lamlamvi's Profile

外子突然星期六約在外面食晚飯，看店名「樂燒遙」心諗：吓？燒嘢食？家下天氣好熱喎。。。辦完事情，就早點去到餐廳等外子。餐廳外面有開放式桌椅，有酒吧區，裏面格局有點像茶餐廳。我們一行六人，放眼每個座位夠闊落，枱面很夠大，但心中自是沒有什麼期望。正正沒有期望，就更令人喜出望外！精粹盡在每一碟上枱的食品的擺盤和質量！外子最喜愛食日本料理，疫情前常與他的老友二人也會來一盤廚師發辦刺身，把酒言歡。他來到，一坐下，就說，交俾廚師，來一盤靚刺身！原來，他預先落order預訂咗刺身！刺身拼盤一上場，人人立即相機先食！擺盤好靚哦！我在餐牌點咗生蠔，$300有半打，新鮮又抵食！至於和牛刺身，真係要講吓我對呢款食物由怕到愛的親身經歷！第一次食係同班大學同學一齊食日本料理，見到生嘅牛肉，感覺茹毛飲血，未放落口就已經驚。後來都經過好多次都係唔敢放落口，或者放咗落口之後偷偷地吐出來用紙巾包着。。。過唔到自己個心理關口。😅🤣終於直到跟外子去了「大阪」（以前位於阿士厘道的日本料理店），正正係外子同佢老友記成日去食嗰間，試完之後就覺得，呢種人間美食點解我咁遲先至識得享受！原來「大阪」搬了2次之後最終也結業了，師傅宜家落戶呢間鋪，難怪味道、賣相咁熟悉呢！和牛刺身口感滑溜，入口立即溶化！真係好新鮮美味啊！如果加上炸蒜片仲正！池魚刺身兩食，薄切加厚切，這就考廚師的刀工了！話明燒烤店，自然要試吓佢哋嘅燒烤物！試咗雞軟骨、牛舌、雞翼，最特別嘅係呢款雞軟骨腸仔配新鮮蛋黃，雞軟骨腸外脆內軟，配上蛋黃汁，非常滑溜！Oishi 美味しい! 最後加上呢條喜之次，雖然細條咗少少，但係肉質非常嫩滑，炸得恰到好處！見到餐廳嘅午餐定食價錢都性價比高，下次可以約朋友嚟試吓午餐先！…Read More

好早已聽聞呢間pink pink 粉紅High Tea打咭餐廳，今次趁朋友生日，三個女士去食個生日lunch。網上用OpenRice訂位，非常方便！第一次用OpenRice的Apps付款（綁定信用卡），仲有Cashdollar回贈，正！小妹一向有cyber phobia，今次餐廳消費經驗，行出一大步！雖然我哋冇坐到花牆位置，但就俾咗唯一一張可以見到少少海景嘅窗口位置檯比我哋。當日下午陽光充沛，在靚靚風景下食午餐，感覺很舒適。當日點左三個午市套餐，價錢也經濟，有湯/沙律+主菜，食物水準也不錯。餐具粉紅襯金色，雖然我唔係粉紅色的fans，但見到也賞心悅目。午市套餐竟然有龍蝦湯，味道濃郁，非常有驚喜！加咗一個小食——明太子釀雞翼，賣相靚，但味道一般。其餘三個主菜分別係：Pama Ham 薯仔粉：軟林林QQ地的薯仔粉，口感好得意！香煎吞拿魚藜麥沙律以下值得推介俾各位嘅：澳洲和牛面頰配薯菜 おいしい （Oishi）估計和牛面頰先燜過，然後再香煎，入口好林好入味！一啲都唔鞋口，肉味依然濃郁嫩滑😋😋😋網上訂位時，寫咗生日朋友個名，上甜品嘅時候，見到個甜品寫住Happy birthday，仲有埋我朋友個名，佢自然開心又驚喜！我哋好嘈，又好多嘢問。餐廳侍應對我哋嘅問題都一一耐心回答。整體也不錯！…Read More

