bluebloodlady's Profile

正當我哋嘅香港政府好努力咁呼籲香港市民留港消費嘅同時，香港竟然出現咗一間酒樓嘅員工好唔自愛咁幫自己老闆「趕客」！到底係邊間酒樓？就係喺上環宜必思酒店嘅「糖心軒」。以免各位誤會，有一點要同大家講清楚嘅，呢間酒樓並非宜必思旗下所有，只係出租形式。以下嘅經歷，令我終於明白點解香港人會選擇返內地消費，去外遊消費，都唔願意留港消費。朋友話想約去糖心軒飲茶，大家相約咗喺下午兩點嘅下午茶時段聚一聚。由於不設網上訂座，於是我打電話去酒樓查詢有無得訂枱（因為我試過其他酒樓都有下午茶訂枱服務）以下分別係我同4個接聽過我電話嘅女酒樓員工嘅對話👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻Call 1: 我: 請問下午餐時段有無得訂位？員工1: 阿靚女呀⋯⋯你覺得下午茶有冇得訂位呢？我,. 即係有定無? (已經著🔥咗)員工1: 下午茶收你咩價錢呀？仲有得訂位？如果有就做死我哋喇。我: 你依家咩態度？有就有，無你就答無囉，你講咁多無謂嘢做咩？員工1: 我好忙㗎⋯⋯(然後cut線)我即時著🔥🔥🔥到嘭嘭聲喇，於是我又再打電話去酒樓，今次係員工2接聽。Call 2:我: 我要投訴啱啱聽我電話嗰個職員，佢態度好有問題。但係呢位員工2不斷暫亂歌柄，淨係話👇🏻👇🏻👇🏻👇🏻👇🏻👇🏻👇🏻👇🏻👇🏻👇🏻員工2: 下午茶係無得訂位㗎⋯⋯佢咪答咗你問題囉！有咩問題呢？無答錯你喎⋯⋯我: 你到底有無聽我講乜嘢㗎，我係要投訴佢嘅態度，唔係投訴無得訂位！呢位員工2一於繼續扮聽唔到，然後淨係講咗句: 「好忙㗎我哋！」之後就cut線！相信唔需要我多講喇，俾著係你，接受完2個員工嘅優質服務再加連環被cut線，大家都feel到會有幾嬲😡😡😡😡😡喇！於是我再打電話去呢間酒樓，今次係第三個員工接聽我嘅電話。Call 3:我: 我要同你哋呢度話到事嘅人投訴！員工3: 有咩幫到你？我: 即係點？你係咪話到事？你乜嘢職級？我足足問咗佢5次佢乜嘢職級，佢都唔答我，淨係識問我有咩幫到我？於是我問佢點解唔講得你咩職級？佢先至肯開金口答我佢係主任，然後佢秒速隊咗個電話俾經理聽。真係唔聽由自何，一聽包你哋把火🔥🔥🔥🔥🔥🔥🔥🔥經理: 我係呢度嘅經理，叫阿(紅)，有咩幫到你？於是我就將頭先嘅對話情況由頭到尾再講一次俾呢位所謂經理嘅阿(紅)聽。真係估唔到呢位經理仲有禮貌過頭先嗰3位傑出員工。經理: 哦！原來係咁樣，得！得！得！我話吓佢哋吓！仲有咩幫到你？明顯呢位經理嘅語氣係想敷衍了事，只係想我快啲收線。我: 佢哋做得唔高興，可以辭職唔撈，但唔可以攞客人嚟出氣⋯⋯依家係咪因為幫襯下午茶時段嘅客就係cheap客，所以就唔洗招呼？請問你除咗話吓佢哋，你仲有乜嘢可以做到？例如點樣去改善你哋員工嘅態度之類？經理: 咁你覺得仲有咩可以做到呢？我: 你呢個態度都經已好有問題喇！你係咪想我連你都投訴埋？經理: 你鍾意就投訴喇！歡迎投訴，bye bye，然後cut線！🔥🔥🔥🔥🔥🔥🔥🔥🔥🔥連續3次俾酒樓職員cut線，員工嘅質素由上層至下層都係咁劣質，就算啲嘢有幾好食，環境有幾舒服都無用喇！好老實我真係好耐好耐都無寫過食評㗎喇，但係呢種經歷係咪唔同各位食家分享真係有啲對唔住自己先？…Read More

