ritatas's Profile

呢間咁有香港八九十年代裝修風格嘅火鍋店，位置好隱蔽，係一間樓上舖，經過朋友介紹終於去試到。佢有好多款雞煲揀，最後同朋友兩個人揀咗菠蘿雞煲，入邊有半隻雞，仲有得揀辣度，其實食完雞已經好飽，不過當然唔可以浪費個濃味嘅湯汁，最後加湯打邊爐，唔少得當然有牛肉拼盤，細份已經足夠兩個人食，性價比都幾高，另外仲嗌咗珊瑚蚌同埋一個signature嘅拼盤， 十分打卡Able。雞煲個湯底食完一嚿食一嚿，停唔到口，打邊爐方便啲食物質素都好高質同埋好特別，拼盤入邊有個沙嗲牛肉餃子，都係好有香港特色。…Read More

今日去開佐敦，一於去試埋呢一間收藏咗好耐嘅舖頭。本來以為舖頭淨係可以賣酒，點知原來都有兩張枱可以坐低品嚐飲品同甜品。我嗌咗斑斕咖啡同埋斑斕芒果卷即場試食，斑斕芒果卷好香芒果味，不過就比芒果搶咗味，斑斕味冇咁出，如果鍾意食斑斕可能原味會比較好。另外斑斕咖啡好吸引，首先咖啡豆已經好香，唔會過濃同好重烘焙味，撞落斑斕同奶個比例十分之好。本身仲諗緊晏晝飲咖啡好驚夜晚瞓唔着，不過好彩最後有事到，如果唔係好後悔。同時我亦都見到有斑斕蓮子薏米水，下次經過一定要買嚟試，其實舖頭嘅產品都唔貴，一定會再去幫襯。…Read More

收藏咗好耐嘅手工意粉店，今次終於去到啦。作為手工意粉店，佢嘅價錢都算親民，性價比亦都好高。餐廳位置唔多，得10幾個位，如果多人或者食飯時間去最好WhatsApp book定位。今次我就自己一個去，見到Menu好多都想試，職員就推介咗一個辣茄汁貓耳朵粉，自己本身都好鍾意食貓耳朵，因為夠煙靭。一嚟到，見到貓耳朵份份量好足，亦都有大量芝士粉喺面，十分之滿足。午膳時間去仲包埋飲品， $100鬆啲嘅價錢就食到手工意粉好難搵到。餐廳性價比10分高，會再去幫襯。…Read More

觀塘海難得有牛舌嘅舖頭，食咗發現同仙台嘅味道都真係差唔多，牛舌軟腍唔會過韌，套餐仲包埋沙律同泡芙，所以套餐都幾抵食，一個女仔絕對夠飽。雖然舖頭又落場時間，而且座位都唔算多，不過避開高峰時間去食都係一個唔錯嘅選擇…Read More

因為唔熟荃灣，朋友就介紹荃灣有一間有live Band，有烤魚串燒有酒飲嘅餐廳。星期五晚餐時間上去冇book位，都好彩早去到所以有位。食物都好食，不過有少少偏鹹。餐廳入邊氣氛好好，酒類亦都多元化，而且足料…Read More

最近見九龍灣food court開咗一間食花甲粉，好開心九龍東終於有得食呢樣嘢啦。因為呢間舖喺food court入邊，所以要自己搵位，呢個有少少唔方便。由於見到有黃牛，於是嗌咗個黃牛花甲粉同埋加咗錢叫咗個麻辣魚皮。和牛花甲粉揀咗小辣，不過辣嘅程度唔算好大，香辣嘅味道幫個湯底加咗，黃牛質素好高，好軟腍腍。花甲就藏咗喺底，食得出花甲好鮮甜，食物質素唔錯。然後麻辣魚皮對於食辣嘅朋友嚟講好出色，唔食得辣嘅可能真係要諗諗，因為魚皮出邊食都好貴，依家加購其實都好抵，套餐仲包埋嘢飲。…Read More

長沙灣人世拉麵店，之前一直收藏咗呢一間拉麵店，今日終於有時間去。不過一去到，自己一個，見到有蠔嘅濃湯同埋鯛魚濃湯，當時企咗喺度唔知是邊個好，不過見到招牌係話廣島蠔嘅濃湯，於是就係左招牌嘅拉麵呀。由於晚市時間去，發現其實午市可以減$10其實都幾抵，萬事可以用一蚊優惠價錢加購一個小食，會有泡芙同埋番薯仔，感覺上好開心，因為用一蚊就買到呢一份快樂。呢個蠔湯拉麵個湯10分出色，一飲落口好濃稠嘅蠔味，濃得來又唔會好腥，而且蠔嘅份量亦都唔少，仲有原隻流心蛋同埋3塊慢煮叉燒。…Read More

