linda_123's Profile

今晚放工同朋友去荃灣食野，大家又想坐得舒服啲，愉景新城比較多選擇，所以就去左。見到三代目平日晚上時間都幾多人食，一定唔係伏，但又因為餐廳好大，所以有位。三代目鋪面都好靚又舒服，大家就好快決定食呢間。發現性價比都好高，食物質素唔錯，重點想提係服務態度好好，令人好舒服。食物方面，鹽麴枝豆 $32居酒居必叫，新鮮好有豆味，鹽麴味比較少見，特別！ 燒鳳梨牛柳串$38、燒一口牛$45居酒屋🏮一定要食燒牛，鳳梨中和左油膩感，值得一試，兩款牛串唔會韌，好香牛味！大蜆味噌煮$82啲蜆真係好大，味噌唔會太咸，調味做得好好！大蜆都好新鮮！海之天婦羅$118天婦羅外層好香脆，唔會太厚，即叫即整，夾落去已經知道好食。我地鐘意炸蝦同帶子，夠大隻又新鮮！帶子有黑松露，超香！另外魷魚、魚都唔錯，我自己最鐘意呢款！最後我地兩個都叫左熱沖繩黑糖珍珠牛乳烏龍（$36），好好飲，係幸福嘅味道，我見佢鋪面中間好飲可以叫飲品外賣，下次行過可以買！食完真係好幸福！🏮🏮…Read More

今晚約左朋友行街食飯，行完街見附近有呢間燒烤店店面舒服又乾淨，就入去試吓。Menu 好多款串燒同熟食揀。串燒方面叫左牛肉串（$36/2）、雞軟骨（$22/2）、海中蝦（$36/2）多春魚（$20/2）、烤菠蘿（$18）同虎皮尖椒（$16）。全部串燒都係想像中串燒嘅味道，好香籽然味，牛肉同蝦肉質唔會鞋同老，多春魚啲魚春好好咬口！我個人好鐘意尖椒，貪佢夠辣同刺激，如果大家唔食得辣，記得要去左啲核！熟食方面叫左烤原隻魷魚（$34）、錫紙豆腐（$36）、錫紙金菇（$34）、烤茄子（$42）、烤大扇貝（$32/1）同椒鹽魷魚鬚（$38）。 最欣賞係有蔬菜同豆腐叫，因為可以轉下口味，清一清個口繼續食，又減低罪惡感！最鐘意椒鹽魷魚鬚表面又炸得好香好脆口，但仲保留到入面好juicy! 而大扇貝真係好大粒，好鮮甜，啲粉絲好入味，好好食！最後雖然好飽，但我堅持叫左個甜品，就係炸饅頭（$18/2），除左本身淋左練奶係面，仲附多一碟自己點，我好鐘意食練奶，當然要點曬！作為晚餐一個好好嘅句號！…Read More

難得約到朋友食飯，我地兩個都減緊碳水食物，所以揀左泰國餐廳貪佢多啲選擇，即係可以揀食肉😍泰式燒牛仔骨 $98同朋友都冇食過泰式牛仔骨，所以身為食肉獸嘅我地決定叫黎試下。牛仔骨份量多，味道方面本身已經醃過，有好香黑椒同埋燒肉味，好好食😋。但我覺得點埋個汁真係好夾，酸酸甜甜又辣辣地，中和左油膩感！個汁好夾夏天食！沙爹串燒 $88/6 去泰國餐廳點可以唔叫串燒，貪心嘅我地叫左呢個牛豬雞串燒拼盤，每款有兩串，兩個人分啱啱好！串燒好juicy 口感唔會柴！識食一定要加大量串燒靈魂「沙嗲醬」，仲食到粒粒花生！好惹味！椰青 $33原隻椰青好新鮮好多水，食埋啲椰肉好幸福。食濃味泰國嘢必叫！最後見到甜品好平，$20有4個，仲可以溝味，所以忍唔住要食埋！揀左椰汁千層糕同椰汁西米糕，我鐘意食西米糕，好香椰汁同芋頭味！滿足！…Read More