話說呢間沾麵店由21/7~31/7做緊沾麵放題，每位食客喺呢段指定期間嘅任何時段都可以無限添加沾麵，而其中食客如果能夠食夠1300g或以上嘅任何沾麵，更可以參加8月尾嘅沾麵王終極大賽添。相信搞得呢啲比賽，都係想幫鋪頭搞搞gimmick嘅啫，可以為大胃王食客帶嚟挑戰，又可以為鋪頭做宣傳，一與兩得。不過，我就覺得鋪頭稍為做得唔夠大方同唔夠彈性啦⋯⋯點解呢？我老公乃係大胃王一名，1300g對佢嚟講，唔算係好高難度。頭一round我老公就叫咗400g，我就叫咗個200g。食完頭round，我老公碗湯就無唒啦，但400g當然唔夠佢填肚啦，所以佢就再加400g，但店員話一定要叫夠800g至可以加湯，咁點算好呢？唯有索埋啲湯尾啦⋯⋯點知大胃王食完800g都覺得無咩料到，於是佢決定參加挑戰，佢再ordered多400g，戲肉嚟啦⋯⋯一等就等咗超過15分鐘，碗湯雖然用石鍋載住，但由於碗麵未上，湯面都已經開始起咗層gel店員見到我哋望咗佢哋好多次，但都無覺得唔妥，最終都係要追。最後，大胃王老公挑戰成功，於是就問店員攞張參賽表格啦，第一個店員應咗我哋好之後，一等又等，10分鐘又過啦⋯⋯我張表格呢？當然係無攞到俾我哋啦！於是，又再問第二個店員，8分鐘又過去啦⋯⋯今次終於有得填表格啦！其實我哋幫襯嘅時段並非rush hour，但都咁多甩漏好難唔俾我一個感覺，就係「你哋最好唔好食咁多」。大胃王比賽好明顯只係噱頭，員工們根本唔care呢個比賽！另外，我覺得鋪頭既然搞得放題，點解一定要強迫客人每次加麵都要200g、300g、400g咁上呢？人哋想添食100g唔得嘅咩點解一定要食客浪費食物呢？我諗100g應該唔會煮唔到啩好啦⋯⋯一啖砂糖一啖💩，佢都有可以讚嘅地方嘅，例如伴碟有一舊🍋俾你解吓膩同辟魚湯嘅腥味(當然我唔覺得個湯頭腥啦，仲幾好味添)。另外，杯水都放咗幾片🍋，飲落味蕾都幾清爽㗎！而用石鍋上湯亦可以保持到湯嘅熱力，講到塊豚肉亦肥瘦適中。整體嚟講，如果麵店能夠再改善一下以上嘅不足，其實佢嘅評分應該唔錯嘅…Read More

天外天呢個週末至有得嘆嘅afternoon tea，緊係要去試一試啦！企咗喺接待處大概4分鐘，終於有人見到我啦👋🏻論環境，呢度嘅裝潢設計係唔錯嘅，好配合佢中西合璧嘅原素，而餐廳亦融入咗環保嘅設計概念，靠大玻璃去吸納光源食物賣相吸引，而且並不是虛有其表㗎，睇得又食得，而且設計亦相當有心思，抵讚之不過服務呢⋯⋯可能侍應們始終係經驗淺，好多時佢哋嘅嘴臉都表露無遺，加上對客人嘅要求唔上心，所以轉個頭就已經忘記得一乾二淨啦Afternoon tea嘅用餐時間去到5:30pm，大概5:15pm左右就有侍應主動幫我哋埋單兼提醒我哋'你哋嘅用餐時間差不多已經夠鐘，你哋需要離開㗎啦' ～你哋需要離開，感覺好似命令式咁嘅！5:25pm，侍應直頭熄燈熄冷氣問你哋仲走唔走…Read More

