快樂哥哥's Profile

最近朋友極力推薦荃灣一間西餐廳，佢話呢度裝修色彩好豐富，地方夠大環境舒適，而且食物質素非常有保證，所以趁住喺附近做嘢就一於過黎試下！酥脆雞翼拼盤打開餐牌就俾呢個有鹹蛋黃、芥末蜜糖及明太子口味的酥脆雞翼拼盤吸引住，作為雞翼愛好者，呢個拼盤真係值得讚不絕口，尤其係鹹蛋黃口味，香脆的雞翼配上鹹香的蛋黃，好食到停唔到口。蘭王蛋松露煙腩卡邦尼QQ卷卷意粉一直都好想食呢一種QQ意粉，最穩陣梗係選擇卡邦尼口味啦，雖然係基本口味，但係食落去絕不普通，因為佢主打配上日本蘭王雞蛋，在撈落去幼滑的意粉，簡直係天作之合！法式香草烤春雞配薯菜呢個烤春雞超級無敵滑，外皮金黃酥脆，入邊充滿肉汁，又唔會好油膩，非常好食呀！黑松露雪山芝士炸薯條呢個黑松露薯條真係含「菌」量極高！薯條上面刨咗超級多新鮮黑松露，食落非常香濃美味！乳酸巨峰提子梳打及蜜蜂柚子檸檬梳打飲品方面就嗌咗梳打，兩種飲品都非常適合夏天，冰冰涼涼、酸酸甜甜，夠晒透心涼呀！…Read More

今日星期三早放，黎到元朗老掌櫃食佢地出名既北京填鴨同酸菜魚，仲叫左個三鮮餃子。可能時間還早，餐廳唔算好多人，職員俾我地選擇坐位，兩個人坐四人檯。一來坐得舒服，二來野食到哂都唔逼。一開始入黑成間餐廳勁快坐到爆哂😮酸菜魚同北京填鴨最先到，酸菜魚不嬲係我既最愛，今次叫左酸菜鴛鴦（魚同牛肉雙拼），配菜有豆卜同芽菜，牛肉質地柔軟嫩滑，愈食愈入味，湯汁濃郁，每一啖都好滿足。北京填鴨（半隻）配搭既粉皮有廿塊左右，鴨肉都幾嫩滑，鴨皮就算食左一陣都仲係好脆，不過兩個人食既份量太多，最尾都食唔哂😂三鮮餃子餃子餡有蝦、豬肉同韭菜，口感好豐富。雖然係碟上，但係餃子肉汁都好充足，要小心食唔係會爆啲汁出來😂…Read More

最近睇得韓劇太多，好想食返啲韓國嘢，所以收工決定同朋友嚟尖沙咀嘅韓國餐廳食飯，揀咗幾間，最終決定呢間韓國餐廳，見到出邊好多人排隊，一定係有品質保證㗎啦！試了幾道菜，真係超好味！醬油蒜蓉炸雞炸雞外脆內嫩，醬油和蒜蓉的味道融合得剛剛好，食落非常脆口，雞肉亦都好嫩滑！泡菜煎餅這個煎餅口感非常棒，外脆內軟，泡菜的酸辣味讓整個煎餅更加開胃，配上醬汁更是完美。芝士泡菜炒飯這道炒飯真是驚喜，芝士的濃郁和泡菜的辛辣搭配得很好，吃一口就忍不住想再來一口，芝士超級多，簡直大愛！豆腐海鮮湯湯品清淡又鮮美，豆腐滑嫩，海鮮的鮮味讓整碗湯都好好飲，真係正到爆…Read More

