twofatpandas's Profile

青花泰國菜餐廳在繁忙的旺角，青花泰國菜餐廳是一個完美的逃離之地。餐廳的環境優雅，裝修時尚，無論是餐桌佈置還是空間規劃，都令人感到舒適自在。走進去後，你會立即被柔和的燈光和精緻的裝飾所吸引，整體氛圍讓人感到放鬆，適合與朋友或家人共享美好時光。驚喜的前菜沙律青花的菜單上有多道讓人垂涎的泰國經典菜式，每一道菜的質素都令人印象深刻。特別是 **泰式涼拌茄子沙律**，新鮮的茄子好淋軟，秋葵、車厘茄配上清爽的配料，讓人食指大動，賣相色彩養眼，更重要嘅就係佢嗰個沙律汁調校得好驚絕，甜酸度及濃稠度恰到好處，口感獨特，帶著淡淡的香氣，喺其他地方都未試過這種味道 ，令人想要一口接一口。接下來是 **馬莎文了咖喱牛肉**，濃郁的咖喱汁與來自多種香料的芬芳完美融合，有點兒印度咖喱的色彩，咖喱唔算辣，內𥚃的牛肉夠滑，蓮藕片爽口，仲有粒粒腰果，如果配搭白飯或麵包一齊享用，風味更佳，更能讓人感受到一種芳香四溢的享受。色彩繽紛的炒飯**藍蝶花蟹肉菠蘿炒飯** 更是讓我讚不絕口。新鮮的菠蘿和蟹肉的搭配，藍蝶花係天然食物及染劑，用於米飯上，色彩誘人，而且仲富含蛋白質同埋好高嘅花青素，蟹肉鮮甜，再加上腰果、雞蛋、豬肉鬆及提子乾拼在一起，每一口都帶著五味俱全的感覺，讓人回味無窮。最後，別忘了嘗試 **泰式糕點拼盤**，三款甜點中最驚艷的當屬熱辣辣的 **斑斕椰汁糕**，柔軟煙靭的口感搭配濃厚的斑斕椰子香，完美結束了這頓餐。再加上一杯濃郁的 **泰國奶茶**，茶味十足，剛好不會過甜，同喺泰國當地嘅奶茶，冇乜分別，無疑是一份完美的餐後飲料。總結總的來說，青花泰國菜餐廳無論是在環境還是食品的質素上，都給人留下深刻的印象。這裡是品味泰國美食與享受悠閒時光的理想地點，無論是家庭聚餐還是朋友小聚，青花都能滿足你的需求。而且中午都會供應抵食的午市套餐，豐儉由人，下次我一定會再來！…Read More

今晚嘅晚餐真係令人回味無窮！位於觀塘的，Nata _Steak,Wine&Cocktail我哋都係第一次幫襯，之前都試過類似的餐廳，對甜品方面每次都會有要求。今晚我哋點咗幾個招牌菜，首先係佢哋嘅**牛油香草烤黃油大雞**。佢最特別嘅地方就係烤得恰到好處，雞皮下嘅脂肪完全融化，食落口一啲都唔會覺得油膩，反而係帶有雞肉本身嘅鮮甜同嫩滑，口感非常出色，真係做到皮脆肉嫩，令人食指大動，再配上一杯白酒，Umbria La Pava-Macabeo Blanc,perfect!至於**慢煮牛肩胛肉**，一上枱已經聞到陣陣牛香，已經切好片，入口即溶，牛味濃郁，根本唔需要點任何醬汁，已經非常美味，點少少海鹽就可以，而且還放在有蠟燭的架上面保溫，每一啖都係享受。**蒜香蟹肉意粉**，見到滿滿嘅蟹肉，真係落足料，熱辣辣仲有煙出，而且完全冇食到蟹殼骨，意粉嘅煙韌度亦都掌握得好好，保持到al dente嘅口感。最妙嘅係，佢帶有少少辣味，巧妙地平衡咗蟹肉嘅鮮甜同蒜香汁嘅濃郁，食落去完全唔會覺得滯，反而係越食越開胃，成個配搭簡直係天衣無縫，我哋都食到清晒碟！不過，今晚嘅壓軸好戲，絕對係嗰個**伯爵茶忌廉配蜜瓜疏乎厘pancake**！呢個pancake一上枱就已經俘虜咗我哋嘅目光，外型鬆軟澎湃。輕輕一舀，入口即溶，好似食緊雲朵咁輕盈，而且仲隱約食到一啲雲呢拿籽嘅香氣，為整體味道增添咗層次。上面嘅伯爵茶忌廉做得非常出色，茶味香濃醇厚，唔會過甜，同疏乎厘嘅清甜互相輝映，令成個甜品嘅味道更加豐富有驚喜。真係食到最後都令人意猶未盡，呢個甜品絕對係今晚嘅MVP！總括而言，Nata Steak今晚嘅晚餐無論係主菜定甜品都保持到高水準，尤其係甜品嘅創意同味道都令人印象深刻。員工都服務周到，絕對係一個值得再訪嘅好地方！---…Read More