記得以前同朋友去伊呂波吃燒肉，服務好之餘食物又新鮮，好有日本人禮貌至上嘅感覺。唔知道係轉咗老闆定因爲係買團購嘅關係，呢間燒肉店上至服務員，下至食物都嚟一個大退步我講緊嘅係今年3月嘅事，我哋一行6人去到燒肉店，為咗爭取時間，大家都即刻剔想食嘅食物，當晚食客並唔多，只得小貓三、四隻。開頭2 round上食物嘅速度係非常正常嘅，但之後唔知點解侍應們好似後勁不繼咁，叫好幾次至會有一個懶洋洋嘅侍應行埋嚟攞點菜單，而且大家都發現，上菜嘅速度明顯慢咗好多。侍應大哥，計時㗎，雖然我哋買團購啫⋯⋯唔洗好似食咗豬油咁款嘅食到尾聲，侍應竟然未夠鐘就同我哋講呢轉係你哋嘅last order!!! 好，既然你講得出，咁我哋亦唔客氣繼續剔。最頂癮嘅係，侍應睇完我哋張點菜單之後問咗一句，你肯定你哋食得曬？？救命！我未試過去一間食肆會有侍應用咁嘅口脗同客人講嘢，我哋答佢食得囇⋯⋯個侍應就黑口黑面去入單，但到啲食物嚟之後，我哋發現好多都冇幫我哋落單，結果係冇得食我哋最後切埋個蛋糕至走，但趕收工嘅侍應們已經心急如焚咁趕客，又講啲說話俾我哋聽暗指我哋阻佢收工大哥們，9點鬆啲咋，我知道你哋冇客，但咁趕住收工不如唔好做啦其實，餐廳之所以做團購，目的不外乎幾個，而呢間餐廳明顯係因為冇乜客幫襯，想藉此增加客源，但失敗嘅係有一班非常唔合作嘅員工，又要做團購，又要吝嗇食物，咁唔大方，不如唔好做啦…Read More

講起去邊度食飯，屋企人極力推薦'御膳'。雖然地點真係唔多就腳，但屋企人話佢多位朋友食過都讚不絕口，咁就一於去試吓佢係咪浪得虛名啦！我哋當晚book咗6:30，去到工廈嘅門口有一個停車場入口，環境衛生確係好麻麻，搭貨𨋢上到12樓，原來同𨋢嘅人全部都係去御膳嘅，證明大家都係慕名而來！一出𨋢就有一位年輕嘅哥哥帶食客去到唔同嘅房間就座。由於餸菜已經一早預訂咗，所以人齊就即刻可以起菜。先講起菜速度，果然有效率幾分鐘已經即刻上咗2小碟，重點係～呢2小碟係送嘅雖然係免費，但味道一啲都唔遜色，相當有質素。之後主菜陸續送到，食物雖然唔講得上係非常特別，但食材就非常新鮮。而且食材嘅配搭亦非常夾，味道好之餘，食客能夠食得出廚師嘅用心製作至於場內侍應，位位都非常落力，有禮之餘又有效率，有效率得嚟服務亦絕不馬虎，食客絕對感受到佢哋嗰份熱誠由於餸菜太多兼份量較大，侍應們都馬不停蹄咁幫我哋大碟轉小碟，而且當晚海鮮類🦐🦀較多，所以侍應都不斷幫我哋更換乾淨嘅碟，淨係呢樣嘢都好過好多食肆啦。食材有質素，食物味道好，份量又大又足料，服務細心又周到，仲要免開瓶費同切餅費，絕對值得俾佢啦！…Read More

提到mad for garlic，其實小妹都幫襯過2次。留在腦海中最深嘅印象一定是餐牌中每一道菜式，甚至甜品都唔少得主角GARLIC！無錯，上至鹹食，下至甜點都係'蒜'~~~先講呢間餐廳嘅特色，定位好清晰，就係韓風中的意大利菜。每款菜式都總會融入少許韓國嘅食材，例如risotto用的是韓國大米而並非傳統的意大利飯，各式薄餅亦選用韓國嘅食材，確實有餐廳自我嘅signature再講環境，餐廳裝潢模仿一個酒窖，特別是卡位的入牆設計，絕對能帶給你私人空間，確實非常選合三五知己的敘會。至於食物，味道不錯，份量亦適中，但暫時未有一道菜式能突圍而出，給人留下深刻印象，非吃不可。最後，值得一讚的是服務，2次的服務都是非常令人稱心滿意的，上至經理，下至侍應生都非常專業，即使非常繁忙，仍能盡量滿足客人要求，例如拍照(多張)之類而且，2位男經理還非常風趣幽默喔！…Read More