最近成日成日落雨搞到唔知去邊度好，一於試吓尋覓啲靚Cafe好好地氹吓自己！見呢間Cafe個門面好靚好有特色，出邊仲有好多泊車位，岩哂有揸車嘅情侶過黎拍拖呀！煙燻三文魚全日早餐嚟Cafe打頭炮，梗係嗌返個All Day Breakfast食先啦，見到蛋咁靚就知呢一個Breakfast唔太差，個煙肉都煎得好香！煙鴨胸卡邦尼呢個意粉面頭煙鴨胸非常好食，煎得焦香味濃，意粉都好Creamy！黑松露芝士薯條本身好鍾意食黑松露，所以專登嗌返個黑松露薯條食下，薯條係即叫即炸，不過炸得有少少乾，好彩黑松露夠香加番分！Oreo鮮奶咖啡、香橙咖啡飲品方面，我哋嗌咗兩杯凍飲，想讚一讚Oreo鮮奶咖啡，味道唔會太甜，成杯嘢入邊勁多Oreo同埋有啲焦糖嘅味道，甜甜甜鹹鹹咁非常之夾！…Read More

最近去了一趟泰瀛，這家餐廳的泰國料理讓我驚艷不已。😍😍😍泰媽媽蟹肉煎蛋這道蟹肉煎蛋真是無法抗拒！蟹肉鮮嫩，煎蛋外脆內軟，每一口都充滿海鮮的鮮味，還帶著淡淡的香氣，吃得讓人心情愉悅。菠蘿海鮮炒飯炒飯的顏色鮮亮，菠蘿的甜與海鮮的鮮味相得益彰。飯粒分明，炒得剛好，還帶著菠蘿的清香，讓人忍不住多吃幾口，特別適合夏天的清新感。麵包咖喱軟殼蟹這道菜視覺上就很吸引，軟殼蟹炸得酥脆，咖喱醬香濃卻不過於辛辣，搭配著香脆的麵包，口感絕佳，讓人一口接一口，根本停不下來！蒜蓉包蒜蓉包外脆內軟，蒜香四溢，簡直是完美的開胃小食。搭配著一杯清茶，讓人感受到滿滿的幸福感，絕對不能錯過！街邊燒牛肉這道燒牛肉色澤誘人，肉質鮮嫩多汁，特製的醬汁讓每一口都充滿風味，配上一些小菜，非常下飯，讓人忍不住想再點一份。排檔海鮮炒粉絲最後的排檔海鮮炒粉絲，粉絲吸滿了海鮮的鮮味，口感滑順，搭配著各種海鮮，讓人感受到海的味道，十分滿足。總的來說，泰瀛的每一道菜都讓我感受到泰國料理的獨特魅力，絕對值得再來光顧！如果你也喜歡泰國菜，千萬不要錯過這裡的美味！…Read More

