小熊安安's Profile

尋日WhatsApp 「光頭糖水」問今日可唔可以自備蛋糕去切，老闆話冇問題唔會收切餅費，今日一行十人去到食飽飽準備切蛋糕，老闆話等等先要播生日歌同熄燈，場內有閃閃燈光好有氣氛🥳🥳大家都好開心😍😍老闆同老闆娘都好nice👍🏻👍🏻食物又有質素😋😋我要俾足💯分佢哋⭐️⭐️⭐️…Read More

去葵涌廣場想飲一樓Nuttea但12:30去到都未開門，就試下二樓呢間，叫咗小芋圓麻糬豆奶，固定甜度只可以半冰，飲落淡而無味，豆漿一d都唔香濃，芋圓冇味份量又少，麻糬有少少甜叫做好d，飲到一半d冰溶咗更加淡到好似飲水一樣，真係好健康… 可能佢嘅招牌飲品俾白牛、黑牛呢類港式飲特飲，係我自己太傻走去買豆奶 雖然Nuttea兩個男店員嘅態度好差又唔準時開門又特別貴，不過下次都係等晏少少去返Nuttea算了。…Read More

荃灣鱟地坊Aroma 1/5結束營業，今日下午茶時間去人唔多，仍舊係入座後限時45分鐘。甜品依舊有水準，第一次食抺茶心太軟非常驚喜👏🏻第一次食甜品以外嘅食物，紅酒燴素牛肉猴頭菇飯，白飯煲得好靚，紅酒汁太鹹又太甜，超重口味，素牛肉及猴頭菇各只得一塊，兩個人唔夠分。店員說留意FB，應該好快會捲土重來。…Read More

荳花店已轉手（聽講已轉手一年半），而家好多款港式台式糖水賣，唔太甜，最平才$14，又平又好味，等於松記嘅一平價錢，仲好味過佢！我時不時專登兜路走去買返屋企食。佢嘅燒賣都好味，$1粒，抵！…Read More

好耐冇去，食物依舊美味😋，店員依舊服務態度一流☺️。三文魚刺身好有驚喜！非常似真三文魚🍣。桂花叉燒煎蛋飯篤散咗蛋黃先記得影相，原先賣相好靚的😅。藜麥沙律碗好fresh好正👍🏻…Read More

第一次幫襯，下午5點嚟到，叫咗兩個下午茶，食物同飲品（肉醬熱狗配薯條，窩夫配朱古力雪糕，檸檬薑茶、洋甘菊茶）味道都好好，店員兩母女好nice，放咗隻可愛貓咪出嚟同我個女玩，大家又有傾有講:)。期待下次再去…Read More

大半年冇幫襯，今日喺隔離米線買外賣就順便幫襯下，叫咗芝士奶蓋抺茶、芝士奶蓋烏龍茶、黑糖珍珠明治鮮奶。兩杯芝士奶蓋唔記得講要大杯定細杯，店員又冇問我要大定細就整咗大杯（其實我想要細杯），到佢整好咗我先知，查下張單係收咗大杯價錢。芝士奶蓋抺茶叫咗少甜，但竟然甜到死，似多甜！！芝士奶蓋亦係甜到難以形容，明明以前叫過好多次唔係咁嘅。以前我細女最鐘意飲黑糖珍珠明治鮮奶，今日飲咗兩啖話好難飲，話好甜，d珍珠又癡埋一pet嘢咁，結果飲剩半杯唔肯飲，掉咗。落單嘅時候有個店員妹妹仔整緊雞蛋仔俾客未得閒理我，另一個店員妹妹仔坐喺度篤手機好似完全睇我唔到咁冇幫我落單，等到整完雞蛋仔個妹妹仔搞掂先幫我落單。…Read More