由於買咗團購，團購通知呢間餐廳將會喺本月尾結業，所以趁今日有時間就去用咗張券佢。可能係下午茶時間，一入鋪頭，一個客都無。侍應姐姐即刻問我哋係咪用券，用券只可以叫正價食品。我哋買嘅係$100當$200用嘅券，所以我哋叫咗1個正宗蝦麵，1個正宗叻沙同一個肉骨茶。等咗一段時間，阿姐送嚟一碗蝦麵，但個湯底同我平時食開嘅蝦麵(包括喺新加坡)好唔同一飲啖湯，味道唔鮮甜之餘仲帶有一點點嘅胡椒粉味，敗筆不過碗麵嘅食材都算好足嘅。之後就到叻沙，個賣相同平時食開嘅差不多，用料都好足，湯底算唔錯，不過螄蚶有沙呢最後上埋個肉骨茶，阿姐問我哋要唔要飯，可能佢唔想浪費食物啦！肉骨茶用鍋上的確係夠唒熱，佢哋嘅肉骨茶係走馬拉路線嘅(即係用藥材煲)只可惜用料不足，藥材味極淡，搞到個湯兩頭唔到岸明明肉骨茶係跟油炸鬼嘅，但阿姐要我哋開聲問佢佢至攞俾我哋，可能又係驚浪費食物啩⋯⋯不過阿姐都算係咁㗎啦，我哋問佢攞調味料佢都俾咗碟黑油同亞參醬俾我哋。不過有樣嘢真係要講，我哋食完真係勁口渴，應該都落咗唔少味精…Read More

其實成日都會路經金鐘太古廣場嘅Great，每次見到呢間朱古力店都好想試吓。咁啱有同事調職，咁就諗住買盒朱古力送俾同事。行到counter，一個女售貨員走埋嚟向我介紹佢哋公司不同款式嘅朱古力，喺我仲十五十六諗緊買邊款朱古力之際，女售貨員隨即好樂意咁攞出1款經典朱古力俾我即場試食，我打開一試，咦~係72%嘅黑朱古力喎，口感好滑之餘，朱古力嘅香味仲好突出，而且亦唔會一味死甜，果然富有層次於是我二話不說，立即買咗1盒。臨近新年，我又買咗1盒多款不同可可度數嘅朱古力番屋企與家人分享，而屋企人亦大讚好味更值得一提嘅係，經理Amii真係好親切，每次都毫不吝嗇咁送片裝朱古力sample俾客人試食，仲要多謝客人為佢哋品牌做宣傳。佢向我講，文華酒店都係用佢哋公司嘅朱古力㗎，果真有一定嘅級數。總之，每次離開呢間店嘅時候，客人總會感受到咩叫賓至如歸嘅感覺…Read More

