familyc's Profile

一家人做冬，為咗方便屋企人，就搵咗間係屯門嘅餐廳。雖然位置偏僻，不過都有幾多人黎依到食。我地揀咗坐出面，睇下風景有特色啲。我最中意佢嘅拼盤，因為比起平時嘅泰式拼盤真係多好多種野食，例如魚餅、荷葉雞、春卷等等，每樣都有6件。其次係咖哩加農夫包，農夫包吸哂咖哩汁，再meet黎食或者包住啲肉黎食都得，咖哩香濃，同豬肉一齊煮得好入味。燒雞都比想像中好食，因為之前食過嘅燒雞只係個外層有味，入面就好dry，但係今次嘅燒雞連入面嘅肉都好有肉汁~…Read More

平時睇電視廣告都知道深井有間裕記出面食燒鵝，今日終於有幸黎食番餐。燒鵝真係超正！！！皮燒得好脆，下面層肥膏同肉比例均勻，成舊咬落去有口感之餘，仲好有香甜味，啲肉汁好多，簡直係滑嫩多汁。其他小菜都一樣好好味。例如咖哩雞煲，係香港味道嘅咖哩，啲雞食落就知係新鮮雞又入味。豬扒睇落有好多辣椒，不過只係裝飾，食落去唔辣嘅。鴨舌唔韌，冇咩調味不過令佢本身嘅味道就更加突出。椒鹽鮮魷略厭唔夠脆，炸得唔夠好，不過本身啲鮮魷夠新鮮，幫佢加番分。…Read More

去過松記好多次，見佢出咗啲秋冬限定就再去試下。不過今次係去天水圍依頭，比較細同偏僻，冇咩人，可能因為仲係好早嘅關係。今次叫咗鮮奶燉花膠，一於滋補下乾燥嘅肌膚。因為要燉，所以都等咗大約20分鐘先黎到，都會有少少唔係幾耐煩。一黎到就緊係睇啲花膠多唔多，都算OK~ 食落去又真係有黏黏地嘅感覺。手工芋圓有蕃薯同芋頭味，增添顏色之餘仲有口感。整體黎講都好滑，唔會太甜，食完feel到個嘴唇好滋潤，如果奶味重啲就更加好。…Read More

想食拉麵，但係又冇咩錢，咁啱搵到依間價錢對我黎講比較合理嘅拉麵店。間鋪細細間，所以都等咗一陣先拎到位。一見到個餐牌就眼花暸亂，因為有很多選擇，老闆亦到貼心咁整咗大約20個套餐，唔洗諗得咁煩XD 我地叫咗A餐 (炸蝦配手打烏冬、嘩鬼炒飯、小丸子)、自選麵、吞拿魚沙律卷、日本年糕、風味拼盤。依度勝在有好多配搭，無論係麵、主菜、湯底都總有一款啱你心水。日本年糕煙煙韌韌幾有口感。因為我地唔食生嘅野，所以就冇試到啲刺身。…Read More

第一次食越南菜，咁啱趕得切黎食下午菜。$36有1碗粉加飲品其實幾抵，我地叫咗3個粉同2個小食。碗粉又唔會因為係下午茶所以縮水，湯底好夠味，個人覺得啲麵條嘅軟硬度適中，撈檬配埋汁都幾滋味。配料亦都唔汁輸，香茅豬扒同豬頸肉都醃得入味又唔會太鹹，煎得好香。生牛肉片又唔會太生，啱哂我。比起粉麵，小食就唔係幾抵，份量有啲少，不過蓮藕釀餅同蒸粉包又真係唔錯，值得一試。而特飲都淨係加$4，就緊係叫番杯椰汁冰同香芒雜飲。…Read More

元朗一向都有好多打冷鋪，依間可以話夠貼地。除咗食打冷，仲可以打邊爐。食打冷一定要叫炸蠔餅，依間嘅蠔餅夠大件，夠脆，啖啖都有蠔仔，唔會淨係得麵粉，如果唔中意食油膩野就唔好叫~ 仲有一定要叫蠔仔粥，其實唔係真係粥，而係泡飯，調味適中，配埋蠔餅可以解膩，令人引唔住食多幾碗。滷水什拼，好夠滷水味，而且有好多種野食，例如鵝腸墨魚片豬大腸紅腸芽菜等等。韭菜豬紅，味道同平時一樣，不過勝在夠多。啫啫雞煲，夠猛火，好入味。沙拉骨，略厭太多沙拉醬，搞到好膩，不過鑊氣唔錯。…Read More