呢間舖頭簡直係香港人嘅童年回憶，今日經過尖沙咀分店，見到有紫米方包，只係$9半磅，即刻買咗方包味道香甜可口，有淡淡紫米味，唔需要搽麵包都好好食。其實舖頭好多嘢，性價比都唔錯,下次經過會再買其他…Read More

今日午餐時間，去咗呢一間好日子打邊爐做午餐。一坐低見到有午餐lunch set，價錢唔算貴，最平嗰款$100內就有交易，而且套餐包括一份肉類，一盤蔬菜，同一碗飯，女仔嚟講十分之夠飽。不過同時，加$9可以加多一份關東煮。其實呢間餐廳性價比好高，都係朋友帶我去先認識，再一睇，原來都唔係好多地方有分店，全香港暫時得兩間，一間喺九龍城，另一間喺東涌。今次就係東涌分店試咗，午餐時間唔算太多人，應該係未有太多人認識呢間餐廳，同埋午膳時間可能大家都未有咁多時間可以打邊爐。…Read More

好多人都推介呢間小籠包，今日收工特登過去佐敦試呢間上海食店。一入到去，覺得舖頭比較細，唔係幾好坐，不過食物款式都比較多，坐低毫無懸念會嗌咗小籠包先，另外仲嗌咗個上海粗炒麵。小籠包喺香港嚟講都真係食過最好食嗰間，有湯汁，肉都唔錯。不過好可惜，上海粗炒麵味道比較普通冇咩特別，唔夠鑊氣，總括而言，如果去呢間餐廳淨係會想食小籠包，其他就唔太需要啦。…Read More

已經有好一段長時間冇去幫襯呢間舖頭，不過去親葵廣，如果想坐低食餐好嘅第一間一定會諗起呢一間湯雞。唔知係咪太耐冇去，一見到個湯好有驚喜。今次叫咗花膠雞湯配刀削麵，砂鍋上枱仲係熱辣辣好滾，雞油適中唔會過多，湯頭好香唔會過分味精，而且好足料，湯入邊會見到好多金華火腿同埋魚翅碎。每次經過都可以去試…Read More

由於呢間舖頭實在太出名，太多人推介，於是bookmark咗一直都未去。今日咁啱有嘢做出開尖沙咀，於是乎一點前就去咗舖頭排隊，本身以為有排等，點知等咗10分鐘左右就有位入去，不過夏天，覺得餐廳入邊冷氣唔係好夠，舖頭淨係得一個食物，就係蝦湯拉麵，仲可以加醬油海鮮，不過因為怕自己食唔晒就冇嗌到。但係上網睇，醬油海鮮都係佢哋嘅主打，亦係靠醬油海鮮做到開舖頭，有機會下次會想去試吓。不過都係建議平日避開高峰時間後會比較好，咁就唔使排隊啦。…Read More

呢一間海鮮放題其實好出名，於是約咗朋友去嘗試。去到其實好多選擇，亦都好多台其他嘅客人。去到海鮮台，有好多唔同貝殼類，蝦，蟹同埋鮑魚。去到中段，諗住放啲蝦入湯鍋，已經慢慢放，奈何舖頭啲蝦真係太新鮮，放咗入鍋都跳起身，於是燙傷咗左手。於是即刻問職員有冇地方可以沖洗避免繼續燙傷，職員只係唔耐煩話冇，亦都冇提供其他方法或者唔見得職員有心想幫手。隔咗一陣，呢個職員就問咁你要唔要燙火膏，態度10分惡劣，我朋友即刻再問其他職員拎紙巾同濕紙巾，即刻攞濕紙巾印走手上面嘅熱湯，免得繼續燙傷。當個態度惡劣嘅職員拎支燙火膏上嚟嘅時候，我仲處理緊自己個傷口，職員顯得10分不耐煩，我就同職員講，我仲處理緊傷口，你你先放喺枱面。職員完全係冇心幫忙，覺得我全心搞事，對於九龍灣分店嘅體驗十分之惡劣。…Read More

喺銅鑼灣食飯唔平，撞正下午茶時間，就見到呢間台式餐廳最平$42下午茶，有主食，小食，同埋飲品。大概三點左右去到餐廳，唔需要排隊，餐廳冷氣都比較大，坐門口位會比較凍。餐廳食物質素好好，飲品都唔會過甜…Read More

睇咗猛男侍應，所以去呢一間泰式餐廳。不過同朋友兩個人冇嗌到猛男特別Menu，所以就冇乜特別服務。餐廳食物都高水平，嗌咗個冬陰功意粉，煮得勁Creamy好香冬陰功味，鍾意食泰國嘢必嗌，另外仲嗌咗軟殼蟹咖喱，味道都唔錯，不過對比起意粉就有啲遜色。…Read More