一個人今日去九龍灣西廊餐廳食午餐,呢間餐廳超過40年歷史，當然係裝修過，入內環境都算舒適，啲餐椅坐得好舒服；叫咗一個三色芝士皇室焗豬扒飯，跟一個蒜蓉包羅宋湯及一杯飲品，個羅宋湯好正宗有啲辣味，蔬菜都多，但係個飽就比較乾，蒜蓉味唔足，豬扒飯嚟到賣相好靚，三種芝士焗咗之後好香及有拉絲，豬扒好厚及碎上，食起嚟有口感又方便，個焗飯底好香，個茄汁都足料，有蕃茄粟米洋蔥蘑菇，比起其他店佢係冇咁重口味，份量適中，凍檸茶不過不失，侍應都算有禮貌，而且佢每一台客都比一個不鏽鋼杯幫你用熱水浸住啲餐具清潔，值得一讚，咁多年水準都可以保持到，算唔錯啦。…Read More

青衣城二期丸龜製麵，今晚係第一次去試，叫咗一碗豚骨高湯烏冬，另一款係炭火燒鳥拌烏冬，先講吓個豚軟骨，炆得好入味骨好腍，食落唔會黐響牙罅度，個高湯好清甜唔會好似其他拉麵店嗰啲湯底咁濃咁鹹，因為係手掣烏冬，所以食落口感與別不同，新鮮彈牙；而另外嗰個炭火燒鳥拌烏冬，呢係乾嘅冇湯，嗰啲雞肉好有雞味，嫩滑，有啲麻辣嘅味道，而且唔係好強烈，，溫泉蛋整得好靚夠流心，加埋啲粟米粒撈勻，十分出色；另外叫咗一串炸雞同埋天婦羅蟹柳，肉質都唔錯，但係呢就唔夠熱，只係暖暖哋，如果可以再炸熱佢就一流啦，另外有自助嘅蔥花同埋羌末可以加落啲烏冬嗰度，增加香味，整體嚟講烏冬嘅質素係好高，亦聽講佢啲咖喱烏冬亦都好好味，下次一定會再試吓其他款式。…Read More

今日親戚約咗喺沙田賽馬會凱旋廳飲茶，環境寧靜優雅，枱同枱之間有好多距離，唔會有壓迫感。茗茶方便我哋叫咗鐵觀音及菊花，兩款都好清香；我哋點咗好多美味嘅點心，親戚說這裏的出品沒有加味精，每一款質素都好高，值得一提就係蝦餃燒賣好好味，蝦餃皮薄鮮蝦爽口彈牙，叉燒餐包上面嘅蜜糖好香甜，牛肉及鮮蝦腸粉個皮好薄餡靚，其他個點心例如雞扎、牛柏葉同山竹牛肉食落去一啲都冇肥膩嘅感覺；我哋叫咗一個楊州炒飯，鑊氣足，又唔會多油，另外個蟹肉炒粉絲，亦都係令你有驚喜，新鮮蟹肉加上滿滿嘅炒蛋喺底，好清新；而叫咗一隻脆皮炸子雞，雞皮好脆，雞肉亦都好滑，唔會柴皮，點雞嗰個柑桔汁亦都好特別難忘，第二度我都未試過呢個汁，成餐食完你都唔會有肥膩飽滯嘅感覺，而侍應的服務都好周到，環境、食物質素及招呼都做到好好，令人滿意。…Read More