今日放工後同朋友聚餐，難得大家都想食小菜，就揀左太子呢間邊方便又出名嘅餐廳。職員安排我地坐窗邊卡位，座位非常舒適鬆動，唔怕太密集。雖然餐廳好出名，但係價錢非常合理，最後揀左一葷一菜。坐底冇耐，職員已經奉上前菜，應該係麻辣白蘿蔔，少少辣，蘿蔔好清甜，非常開胃！蜜汁叉燒皇 68呢度燒味好出名，今日想食甜甜地，所以揀左蜜汁叉燒。叉燒肥瘦適中，燒得啱啱好外面好香口，裏面仲係好Juicy，唔會太柴。蜜汁都唔會死甜，好好餸飯！海鮮濃湯雜菜煲 108另外叫左海鮮濃湯雜菜煲，貪佢有唔同類型嘅菜。估唔到咁大煲，海鮮、粉絲同菜都份量十足。蝦好彈牙，蔬菜唔會太淋，好甜好新鮮，而個湯底吸收左海鮮同埋蔬菜嘅味道，非常鮮甜，我同朋友差唔多飲曬啲湯！食港式小菜真係會好滿足！另外呢間餐廳職員好有禮貌，抵讚！…Read More

今晚同朋友食晚飯，又約左最方便大家嘅旺角。好耐冇食韓燒，所以好快就決定左食呢間裝修好靚嘅韓燒餐廳。每次食韓國餐廳最期待就係佢嘅前菜！估唔到佢地嘅前菜一啲都唔hea，就最鍾意佢嘅泡菜同埋醃青瓜。調味醬油雞肉 $110/150g 雞肉用醬油醃過，燒完味道好香濃，咸咸甜甜，非常入味，但又唔會太重口味！雞肉肉質都好嫩滑。石鍋拌飯 $85石鍋拌飯上菜時保持好熱嘅溫度，配料有牛肉、蘿蔔絲、菠菜、紫菜、香菇同埋我最鐘意嘅大陽蛋！撈埋一齊食，咁多蔬菜感覺好健康！而且仲有飯焦，又香又脆卜卜！雪濃湯 $100韓國雪濃湯係用牛骨燉煮成乳白色，入面有牛肉、青蔥同粉絲。湯頭非常順滑、鮮味，忍唔任不停飲！而牛肉份量足又唔會太老，粉絲軟硬程度啱啱好，個湯配合烤肉食，中和一下冇咁油膩。又有肉又有主食，大滿足！…Read More

朋友係觀塘海濱果邊返工，放工約食飯就揀左附近呢間餐廳，因為網上睇相裝修好簡約好舒服。兩個人餓鬼上身咁叫左好多野食😆鮮蝦雜菜沙律配柚子油醋汁 $58沙律菜好新鮮好靚，蝦有彈性，有輕輕煎過，仲有個柚子油醋汁好清新，好開胃！芝士醬炸薯條 $32呢道菜上菜果陣真係嘩一聲！碗芝士超級香濃！完全估唔到係咁！芝士醬所用嘅芝士應該唔止一款，薯條新鮮炸，熱辣辣，點芝士可以拉到絲，好好食，芝士控一定要點！多到點唔曬！K-Pop 炸雞 $32炸雞都係新鮮炸，醬汁甜辣度啱啱好，有啲蒜味，我仲點埋薯條啲芝士落去，自創新口味！😆人蔘雞湯浸娃娃菜 $58點人蔘雞湯浸娃娃菜之前，staff 提我地呢道菜裏面會有原隻人蔘雞，但我地主要想食菜，所以都決定揀呢道。個湯好滋補濃郁，娃娃菜索晒啲味，入面其實係有雞肉，食完小食，我覺得呢個菜好啱中和一下。感覺非常健康又好味。乾炒黑松露雜菌扁意粉 $78意粉有黑松露同埋菇味！依家唔會太淋太硬，唔錯！特飲 手工薑汁撞奶茶 $23特飲 柚子檸檬茶 $26凍柚子檸檬茶好清爽，朋友比較養生，杯薑汁撞奶茶都好香薑味。…Read More

