hungrybobooo's Profile

今年平安夜同老公嚟咗呢間好呷打邊爐，我哋鍾意嚟銅鑼灣分店因為比較闊落，而旺角分店就比較迫。平安夜做緊聖誕火鍋盛宴，湯底可以揀龍蝦濃湯底，有海鮮拼盤送，會員仲有七五折，每人都係三百幾蚊。肉類亦比平時多好多選擇包括美國和牛肩脊、牛小排。送嘅海鮮拼盤亦都有驚喜，本身冇乜期望，但鮑魚新鮮幾爽口、蝦亦都唔錯正常發揮、蠔都幾鮮甜。Menu仲有蜆可以逐隻叫，雖然細細粒但係都幾鮮甜。總括呢個邊爐變咗海鮮邊爐幾抵食！…Read More

同屋企人慶生，一行10人嚟呢度食晚飯。經OpenRice訂枱主menu有七折, 指定鵝肝dinner set有8折。餐廳職員有善，主動介紹餐牌，亦唔會太hard Sell 。我哋叫咗一打生蠔：coffin bay + Irish rock, 送咗一支意大利白酒。我哋叫咗鵝肝dinner set，有前菜+湯+主菜，而甜品可以加$20揀心太軟、Tiramisu、cheese cake。餐湯係龍蝦湯入邊有一粒粒嘅龍蝦肉幾好味。主菜叫咗牛柳，正常發揮不過不失。當晚有駐場歌手係一個菲律賓籍嘅歌手，好識搞氣氛，每張台會過嚟問你想聽咩歌，屋企人生日亦有過黎唱生日歌，氣氛好好！…Read More

間唔中都鍾意去十字冰室食嘢，因為佢有玻璃樽嘅牛奶，好似搵返細個嘅兒時回憶。我同朋友分別叫咗兩款午餐，一個係蕃茄牛肋條飯，另一個係香茅白咖喱豬仔髀飯，加$8叫咗芒果木瓜奶同埋朱古力牛奶。蕃茄牛肋條飯幾好食蕃茄汁味唔會太假，而牛肋條份量好充足，質地亦都算炆得幾淋。而香茅白咖喱豬仔髀飯，出邊茶餐廳比較少見。有兩支豬仔髀骨，一開始睇落去感覺好少肉，但食落個豬仔髀骨原來都好多肉亦好容易起骨，炆得好淋，整體嚟講都好好食。…Read More

結婚週年老公安排咗去St Regis嘅Drawing Room食晚餐慶祝。因為呢間餐廳主要係食afternoontea，加上係平日既夜晚，所以當時入到去只有好少人。職員安排我哋去卡位入座，座位寬敞，因為得好少客人，所以好寧靜好舒服。職員有主動介紹餐牌及回答我哋一d問題,亦會係適當嘅時候幫我地加茶水，服務不錯。以五星級酒店嚟講食物質素都合格，中上水平，正常發揮。 因為係結婚周年，所以酒店亦都有安排小蛋糕送俾我哋，同埋主動幫我哋影相留念。…Read More

返工喺上環附近，見到新開嘅呢間Cafe lunch time 時間日日都大排長龍。經research得知原來呢間Cafe係韓國人主理既意大利餐廳，估計因為黑白大廚呢個節目好Hit，令到呢個韓國人開嘅意大利餐廳都好受歡迎。因為同事之間都好想試，所以有一日同事專登11:45am嚟到呢間Cafe攞位。因為我哋有成10個人，所以基本上成個Menu嘅菜式我哋都有叫。蕃茄加Burata cheese嘅沙律真係非常好味，雖然簡單但係蕃茄好新鮮加埋醬汁一齊食非常之夾。佢哋嘅意粉都係手工做，食左幾款意粉都好好味，值得一試！有一款pasta叫Cacio e Pepe ，望落好普通，但食落好有驚喜，好香芝士味！反而pizza我個人就覺得麻麻地。…Read More

之前同事帶過我嚟食過呢間燒烤堂，覺得燒烤質素唔錯，串燒種類亦都幾多選擇，有啲款式都幾特別，座位都幾舒適。而且呢間串燒店勝在分店夠多容易約朋友，所以今次做冬就同屋企人嚟食。每張枱仲會放一個蠟燭嘅火爐，可以用嚟保溫d串燒，雖然覺得作用不太大。我哋推介嘅串燒係味噌松阪豬、黑糖燒菠蘿、厚切鹽燒牛舌拖羅（入口即溶好好食！）、香草蒜蓉包、檸蜜牛油包（幾特別甜甜地）、明太子淮山燒、鹽燒白鱔、鹽燒阿波里七里香雞（走地雞）。…Read More

