miaclaire's Profile

作為土生土長嘅香港人，反而冇食過遊客名物。今次就去尖沙咀，唔少日本人都有推介嘅池記。叫左午市餐餐，有酸蘿蔔飲品同主菜。雲吞麵嚟講就有少少貴，不過同類型出哂名嘅雲吞麵舖嚟講，就算可以接受。出名雲吞麵，當然要試吓。要左海蝦豬軟骨雲吞麵。面頭有金華火腿，湯飲落好濃蝦子味。麵質非常彈牙，冇鹼水味。同時都幾大碗，雲吞係哂底，一共仲有四粒，海蝦好彈牙，大粒啲就正。豬軟骨就豬味勁左啲。另一個要左蘿蔔牛筋腩飯。牛腩正常，腍啲會好啲，牛筋反而好淋充滿膠質，好黐牙。蘿蔔都清甜冇渣。加多咗一個小食，炸雞翼炸到好香脆，金黃色加埋面頭嘅炸蒜，非常香口好食。飲品唔係大路普通飲品。叫左好少見嘅桑寄生蛋茶同薏米水。仲有南北杏紅棗雪耳糖水。 兩杯都好足料，半杯都係薏米，仲要係加咗薑嘅。蛋茶飲得出真材實料冇溝水。飲品反而變左甜品咁，幾有趣。…Read More

想食韓國野但係餐飲平台反而揾唔到，反而係Google map 求其揾左間。餐廳好有韓國餐廳feel 。落左單，好快就上到菜。前菜可以添加，酸蘿蔔保持到蘿蔔嘅爽脆，泡菜質素都唔錯，海帶都唔求其。叫左個小食椰漿柚子年糕。係新奇口味。年糕係軟身偏淋。甜甜地，椰汁味為主，好香。柚子其實就係柚子蜜，係椰汁味後滲出嚟，屬於配角。面頭仲有兩件桃。椰汁同柚子蜜整體幾夾，接受到甜嘅年糕可以試下。牛肉水冷麵，一樣好大碗。充足嘅冰令到最後先食嘅水冷麵都保持冰凉。清爽派嘅湯頭，想辣啲就可以拌匀哂啲辣醬。配嘅係蘋果醋，清新唔會係死酸，仲有蘋果嘅香味。麵如果粗啲可以有咬口啲會更好。五花腩石頭鍋飯。有少少飯焦，同樣好大碗，五花肉蓋過整碗飯。肉唔算好肥，所以唔會有好大負擔。可以加枱頭上嘅芝麻同麻油，增加風味。整體嘅份量都夠哂大份，食物質素有驚喜，係會回頭再食嘅韓國嘢。…Read More

見到飲品Menu有唔少得意飲品，就嗌咗兩杯。遍地黃柑$98 清爽得嚟幾濃味。酒味唔算出，柑橘味嘅酸易入口，可以等粒冰溶咗之後再飲會溝淡啲。桂花烏龍茶味反而就唔係好飲到。另一杯龍眼蜜$118，用中式茶杯裝住，係熱嘅Rum加威士忌利口酒，好香雲呢拿mix 威士忌嘅味道，龍眼味融入咗酒入面，雖然係熱嘅但酒精冇揮發太多，比起第一杯酒精感重啲。Dining city 嘅3 course menu 頭盤四揀一，要左燒牛肉沙律，牛肉係熱辣辣咁上，厚身，牛味濃嘅。不過啲菜唔算太新鮮，醬汁就普通酸嘅調味。醃青瓜就略嫌酸咗啲。另一個係芝士雞肉丸子，用煙肉芝士醬鋪底，上面係三粒雞肉丸。切開原來會流綠色嘅青醬醬汁，幾香。雞肉味本身唔出，醬汁就令到雞肉丸冇咁乾身，冇諗過切開會爆汁。雞肉丸好少食，預咗佢口感會柴，但食落又唔係，所以幾有驚喜。主菜兩個都要咗牛扒，五成熟，都係熟咗少少。唔使太多調味就已經好好食，牛味香濃，保持到肉質，算係做得唔錯。配菜嘅薯仔都夠香口。甜品要左芒果杏仁撻，似芒果味椰撻蛋糕。食落好乾，嘴巴沙漠，撻底認真食係有牛油味嘅，但芒果味淨係靠面頭嘅幾粒芒果。反而Brownie好啲，有兩舊，屬於好rich 有層次嘅朱古力，唔太甜，唔想落得唔多，所以口感似生朱古力。牛扒係冇得挑剔，不過整體嘅Menu未算好突出同有記憶點，反而飲品更加有特色。…Read More