茶木不嬲都係有保證嘅台灣餐廳，坐得舒服，服務唔差，野食價廉物美。醬燒豬軟骨麵，湯底入味，豬軟骨夠軟又有骨有肉，夠哂惹味。黃金酥炸排骨，好好好大塊，炸得好脆，有少少照燒醬令佢冇咁油膩，而且炸粉唔算多，夠哂有良心。馬鈴薯絲炸蝦卷，好巧功夫嘅一道小食，用薯仔絲包住舊蝦，兩者比例均勻，又唔會蓋住蝦嘅鮮味。蚵嗲肉碎泡飯，夏天冇咩胃口，食碗泡飯就最好不過，蚵嗲肉碎鹹鹹地就更加開胃。地瓜炆牛腩，仲有個火慢煮緊，牛腩肥肉適中，夠大舊，同蕃薯一齊令有一番風味。炸魚豆腐，幾香口。香煎餃子，唔咩特別。最後再叫咗草莓香草蜜糖磚塊仲有黑糖芋丸水果仙草，茶木嘅甜品一定要試，靚之餘又有特色，冇偷雞！…Read More

係屯門附近食完飯，當然要滿足一下第二個胃，咁啱搵到依間嘆甜品~ 雖然鋪頭細細地，不過野食嘅種類都叫多，有傳統糖水、新式啲嘅糖水，同埋出哂名嘅窩夫！我地叫咗2個窩夫。焦糖脆脆花生醬甜奶鮮忌廉窩夫，顧名思義，窩夫上面有焦糖脆脆、花生醬同忌廉，仲有雪糕球，首先佢依到啲窩夫外脆內軟，而且係成塊上，啲花生醬夠多夠濃，基本上係可以每一細塊嘅窩夫都可以沾滿花生醬，真係估唔到窩夫同花生醬又幾夾，平時好少食到依種味道嘅窩夫。士多啤梨鮮忌廉窩夫，士多啤梨份量多，真係好滿足。睇得出好有心思，因為每個碟都會有隻用朱古力醬畫嘅貓咪，真係睇得又食得！…Read More

平安夜唔知去邊到食好，見到依間餐廳係中西式之間，啲野食平得黎又幾吸引，就揀咗佢。環境都幾舒適，我地5個人叫咗農夫蕃茄湯長通粉配煙鴨胸瑞士薯餅、瑞士汁豬扒天使麵、法式香煎魚柳飯、法式煉奶烤麵包。首先要贊嘅係瑞士薯餅，佢唔係好似我地一般食嘅薯餅咁，而係一條條切絲嘅薯仔再整成一塊好似網嘅薯餅，用個鐵板裝住，好脆唔多油，又有伴菜同茄汁，一齊食就更加有口感，因為太好味最後我地再叫多一碟。豬扒天使麵同魚柳飯就冇咩特別，同普通嘅西式餐廳一樣。烤麵包就幾香口，不過就寡咗啲。…Read More

新開張個陣見到網上有人介紹就過黎試下，覺得甜品種類太少。隔咗年幾再黎睇下，發現多咗好多甜品，總有一款啱你心水！我地4個人叫咗焦糖Oreo窩夫、草莓芭菲、香蕉紅豆朱古力奶凍、芒果腸粉。本身以為Oreo窩夫會好似普通甜品鋪咁淨係灑啲Oreo粉同埋放塊Oreo餅，點知原來塊窩夫中間係夾咗好多Oreo碎，好有驚喜！而且窩夫外面脆得黎入面又有鬆軟，值得一試。反而草莓芭菲冇想像中咁好食，因為冇咩關於草莓嘅原素，同埋太多cream搞到好膩，不過個賣相幾靚。朱古力奶凍好滑好有奶味，同香蕉紅豆一齊都好夾。芒果腸粉嘅腸粉皮好厚，入面嘅芒果都冇走雞，每一條都有足夠嘅芒果。…Read More

依間餐廳係我去過嘅所有餐廳入面服務態度最差。1) 入到去發現張枱仲未執乾淨，絕對唔係因為太忙，因為有啲員工係棟緊係度，要提醒佢先識得過黎執。2) 點餐個陣叫佢加多啲醬，個員工竟然話「都唔知你講咩」，如果係我地講得唔清楚嘅話，我覺得可以更加禮貌咁詢問多次，而唔係用啲毫無待客之道嘅態度黎講。3) 總共叫咗4個餐，其中1個意粉遲遲都未黎，其他遲過我地黎嘅客人嘅意粉都黎咗，只好叫職員催一催廚房，過咗20分鐘都仲未黎，再催多次，個員工check一check之後，先再問我地係叫咗邊個餐，明顯係落漏咗個餐啦，咁點解第一次催單嘅時候冇發現依個問題呢?搞到等個早餐都等咗45分鐘，同行嘅屋企人已經一早食完，最後要趕頭趕命咁食完，仲要塊雞扒煎焦哂...... 已經好耐冇寫食評，今次真係嬲到要寫出黎，以後都唔會再黎食！…Read More