約咗JM行街，臨近佢生日，擇日不如撞日，即刻搵個地方同佢提早慶祝生日啦！JM話想食燒肉，見呢間就腳，於是就搵咗呢間日式燒肉店。晚飯時間，一出𨋢，異常冷清，人影都冇隻。我哋睇完個menu，覺得都ok，就決定食呢間！企咗喺餐廳出面幾分鐘，終於有職員見到我哋2個楝咗喺度啦入到去，店內只得幾枱客，侍應擺低menu、餐具同2杯茶之後就極速轉身離開。我哋揀好食咩之後就諗住落order啦，舉咗好耐手都冇人應，店內大大話話有成6、7個侍應，但個個都用個背脊得住我哋掛住打牙骹想點先？最後要好似大排檔咁大聲嗌「唔該🔊🔊🔊」先有1個waiter聽到，個waiter目無表情行埋嚟落單，開完個爐就即撇。食物好快就送到，味道的確係好嘅，食物亦都新鮮，特別係🦀腳，鮮甜得嚟又唔會太咸，而豬肉亦都非常有嚼口，食物質素整體係理想嘅，而個set嘅份量對女仕嚟講絕對係啱啱好既然有🦀，最好就當然有拆蟹嘅工具provide啦！我見waiter冇俾，於是我就問佢攞鉸剪啦，結果個waiter只係攞咗1把鉸剪俾我哋😌講真，成間鋪都冇咩客，點解唔俾多把鉸剪我哋而要我哋share輪流用呢！一路食，一路有姐姐走埋嚟收唒我哋枱面嘅調味料，但問題係我哋仲食緊嗰喎⋯⋯最正嘅係2個侍應哥哥不停輪流式巡邏，佢哋2個不斷你眼望我眼，然後就耷低頭笑，但佢哋從來冇留意吓客人有咩需要，例如客人杯內仲有冇茶之類。佢哋唯一有做嘅就係收碟，強調，係極速收碟超口渴但又冇人斟茶，唯有截停其中1個巡邏中嘅waiter幫我哋加茶啦！結果⋯⋯個waiter只係斟咗俾我咁我JM呢？OMG😱😱😱我哋都未食完，侍應已經急不及待俾張bill我哋埋單，咁嘅服務，當然係一毫子tips都唔會俾啦⋯⋯或者佢哋根本都唔稀罕tips呢樣嘢😌😌臨走前，JM問個waiter攞牙簽，當然JM好醒目地問佢攞2枝牙簽啦，最後，個侍應咪就係俾咗2枝牙簽我哋囉😂😂😂😂😂即係咁，我喺呢間餐廳強烈感受到1樣嘢，就係趕客…Read More

話說最近雪糕大師Haagen-dazs推出限時優惠買1送1套餐，為食嘅我當然唔會放過呢個咁筍嘅優惠啦⋯⋯我同朋友下晝四點去到，人流並冇我想像中咁多，但都有6、7成滿座。waitress話只要你like咗我哋fb就可以享用呢個優惠套餐！完全冇難度，㩒個就有優惠，何樂而不為呢！餐牌上總共有5個優惠套餐，客人可以喺5款蛋糕入面揀選1款蛋糕+1種口味嘅雪糕球+1杯飲品。蛋糕種類包括熱帶風情芝士蛋糕、和風黑芝麻芝士蛋糕、蘋果金寶芝士蛋糕、柚子芝士蛋糕同唯一一款嘅紅莓香橙朱古力蛋糕！似乎全部都係cheesecake，如果唔喜歡cheesecake嘅朋友就唯有揀朱古力蛋糕啦😌當然，呢間係一間雪糕專門店，蛋糕始終唔係佢強項，味道真係好一般，絕對冇驚喜！但亦都明白雪榚本身甜食，如果再配搭上甜嘅蛋糕會好膩口，相信雪糕公司應該係專登用芝士蛋糕嚟配搭雪糕嘅。至於雪糕球，好大方吖全店26款雪糕嘅味道都可以揀，花多眼亂，真係樣樣都想試飲品方面，大部分嘅咖啡同茶都可以俾客人任揀，只有極少數喺menu上嘅飲品係唔包嘅啫！整體嚟講，$65(未計加一服務費)2個人share真係算超值，起碼坐得舒舒服服先啦…Read More

今晚喺福元街附近食完飯，最完美嘅當然係食埋個美味嘅甜品，咁先至叫做畫上完美嘅句號嘛⋯⋯咁近城隍廟就緊係去福元街嘅福元湯圓啦！一如以往，門口一定有番咁上下人龍。等咗10分鐘左右，就有得入座！雖然又堂食又外賣，樓面只得1位阿哥，廚房只得1個阿姐，但啲單依然絲毫冇混亂今次我哋2個都係食黑芝麻湯圓配糖薑水！湯圓依舊能夠保持皮滑餡靚，一咬開湯圓，芝麻流心就慢慢湧出嚟，芝麻嘅香配上糖薑水，兩者絕對唔會搶咗對方本來嘅味道。冇食一段時間，仍然能保持穩定嘅水準，值得返轉頭啦…Read More