## 食評：瑰麗酒店 Butterfly Patisserie Signature 拿破崙蛋糕今日係我生日，女兒好有心機，特地買咗呢個瑰麗酒店的Butterfly Room Signature拿破崙蛋糕來慶祝，真係挑選得好！一打開包裝，首先映入眼簾嘅係呢個精緻而又高貴嘅盒子，無論外觀定內裡都充滿咗藝術感，讓人一見就心情愉快。### 蛋糕外觀呢個拿破崙蛋糕嘅外觀設計非常吸引，金黃色嘅酥皮層次分明，上面印有細緻嘅圖案，令人忍唔住想立即試一口。佢個淺色嘅雲呢拿忌廉更係讓我迫不及待想入手！### 口感與味道一口咬下去，酥皮真係好有層次，入口即化，十分酥脆！每一層都係咁輕盈，不同於其他地方嘅薄皮，呢個真係做到咗「拿破崙」應有嘅質感。仲有，雲呢拿忌廉嘅味道真係令人驚喜，香濃得來唔膩，連同雲呢拿籽一齊，味道好綿密，令人回味無窮。這樣搭配，令我感受到咗味蕾上嘅幸福！### 溫馨時刻最令人感動嘅係，個女特地為我準備咗呢個蛋糕，仲插咗支蠟燭，令我覺得好溫馨。不論生日的喜悅定係蛋糕的美味，所有嘢加埋一齊，令人倍感珍貴。### 總結瑰麗酒店的Butterfly Patisserie 出品，真係每一樣都高質，無論係視覺定味覺，都唔會令你失望。呢個拿破崙蛋糕無疑係我食過最好嘅一個，今日的驚喜令我印象深刻，真係一個完美生日禮物！下次我一定會再帶朋友嚟品嚐。…Read More

今日和親友去到人氣極旺嘅淘大千海水產食火鍋，我哋一星期前已經訂咗六位，由中午12點食到下午四點。我哋叫咗黃金花膠雞鍋底，湯底濃郁惹味。出去攞海鮮，蟹蝦鮑魚蜆及螺大量供應，每種海鮮都有幾個品種供選擇，我哋主要係攞咗花蟹、鮑魚、蠔及蜆，花蟹肉質鮮甜，鮑魚及蠔都好大隻，每種海鮮都好新鮮生猛。另外我哋亦都叫咗其他熟食，包括鰻魚、牛舌、紅燒乳鴿及烤羊鞍架，鰻魚同紅燒乳鴿，質素一流，乳鴿皮脆肉嫩有汁，比好多大酒樓仲好食；還有大量各款熟食供應，質素都好唔錯，另外還有好多甜品供應，令你大飽口福。雪櫃櫃內還有大量各式各款的飲品，仲有即磨咖啡。由於可以食四個鐘，一路食一路傾偈，唔使趕頭趕命，性價比超高，一定會再返嚟食。…Read More

今晚到咗銅鑼灣，以前的食街一間西班牙餐廳CalleOcho晚膳。內𥚃裝修令人感覺溫馨舒適，兩個人叫咗個$598二人晚餐;先講下啲小食，蕃茄多士好鲜味多士又脆，吞拿魚他他的吞拿魚十分新鮮，流心煎蛋薯仔辣肉腸好惹味，辣肉腸肉質好特別，配搭得好好。套餐有追加西班牙丸子，一粒係大蝦一粒係西班牙火腿，啲火腿好甘香。主菜嗰個慢燉牛面頰松露薯蓉，牛味濃郁，松露薯蓉夠滑，而另外一個係紅椒堅果烤鱸魚，味道一般，個甜品係巴斯克芝士蛋糕，甜度適中芝士味濃郁，值得一讚；今次係我哋第二次幫襯呢間餐廳，叫咗兩杯Sangria，係免費贈送的，一杯紅一杯白，好好飲。我哋之前仲喺呢個餐飲集團買咗$500嘅voucher,算係好抵食，定會再光顧。…Read More

今日經過荃灣沙咀道，入咗肥仔記麵家，店內生意好好幾乎係滿座，同老公一人叫咗一碗雙拼麵，牛腩牛肚生麵，另一款係牛腩雲吞米粉，價錢雙拼係$33一碗，下午兩點後仲有一杯凍豆漿送，兩碗麵都好大碗，牛腩同牛肚炆得好入味，軟硬度適中，好香柱侯醬味，雲吞大大粒，鮮蝦同豬肉都好足料，個湯底都好美味唔算好重味精，值得一讚係佢自家製嗰個辣椒油，好香辣惹味，兩杯豆漿都唔錯，超值抵食。…Read More