呢間係灣仔店嘅分店。一出地鐵站就見到。星期一夜晚七點幾入座，但想食嘅沙律同埋其中一個甜品都咁啱冇，上網睇喇沙又唔算特別好出色，所以嗌嘅全部都係小食。要左鹹蛋黃蓮藕片，份量幾多下。切得好薄，好似薯片咁酥脆，咸蛋黃醬比得好generous ，coat每一啖都有，好香口，仲有咖哩葉，唔係hea 。略嫌冚咗薯蓮藕本身嘅味道，不過鹹咗少少，如果用嚟做送酒小食就非常好，就算凍左都好好食，係會考慮買外賣返屋企食嘅水平。辣椒蟹炸饅頭，蟹肉比得多，同有饅頭一比二嘅份量，所以每一啖都係蟹肉，加埋少少汁，口感豐富。望落好似好大份，但其實只係迷你炸饅頭，兩啖食得晒。辣椒蟹個味反而有啲似喇沙或者咖喱，但係有啲甜。斑斕Churros ，好似粟米芯咁，幼身，係density 比較高嘅churros ，炸得唔夠脆。配嘅係斑斕味嘅吉士打醬，個樣好似牛油果醬，凍凍地配熱churros 係ok 嘅。不過本身已經加左玉桂粉，斑斕味唔係好食得出，有啲被蓋過嘅感覺，反而單食個醬先食到斑斕味。…Read More

有Restaurant week可以試到好多平時唔知唔熟嘅餐廳。今次去到上環近文武廟法式小餐館，餐廳唔算大，座位之間闊啲會好啲。午市套餐$198，有前菜主菜甜品同餐茶。揀左法式小蝸牛，雖然好多蒜蓉，同夠哂熱辣，但鹹味鮮味略嫌不足。雞肝醬食落唔腥，份量都多，但似普通貨色。主菜加錢要左flat iron steak 明明要咗五成熟，但嚟到變左一成。牛肉味唔出，肉汁就算咁生都欠奉，食落肉質普通。同專食牛扒嘅舖頭俾略為失色。另一個主菜要咗sea bass ，反而更令人驚喜。魚肉嫩滑冇骨，白汁唔會太肥配魚啱哂。甜品份量好大，一人一個雲呢拿雪糕泡芙，另外蛋白檸檬批都好好食，蛋白霜平衡咗檸檬酸，批皮都好香牛油味。不過總括而言，呢間未算太大驚喜，價錢還可以。餐廳有位講廣東話嘅外國人侍應服務態度幾好。…Read More

平時路過都見唔少客人，可能位於廟街隔離，好受遊客歡迎。試過夜晚十點幾，見到仲食緊野嘅街坊都唔少。今次閒日中午時段去，都係人山人海，仲有旅客拖住筴都排隊食。要左清湯配油麵，湯好普通，腩汁味道唔出。友人揀左辣汁，食落都幾辣下。兩人一共揀左幾款餸：肥牛：普通質素，煮得過老。雞翼豬頸肉：正常，蘿蔔：有渣，得一兩件係甜嘅。咁多款餸入面得牛肚夠入味，係出色啲。另外要多左份牛𦟌，可惜係筋位同肉嘅比例差左啲，咬落去冇牛𦟌應有嘅口感。整體呢間車仔麵都比我想像中普通，勝在係環境好啲咁解。…Read More

Hidden bar 總比一般酒吧多左種玩味同吸引，近排都熱衷於探索香港唔同嘅特色hidden bar 。呢間叫Room 309，位於中環the pottinger 酒店3樓。本身上網睇話要係隔離餐廳拎房卡先入到去，好似check in 咁好有趣。可惜嘅係餐廳己經結業，入去就只係ring the doorbell ，少咁啲神秘感。不過離開去廁所嘅人都可以體驗一下用房卡拍卡入翻酒吧嘅感覺，都算係意外驚喜。閒日夜晚七點幾去到唔多人，坐下坐下都全院滿座，環境細無可避免就嘈雜啲。酒吧其中一個系列係以童話故事為主題嘅cocktail，連menu 都整到好似故事書咁，每杯都有符合主題嘅裝飾，好精緻，打卡一流。要左一杯I do believe in fairies ，記憶中係有關Peter pan 嘅。飲落去有股草青味，本身以為呢啲靚靚cocktail 都係甜甜地易入口、啱女仔嘅，冇諗過呢杯嘅味道咁特別。另一個系列係透明，連menu 都設計成透明，調酒師介紹話好多時候都會因為顏色而預設左味道，例如紅色就係草莓味咁。特意將酒整成透明，就可以打破呢個預設，集中以味覺感受，從而更能享受cocktail 嘅味道。揀左cut the fog 介紹有豉油係面層，第一啖飲落去覺得有啲奇怪，但飲飲下反而覺得佢咸咸甜甜咁好特別，係是晚MVP 最後要多左杯透明cocktail ，iced guava ，話梅粉圍杯邊，主體雖然係guava 但飲落都好似梅味咁，加埋有氣幾夾，酒精味又唔重。…Read More