今晚同朋友睇完戲，跟手就去安撫吓個五臟廟，附近嘅餐廳已經大部分打烊，食過呢間餐廳（中環店同太古店）好幾次，趁佢未收就急急腳入座。其實論味道，我覺得太古店係不及中環店嘅，淨係講個泰式燒牛肉沙律，唔係話太古店唔好味，但中環店嘅味道的確係勝佢一籌。其實甜品都係一樣，同一款甜品，2間店我都食過，但我唔會再喺太古店食甜品，因為味道根本唔係嗰回事論環境，太古店係舒服啲嘅，起碼枱與枱之間嘅距離冇咁貼先啦。論服務，其實太古店俾我嘅感覺一向都係麻麻，比較hea，而且禮貌好一般。但如果你好似我咁，久唔久就會想食泰菜的話⋯⋯呢間係可以encore嘅！…Read More

平日如果同屋企人食buffet，其實嚟來嚟去都係嗰幾間。今次由於係家人突然有假放，所以臨急臨忙之下就揀選左呢間餐廳，原因係汽水果汁有得無限量供應之餘，OpenRice又有飲食折扣優惠。打電話book枱嗰陣，我問接電話位哥哥你哋有冇龍蝦供應，個哥哥有啲猶豫咁答我話有.......咁我就made咗reservation啦！Buffet係由晚上6:30開始嘅，我準時到餐廳諗住影吓相，一坐低waiter就問我哋想飲果汁定汽水。Buffet準時6:30開始，食客一窩蜂湧到去龍蝦、蟹腳、生蠔嘅海鮮檔，唔洗幾分鐘，半邊龍蝦就已經俾人掃唒，而我，就只係夾到1件半邊龍蝦😢等咗一陣，都唔見師傅加番啲龍蝦，於是就同師傅講，麻煩佢加番啲龍蝦，點知師傅話冇唒半邊龍蝦，得番啲蚶依家至啱啱開始咋喎⋯⋯冇唒！！！師傅話熱食嗰邊都有半邊龍蝦，不過係熟嘅。返埋位坐低就問經理點解會冇冷盤嘅龍蝦供應？經理話頭先啲龍蝦係之前"賣淨"嘅，所以所淨無幾，其實熱食嗰邊都有半邊龍蝦，仲新鮮過急凍㗎！既然你俾得呢個答案我，我都會欣然接受啦😌😌食食吓，經理又走埋嚟問我地要唔要幫你地預備幾隻凍嘅龍蝦？我都想知道佢地點樣變幾隻凍嘅龍蝦俾我🤔我就話好吖！隔咗一陣，半邊凍嘅龍蝦送到啦⋯⋯原來係用熱食部嘅龍蝦先用爐蒸熟，再將龍蝦急凍！講真，凍食真係比熱食彈牙，有嚼口。經理Phoebe問我味道如何？會唔會唔夠熱食好味？其實能夠為客人諗到急凍呢個方法，又肯盡力補救，都算係好有heart㗎啦。至於其他食物，老實講，食物種類真係唔多，但勝在表現平均，樣樣食物都有啲，而味道嚟講係唔錯嘅。除無限量飲品供應之外，最後都仲有杯咖啡或茶，飲料方面都算係做得好好講到服務，整體而言係好嘅，特別係廚部。但侍應當中總會有例外㗎啦，一兩個唔好係好難避免嘅，明白㗎啦😌😌…Read More

今日同絲打慶祝生日，佢話想食韓燒，於是上OpenRice look look，見到呢間餐廳5錯，於是就揀佢啦！當晚天氣涼涼地，全間餐廳打開唒窗，感覺好正，最重要係空氣流通，5會成身燒烤味人齊坐低，我地order左2個韓🐮set，牛肉好好味，好新鮮期間waiter不斷主動地加生菜、蛋漿同配菜俾我地，服務都好好雖然訂枱時職員冇同我講用餐時間限時2個鐘，到我地坐定定個waiter先同我地講，不過到最後我地食超過2個鐘都冇人趕我地走！最最最好嘅就係，呢間餐廳係5收切餅費㗎我覺得呢間餐廳絕對可以encore …Read More