今日專程去食牛舌，訂咗十二點，即刻入座，三人都係叫咗厚切牛舌定食。上菜速度都好快，美味的套餐已經擺在眼前，賣相好靚，有麵豉湯、茶碗蒸、蔬菜沙律、小碗咖喱汁及一個布丁甜品，主角係牛舌及白飯。牛舌爽口鮮嫩，咬落十分彈牙有口感，總共有三款醬汁，岩鹽、照燒醬及麻油蔥花，感覺上都係點一啲岩鹽係最能夠帶出牛舌味，唔會被其他醬汁蓋過牛舌本身的味道，牛舌份量很足夠，大飽口福，其他配菜都不過不失，白飯再加一啲咖喱汁好好食；雖然環境係擠迫啲，但係食物質素好好，值得一試。…Read More

城門水塘行完山，坐小巴落到荃灣，嚟咗紅豆食午餐，嗌咗一個午餐係咖喱牛肉飯，咖喱都係一般茶餐廳嘅味道，但係都夠香滑有咖喱味，個午餐跟咗一個羅宋湯味道一般啦，下午茶餐叫咗一個乾炒牛河及焗芝士鮮茄豬扒飯，乾牛河炒得好夠透好夠熱，灑了一啲芝麻，賣相好睇好香又好食；個焗豬扒飯焗得好透，炒底飯啲雞蛋都好多，豬扒夠厚；飲品方便兩杯凍檸茶就普通啲，而杯熱茶走就好香滑，整體嚟講都算抵食，憑單買佢個麵包外賣仲可以減兩蚊，可以一試。…Read More

剛完成先人後事，安排到此食纓紅宴，八個餸菜加炒飯及紅荳沙。紅皮赤壯：即係燒腩仔，肉質鮮嫩，肥瘦分明，皮夠脆，很好食。粟米魚肚羮：味道一般，但夠料及夠熱。清蒸海虎杉：肉骨分離，熟度剛好，不過火。塘拌鮮蝦仁：蓮耦片及蝦仁夠爽脆。菠蘿咕嚕肉：肉質夠腍，甜酸度都適中，但係就冇拉絲。姬松茸野菌豆腐:質素麻麻，唔夠熱，冇鑊氣。羅漢上素：味道唔夠，唔夠熱。白切貴妃雞：雞肉都夠嫩滑。瑤柱蛋白炒飯：呢個比較差，料頭唔夠足，飯又炒得唔夠熱唔夠透。最後係個蓮子紅豆沙，超級甜，難食。…Read More

路經黃大仙中心，見到譚仔米線有下午茶，個價錢超吸引，兩個人入內一試。其中一個係一款料的米線、一隻煎蛋及焦糖肉桂多士配一杯飲品，只售$33。另外再叫一款係一件焦糖肉桂多士，加一杯飲品價錢係$15，米線份量及質素普普通通，魚腐兩小片，配菜亦都不多，但係個焦糖肉桂多士烘得好脆，中間仲加咗牛油，夠香；兩杯飲品係熱檸蜜，但係就唔夠熱，以呢一個價錢來講絕對超值冇投訴，不妨一試。…Read More

生日前夕，三個人去荳子餐廳食午餐，叫左個千島海鮮批、黑松露薯條，卡邦尼寬條麵。先講個pizza,份量好大，表面滿滿海鮮，千島醬好味，每人二片好飽足，黑松露薯條個醬係靈魂，松露味香濃，點薯條配搭一流，個卡邦尼意粉即叫即煮，好有咬口，另外仲有兩杯飲品，美式咖啡及黑糖薑母茶，咖啡有質素，薑母茶內有還有兩片生薑，好飲；最後因為係生日，餐廳送咗一件開心果芝士蛋糕，寫咗生日快樂，還有一件很貼心的事，送上一張生日卡，內裏有很多員工簽名，好貼心，好開心，令人難忘，值得讚賞。…Read More

今晚冇煑飯，叫左pizza hut 外賣自取套餐，內有迷你千島海鮮厚批，海鮮料足夠，薄餅又夠熱，有迷你意大利腸及薯條，質素普通，兩隻原味雞翼，味道足，肉質嫩滑，另有一罐汽水，如果唔飲汽水可以加$3改忌廉蘑菇湯。我另外加左$16 要半客香蒜肉絲意粉，雖然份不多，但一如過往，香蒜及芝士味十足，意粉煙韌，令人回味；總括來說這個套餐抵食高質，可以再試。…Read More