今日是朋友的生日，他說喜歡這間餐廳的裝飾，所以選了來這裏吃飯。一進入餐廳，朋友已被內裏的鞦韆吸引，點完食物便立即過去拍照。這裏的午餐不貴，我香蒜欖油大蝦豬肉腸意大利麵和BBQ雞翼，跟餐的飲品是 vanilla bean tea.我們拍完照後，食物已送到，可以立即吃，不用再等。意大利麵的香蒜味不會過濃，而且加了芝士來烹調，味道很適合我。意大利麵配上3隻大蝦和份量適中的豬肉腸，不錯！我自己很愛吃雞翼，雞翼外皮酥脆，但內裏卻嫩滑又多汁，好吃非常！至於vanilla bean tea，每喝一口都散發出呍呢拿的味道，讚！…Read More

大埔甜品店選擇其實唔多，尤其舊街呢邊，所以飯後甜品不嬲系作為大埔友嘅我嘅第一選擇。之前都一直有幫襯開，最近轉左比較多用外賣速遞買。今晚食完飯，想同細佬出去食個糖水傾下計，就去左飯後甜品食。今晚未食生果，所以想試下有生果嘅甜品。自選配對系列：大菜糕+鮮雜果（椰汁底）$38第一眼見到好開心，因為冇預計有咁多生果粒系面。有西瓜、芒果、密瓜同火龍果，都系我鐘意食嘅。而大菜糕系已經切左粒粒，有咬口又方便食，一啖可以食到生果同大菜糕，正！細佬就揀返佢成日叫嘅雪糕芒果布甸，因為佢系芒果迷。雪糕芒果布甸 $40上面有大大球芒果雪糕，一啲都唔hea。花奶同芒果布甸不嬲好夾，布甸好滑，仲有大粒香甜芒果。我諗鐘意食芒果嘅朋友一定會鐘意。最後走之前都叫左個D24榴連西米露外賣俾媽媽，我媽媽超鐘意食。D24榴連西米露 （$42+$1外賣）雖然唔算好大碗，但裡面真系有一大舊榴連，又系唔系hea 客人，食完一定好滿足。我唔敢講飯後甜品系絕世味道，但一定系又誠意，同埋充滿懷念港式糖水味道。…Read More

今晚放工之後約左朋友去荃灣食飯傾計，大吐工作上嘅苦水！見呢間餐廳評價高分，望到座位都好舒服好似好清新，同埋時間尚早人都唔算多，所以就決定揀呢間。因為好想食肉，我地兩個人就揀左燒春雞。慢燒800G土匪大春雞配孜然燒肉汁（2人份）$268因為慢煮關係，呢隻土匪大春雞要等大約20分鐘，不過其實傾多兩句就已經上菜。隻燒雞放低果陣已經超香孜然味，簡直係土匪雞翼加大版。味道好好又唔會太咸，肉質都好嫩滑，但又唔會唔熟。配菜都好正，輕輕焗過，我最鐘意baby potato同西蘭花 。鐘意食雞嘅朋友值得一試！由於燒雞係二人份量，所以我哋就冇叫到其他食物，但升級套餐好抵，加$35就有飲品同埋餐湯。套餐餐湯一啲都唔hea，個樣靚之餘都好足料好好飲。個包浸落啲湯度再食，好滿足。是日餐湯（羅宋湯）兩杯飲品賣相都好靚，好鐘意凍特濃朱古力，夠味！朋友杯乳酪野莓打卡一流！乳酪野莓＄45凍特濃朱古力（跟餐，單價＄40）食完肉，吐完苦水，心情靚返曬！…Read More

