難得同朋友聚會，見最近有報導介紹麻神，睇相好似環境食物都幾正，但食過呢次就算請我都一定唔會再去，真係勁嬲！首先食物味道係不過不失，份量偏少，但去之前都知唔係平價邊爐路線，所以冇太介意。不過，食到中途，突然見到一隻曱甴喺我哋個位連住嗰幅牆上面行，直情就喺正我朋友隔籬，超級驚恐！我哋即刻叫職員幫我地捉隻曱甴，但佢哋捉完之後就冇為我哋作其他安排（如轉位），當時我哋心入面都少少不安但都照坐返，以為係偶一為之。點知15分鐘後，我聽到朋友叫咗出嚟，原來又出現另一隻曱甴，今次仲要係喺枱面，快速經過埋我哋啲餐具同杯！我哋嚇到即刻彈起身，急忙叫職員處理，職員處理咗曱甴之後就行開咗，然後我哋就呆企咗5分鐘以上。跟住就有個職員話幫我哋轉枱，但見完兩隻曱甴之後點會想再食，諗起都反胃！然後好快就有另一位職員就咁拎張單出嚟叫我哋埋單，而當時一句道歉一聲交代都冇！！有位自稱老闆嘅男人出現，然後用非常惡劣嘅態度話最多只可以俾88折我哋，仲話：「咁你哋想點啊？你哋都食到7788啦，咁你第一次出現曱甴嗰陣仲食？嗰時咪可以幫你waive哂成張單囉」我哋勁一頭霧水，依家係你再出現第二隻曱甴，講到我哋唔想俾錢咁。呢個負責人雖然有口講過唔好意思，但態度毫無歉意，仲責怪返我哋！講咗一陣，呢位自稱負責人嘅男人，忽然話自己唔係餐廳老闆，只係路過，叫咗個普通職員同我哋處理。然後就有一個自稱負責人嘅女人出黎，開頭又係用無禮態度問我哋想點，仲話我地食咗野就係要俾錢。其實我地從來冇打算唔俾錢，我哋一直係想要真誠嘅道歉同交代，於是我哋就提出咗兩點要求：1）要負責人嘅卡片證明自己係負責人嘅身份，2）書面道歉。但最後無論我哋點堅持，佢哋呢兩樣都冇俾我哋，只係肯留自己個電話，同口頭道歉。其間無啦啦又多一個自稱路過嘅女人出黎，又話自己係食客又話係佢哋啲朋友，突然又話你都可以當我係負責人，咩想幫我地解決件事，又不斷話幫我地報警呀，跟住又話我地騷擾到佢，而我哋一直只係平靜咁傾喺度講道理同要求道歉。總之成間餐廳無個肯承擔嘅負責人（個女負責人後來有態度轉好），但就勁多話自己路過嘅人係到問我地想點，成齣鬧劇咁，睇得出呢間餐廳管理都非常有問題。其實我無諗過一間餐廳出現曱甴，仲要諉過於人，實在太離譜。呢餐飯搞到我朋友好唔開心好驚，仲浪費咗我哋成個鐘，以呢個價錢換黎咁嘅衛生、服務、食物質素，真係好離譜！免費都唔會再去！…Read More