專登喺聖誕節前嘅一個星期網上10:00準時book位，book到Boxing Day下午5:00的位置可以試吓呢個炭燒漢堡扒。咁啱聖誕節期間做緊期間限定既A4九州和牛漢堡扒。套餐每人包3塊漢堡扒+1隻生雞蛋+白飯任裝。廚師會因應你進食嘅速度去安排漢堡扒，漢堡扒真係烤得好香好Juicy輕鬆就可以K.O.幾碗飯。期間亦見到廚師因為漢堡扒烤得唔好而掉咗去垃圾桶，真係好認真。店員會介紹每塊漢堡扒唔同嘅食法，唔會咁快食到厭。旁邊嘅醬汁亦都好好味，令人開胃，減輕油膩感。整體嚟講幾好食可以再嚟，但可惜太難book位都要再諗諗先！…Read More

經過金鐘，灣仔附近就試吓潮州人。門口見到餐牌有手切牛湯米粉就打算試吓，點知當日普通手切牛湯米粉已經賣晒，只可以叫星級手切牛湯米粉。咁就叫咗一碗星級手切牛湯米粉試下，呢個係大碗。 湯底都有少少牛肉味道，米粉嘅份量亦都好充足，牛肉亦都幾好味，可惜略嫌片數甚少，只有大約六片，食晒啲牛肉都仲有好多米粉剩低。同行的朋友叫咗清酒大峴湯米粉，湯底有清酒味幾鮮甜，大峴亦都夠大隻，份量大約7隻峴。如果想飽肚啲，可能要再叫啲小食。…Read More

平日喺附近返工，中午就同朋友嚟試呢間越南粉。店舖好細間只有幾張枱，我哋12點鬆d嚟到仲有位，到我哋食完大約1:00就已經坐滿人。Lunch menu都有唔同選擇，有湯pho, 有撈檬粉。第一次試梗係試吓生牛肉金邊粉, lunch set仲包一杯飲品， 可以選擇越南冬瓜水、亦有熱情果汁，另外仲可以揀檸蜜。湯底幾好味，食完都唔會覺得口渴。而且牛肉份量都算幾多，牛肉亦都唔係超級薄切個種。大約$83 lunch set 以附近中、上環嚟講係好抵嘅選擇！…Read More

星期五夜晚放工後經過奇蹟拉麵，當時未需要排隊，見到入邊仲有位就入去試吓。本身仲考慮緊試清湯醬油拉麵定係濃湯拉麵。然後喺OpenRice見到其他人的食評都係話清湯醬油拉麵比較出色就決定試吓！而老公就決定是濃湯拉麵。果然清湯醬油拉麵嘅湯底真係清澈得黎夠味道，飲落去唔會覺得重口味，仲好舒服。對比之下反而老公嗰碗濃湯拉麵的湯底，我就覺得冇咁好食，因為太厚比較杰身。 面底份量就唔算好多，女仔就應該啱啱好，但男人就可能會唔夠飽。總括嚟講唔使排隊既話可以一試。…Read More

今次我同朋友去咗西貢呢間海鮮酒家，食左一個4人海鮮餐，份量好夠幾抵食。1. 椒鹽奇脆豆腐：新鮮整出黎，熱辣辣，外脆內軟，好好食！2. 薑蔥炒蟶子皇：蟶子肉質煮得剛好，薑蔥亦都好好食。3. 椒鹽焗鮑魚：椒鹽粉薄薄包住鮑魚，唔會太厚，肉質爽口，椒鹽味恰到好處唔會太鹹！4. 天婦羅桶蠔生菜包：桶蠔好大隻，入面炸得剛剛好，天婦羅粉亦唔會太厚，包入生菜中一齊食，口感層次分明，大讚！5. 上湯開邊龍蝦伴伊麵：龍蝦肉質煮得剛剛好，伊麵正常發揮。6. 鮮菠蘿生炒骨：生炒骨唔會太厚粉，正常發揮都幾好食。整體來講，呢間酒家性價比都算高，海鮮新鮮好味，下次可以再黎！…Read More