Iriskkkkk's Profile

星期五夜晚，當然係與佳人約會，夜晚來到景峰呢間日式居酒屋，點左啲串燒拼盤同埋唔同既燒物，係估唔到一間咁細間咁骨子既食店，味道居然有好多驚喜。首先點左兩份前菜小食，唐揚墨魚咀同埋味琳魚乾，平時好少食，估唔到墨魚咀都幾脆，咀嚼感幾好！味琳魚乾就不過不失，味道正常。然後到蜆湯烏冬，蜆既份量有6隻，份量適中，然後每隻蜆都幾大隻，同埋唔覺有沙同埋都幾有質感，唔會太硬，蜆肉與湯底出奇地夾，兩者揉合一齊都幾好食。然後再點左一份鮑魚，咬落去口感好軟熟，鮑汁都好有鮮味；仲單獨叫左份醬燒五花腩，腩片脆得黎亦好煎得好香，好有水準；接下來就到串燒拼盤，咁多串燒當中最鐘意豬頸肉串，配搭起秘製既孜然粉，咬落又脆又有豐富既豬頸肉香，仲有燒茄子都好大塊，好好食。最正必點既係牛油雞比菇，搽左牛油落去之後，估唔到咁香咁好食，高度推薦大家去食晚市一定要點呢個小食。Overall黎講，叫左近乎十樣食物，都只係around $500左右，都幾抵食，大家如果入到屯門，都可以試下呢一間小品。…Read More

今日同朋友黎到太子呢間新開既食包(Winning Burger)，點左兩個漢堡包餐試下，分別點左份WB豬牛薯堡同埋蝦肉漢堡，小食就配洋蔥圈同埋雞翼。佢主打既豬牛薯堡真係幾高質，塊牛同豬都好大份，肉質鮮嫩，果陣牛味同豬味都好濃郁，咬落口唔會覺得硬而係幾有肉汁，包既配料分別有蕃茄、薯餅、芝士片，仲有流心蛋！非常足料，大家食既時候要小心啲汁沿住張紙滴出黎！至於蝦肉漢堡就冇咩特別，建議主力試主打既豬牛薯堡，真係充滿驚喜，又唔太貴，100蚊。另外，小食方面，我覺得雞翼既味道都幾豐富同埋有層次感，酸中帶甜，亦有少許辣味，係一個唔錯既嘗試，幾新鮮；洋蔥圈脆得黎幾入味，可以呢排堂食唔係幾方便，要帶番屋企食，番到去已經冇咁脆。呢間會再幫襯，食物質素同埋服務態度都偏中上水平，真係唔錯！…Read More

今日同朋友想食扒，但又唔想食太貴，行過金雞廣場，朋友話有熟人介紹樓上一間新開張既扒房，幾高質，咁就試下啦！我就點左一份黑毛豬柳扒，大約係100蚊左右，肉質非常柔嫩！咬入口，嫩滑多汁，質感非常爽，味道亦有濃郁且新鮮既豬扒味，半肥瘦既肉質，既可滿足食客鐘意食肥啲既口味，亦唔會令人覺得太唔健康太油膩！同埋係冇筋，建議大家唔使點汁，因為已經好夠味。朋友就點左份醉海雞扒，個皮都煎到卜卜脆，以醉香汁作點缀意想不到地夾，係一個唔錯既嘗試！…Read More

今日黎到上環呢間蘇杭冰室試下佢啲午餐，點左份茄汁雞扒滑蛋飯，我覺得雞扒外皮爽脆有口感，雞肉味道香滑且鬆軟，滑蛋絲滑可口！58蚊黎講非常抵食，各位上環既打工仔平時諗唔到食咩都可以黎呢度食下！…Read More

麻辣烤魚配肉燥飯便宜但份量豐富、味道一般，辣味不足、魚塊質量亦平平無奇；反而肉燥飯異常好食，肉燥鬆軟入味！肉燥飯是必點！另外，亦可以加錢將餐飲轉台灣特色飲品，如珍珠奶茶。…Read More

岩先午餐去左呢一間食鰻魚炒滑蛋飯，佢個鰻魚好爽滑新鮮，入口即溶，非常高質！滑蛋亦恰到好處，唔會太水汪汪，唔會太熟，絲滑既口感體驗非常好，佢個飯仲有少量沙律伴菜，都算係幾健康。環境方面，餐廳空間偌大，裝修擺設都好精緻，座位唔會太迫，物理環境體驗都幾好！埋單都只不過係$60，係旺角番工既朋友，真係可以黎呢度試下呢一間高質餐廳！…Read More

今日去試左呢間好叉好味，係Openrice提前點外賣自取拎番公司食，可享有九折優惠！佢個太陽蛋非常好食，蛋漿鮮滑，雞皮又脆、雞肉好滑好鬆軟，加埋佢個柚香汁，配合菜飯食起來真係一絕！最難得係佢都只不過係52蚊，但雞多、飯多，味道有中上既質素，大家鐘意食叉雞飯既真係要去試下！仲可以儲印花然後換領飲品、小食同埋套餐飯！午市同同事一齊去買番黎，一次都儲左五六個印花，好快！…Read More