夏天嚟到就好想食榴槤，但係出去買又好貴，所以想搵間餐廳可以任食榴槤。上網搵有邊度可以任食榴槤嘅晚餐，俾我search到天后有一間，榴槤加燒肉放題任食。因為我細佬好鍾意食肉，所以放題食燒肉今次我捉埋佢去陪我。間餐廳喺天后地鐵站，行大概5分鐘就搵到，好方便嘅佢叫做燒肉屋，見到佢最近有個promotion係任食榴槤同埋燒肉🥰。間餐廳內籠充滿日式嘅風情，掛住好多嘅燈飾，牆上亦都有啲日本風景畫，好有日本居酒屋嘅感覺，加上黃黃地色嘅燈，真係好有feel。店員一開始就遞上幾款前菜，有泡菜海帶芽菜仲有麻醬牛舌等等，全部都係開胃菜❤️。我仲叫咗個泰式生蝦，佢係刺身級別，加埋個泰式醬汁超級好食開胃。細佬話超級肚餓要食好多肉，我哋睇睇任食個Menu，唔錯喎，好多選擇，有好多款嘅肉類亦都有海鮮仲有啲炸物。細佬叫咗佢最愛嘅牛舌心，澳洲和牛，仲有我最愛嘅海鮮帆立貝。上到枱好靚仔，睇落好新鮮啲肉亦都係鮮紅色唔係出面變曬色既肉😎牛舌心好厚身，燒完之後好Juicy好好食，澳洲和牛佢可以揀唔同嘅汁今次我哋揀咗蔥蒜，燒出嚟加埋個蔥蒜汁超級夾，再點埋餐廳特製嗰幾款醬汁，真係要添多幾碗飯先得。帆立貝都係好大隻，佢另外加多一小嚿牛油，燒出嚟特別香，燒完入面仲係有好多汁，好正。細佬話食牛咁悶？梗係叫五花肉啦，佢叫咗個果汁五花肉，又叫咗個韓汁五花肉，個衰仔真係食肉獸嚟呢兩份五花肉都超級大份，要用鉸剪剪開細細舊嚟燒先有風味。兩款醬汁嘅五花肉都各有特色，果汁嗰款入口比較甜韓汁嗰款帶少少蒜味同埋辣味食落都好惹味，夾埋生蒜片同埋生菜食，好似去咗韓燒咁正。作為榴槤控嘅我，叫咗佢個榴槤薄餅Trytry, 個薄餅係要自己燒嘅，佢另外配埋一嚿榴槤醬俾你茶喺個薄餅上面食，成件事好有趣個薄餅熱辣辣加埋個凍嘅榴槤醬，好正，出面未試過咁樣食法。我哋另外又叫咗雞軟骨，豬頸肉呢幾款香口嘅嘢，肥細佬話一定要叫碗飯先似樣。佢叫咗個紫菜生蛋飯食，佢話配埋啲燒肉係超級夾嘅好好食添。最後我哋叫咗榴槤嚟食，佢係雪到凍嘅榴槤肉，好甜好香好似食緊雪糕咁，我叫咗好多round食，覺得值回票價😝最後仲食咗雪糕作總結，餐廳係任食雪糕同埋任攞飲品嘅，但係因為實在太飽，雪糕食咗一杯就夠了。三百幾蚊一個人任食榴槤同埋靚肉，好抵，啱晒食肉獸過嚟食，佢啲肉係靚肉，而且仲有榴槤任食，真係值回票價，一定會encore！…Read More

今日放左工約左老公去炮台山食意大利野，因為見到網上面話佢啲手工pizza好出名😙去到炮台山站b出口向右行大概5分鐘就到，都幾易搵。佢門面幾靚仲有個大玻璃窗展示左啲牛肉同埋pizza出黎，望落都幾靚仔。一入到去餐廳好闊落，牆上面畫咗好多油畫，餐廳個裝修亦都好有特色，燈光又暗暗地咁幾有情調。嚟到呢度梗係要食手工pizza啦，店員一嚟到就俾咗set牛油麵包我哋，個麵包質感都幾濕潤配牛油食好香👍跟住我哋叫咗一個四道菜嘅set，前菜要咗個牛肉丸，主菜要咗個牛扒，手工pizza要咗辣牛肉pizza，甜品嗌咗兩球雲呢拿雪糕，但由於我太肚餓嘅關係，另外再加多咗個薯條🤣自製安格斯牛肉丸果汁超級香，好多香草同埋一啲茄汁嘅配料，溝出嚟嗰個味道好夾個牛肉丸，我仲拎埋佢個麵包嚟掂啲汁食超級match 。辣牛肉pizza呢個用炭火焗出嚟嘅pizza，好鬆軟，上面鋪咗茄醬芝士同埋啲辣牛肉，食落少少辣好惹味，牛肉亦都好香，唔知係咪炭火焗嘅關係食落係特別鬆脆同埋香口。我係第一次食到呢個味道，出面都食唔到，好食😋薯條佢俾咗成筒嘅份量我哋，超級抵食，而且全部都炸得好香脆，熱辣辣咁樣上。我同老公兩個人都食唔晒，份量勁多。西冷牛扒我哋要咗七成熟，牛肉好嫩口亦都好香口味，佢係用鐵板咁樣上嚟，見到仲係煎緊咁嘅狀態，熱辣辣好香口。甜品雪糕前面嗰幾對菜已經食到超級飽，但係女人又另一個胃就係甜品。本身想食Tiramisu，但係怕咖啡會搞到失眠，所以叫咗雲呢拿雪糕，雪糕有兩球，我同老公一人一球唔使爭，正常發揮好食👍重雲呢拿味嘅。整體嚟講，呢間嘢嘅環境唔錯，食物質素亦都有返咁上下，性價比幾高，下次會再encore。…Read More