荃灣「天·悠蔬食」金沙四蔬配素鹵肉飯，炸物夠脆，有茄子、椰菜花、豆角，仲有一款唔似係蔬菜，白色的似素肉（？）咸蛋黃味好正，鹵肉醬略嫌太少，只夠撈半份白飯。鮮茄甘筍香芋濃湯配蒜茸包，湯係番茄甘筍打蓉加芋頭粒粒，幾特別，蒜蓉包上次食覺得好難食，唔香又唔脆，今次感覺一樣，只夾硬食咗一塊… 下次會叫店員走包，以免浪費。加咗份甜品「榛子海鹽焦糖乳酪蛋糕」，我食唔出有海鹽同榛子味，焦糖醬亦唔對味，得個甜字，$18得咁細件仲要加一，好一般。佢嘅飲品我只飲過兩款：凍香芋黑糖珍珠、熱咸柑橘蜜，前者非常難飲，死甜，珍珠難食，芋頭味好假好人工化，只飲咗半杯放棄咗，仲要加$10升級，好唔抵。後者嘅柑橘蜜好淡（可能佢d柑橘蜜好貴，要慳住落），除咗熱水浸住果塊檸檬出嘅苦味之外係冇乜味，不過我幾乎次次都係叫呢個，因為其他唔駛加錢嘅飲品我都唔想飲。幫襯咗咁多次，都係覺得佢服務麻麻，今次幫襯蓋第10個印仔（儲滿10個印仔可成為會員，以後有9折），佢都冇俾會員咭我，話下次再幫襯先俾我，怪怪的，我問佢下次俾會員咭我時係咪會做九折俾我，佢答我「應該係」… 都唔知係唔係嘅，冇乜理由儲夠10個印仔仲唔即時發咭俾個客，諗極都唔明。仲要一題嘅係，店員每次落單時都問客人飲咩湯，但唔會講飲湯需要另加$10，要注意（菜單有寫但未必睇到，我初時都唔知，以為係套餐包咗湯同蒜茸包/沙律。…Read More

成個月冇嚟，今日終於就到時間地點再嚟😊店內播放舒情的歌，望望窗外，放鬆心情享受美食☘️感謝店員記得我個女話餐廳凍，一入座就主動幫我哋熄咗頭頂上的冷氣🙂又送多一碗素湯和一串素羊肉🙏🏻好窩心🥰今次冇14日內嘅收據，又早過2:30入座，都打了85折😉食物同店員質數都超好👍🏻…Read More

支持港產片，今個月睇咗三套🎬《明日戰記》、《阿媽有咗第二個》、《緣路山旮旯》。尋日咁啱要去荃灣，就憑票尾去金雞換免費海南雞飯，排咗近一個鐘，6個人6張票尾換咗6盒飯仲送埋例湯🍵雞件有雞肶、有雞翼、都有雞胸，d肉都好滑，皮夠爽。點雞食嘅醬汁有酸辣汁、黑醬油同蔥茸，都好好味湯係用雞骨煲嘅，有好多南瓜蓉同青、紅、白蘿蔔粒，好足料又好味。油飲好好味，份量又多，一個人食一盒好夠飽。呢餐免費餐大家都非常滿意…Read More

熱葷叫咗牛扒（5成熟）好嫩滑，有牛味但好似冇落鹽咁，帶子好淡、蒜茸蝦好啖，都好似冇落鹽咁，問職員攞咗樽鹽同點咗辣椒仔辣汁，食落稍為好少少，但都冇再叫了，食一次就夠。烤鴨刈包、黑松露青豆雞蛋炒飯OK的。煎三文魚、烤豬腩肉幾好味，外皮都脆卜卜又夠熱。生蠔好削唔夠肥美但味道ok的，但我老公都食咗40幾隻。長腳蟹啖啖肉，蟹味濃郁鮮甜，值得一讚凍蟹同翡翠螺味道ok的，要小心翡翠螺食嘅時候有d碎殼痴住肉。沙律有6款，我太飽只食咗3款：藜麥木瓜沙律、蘋果紅菜頭酸薑沙律、凱撒沙律，都好好味。花鵰豬手唔好味，好硬冇乜肉又唔夠酒香。酸薑皮蛋幾好味我食咗兩件。甜品好多選擇，試咗大半都幾好味，最鐘意係焦糖批，批饀係果仁碎好香口，馬卡龍食咗黑加侖子味、咖啡味同開心果味都好正。雪糕係自家製，口味比較特別，有唔知咩豆（出到去啱啱冇晒換上了紫薯味），仲有甘草味同抺茶味，有焦糖漿同幾款配料俾你自己落。好鍾意佢有一大碗新鮮切粒嘅水果，有西瓜、綠色蜜瓜、哈密瓜、菠蘿、青提子、黑苺，我攞咗d巴馬火腿夾哈密瓜食，好正刺身新鮮，都好鮮甜。仲有幾款麵包、餅乾同芝士，不過太飽冇食到。飲品有幾款罐庄汽水同茶任攞、有兩部熱飲機可沖咖啡或其他唔同款嘅熱飲。3個人埋單有OpenRice訂座85折優惠，人均消費$690。算唔算抵食就睇下你食咗幾多生蠔同長腳蟹。…Read More