第一次去幫襯時係幾年前朋友介紹，說其奶茶、菠蘿油出名要帶我一試，當時朋友仲講我知咩叫「茶走」。當時餐廳門外大排長龍，排到裏面仍要企一陣。當時也覺得員工「串」，但不至於對客人無禮。那次之後我一個人也吃過一次，仍然門外大排長龍，串有佢的理由。直到上星期日（21/7/2019）帶兩個來香港旅遊的朋友去太子食早餐，行經門口見門口竟然冇人排隊，於是走入去，唉。。。一行咗入去之後我已經可以完全BLACKLIST 呢間店！我明白點解幾年間佢地再冇人排隊（同隔一條街另一間的人龍相比，少人也有佢的理由），而呢一次登門拜訪的經驗可以講，呢間餐廳完全影響香港服務行業形象的餐廳。出了名的本地餐廳員工態度惡劣我已經預左，但冇諗過係由入門口已經被人（操不純正廣東話的大媽）鬧！冇錯，係鬧！從未試過食個早餐會比人鬧架！呢個咩世界？！由入門口開始，門口負責夾面包嗰個操不純正廣東話大媽已經好唔客氣問我和朋友5人：「做咩走入去？阻住佢地個門囗？！」😱大佬，你門口冇人龍排隊咁我當然走入去店內，企在門口搵人招呼我啦！我見佢咁問，就望下入邊見有吉位，又有吉枱，咁我五個人就行入D。其實，行入去都冇人理/招呼你，只見D大媽扮到好忙咁睇你唔到！我就再行入D自己搵位坐，當我哋想坐下時，一個大媽好緊張咁問：「你哋幾多個人？唔好入來阻住我哋！企返出去！」我有冇聽錯？冇人招呼你仲話你阻住佢？有位，但叫你出去！盲嘅都見到成間餐廳只有我們5個人企喺度等緊你安排座位！但仲話你阻住佢！我和另一朋友立即忍唔住，問佢「你做咩咁冇禮貌鬧人架？我地見門口冇人排隊，唔行入來行去邊呀？行入來企等位又比你鬧阻住你？咁可以企去邊行去邊呀？」跟著另一個大媽好勞氣咁問：「咁你地幾多個人呀？」「5個」然後大媽指住最入邊近厠所門口一張4人枱說：「你地人多，加多張櫈在走廊，唔好阻住人！」嘩，又講多次「我地阻住你」呢一下我地立即全部人扯🔥！一行人立即離開停止再受氣比呢D大媽鬧！大媽咁做生意，你哋客人多做到躁底都唔好捉我地D香港小市民、外地遊客來出氣啦！一間餐廳食物再好，但員工態度惡劣令食客食都食得唔開心，係自己同自己公司倒米！也明白，這間知名茶餐廳現今門口冇人排隊，一定有原因！香港的服務行業就係咁比你地影衰曬！（宜家諗返都仲嬲嬲地，替其他同行不值！…Read More

見有咁多人like, 今早特登從屯門坐車出荃灣慕名去一試。一個人去食茶餐，搭枱係常識。但係樓面個阿姐態度惡劣，要我轉左四次枱，當D單身客人好似乞衣咁搬來搬去，呢下對食客極唔尊重已經算！仲話我一個人霸住2個人嘅座位，佢講野真係好有問題！但係因為叫左野，唯有繼續坐，忍住冇出聲。間餐廳地方淺窄，仲要加摺凳讓食客坐落中間條走廊度，阻住客人出入。等野食其間，見到有一對男女突然起身離開，好谷氣咁講「你有佢嘅樓面冇同我哋落單架？等咗咁耐都未有野食，我哋唔要啦！」個樓面阿姐話「你已經落左單」，個男客人好有禮貌咁話「我俾你食埋佢啦！」眼見客人等野食等到要起身離開的話，可想而知間餐廳嘅樓面同廚房流程管理極度不善！總之，如果一間餐廳佢嘅服務態度令到客人未食嘢已經咁唔開心，啲嘢幾好食都冇用！唔好恃住自己出咗名，就唔需要保持服務態度和禮貌。樓面員工服務態度差，加上餐廳無法應付人流客量而出現流程管理有問題，就要變相讓客人受氣啦！今時今日咁嘅服務態度點得㗎！…Read More