今日去到旺角呢間平民廉價日本食店，點左個七色當，$88！幾豐富，材料同質量一般，不過不失。由於我地係二人同行，我同朋友共消費超過$100，可以享有五折至七折既優惠點多4份小食，我地點左雞軟骨、軟殼蟹壽司、芝士炙燒三文魚，好平，埋單人均消費都係$120，服務幾好，但冇收服務費，呢啲先好！唔會濫收服務費，依家好多食店都收得好過份，咩服務都冇都照收！…Read More

今日來到旺角朗晴坊呢間中餐館食午餐，門面上以為係普通中式茶樓格局，估唔到啲餸菜極好味！點左兩餸飯，蜜糖雞翼鮮甜味美、極大隻、口感爽脆，而且有六隻咁多！另外，點左份回鍋肉，好少可咁惹味，質感好好！飯任添，涼菜任斟，仲有芒果布甸，咁都係$60！平到爛，極抵食！…Read More

呢間既烤魚好大條！點左份$299成條魚，勁多肉，勁豐富！唔怪得知咁貴一條啦，味道方面就正常，我地叫左小麻辣，但其實完全冇辣味（你當係譚仔十小辣既辣度），建議下次可以叫中辣！可能啲魚會入味啲。不過，我覺得佢間舖頭嚴重缺人手，我睇啲評論，佢果度半年前樓面得1個人、廚房1個人，到依家都仲係咁！一個人服侍哂廿幾個客，太忙了，都唔得閑理我地！…Read More

今日係藍田點左份上海酸辣湯韮菜鮮蝦水餃麵。我覺得佢啲食物不過不失，個湯都唔係幾濃郁，唔係特別好食。比較有深刻印象既係，環境方面，我覺得地板好滑、濕漉漉，而且好多食物雜碎，空間又比較細，員工係廚房行出黎行到成個地板都濕哂，環境體驗黎講都幾差，因為我本身我個人都比較有潔癖，所以頂唔順叫左外賣拎番屋企食，如果唔係諗住方便就腳就咁係現場食就算。而且，你會睇到啲設施同設備都比較破舊，雪櫃都生哂鏽、枱凳都好殘舊，比人個感覺唔係幾舒服。我諗冇咩特別都唔會去呢間食，唔多鐘意。…Read More

今日去到上環食，一般般，可以食得落肚既普通茶記今日去左上環呢間德記茶餐廳，叫左份兩餸飯外賣比自己拎番Office，今日點左份豆卜腩肉同埋一份菜，啲腩肉有小小鹹，豆卜幾爽口，都唔錯，味道正常吧，作為一間典型既茶記，過得去，主要係貪佢平（應該都好難係上環 / 中環搵到間係平過佢），$40既兩餸飯包埋湯都算幾豐富，適合經濟能力沒那麼高的食客去食！…Read More

今日去左呢間真心泰國菜館，點左份乾炒海鮮河粉。整體來說有7/10分，啲河粉好彈牙，成碟菜炒得非常有鑊氣，河粉炒得好好食，香味四溢！海鮮就一般啦，始終價錢才五十幾，都係冰鮮海鮮，但都算多料。另外，值得一提，午市是包飲料的，椰汁冰都唔使加錢，但都幾甜下。如果經過旺角，唔知食邊間，依間可以去試一次！…Read More

今日去到上環呢間非常出名既龍邦燒味，幾乎每日午餐時間都係排哂長龍，等外賣同埋堂食既人絡繹不絕，今日就來一試究竟。故意點左個切雞燒肉飯，份量非常多，蔥油、飯、燒味都極多，到最後食剩半個飯！$50幾蚊，切雞爽滑，但略嫌太多骨；燒肉就比較韌啲，啲燒肉皮都比較硬，冇咁好食。我覺得呢間最主要咁受歡迎都係因為平民餐廳，夠平、份量夠多、味道就一般般未係非常好。不過呢間野非常忙，忙既餐廳有個唔好既共通點就係：食物質素、顧客體驗比較差啲，收銀忙個不可交加，我地落單都要排隊等幾個字，落完單再等拎都要等起馬10分鐘；就算係打電話去，佢都係好耐都冇人接聽，就算有人接聽，都係接聽左後，要你再等5分鐘！所以建議11點半打去落單就最好。…Read More

一直都認為譚仔比譚仔三哥好食，湯底味道比較傳統正宗。我點左份重慶酸辣小辣腩肉魚腐米線，我覺得食辣湯一定要有魚腐！因為魚腐吸哂啲湯底既精華水份後，非常惹味，咬落去水份極豐富，加上魚腐濕左水果種獨特既質感，簡直係錦上添花。腩肉亦係不可多得，譚仔既腩肉一向以爽脆新鮮聞名，呢兩樣餸基本上係我每次叫譚仔都必點，湯底辣度及風味就視乎番食客自身既喜好了。…Read More