ccsy2000's Profile

有一晚在附近買完野，肚餓想買外賣回家吃，見到呢間正義小店（雖然上網搵唔到但當日見到有合理嘅證明）餐牌選擇不算多但合我口味，價錢又合理，即下單買返個湯飯外賣。即叫即煮，年輕老闆態度非常有禮話要等，我無所謂，等嘅時候梗係過隔離九份買奶蓋啦。年輕老闆竟無叫我俾錢先！正義良心人就係太率性，我當然先俾錢再去九份。買完九份回去就剛煮好，good。飯餸份量都非常足，我分左一半留第二日食。湯好味又夠熱，飯的軟硬度啱我。一定要再去懲罰。後記：第二日滾返熱仍然好好味…Read More

今日搵地方食lunch，本來想搵另一間黃店但唔知點解搵唔到，跟住見到呢度，收銀處貼左連豬，餐牌都未睇就入去坐低。好細嘅店但唔算好逼，餐牌比較似台灣野，我哋叫左胡椒豬肚雞湯麵同蟲草花雞湯麵加熱奶茶。熱奶茶香滑，朋友好鍾意，我就鍾意茶味再濃啲。兩個雞湯都好香但放麵就偏淡，不過宜家就飲埋啲湯都唔怕；餸好足夠，有食極都有嘅感覺；雞好淋滑，好好味。整體來講係會推介俾人同會再黎食嘅。支持黃店，更支持用心做出好味道嘅黃店。…Read More

買午餐外賣，本來想懲罰水門，點知去到已賣晒。諗起附近仲有呢間黃店，去到發現油煙好勁，堂食應該坐樓上比較好。佢哋的外賣午餐好抵，我點了鴨脾餐 $50，包牛油餐包、沙律、小件甜品同一杯果茶。可能客好多，都等了一陣。返到公司發現係無餐具的，唔知係咪環保呢？好彩自己有一set餐具响公司。沙律超多，滿滿的一盒。鴨脾就孤零零一個响個盒度。餐包似飛機餐嗰種；細細件甜品係1/10件士多啤梨醬waffle，其實少吃多滋味，我覺得份量ok；果茶大大杯好驚喜，有果香唔少少甜。呢個價錢十分抵。…Read More

同事一齊午飯，食物質素正常，但服務真是差極，要求加水係完全不理會，已舉手示意，幾個女服務員是見到，但唔理。過了差不多20分鐘，全枱人的杯內都無水無茶了，一位男經理經過，同枱的男同事捉住佢話要加水，男經理態度厭煩的話等陣幫你，又等了幾分鐘男經理才出現。整個午飯時間約1.5小時就只加了這麼一次水，不是收了茶錢嗎？以後去潮江春不要話去「飲茶」了，因為是沒有茶或水俾你飲的！…Read More

每次訂散水餅都幾傷腦筋，今次在網上找到呢間，不是一般蛋糕Cup Cakes，是由2位法國甜品師傅造，賣相不錯，早一天訂也可以，而且有免費送貨(過了一定金額)，就決定訂了。當日很準時送到，送貨人非常有禮，不知是否就是老闆。包裝非常精美，外盒很堅固，每個小撻也有小盒盛載，不同味道用號碼代表。派發時，同事們見到包裝已嘩嘩大叫，選擇味道時更出現選擇困難，味道亦大讚不已，雖是法式甜品，但不會過甜，適合香港人口味。派得太開心竟忘了拍照。…Read More

