 $25 - 雞翼外皮香脆，一咬就爆汁，明太子加雞肉熱辣辣，推！總結：成日話係元朗國生存到既餐廳一定有返咁上下，果然無錯。呢度食左咁多野大約600蚊（我同媽食飽飽），幾抵食。而且環境好，坐得舒服，服務都好，真心推介。…Read More

一向都唔好京菜（註：還是抗拒不了北京填鴨）既我焗住去朋友飯局，結論都係唔好京菜。我表示粵菜先係世界級。先講講個茶，茶錢15蚊一位，菊花清香叫對得住價錢。菜式方面比較ok到既菜式係魚香茄子，佢係比較新派既造法，茄子唔多，主要青椒木耳絲，食落酸酸甜甜，幾有口感，但略嫌油膩。酸菜魚既魚係新鮮，魚好滑唔多骨，湯底較為清淡，如果再酸d更好。順帶一提d粉條係好食的，但花左唔少時間搵。北京填鴨都係唔錯，都燒得幾香，但鴨皮略嫌唔夠騷脆。不過包埋春餅加乾蔥青瓜點醬就可以了。218蚊半隻黎講算唔錯。最後全晚最滿意係炸芝麻湯丸，好香口，芝麻味好香濃。總結京菜係重味偏油，適合重口味人士。…Read More

焫焫焫焫焫焫著，校長燒肉快啲約！（此乃男友創作之標題，與本人立場無關)身邊不少男士（包括本人男友）都係校長燒肉既粉絲。佢最近成功爭取左我第二次陪佢黎食。佢表示上次2個鐘都食唔哂啲野。所以佢今次調整策略邊燒肉邊打邊爐再覆桌咁話喎😯今次去發現熟食比上次多咗，仲多咗熱狗腸同點心😇點心種類都幾多：蝦餃，金錢肚，燒賣等等。係放題有點心食就真係小有，味道就正正常常，帶埋爺爺嫲嫲黎食就啱哂👍🏻不過呢除左第一轉見到有熱門既蝦餃燒賣金錢肚，跟住就冇再出過，要食就要去搶喇😂燒肉櫃區多野食，雞牛豬基本啦。淨係雞翼都有三種，比較鐘意土匪雞翼。仲有我最鐘意既多春魚，我鐘意呢度燒野會鋪張油紙，冇咁容易痴底，少有地煎到唔係五馬分屍既多春魚。另外仲有魷魚雞軟骨台灣腸金沙骨叉燒....真係勁多選擇。肉類我最中意食牛五花，呢味野就好難伏，肥肥地有油香點埋燒肉豉油食真係唔錯。前面提及到喺燒肉既同時可以打埋邊爐，咁就唔洗係度等！湯底方面有就款，可以用鴛鴦鍋，本人就食咗壽喜燒同埋四川麻辣鍋，二個都幾好。打邊爐可以整啲粟米、菜、丸類、肉等等。咁就唔洗驚燒肉期間會餓啦😂呢度仲有個刺身櫃，帶子、三文魚、甜蝦好多種類都帶！食得出幾鮮甜，融雪做得幾好，值得一讚。食到飽飽，仲有一大個甜品櫃，推介伯爵茶涼粉，茶香足，唔會太甜。另外仲有好多款雪糕雪條，蜜瓜雪糕好食就好多人都知。有隻唔起眼既榴連雪條原來幾重榴連味，不過食落都有d甜，但係幾好食既。另外仲有朱古力沙冰，幾香濃的，好食。以呢個價錢黎講，提供到咁多食物選擇。如果多人食都幾好，起碼個個都岩食，推介的。…Read More