因為好朋友生日，大家想食火鍋但唔想又食連鎖店，所以揀左喜鍋試下。因為疫情其實都有啲擔心，但啲座位隔得好開，又有好高嘅隔板，一坐低又提供口罩袋同搓手液，所以都可以安心食。另外一坐低已經感受到店員貼心嘅服務態度，真係好抵讚。講返食物。本來計劃減肥，天氣又咁乾😂所以叫左個好滋補嘅湯，花膠鯊魚骨膠原湯鍋。招牌花膠鯊魚骨膠原湯鍋（送炸米）$208店員提我地飲啖湯先，我地足足飲左成碗😂因為真係好滋潤好好味，好足料，真係食料都飽！😆相信女士一定會鐘意。之後就加湯入炸米，我第一次食，好香口好特別！蟹籽墨魚油炸鬼 $58坐低肚餓，想先食小食。店員推薦蟹籽墨魚油炸鬼，冇試過所以試下。油炸鬼炸到香口，墨魚滑都好彈牙，加埋最愛泰式甜酸醬，唔錯。元貝 $38/1元貝好新鮮，食落都係好鮮甜好彈牙，都唔會有沙嘅口感，唔加醬料都勁鮮味！鮮淮山 $38打邊爐我必點鮮淮山，份量十足，食落十分新鮮。手打五寶丸（墨魚、蝦丸、鯪魚丸、牛丸、豬肉丸） $88一次試曬五款丸，每款有2粒，2個人食唔洗爭。食得出係手打丸，好彈牙！我自己最期待係梅菜豬肉丸，因為真係冇見過！我好鐘意食肉餅，味道果然冇令我失望，好香梅菜味。青檸柚子蜜 $48最後點左個青檸柚子蜜，好夠味！宜家呢啲天氣飲真係好似滋潤，喉嚨舒服晒～總結覺得喜鍋食物好特別，好驚喜。員工好貼心，所以都食得舒服又好安心。仲有宜家埋單有88折，醫護仲有7折！…Read More

大埔小店多，今晚約左同朋友試一試呢間日式居酒屋。裡面裝修好懷舊，貼滿舊式海報。出糧冇耐，所以我地想食得豐富少少😂。三文魚刺身 （$38）朋友話好新鮮，有三塊抵食，唔錯！吉列日本廣島蠔（$48）、唐揚炸雞（$48）廣島蠔有四隻外面脆卜卜，裏面creamy冇腥味。炸雞好香但又唔算好油膩，配埋沙律醬好好食！水牛芝士條（$48）我覺得好好食，鍾意食芝士嘅朋友一定要試吓，裏面有拉絲。不過提提大家上咗枱之後一定要快啲食，因為我想留一條到最後先食，點知攤凍左已經冇咗拉絲！好傷心！燒海蝦（$28/1）燒得好香口，肉質緊緻彈牙，但價錢略貴。豬五花腩（$28）味道唔錯，但我覺得多咗少少肥肉。烤豚肉提子卷（$28）、開邊雞中翼串（$28/2）烤豚肉提子卷好特別之前冇食過，所以叫咗串黎試吓。提子好甜好清新，可以中和左烤肉串嘅油膩，唔錯。雞翼串正常發揮。小町飯（$38）、醬油湯烏冬（$38）同朋友分別點咗兩個主食，分量唔算好多，但價錢平，配埋之前嘅小食其實好夠。小町飯係半熟蛋撈飯，唔錯。醬油湯烏冬味道都味道啱啱好唔會話太濃。最後埋單400幾，價錢合理，坐得舒服，同朋友傾得好開心。…Read More

朋友話大埔工廈開咗呢一間新cafe，好近朋友屋企，所以今晚就約左佢一齊嚟試下。地點唔算非常方便，不過朋友係地頭蟲，所以都唔算難搵，落車行一陣就到。坐低覺得環境好舒服，好有空間感，因為我怕人多好嘈，傾計都唔方便。 當時已經有好幾枱坐咗喺度，因為我想睇電視哈哈，所以就揀左中間坐。食物嘅名好有心思，係由細聲到大嘅歌詞！ （透露咗年齡秘密）日式比目魚扒配薯蓉（$118）擺碟好靚，條魚好大塊，外皮都幾香脆！薯蓉都好綿密。朋友話好鍾意上面嘅柴魚。因為我重口味開，所以見到有小辣椒，所以加左刺激下哈哈。韓式泡菜芝士炸雞漢堡配薯條（$98）見到嗰下真係嚇咗一跳。因為炸雞真係好大好大好吸引！！ 真係好大塊我哋要切開佢。炸雞炸到好好味好香好脆，配埋芝士同埋泡菜我覺得好夾，好邪惡！薯條都炸得好好味。飲品方面朋友嗌左黑牛，即係朱古力雪糕加可樂，好啱夏天飲。我想下佢嘅夏日特飲橙汁沙冰，但佢今晚冇得賣，所以呢就嗌咗爆谷朱古力。 朱古力味道都算濃，不過爆谷唔夠脆，如果可以脆啲就好喇。仲有配南瓜湯同麵包，不過不失，係普通嘅嘉頓餐包。總之我覺得如果想安靜過一個嘅晚上，傾下計，呢度都好適合。…Read More