買了團購特級二人餐，包括黑醋沙律、脆皮豬手、招牌腸、芝士薄餅、及啤酒。味道及份量是不錯，但服務十分不專業。一開始來了沙律，我們分到小碟時竟發現有頭髮，立即叫來侍應，指著頭髮問可否換過，侍應的反應是：吓？有咩問題？我們再指著話有頭髮在裡面，可否換過。侍應便拿著那小碟進廚房，我們再叫住佢話要全部換過吧！佢才有點反應的也拿走大碟沙律。這時我們還開玩笑會否只是拿走頭髮將沙律原碟拿出來。之後再上來芝士薄餅，味道很好的，有9片，份量足。吃著吃著，沙律再拿來，即使之前開了玩笑，我們也太放心沒有細意檢查，又再將沙律分到小碟吃，吃到一半，竟又發現有頭髮！實在倒了不少胃口！我們再叫來侍應，這次是年紀較大的一位，我們指著頭髮說已換過還是有頭髮，佢就將沙律全拿走，我們說已兩次都有頭髮，不想再要這沙律了，問佢有什麼可補償，因為我們是買團購，錢已付了但套餐內沒有了沙律。佢提議補回炸薯角，但我們的餐已有大量肉及薄餅，我們想要點蔬菜，問佢有無其他沙律；佢有點疑惑話沒有其他沙律，而且其實我們沒有証據話有問題！這句話也實在太過份吧！如沒有問題，你們為何兩次將沙律拿走？我其實很懷疑第二碟沙律其實就是第一碟，連頭髮也可能是同一條！只是廚房將細碟的倒入大碟撈一撈便再拿出來。後來我們要了薯仔沙律，拿來的是比豉油碟大少少，就像伴碟的份量。不過我們也算了，不想再爭辯。其實食物味道是不錯，但衛生情況及服務態度實在令我不會再光顧。…Read More

約了朋友在中環吃lunch，匆匆忙忙的，一向都沒有太大期望。今次朋友話去呢間，我都以為是普通餐廳，去到好多人，座位其實幾迫，睇餐牌，唔係好貴，普通中環食晏價錢。我叫了西冷，朋友叫了羊架。我愛偏生的，要medium，來了的西冷是外熟切開有血水，good！肉質很嫩，真係不錯！可以話lunch吃過最好吃的，因為好多餐廳lunch價錢不可以太貴就將貨就價，高質數的扒都留晚市，午市只用次一或幾級的，但呢度唔係，個西冷真係好味！其實佢地lunch都有澳洲和牛，二百零一個餐，其實唔算貴，但朋友請的lunch，都係要個百零的西冷算了，不過反而喜出望外。朋友話佢的羊架都好得，下次要試下。…Read More

團購$89/位+$10醬油及服務費+$10星期五特別附加費 = $109/位的任食火鍋，呢個價錢係平的。團購度話原價係三佰幾，但去到見到大大張海報話開心價$123，咁團購其實只係平$12，都幾搵笨。我自己先到，出電梯一望.... 好奇怪的地方，似中學做話劇的佈景(電視台的應該會認真D)，無裝修的地方，膠地板，牆上掛幾塊布，中間一張長枱放了食物，兩邊不整齊的放著摺枱。坐低交出coupon，阿姐話每人加多$20，我話明白，佢唔走，我問係咪宜家俾，佢話係！原來係咁！唔係埋單先俾o既，但佢又唔講，好似我好應該知道呢個規矩咁。好快地問我要乜湯底，朋友來到發現四人只有兩個邊爐用的勺，問阿姐，佢話係兩個人共用一個的，因為唔夠每人一個！咁都得！咁碗筷係咪又要SHARE?用來裝食物的碟好細，驚死你一次攞好多咁。講返食物，庶水無味，清水加了一點輕微的甜味。好彩有百事同美蓮達。肥牛好肥，見到有一年輕少女拿著細碟係咁夾肥牛，壓實再放肥牛，好似想將一大碟肥牛壓縮落隻細碟度咁，雖然係任食，應該係任你攞，但都有返少少，丁點咁少的公德心，其他人都要食架嘛，何況係可以响有限的時間內再攞，無限次咁攞架嘛。豬肉片不錯，團購廣告話有鱔片，我及我的朋友都見唔到。有蠔，幾乾淨咁，淥完變了蚵仔，好神奇！淥淥下有位阿姐話出面有炸雞翼，咁特別，一望已排長龍！炸雞翼咋喎，都要排隊？香港人真係越來越奇怪，有冇聽清楚先呢？結果我地決定唔食。最好食係雞件，因為雞本身白切都好食，用湯淥完雞肉好滑又好味。其他食物無乜特別，食完都無乜印象。返到黎諗住寫食評，先見到有人提到每四人送海參事件，係喎！無海參喎！亦無人交待係送晒定點，總之大家側側膊唔多覺就咁算，但我地身為客人就感到被騙囉，形象好差啫！一定要讚係D阿姐手腳真係好快，收碟、加水、夠鐘(任食2小時)過來執枱，非常快手。…Read More