今日星期一難得放假，獎勵自己食餐好，朋友話食番之前食過既一間好食既打邊爐。坐低，可以先揀火鍋鍋底，總共有18款選擇，包括有烤魚、雞煲同火鍋湯底任君選擇。我地今次就揀左酸菜魚鍋底小辣，一上菜嚇親，勁大盤，酸菜魚勁入味！食完呢個鍋底已經飽左一半😆食到個舌頭開始辣，去自助區拎飲品，有打邊爐必備啤酒任飲、汽水同埋有特式飲品，可以逐樣逐試，最有印象係佢既仙草紅豆冰，勁多仙草。建議唔可以一來就飲，唔係好快就會好飽，仲有佢嘅手打檸檬茶，好香好好飲。再掃埋自助區有咩野食先，有蜆、蝦、魷魚、蠔。仲有好少見既蟶子，食落冇沙唔錯👍🏻拎埋炸魚皮同響鈴就番去繼續博鬥。每檯仲有送頂級牛板腱，入口即溶，一定要推介去啲手切牛肉，牛味好濃，好正！其他配料都好食，特別推薦鵝腸 、牛柏葉 、水魷 皇帝菜係打邊爐必然要食（私心😂），仲有好多各種款式嘅丸最後仲有生果同雪糕（有好多種唔同味道）我地一人食左三杯，總括呢間要再搵朋友來食，價錢相對比較平民化，下次要試下佢既藥膳雞煲補一補！😜…Read More

早前同朋友返咗大陸食湘菜，食完真係念念不忘，趁今日假期，約朋友去西環呢間餐廳食湘菜，好彩時間尚早，好快有位坐，我哋即刻打開餐牌，見到唔同款式真係花多眼亂。由於太肚餓嘅關係，我哋都決定嗌一啲可以送到飯嘅小菜。小炒黃牛肉呢度菜簡直咸香微甜，牛肉鮮嫩多汁，同小炒醬汁非常配合。醬汁有鹹味同埋鮮味，非常平衡，好有鑊氣嘅一道菜式。拆骨肉炒荷包蛋濃郁嘅蛋黃同鹹香嘅肉結合，令人食指大動，口感非常豐富，直頭想叫多兩碗白飯！乾煸四季豆四季豆煮到恰到好處，保留咗微辣嘅脆感，同時又有少少煙熏味同埋略帶辛辣嘅味道，非常惹味。紅糖發糕食咗咁多嘢點少得甜品，呢個甜品為呢度飯畫上香甜而蓬鬆嘅句號。食落既口感好好，唔會太甜既感覺。總結呢間餐廳非常值得推介。…Read More

難得星期六放假，一早起身去整頭髮，整完再打俾老公叫佢出嚟同我食晏晝飯。由於電髮都需時五個鐘，我連早餐都冇食，真係餓到就嚟暈低。我哋喺西環都唔知有咩好食，經過見到一間泰國嘢叫做太誇張，由於太肚餓嘅關係唔使諗即刻入去睇吓有咩食。入到去見到啲Staff似係泰國人，呢幾年太過咁危險我都好多年冇去過曼谷啊見到呢啲泰國人嘅面孔，令我好懷念曼谷嘅感覺🥹現場環境氣氛舒服，牆上掛咗好多嘅裝飾，太肚餓啦，即刻打開Menu睇吓食咩先。我哋兩條友叫咗勁多嘢食，但係每一樣都冇令我哋失望，份量大大份又好食。冬陰功湯天氣凍凍地，好想飲碗熱湯，冬陰功湯裏面有好多嘅菇類，亦都有兩隻大蝦好足料，湯頭偏甜比較適合香港人嘅口味。辣椒高炒青口份量闊綽，有成7隻，好香好惹味，青口粒粒都脹卜卜，亦都好新鮮好好食。軟殼蟹農夫包一上到嚟見到佢個份量好大好誇張🤣啲軟殼蟹悶到就快要瀉咁滯，個農夫包仲要係焗過，點埋呢啲軟殼蟹同埋咖喱汁，味道好夾， Creamy嘅醬汁加軟殼蟹肉配脆身嘅農夫包，好好食蝦膏炒飯炒飯炒得好乾身，同時亦都好足料好有蝦膏嘅香味，有好幾隻大蝦食落好爽脆，肉鬆份量亦都好多甜甜地配個炒飯食好開胃串燒雞豬牛各二，我同老公都分唔清邊一款係牛肉，因為全部都好Juicy好嫩滑，而且佢唔係一般配沙嗲醬咁簡單，佢係有個特調嘅醬汁，點落個串燒度食好fresh好解膩，串燒本身肉汁好多，唔會好似我哋平時食嗰啲串燒燒到乾晒水咁，抵讚食到最後，我同老公都飽到反艇，啲嘢好好食之餘，個老闆出手都好闊綽份量真係大，價錢亦都好相宜，下次一定會帶埋小朋友過嚟食晚飯。…Read More