同朋友去黃金買完電腦野， 自詡石硤尾地膽嘅朋友就帶咗我黎呢間冰室食晚餐，朋友話細細個已經有食開。聽聞裝修左，感覺好整潔同光鮮！坐得舒服，冇壓迫感。我好想食咖哩所以就叫咗個咖哩牛助條飯。南洋咖哩牛肋條飯 （$55）咖哩好好味，係港式咖哩嘅香辣味完全冇令我失望！牛肋同薯仔嘅份量好足，不過牛肋有少少韌。但 整體覺得好好食。朋友叫咗個海南雞飯，係雞脾位置所以雞肉嫰滑，鹽焗雞味重，飯都有好香雞油味。海南雞飯 （$58）鹹蛋黃肉碎四季豆 （$72）鹹蛋黃好香，朋友覺得好好食，我覺得豬肉略嫌有啲鹹。最後，朋友知我鐘意食炸雞脾， 所以都推薦咗食呢一個避風塘生炸雞髀。避風塘生炸雞髀 （$28）上枱嗰下已經哇一聲，因為即炸所以要等，好期待，我真係好鍾意食炸雞脾炸雞翼，望落已經見到炸得好香脆，上面仲有一啲避風塘嘅炸蒜辣椒等等，超香！！即刻放低食緊嘅飯！ 好香脆又惹味，朋友食得辣所以覺得可以再辣啲。飲品方面，我點左最鍾意飲嘅奶茶，朋友喉嚨唔舒服就嗌咗檸檬西洋菜蜜。檸檬西洋菜蜜（＋$4）、樽仔奶茶（＋$9）樽仔奶茶好正，因為直接放入雪櫃，唔會因為冰粒而溝淡奶茶味道，同埋真係好香濃，又唔會太甜！正。而朋友都話杯菜蜜好飲又滋潤。如果唔係地膽朋友介紹，都唔知道原來呢度有間咁抵食嘅茶餐廳！2個人都係食左2百頭！好飽好滿足！…Read More

今晚來到出名的大排檔，想試一試同以往係沙田的味道有冇分別。點了3樣餸：分別係Wasabi 沙拉蝦球 、蒜蓉炒白菜仔同薑蔥魚腩煲。Wasabi 沙拉蝦球Wasabi味道好好，又酸又有d攻鼻，但係我地發現西蘭花入面疑似有條蟲，覺得好核突，即刻唔多敢食。疑似蟲仔薑蔥魚腩煲好失望，望落好多薑同洋蔥，魚塊份量都多，但唔知點解魚一d都唔入味，除左腥腥地，真係薑蔥冇味，朋友話唯一可取之處係魚表面炸得好香口。同埋真係好多魚骨，食食下我已經唔敢食。蒜蓉炒白菜仔呢道餸都ok, 但炒到有d燶，所以搞到有苦味。總結真係有d失望，好似比以前失色唔少。…Read More

睇戲前想同朋友食飯，心儀嘅幾間餐廳都已經好多人排隊，難得呢間唔使排隊，所以就入咗去。我哋叫咗lunch setset，包咗嘢飲（ 我揀咗水果茶 ）同埋沙律，味道都係正正常常冇乜特別， 水果茶就甜咗啲。主食方面就麻麻地，尤其係個雜菌意大利飯，味道其實唔錯，但係意大利飯就真係硬左啲。而意大利粉就唔太夠味，可能係我太重口味啦。其實呢一間係日本公司旗下嘅餐廳，我都唔expect係正宗西餐，所以好有係日本家庭餐廳食西餐嘅味道。 喺沙田新城市唔想等位食飯嘅朋友，就可以試下呢間餐廳，因為坐得都算舒服， 價錢都唔算貴。…Read More