與舊同事吃午飯，舊同事訂了這間，我是第一次來，一入門口樓下一個客都無，上到樓上，只有一枱2位的客，加埋我地3個，整個午餐時段只有5個客！見到咁o既場面，心諗應該好食有限。set lunch都幾多選擇，我愛吃扒，要了肉眼，medium rare (30%)。我之前在很多餐廳食扒，叫了medium (50%) 總是來了近乎well done的扒，所以今次叫medium rare，希望佢熟得黎都有點血絲睇下。來到時一切開，surprised，竟然真係medium rare，表層是熟的，但中間是紅的，正合我心意！除了生熟程度恰到好處，肉眼本身都很好味。前菜要了黑醋豬膝沙律，一般，不特別好食亦不難吃，不過份量很多。舊同事要了焗田螺，呢個好味喎，唔係連殼上的，放在有汁的碗內，我個人覺得不錯，因為在這裡食lunch都是這邊返工的人，這樣吃比較方便同穩陣，不怕有意外弄髒衣服。由於時間關係，沒有加甜品了。整體是滿意的，一定會再去！…Read More

原本想去藍地大街那間日本餐廳但要等位，聽聞過豫豐花園都有一間，便去望下。大約8pm，店裡只有兩枱客，相比之下，其實有點猶豫，不過唔想等位，朋友又肚餓，便姑且一試。食品選擇很少，是日晚餐有5款，除了迷你三文魚生飯外，都係熟食。所以我點了雜錦魚生飯，加$5轉套餐，而其實只係加多麵鼔湯或韓國罐裝飲品。朋友點了晚餐中的咖喱雞飯。全店大約9張枱，有兩位侍應兼收銀。侍應反應很慢，經常叫了很多次也沒反應。客人不多但上菜很慢，仲要上錯！魚生飯不用煮，我知要師傅切的，但我地坐低時，原本兩枱客其實都已食得七七八八，照計廚房應該只需弄我們一枱的order，可惜我們仍然要等近半小時，中途還錯送來了三文魚生飯。半小時只是我那個魚生飯，朋友的咖喱雞飯在我差不多食完成碗魚生飯及催了不下三四次後終於出場。後來又來了三枱客，不停見到落錯order，上錯菜之類的情況。客人數量只有十人左右都咁樣，其中一個侍應仲要反應呆滯，想點？咖喱飯味道不過不失，魚生飯好細碗，三文魚不肥美，好彩之前食了半包薯片打底，否則一定肚餓。…Read More

睇之前的食評，好多都話佢地服務唔得；但我的感覺又OK喎，可能見到批評後改善左。當晚一行七人朋友聚會，其實只訂了六位，臨時加位佢地都盡量安排。落ORDER時侍應有問我地係咪SHARE食，但我地係各自食自己的主菜。ORDER完之後又想叫一客豬手SHARE，再同侍應講，佢地都立即給我地細碟。開始講食物，一行七人叫了乜呢？主菜(加$30便可轉套餐，有沙律、湯、包、咖啡/茶，好抵，梗係全部都轉啦！)：兩位牛柳 — 兩個都係要MEDIUM熟，但我的來了個WELL DONE，另一份有少少紅，應該都有七成熟。可能我不太愛食咁熟的扒，覺得有點嚡。兩位西冷 — 一位MEDIUM一位七成，兩個都幾滿意喎。一位肉眼 — 原本都係叫牛柳的，但轉頭話只剩兩份牛柳，朋友只好轉肉眼、七成熟。都幾大塊，無乜投訴。一位羊架 — 賣相唔錯，又係無投訴。一位南瓜飯 — 呢個正名係炸蝦南瓜意大利飯，好香同賣相幾好。再加一個豬手SHARE — 可能SHARE左每人只有一兩舊，少食多滋味，又係第一碟，肚最餓的時候，覺得好味喎。沙律： 田園沙律 — 沒有沙律醬，只有少少酸酸甜甜的汁，普通但都算好味。湯： 牛尾湯 / 周打蜆湯 — 兩個都好好味包： 香脆夠熱，好味甜品：四個心太軟SHARE (5吋 OR 7吋要預先訂的) — 七個人分四個有點多了，皮較薄。我地鍾意皮厚一點脆一點的。餐飲：我要了熱咖啡，我習慣飲齋啡的，這裡的咖啡好淡口。叫了凍咖啡的朋友都覺得飲品唔得。(唔知點解UPLOAD相片好慢，所以放棄了)…Read More

