lalalalac's Profile

呢間熱狗店，好多年前已經幫襯過幾乎去親西九都係食佢但今次食完之後，真係零意慾再幫襯。趁住聖誕去行西九聖誕小鎮，大約晚上8點左右，就去買野食出外邊啲室外空間食。我揀左比熊犬($78)，一打開個盒，個熱狗包已經水平分開咗兩截，變左佢包-腸-包狀態，食起上黎已經好唔方便。個熱狗包完全係微波爐叮熱咁，叮都算，仲要叮到過左火，食落個包係韌既。真係宜家家俬熱狗個包都好食過，軟熟過佢。法蘭克福腸方面冇咩好講，都係大路野。但其實可以有心啲，煎香少少先夾落個包到都得掛。都係叮既。呢個包唯一值得讚既係上面個舊粟米配料。同行友人叫左蠟腸狗($78)，包一樣的差。唔知係咪因為就收工，層肉醬好薄，好似夾硬刮埋淨低既肉醬就算咁。另外加左$28，要左客薯條。份量少，冇調味，凍冰冰，完全係隔夜薯條咁，但連翻炸返熱都廢事。反而西班牙油炸鬼配雪糕($68)有驚喜西班牙油炸鬼好脆口，肉桂沙糖包住成條油炸鬼，好好食。點埋雪糕，簡直係絕配。另外仲嗌左杯Honey Lime Black tea ($48)，疑似跟熱狗嗌平左$24野似都好飲，清清地，好解膩。我同友人都好喜歡。雖然話有好食既野，但呢間鋪頭點都叫做以熱狗為主的店吧，連自己主力既餐點都搞唔掂，真係令人試一次就係最後一次。…Read More

星期日同朋友聚會，睇左報導介紹，再加上比佢既門面吸引住，就決定一試。到達時係大約下午1點鐘，cafe內只有幾檯客人，簡約的設計再加大玻璃窗，一步入cafe就有種舒服的感覺。Cafe以半自助形式經營，客人要自行到收銀處點餐，然後再有staff送餐。因為佢營業時間係早上9點，11:30前都有早餐供應，有機會下次想試下😆講返今次，我同朋友兩人，叫左期間限定的冬陰功海鮮薄餅、手撕豬肉漢堡配薯條、開心果修女泡芙、homemade lemonade 同埋matcha latte。🌟 手撕豬肉漢堡配薯條因為想食薯條而揀左佢，薯條好味，個醬有啲似檸檬蛋黃醬，用黎點薯條都好好味。漢堡好足料，豬肉餡調味惹味，但唔會太咸。不過建議上菜後要盡快食，因為豬肉餡料比較濕身，如果太遲食，會浸濕底層的麵包，口感就會變差。🌟冬陰功海鮮pizza好味🤩冬陰功味濃郁，海鮮主要係魷魚同蝦，成件事好夾。薄餅底，兩個女仔都可以輕鬆KO。冬陰功愛好者必試！🌟開心果修女泡芙超！好！食！十分之推介。外形靚就唔在講，外層係曲奇泡芙，十分香脆，而且泡芙皮相當薄，相對忌廉份量很多。雙層泡芙入邊係原味忌廉，感覺相對偏甜。但下層泡芙味道實在驚艷。薄薄嘅泡芙皮外層，包住滿滿嘅開心果醬忌廉，開心果味濃厚，相對之下有冇咁甜。為呢一餐畫上完美句號😌🌟homemade lemonade & matcha latte飲品質素係正常cafe質素，但個人幾欣賞佢既homemade lemonade，酸味同甜味既平衡剛剛好。用黎配薯條同pizza，很是絕配。整體來說，食物同飲品質素都不俗，係價錢小小偏貴。但係係一間難得喺星期日都唔會限時既cafe，環境坐得舒服，枱同枱之間的距離都很ok~所以會再encore！希望佢地可以一直保持質素啦～…Read More

同朋友去試呢間cafe百五蚊個便當值唔值就見人見智我地仲嗌多左個炸雞槌但重點係想講個服務。我地食到咁上下就想加個伯爵茶班㦸但服務員居然話，因為要還枱，你地應該趕唔切食所以唔比我地嗌。咁我地都知80分鐘要交枱，但係服務員可以係客人坐低既時候提醒佢地預返等野食既時間，可以預先嗌定甜品，唔係客人食到一半想加單就話唔可以，勁奇怪，其他餐廳都唔會咁，都會有限時，但唔會係中途加單都唔會比囉，所以真係唔會再幫襯😡…Read More

今日同屋企人去新蒲崗開餐。剛好經過此小店，正駐足觀看餐牌，店主就走出黎，強調小店菜色都不添加味精。正合爸爸口味，所以就入左呢間食。我地叫左2個套餐+1碟餃子套餐包白飯，油菜，湯及飲品咖哩麵包雞（$78）其實即係農夫包，雞件嫩滑，咖哩味道也不俗，唔似出面食咖哩一浸油係面。面包表面亦焗得很脆。唯獨是咖哩汁略嫌有點稀。密椒薯仔牛柳粒（$78）👍🏼👍🏼👍🏼👍🏼呢個超好食。牛柳粒一d都唔肥，而薯仔更是精華所在。粒粒都煎到焦香，黑椒均勻地沾在薯仔表面。食到停唔到口。地道山東餃子（$58）像是手工包的，入面是韮菜瘦肉餡。配浙醋，清清地。此店價錢相宜，就算烚碟油菜都唔馬虎。跟餐送的都是老火湯。南瓜也被煲成蓉。老闆也很好人，會問問客人意見。店子小小，人情味卻很濃厚。有機會會再去光顧的～希望水準可以保持下去。PS.本來冇打算寫食評，所以餸菜都冇影相。從來在openrice都很少寫食評，但真心覺得此小店不錯，很想推薦給大家，讓多d人去光顧，讓小店不至於折服於昂貴鋪租之下。大家去開個頭就試下啦！…Read More

第一次開飯食評獻比你地。呢間野第二次黎食。本來諗住食樓下間韓式邊爐，但同行的其中一個友人唔食牛，加上見到呢間野7點前入坐有四人同行一人免費，所以就上去食啦。去到冇人等位，我地5個人都坐到6人坐位。野食方面，以放題黎講真係算唔錯，壽司細細件，唔會話用飯質飽你。係壽司飯唔ok,煲得太爛。所有肉都冇餣過，但枱面有鹽同胡椒比你調味。上食物速度都冇之前咁差。但d服務態度真心不濟。話說我地點左三文魚刺身，一上枱個樣有d瘀黑，食落仲有d腥，咁我同同行友人就放塊刺身上鐵板度燒燒個面先食。燒左幾塊之後，有個唔知部長定老闆既男人行埋黎，話：「嗱，你地唔好再放d刺身落去燒呀下」咁我估係怕整燶塊鐵板痴底之類。咁就講左句：「唔好意思呀吓，驚痴底係咪呀。」之後個男人話，「唔係驚痴底，係你咁燒，嘥左我d野，再見到就唔出刺身比你地。張紙寫左架，你地自己睇返」嘩，呢d咩態度呀？你d腥既三文魚刺身又有幾靚呀。仲要收加一服務費，但咩都係自助咁濟。如果要貼錢買難受，我寧願比貴d唔洗受氣。可以既話， 服務直頭想比負分。…Read More