mukbang_kaman's Profile

日本拉麵店阿夫利，出名食柚子拉麵，依加喺尖沙咀The One有得食，即刻去試下。餐廳裝修簡潔，兩邊落地玻璃，好有簡約美。柚子鹽味拉麵💰$98阿夫利出名食柚子拉麵，呢款鹽味拉麵湯頭清甜，有淡淡嘅柚子味，好夾。叉燒同糖心蛋都唔錯，叉燒有輕輕燒過表面，有微微嘅焦香，半肥瘦食落有油香又唔會過膩。拉麵較為幼身，煮得唔軟爛，不過如果可以係粗身拉麵可以有更好嘅口感。柚子甘露沾麵💰$108沾麵湯係凍嘅，柚子味好香，仲有柚子醋嘅酸味，好清新，加埋香葱同芝蔴非常好食。沾麵用嘅係粗身拉麵，好彈牙，睇真啲係有嘅好似麥粒嘅點點喺拉麵入面。角切叉燒肥瘦均勻，份量略少。唐揚炸雞💰$68炸雞味道偏鹹，有少少雪味，炸得略為乾身。炸軟殼蟹包💰$58包食落好似台灣嘅刈包，原隻軟殼蟹，炸得酥脆唔油膩，配上少少辣嘅沙律醬，好食。…Read More

呢排冇得去旅行，好掛住台灣嘅街頭小食。冇得飛咁唯有喺香港搵下台式小食解一解思念嘅感覺啦！喺牛頭角工業區入面有間隱蔽嘅大伯紅豆餅，係一間街頭嘅台式車輪餅店。去到都已經有十個人左右揸住飛仔等緊餅，大部份係即叫即做，等侯時間大約十分鐘左右。車輪餅有咸有甜嘅選擇，有經典嘅紅豆味，亦都有好特別嘅Oreo/ 酒漬葡萄味。經典奶油紅豆餅 💰$12即叫即做嘅紅豆餅好燙手，餅皮加左綠茶粉，有淡淡嘅綠茶味。餡料係紅豆奶油，份量都好多，紅豆都幾軟綿，不過味道就偏淡，冇乜紅豆嘅香甜味。榴槤忘返 💰$23寫住期間限定，忍唔住嗌左份榴槤忘返。餅皮係原味，一咬開熱燙嘅榴槤餡就吱出黎，榴槤香氣四溢，推介俾熱愛榴槤嘅朋友。…Read More

之前都有喺銅鑼灣同鰂魚涌嘅FRITES分店食過，今次就去到喺觀塘開左冇耐嘅分店。餐廳喺海濱附近嘅商業大廈入面，位置唔易搵，揸車去會比較方便。可能係因為喺商業區嘅關係，星期六中午去到都冇乜人，坐得都幾舒服。餐廳連住露天花園，如果坐喺近花園位，可以欣賞到開陽嘅觀塘海濱景，飲住啤酒都幾嘆。Charcuterie 💰$195凍肉拼盤質素都ok，勝在夠份量，足夠三至四人分享，Parma ham，salami,honey ham, 配埋醃青瓜食好開胃，仲有幾片烤得有焦香嘅薄片Sourdough麵包，可以配豬肉醬。Super Protein Salad with USDA Black Angus Rib Eye Chimichurri 💰$250沙律材料好豐富，切碎左嘅羽衣甘藍mixed埋藜麥、甘荀粟米粒，口感好豐富，最特別係個紅菜頭蓉，甜甜酸酸，伴埋個沙律一齊食好醒胃。沙律可以加錢配唔同嘅肉，我就揀左五成熟嘅肉眼扒，塊扒都幾大塊，煎得外脆內嫩，表面有焦香味，咬落好juicy有濃濃嘅牛味，配上用碎洋蔥同香草嘅醬汁，食哂成塊都唔會膩，健康得黎又好味。Mussels Pot (1/2kg)💰$245每次黎Frites都會必點青口鍋，今次就揀左地中海風味，青口size中等，sauce個base係用黃燈籠椒醬同洋蔥煮，有蔬菜嘅甜味，加埋炒香左嘅西班牙辣肉腸，增添左少少嘅香辣味，唔會搶左青口嘅鮮味，非常夾。個sauce可以用sourdough黎點，厚厚嘅麵包吸收哂個湯嘅精華，得一塊真係唔夠喉😋個青口鍋仲跟招牌嘅粗薯條，薯條偏淋，不過好有薯味。…Read More

星期六朝頭早專登出觀塘拜訪華嫂冰室，食一個邪惡嘅早餐。平時一定大排長龍，今日十點幾去到竟然唔使等位，非常難得。入到餐廳亦少有地冇乜人，坐得舒服。鮮油奶多💰$16厚切多士烘到有微微焦香，因為夠厚嘅關係，表面香脆而入面保持到軟熟唔乾，夾住半溶嘅牛油同煉奶，咸甜香口，真係好邪惡。最欣賞嘅係多士飛左邊，食落更加軟糯。咸牛肉蛋雙拼三文治💰$17有別於大部份茶餐廳，華嫂嘅蛋牛治係熟反蛋，之後再放咸牛肉喺蛋上面，同出面通常食到嘅炒蛋咸牛肉有啲唔同。加多左1蚊轉多士，三文治嘅麵包就比起鮮奶油多嘅薄啲，咸牛肉份量都好多，所以食落咸香又juicy。熱奶茶💰$16 熱鴛鴦💰$16奶茶非常香濃幼滑，有回甘香。鴛鴦有濃濃咖啡嘅香味，不過略為偏酸，奶茶味偏淡。總括食物質素都唔錯😋，不過因為全部單點冇套餐，價錢略為少貴。…Read More