之前聽住附近的朋友黎呢間食飯，話平日晚飯好抵，但唔係就幾貴。既然未黎過，星期日就同爸媽黎食午飯，諗住屋村酒樓有幾貴，而且貴得黎好食都無所謂。去到大約12:30PM，仍見到吉枱，行到入門口，無人招呼，阿媽見有枱就埋去坐。點心紙望落都幾多野食，最好係有併點心，方便一兩個人去食，唔洗下下叫一籠又食唔晒。老爸愛吃盅頭飯，剛想點就聽到廣播話盅頭飯暫停。點其他點心，叫左：蘿蔔絲春卷 - 可能係第一碟到的點心，覺得幾好味，上枱仍熱，皮香脆，入面蘿蔔絲夠熱北姑斑片腸粉蟹籽燒賣併乾蒸牛肉雞包仔併麻蓉包併饅頭叉燒包布拉腸粉上海小籠包除蘿蔔絲春卷外，全部食物味道一般，不太好食，都不用每樣評分。服務真係太差，店面不大，還坐不滿座，見到侍應行來行去，但打開壺蓋沒有人加水，其中一個女侍應在我們枱邊行過幾次，我見到佢係望到我地個壺，就係唔黎加水，轉彎入左房。後來我舉高手叫佢幫忙加水，佢應了叫我等等，又轉入房了。我知道可能佢地有分區工作，佢係負責房入面，但佢可以幫手叫其他侍應加水啫，唔係視而不見，應左就算呀！之後又等了近10分鐘，其間又有些侍應在隔一張枱附近走動，但我伸高手佢地係睇唔到架喎。真係忍無可忍，老媽自己走去拿水壺，這時就突然有位阿姐走出黎搶先去拿水壺幫我地加水。但兩壺茶只加了一壺半就無水了，那位阿姐就放回水壺，又消失了。之後叫一位阿姐拿兩個餐盒來打包，望住那位阿姐行入茶水間，一會兒拿著兩個盒走近門口，心想都算好了，真係做野喎。跟住我地叫著套裝那位女經理埋單，我地又傾下傾下，咦？點解個盒仲未黎，再望下茶水間，見那位阿姐這時是拿著兩個茶壺在沖茶！吓！咁... 我地個盒呢？那位阿姐拿著沖好的茶放到我地隔離張枱，之後就四圍行睇下有乜野做。將我地要盒的事好像忘記了。唯有又再找另一位阿姐要盒，等了一陣，單來了，原來埋單那位女經理拿著盒來。終於明白了，因為我地叫了埋單，所以之前那位阿姐就將盒放低讓埋單的經理一併拿給我們。但.... 下次可否通知一聲呢？我想我和佢地的服務水平很有代溝。…Read More