買了$300外賣回家一家五口做晚餐，有香茅豬扒撈檬粉、豬頸肉飯、海南雞飯、炸蝦餅、蠔仔煎蛋、肉碎生菜包，另外叫多一份$50淨豬頸肉做餸，叫咗$10一份白飯。肉碎生菜包係最好味嘅，泰式香料味十足，下次會再幫襯。蠔仔煎蛋ok，蠔仔好瘦好細粒冇乜蠔味但都幾多，煎蛋香口。$29海南雞飯正常，油飯份量好多，咁平仲想點？點雞嘅汁只有酸甜汁，冇俾黑醬油同薑蓉。炸蝦餅太薄身冇乜口感，麻麻地。撈檬個汁唔夠魚露味，只係酸辣，麻麻地，塊豬扒好硬好乾，冇肉汁，又炸得唔香口，唔知想點。豬頸肉好難食，我仲叫咗個跟飯嘅另加一份淨餸，中晒伏，又唔香又乾又瘦似煲完湯嘅豬肉咁，平時家人最鍾意食豬頸肉，今次每人試咗一件剩低晒冇人肯再食，我自己整嘅好食好多。…Read More

今日又去咗葵興「入素」。咖喱豬扒飯嘅咖喱汁好香滑，有椰汁香但有d辣，個女食唔到，問店員攞咗d燒汁（香草茄汁）撈飯，豬扒香脆飽肚。惹味嘅羊肉串係個女嘅最愛，今次都有order😋不過佢話今次比之前嘅辣，只食咗兩粒。套餐包一碗香菇粟米粒素湯，個女好鍾意飲💖凍白桃綠茶（少甜）茶味好濃，啖啖白桃味。憑上次張收據，今餐又有85折。（憑單14日內2:30後入座享全單85折）…Read More

細女上完空手道班，指定要食呢間。素湯同素滷肉羽衣甘藍菜飯都係我個女最鍾意食嘅💙西檸杏鮑菇唔錯🍋有七舊。今次係第三次嚟，聽到隔離枱問起先知道原來可以儲印仔做會員，每次幫襯儲1個印，儲夠10個有張永久會員咭，以後幫襯有9折。唔問d店員都唔知到有呢一回事。由我第一次嚟，到今次都覺得呢度食物ok但服務麻麻，有待改善。…Read More

今日又要落葵興參加中心活動，先去入素食晏。Order咗喇沙牛肉湯麵， 素蠔油娃娃菜，羊肉串，雜莓汁。麵同羊肉串都有d辣，我個女邊食邊飲嘢都食得到。羊肉串我只食咗一粒，個女食五粒，佢話好辣（其實只係少辣）不過好好味，味道真係似羊肉。喇沙湯好香濃，配料有三色椒、豆腐卜、素牛肉片，幾好味。娃娃菜正常，第一次食素蠔油原來只係咸咸地冇乜特別。呢個餐兩母女分嚟食，我唔係幾夠飽添😅憑上次幫襯嘅收據，2:30後入座有85折，今次埋單$95。…Read More