今日難得早咗收工，決定同朋友食餐好嘅，之前嚟過MegaBox呢間餐廳，經過見到時間尚早，仲未係好多人嘅時候，決定揀個靚位坐低慢慢食。一坐低已經見到一個眼花撩亂嘅餐牌，各式各樣嘅食物全部都係我最愛，由於我有選擇困難症，朋友好快已經幫我決定好了。牛油果香芒大蝦沙律一開始梗係要食個沙律先啦，我最欣賞就係佢個芒果同埋蝦嘅份量都唔少，芒果酸酸地好開胃，冇諗過原來同牛油果咁夾，而且最欣賞佢個醬汁酸酸甜甜，令到我哋食唔停口。招牌手撕燒烤豬肉三文治我記得呢個手撕豬肉之前食過，好欣賞佢個醬汁，同啲豬肉好夾，而且豬肉亦都唔會好鞋，另外佢個三文治真係好好食呀，而且配菜有大量沙律菜同埋大量薯條，性價比極高。蒜辣欖油大蜆意粉每次去西餐廳食嘢，一定會點嘅蜆肉意粉，好鍾意佢個橄欖油，食嘅時候，每條意粉都非常掛汁，好香蒜味，而且啲顯大大隻，好多肉。份量亦都唔少㗎，誠意推介！…Read More

趁今日happy Friday , 梗係要收工之後要食餐好啦，今日收工朋友約咗我喺荃灣食飯，朋友介紹一間火鍋餐廳，之前食過大推！我哋一坐低，食完好快為我哋介紹，餐牌上面有好多款式嘅鍋物，由於太肚餓嘅關係，我哋決定食麻辣雞煲。職員未拎上雞煲之前，我哋喺自助區行咗一圈，好多唔同種類嘅丸類、菜類、仲有好少見嘅海鮮都有，包括有蝦、魷魚、蜆！簡直非常罕見！講返雞煲先，一上菜嘅時候非常香噴噴，而且雞肉非常之多，啱晒我呢啲食肉獸。好快我同朋友已經清咗成個雞煲，每一隻雞都好嫩滑。食完雞煲之後，可以叫職員加湯，之後我哋就可以落返打邊爐嘅食物，呢個餐送咗個特級牛版腱，一落湯即刻好快熟，食落去入口即溶。其他肉類方面，自助區都有得自己攞，有黑毛豬、手切牛仲有肥牛。其他配菜我都好滿意，尤其是牛柏葉，非常爽口彈牙，海鮮亦都好新鮮，最鍾意就係食蜆同埋蠔，煮得耐都唔會縮水。最後要講下甜品，餐廳提供唔同味道嘅雪糕，就算幾飽我都食咗兩碗！整體嚟講呢間餐廳會有下次。…Read More

