Irene Ho HK's Profile

又搵野食，呢間幫襯過2次，今日第3次，就寫下佢啦。今日食紐西蘭肉眼扒配意粉黑椒汁（$98），7成熟。先送上餐湯同包，係南瓜濃湯，我對南瓜有點抗拒所以唔評論。包係香草包+一支breadstick，唔錯香草味幾特別。 等左一段時間，終於上主菜喇。試下塊扒先，咦，有驚喜喎，以7成熟黎講佢煎得剛剛好，唔韌，我好怕太生有血水或太熟咬唔開，肉味唔算濃，但絕對可以接受，意粉係扁意粉我鍾意，不過可惜味道比較淡失色左少少，但將牛扒放在意粉上一同放入口就剛剛好。飲品方面，佢有好幾款咖啡同花茶可以選擇，有誠意，我叫左凍mocha，我好少飲咖啡但覺得唔太甜幾好。有誠意，會再幫襯佢:)…Read More

上水比較少西餐廳，呢間算係少數中高檔嘅西餐廳。佢近期裝修左，光猛左我覺得舒服左。佢嘅set lunch 由四十幾蚊至二百幾蚊不等，星期六日同假期貴十蚊。可揀跟湯或沙律，我鍾意食雞同牛，但牛比較貴會留返獎勵自己先至豪下，呢次就食沙律係哈蜜瓜沙律，主菜就食雞排拼豬排，雞排唔算大塊，肉質唔錯，切開都仲有肉汁，豬排煎得幾好，唔柴有肉汁，唔會食到牙軟。但係我最近再去食呢個餐，佢竟然將塊雞排減左半，得返半塊！！！豬排都細塊左好多。如果唔想食太飽，呢間係唔錯嘅選擇，我就有時會唔夠飽服務黎講我覺得女侍應比較有禮貌嘅。…Read More

呢間開左唔係好耐，同媽媽試下新野，入到去無位要留電話，有位call我。之後打比我話有吧枱坐唔坐，咁好啦都坐住先啦。我地都係叫set lunch都有好多選擇，我左個豬扒配薯條。都等左幾耐下，又坐得唔係好舒服，燈光比較昏暗。終於黎喇，賣相不錯哦，食落口，豬扒煎得幾好，外面香口，入面無過熟，都幾juicy。薯條係我最鐘意嘅薯角，加分。沙律唔特別，都幾新鮮。有下次！不過下次要坐正常座位唔要再坐吧枱，因為坐得好辛苦，令到媽媽短期內唔敢再去。…Read More

小小個已經幫襯佢，由廿幾蚊食到而家差唔多四十蚊。首先入到去，要同一位內地男人搭枱，搭枱係正常，因為店不大，只有幾張圓枱。之後叫左碗牛腩河，一黎到碗牛腩河浮起左啲奇怪紅油，而我係未加任何辣油之類嘅，我覺得好奇怪，心諗佢而家易左手加左啲怪油定洗唔乾淨個碗呢？食落口，牛腩好粗同柴，一路食，對面個男人一路撩牙再一路將牙簽上嘅野刮落個碗佢，好核突。而我好不安咁食，食到一半已經覺得食唔落，因為覺得好噁心。因為我不禁聯想佢碗野浮起嘅油會唔會係上一手留低.......佢而家專做大陸人同水客生意咁，我唔係歧視佢地，但佢地啲行為令我以後都唔會再幫襯。…Read More

今日同朋友即興約去沙田行下，就揀左佢食喇。叫左牛肉麵、排骨蛋炒飯、小籠包、酸辣湯同燉雞湯。首先牛肉麵好普通，八十幾蚊一碗偏貴，下次可以唔叫，留返食程班長仲好；排骨蛋炒飯，我鐘意佢個炒飯底，炒飯好食，排骨（豬扒）略嫌乾左少少又有啲油膩；小籠包，保持水準皮簿餡靚；酸辣湯，我次次都會叫但今日唔夠辣淡左啲；燉雞湯保持水準。之前測試過佢幾次，平日星期一至五，整得好食啲，星期六日/假期就硬係差咁少少。建議大家平日黎好啲，始終價錢都唔平，平日黎食好啲感覺會好啲😂…Read More

由佢開張已經常幫襯，因為佢當時質素，環境同價錢都好唔錯。通常食下牛扒、意粉、沙律、奄列飯等等，應該係西日餐廳，走中檔路線。但係突然有幾年佢風格突變，腸仔雞翼、咕嚕肉飯、雪菜肉絲炆米等，我感覺就係茶餐廳質素西餐價錢。其實我欣賞佢多元化，只不過當時菜色唔太岩我口味，所以就好少食佢，轉左去梳乎厘今年佢好似搵返自己嘅定位，質素都上升返，所以我又多左幫襯佢喇，今日午餐食左-韓式薄切牛肉泡菜伴飯。都唔錯喎佢日日set lunch都唔同，岩晒想日日新鮮嘅人…Read More

星期日，同爸爸媽媽去搵野食，爸爸話好掛住廣成嘅牛肉通，所以我地就去食喇。去到門口，心知不妙，因為好多人等緊。我地等左20分鐘左右終於有位。入到去，無卡位，坐大枱，好鬼迫。叫左三個茶餐食，即係牛肉通+蛋治+飲品。我爸爸話佢個牛肉通係用新鮮牛肉整，配搭少少薑絲，佢地加少少胡椒粉，我就加少少辣油，爽！辣油我覺得比其他地方辣，所以唔好加太多，費事搶晒原味。蛋治厚蛋好味道！包好軟，如果拎得唔好會食得好論盡除左坐得唔太舒服之外，食物係好唔錯架。…Read More