朋友公司在附近，所以提議在這裡晚餐。我地原本只是想找個舒服一點的地方傾下偈，估唔到有驚喜。餐廳位置頗隱蔽，朋友帶路是經過一幢住宅的停車場入去，餐廳入口有花園的感覺，環境幽靜，見到已很討好。前一天訂了位，所以不用等，但其實當晚餐廳都沒有滿座，walk-in都應該有位。女經理態度很友善，推薦我地食一個6道菜的Tasting Menu時，介紹餐牌內食物很詳細。整頓晚餐來加水的女侍應亦很好笑容很有禮貌，餐後所加的還要是溫水，很體貼。餐廳服務不錯，沒有如前文所說在客人旁邊團團轉，但適當時候又會來收碟加水，可能看完評價後真有改善。我們叫了Tasting Menu，有兩道頭盤，一道湯，一個pasta，一個主菜，甜品及咖啡/茶。(Menu是英文的，以下菜名是我個人翻譯而已)頭盤1：芒果墨魚千層 芒果很香很清新，中間夾著墨魚粒及蔬菜粒，一點點芒果酸甜+海鮮味，很好食開胃。頭盤2：香煎帶子伴青芥辣汁 帶子煎得很爽不韌，最驚喜係個青芥辣汁(wasabi)，無諗到會咁好味，我將wasabi汁都食清光。湯：忌廉海鮮湯 我覺得是有南瓜蓉的，因為有南瓜的甜味，再加上海鮮令個湯好鮮味，整體好match好正。意粉：意大利辣肉腸蝴蝶粉 這個配搭是比較普通，但辣肉腸很好味，而且它不是主菜，所以份量少少，不會太飽，所以我都like。主菜：法式雜菌燒春雞伴黑松露汁 女經理介紹時已話菜上時是看不出是春雞，因為雞已起骨，包著雜菌卷成球狀來燒，是手功之作，亦因為工序較多，做完今個月便不會再做，不會放到a la carte。菜來時真的覺得很神奇，外表外形看以為是南瓜，雞肉很嫰滑，雜菌及黑松露很香濃。伴碟的蔥頭及黃紅車厘茄略煎，我全部都吃掉。甜品：布朗尼蛋糕 + 熱咖啡 朱古力味濃郁香甜，配黑咖啡非常夾。一定會再試，不過很貪心地希望佢下次會再有驚喜給我！…Read More

事隔兩年，因為朋友想近公司，尋日又去dinner buffet。之前食過佢地的燒羊同甜品，覺得非常正。但尋晚係有點失望，無燒羊，不過明白佢唔係晚晚都整，燒牛肉味道都唔錯，嫩滑有牛味。冷盤選擇都ok，不過：紐西蘭同美國生蠔(紐西蘭比較好味，係以前那種開晒之後放喺冰上任夾)蟹腳(好好味)蟶子(怪怪)螺(一般)蝦(無食過)壽司(剛到時見到，但跟住成晚除太卷之外無見過其他)魚生(選擇好少，三文魚無脂肪紋，近似全瘦肉，而且碎濕濕，好似係將頭頭尾尾切出黎咁；北寄貝又係剛到的時候見過，之後無添過；亦係開放式任夾)沙律菜(無食過)應該係上海專題，熱葷80%係上海口味，近乎全部都係酸甜，好此味者一定開心，可惜我不喜歡酸甜的菜式，所以一樣都無食。其他選擇有：小籠包(皮都ok薄，但入面無汁)上海煎餃子(皮較厚，肉無味)炒年糕(朋友食過話ok)金銀蛋莧菜(個人認為係全場最好味的熱葷)忌廉汁龍脷柳(無食過)烤薯仔(聞落幾香牛油味，食就無乜味)蜜汁火腿(幾好味)燒牛肉(上面comment左)湯：忌廉蘑菇湯(保持水準，好香好滑好有蘑菇味)酸辣湯(一望以為係碗仔翅，辣味十足，少少酸，料不算太多，我覺得好味)另尋晚每位送大閘蟹一隻，非常迷你的，有膏但不是太多，我和朋友都係蟹癡，所以都係一個驚喜。由於食大閘蟹，佢有提供薑茶，好香的薑及茶味，但飲落又唔會太辣，我和朋友都飲左3杯。甜品枱好細，印象中以前的甜品枱好多種類，但尋晚好少，而且近尾聲時已有大撻地搶野食咁，好可怕！甜品好一般，沒有值得推薦的。餐後那杯茶反而好正，茶味香濃，成壺上，個茶壺應該係好耐之前的產品，好重身，所以茶溫保持得好好，一路倒出來都係熱的。仲有個精美的茶隔同茶隔座，真係好英倫淑女的感覺。供應時間至9:30pm，有點早，好像未食夠就完場。不過，9:30pm繼續坐繼續傾偈都可以，我地都傾到10:30pm，才有侍應來提醒要離開。…Read More