Angry Meow's Profile

好耐冇來過呢度，對呢度印象有啲模糊。原來最近新裝修完，的確係靚左。野食方面，下午茶點心來來去去都係那幾樣，冇乜持別，最爆炸性的竟然是三十幾蚊碗的燒鵝瀨粉，啲鵝份量竟然多過美心Mx，抵食，不過賣相都係貌不驚人，所以我都係冇影相。反而要講下啲甜品頗為OK，個姜汁湯丸啲皮又薄又彈，如果湯丸大粒啲，芝麻餡多啲，個湯薑味濃啲就仲正；個蕃薯崧子糕好好好好好食，夠煙韌，軟腍度適中，表面應該掃左桂花糖先蒸（個人猜測，錯左唔好話我），甜得來帶香味，必吃。服務呢，典型美心，待客基本禮貌係有（同事間溝通時則不論性別都用好多助語詞），但唔好期望熱情殷勤，老字號係咁架啦。…Read More

食個early dinner（定係late late afternoon tea？），望住日落食好西係好正。先來小食，Buffalo Wings同Calamari好味（如果作為一間brewhouse呢兩樣送酒招牌菜都唔好食又真係講唔通…），嗌多個Parmesan Fries，呢個堅好食，芝士味夠濃，新鮮炸起，黎呢度記得嗌。兩條友食一個主菜就夠啦，點左個Ribeye，五成熟，上檯後冇話自己繼續熟到七成，ok喎，伴碟啲薯條，唔係唔好食，但sorry真係唔係Parmesan Fries對手。呢度係一間brewhouse，但啲酒我唔識欣賞，自家Ale係好飲，但勁快上腦，自問酒量唔差都feel到；杯champagne，係，我認fancy所以嗌左杯，但冇乜特別，你可以唔嗌。總括而言，食物好過酒，有啲反高潮。…Read More

西環friend介紹，話呢間係文青至愛。作為一個過期過期過期過期過期掹車邊文青，行過路過就入去試下。第一眼，環境係唔錯，有啲小清新感覺。西環friend話一定要試個招牌西瓜蛋糕，好，就試下，加多杯凍latte。件西瓜蛋糕賣相固然靚（雖然我都同時覺得幾十蚊一件非酒店餅房蛋糕真係好貴），最面層士多啤梨啫喱鋪住玫瑰花瓣，少女見到當然會尖叫兼相機食先。其中一層係大大塊西瓜肉，又真係冇欺場喎。但最欣賞係中間的玫瑰忌廉同個餅底，大家如果食呢款蛋糕要留意下。杯latte，賣相唔係特別靚，但啡味好夠濃，唔係一杯有咖啡味的奶，我覺得好足料囉，收貨（但again我又係覺得好貴，雖然算大杯）。服務呢，唔係特別殷勤，仲有少少cool，不過而家後生仔女係咁架啦，都總算有禮貌。西環friend話做左會員，因為啲熟食好好味，我都想試下，不過我仲未收到張會員咭or入會email，電話都冇個，睇黎要追一追，after sales呢環真係要改善一下。…Read More

呢度收費唔平，所以醒目的話一定要做餐飲會員，恆常有折，有時仲會有突擊優惠。講返今次食個魚翅鮑魚餐啲食物。首先上雪嶺餐鮑，叉燒餡，焗得幾好，係食嗰陣小心啲糖粉跌到周圍都係，最後dun一dun先食。叉燒燒肉拼盤，每人每樣兩件，叉燒燒得幾好，唔會乾爭爭，仲有肉汁；燒肉皮脆，係脂肪層比較厚，不過肉都多，點左芥辣就唔會覺得漏。仲有一籠蝦餃燒賣，燒賣冇乜特別，不過老實講燒賣好難會難食，right？啲蝦餃好食，彈牙，我唔知係唔係鮮蝦，總之唔會話有雪味 ，最重要塊皮薄得來唔穿。肉絲翅，啲翅唔算粗，不過起碼唔使摷就咁睇都睇得到，合格。松露醬炒彩椒雲耳西芹帶子，呢碟真係好味，好香，帶子煎得啱啱好。冬菇海參鮑魚，冬菇大隻，唔韌；海參夠淋，唔會似食橡膠；鮑魚老實講比較細隻，不會煨得夠火候，入味，都夠鮑魚味，ok。肘子白菜湯，啲湯鹹左啲，好在塊金華火腿冇膻味，啲白菜仔都算嫩，冇渣。最後個甜品係芒果布甸，唔太酸唔太甜，多芒果肉，好食，算係個完美作結。總括而言，有會員咭的話，用來請客唔錯，份量剛剛好，記得打電話預訂就得。…Read More

同friend慶生，都唔係第一次黎，因為呢度訂座時講明慶生，到時order埋甜品，啲staff會在碟上唧返你個friend個名祝佢Happy Birthday，仲會有一張即影即有polaroid，係Chop House呢度賣點。食物方面，個炸魷魚好味（講真好難唔好食），但份量真係太細，要送酒起碼要點兩碟，性價比差少少。招牌沙律配烤雞真心好味，因為個蜜糖汁真係好得。炸蕃薯條係呢度招牌菜，食過幾次，老實講水準比較飄忽，今次幾好食，建議點多啲醬會食得出多啲蕃薯本身甜味。個炸薯粒眾人一致同意好食。好食過個蕃薯條。如果你唔mind個賣相冇乜特別的話。五成熟12安士rib eye上檯時個賣相真係非常非常非常普通，十分反高潮，唔會嘩一聲，不過食落好好味，因為塊排夠脂肪得來唔會太肥。個汁可以自選，上檯時侍應仲會主動問要唔要芥辣。甜品方面叫了招牌Bailey's Cheesecake（抱歉因為隻碟唧左friend個名唔出得相）同Lemon Pie。Cheesecake好重Bailey's味加少少咖啡味，老實講同真Bailey's非常像真，來到要試。個Lemon Pie啲cream好重肉桂味，我like，但應該唔係個個都會鍾意。要講講支酒。雖然係點左兩支貴啲那支rose，但上檯時大家都覺得色水偏近白酒，飲落去都係似白酒。如果大家鍾意飲rose，建議大家去海港城La Locanda，嗰度支rose真係極品。總括，來Chop House慶生，非常OK，只要你唔係好大食 ! …Read More