期待咗好耐，約埋朋友一齊去食荃灣大鴻輝嘅御滿屋，現場環境寬敞舒適，食物方面亦好有質素👍店員亦好有禮貌，上菜速度亦都超快！刺身、壽司、手卷好新鮮出色：整個刺身拼盤都非常新鮮，有多款刺身選擇：三文魚腩（好肥美）、油甘魚、赤蝦和長腳蟹等。海膽手卷好creamy，入口即溶，超高質。火炙壽司亦都係必食推介，例如火炙三文魚及左口魚壽司真係回味無窮！燒物及天婦羅恰到好處：非常推薦鹽燒牛舌（非常嫩滑）、雞軟骨串、西京燒比目魚。所有燒物的都能夠鎖住肉汁，肉質鮮嫩多汁。天婦羅炸漿夠薄夠脆，能夠保持著食材的鮮味，尤其推介大蝦天婦羅，肉質豐盈，過足口癮。鐵板及小食令人眼前一亮：冷鮑魚有彈性咬口，配酸辣醬汁，非常醒胃，可中和油膩。鐵板紐西蘭西冷牛扒經過烹調後保持了肉質的嫩滑，配上黑椒汁，非常惹味。自助吧選擇多元化：自助吧供應多款美食，包括炸薯條、麻辣豬耳、香炸雞塊及燜牛腩等，應有盡有。仲有各種飲料及甜品，特飲美常好飲，非常適合炎炎夏日解渴，還有海鹽軟雪糕，透心涼好味。仲有各款蛋糕甜品，一定可以滿足你嘅口味。總結，呢間日式放題非常高質！餐廳提供非常多款式，且高品質的食物選擇，加上地理位置方便，鄰近荃灣市中心，係一間唔可以錯過嘅餐廳選擇！…Read More

最近工作壓力好大，咁岩今日老公又無揸車，就約咗佢一齊去旺角酒吧街，呢間餐廳我哋都成日去飲酒，至在氣氛夠又好坐！天多尼雞肉自家手打薄餅呢個Pizza好足料，有拉絲芝士配上啖啖雞肉，兩隻夾埋簡直天衣無縫，醬汁甜甜地，唔會好膩，兩個人食一個都冇問題呀！西班牙雞肉辣肉腸燴飯呢個燴飯顏色鮮豔令人食慾大開，而且當中雞肉及辣肉腸的分量都好充足，燴飯食落去口感濕潤，唔會好乾身，味道清新不油膩，非常有西班牙的風味！招牌炸雞翼呢個炸雞翼做下酒菜就一流啦，食落香脆可口，再配上酸酸甜甜嘅茄汁醬，更加能夠將炸雞翼鮮味提升。黑松露炸薯條下酒菜又點少得炸薯條呢，呢度嘅黑松露嘅供應完全唔孤寒，薯條面頭灑滿黑松露，再配埋松露醬食，香氣奢華，每吃一口都充斥住濃厚的黑松露香氣！非常好食！…Read More

朋友話想荃灣行下，因為個邊都好多好野食，行經見到呢間格局中式嘅餐廳覺得好似幾有特色又幾靚就入去試下啦！麻辣口水雞配白飯&時令雞湯本人好愛麻辣，無辣不歡，見到麻辣口水雞當然唔會放過啦，一上菜就見到佢放面嘅配料顏色比較淺色，以為會唔夠香辣，點知食落係好好味好適合送飯！而口水雞我就轉左雞脾肉，所以食落啖啖肉又新鮮，非常滿意呀！時令雞湯就係椰子雞湯，飲落清甜！星馬炸雞飯好欣賞呢個咖哩汁，佢係偏辣而唔係偏甜嘅咖哩，好適合我同朋友嘅口味，而且炸雞食落脆口，脆漿亦唔會過厚岩岩好，好有誠意！椰汁斑斕糕食完飯點小得飯後甜品，斑斕一上碟就係熱辣，係新鮮蒸起嘅糕點，食落幾軟糯，唔會好甜，但如果重斑斕味就更佳，係好適合長者黎食嘅甜品。馬來拉茶拉茶唔會死甜，有帶茶香，如果愛好港式奶茶嘅朋友就應該會好鍾意啦！…Read More