呢間想食咗好耐，不過佢唔係任食，人數少去食，又嗌得唔多，今次有人請食飯終於有機會食。收費醬料區有好多醬料可以自行調配，不過種類對比海底撈就冇咁多。小食只有辣菇冷盤同炸芋頭波波。肉燥飯就要油咗少少，不過都好食。免費生果有哈密瓜、西瓜同番石榴，不過唔算好新鮮同靚。湯底揀左最出名嘅麻辣鴨血，可以無限添加鴨血同豆腐，淨係食呢兩樣嘢都飽，麻辣唔算太辣比較稀，有少少失望。另外一個要左花膠湯，花膠湯非常之濃稠，入面有魚肚，就咁飲都好好飲，不過作為湯底就唔係好入味。整體食物嘅造型普遍比較多心思，打卡一流。荔枝蝦球，即炸蝦球，彈牙，蝦肉味突出，好特別地整成荔枝形狀，外表有趣，係最令人驚艷嘅食物。例如企鵝造型嘅魚蛋黑色係墨魚味，黑色身軀係落咗墨魚汁整成，一排企鵝仔放喺冰上面打卡一流，勝在造型得意。豬肉同牛肉正常。帶子偏細隻。丸子拼盤，彈牙程度都係一般，食落比較普通。唔係任食都食到非常之滿足，不過同行友人話尖沙咀分店唔單止裝修較靚，食物質素亦都較好。整體感覺無論係免費食物醬料、服務、抵食程度都係海底撈更勝一籌。…Read More

素食連鎖印度店，喺新加坡、曼谷甚至遠至卡塔爾都有分店，係一間將印度小食發揚光大，可以上得到枱面做餐廳主打。平時係印度餐廳最鍾意就係食佢嘅印度小食，呢度淨係pani puri 唔同variant menu 都有成頁咁多，唔使去印度都可以食到好多平時少見嘅印度小食。今次要左有幾款唔同脆餅嘅併盤，每一款都好好食，味道好正宗。脆餅配上乳酪同醬汁，加上脆脆、番石榴籽薯仔等，唔同嘅味道口感mix 埋好開胃，成碟食晒都得。主菜要左印度三文治，份量大，本身仲諗住嗌多啲其他嘢食，見到咁大份就决定留翻下次。餡料係香料薯仔，蕃茄生菜等等，好似公司三文治，但有薯仔就更加飽肚，面頭仲有好多芝士，係唔錯嘅。另外要咗兩杯嘢飲，一杯係mango Lassi，芒果味香濃，足料，比較傑身，特別係佢仲落左fennel seeds ，比平時嘅多左陣香料味。另一杯係印度檸檬梳打，有分甜鹹同埋混合版，揀咗個混合，飲落都少少鹹，好似鹹柑桔咁，想像唔到如果全杯都係鹹嘅會係咩感覺，檸檬味半真半假，氣泡就唔算多，不過又幾夾啲食物。好人好事：mango lassi 隻杯上重下輕，嗰日飯左兩啖都唔夠就唔小心倒瀉咗，諗緊如果要叫多杯好似唔抵。正當好傷心嗰時，應該係老闆嘅，好好人咁再比過杯我地，仲話唔使再收我地多一杯嘅價錢🥹圖中就係倒瀉左嘅lassi …Read More

大圍起家嘅中菜館，位於元朗嘅分店，餐廳屬中高消費水平，大圍本店拎過米芝蓮推介，睇返價錢似乎午市會平啲之餘，加上會有點心，不過今次食晚市就冇機會試到。之前星期六打算去食冇book位，排隊walkin 都冇位，今次醒目先去打電話book位，晚市只分兩場：六點及八點。店舖座位唔算多，高級中菜廳佈置。茶水費每人$28都唔平，但茶款不少，除左正常鐵觀音普洱，仲有玫瑰、白毫等，普洱更係五年雲南茶葉，利申唔識分啲茶係咪好靚。招牌叉燒五件$188 原本以為份量唔多，點知五件都係厚切大大件。上菜後仲會有待應係你面前搽上鳳梨醬，然後再攞火槍燒，打卡一流。不過個人就覺得加左之後甜左少少。上梅頭肉製成嘅叉燒，肥瘦適中，肉汁豐富，肉質軟腍，焦糖化嘅表皮香甜多汁，係每枱必叫嘅餸，送飯一流。蜜薯和牛柳（$238）薯仔炸過外脆內軟，好香口。估唔到嘅係和牛柳，平時食開都係手指公大小，呢度一上枱都忍唔住wow 左一聲，和牛牛味香濃，絕對唔係平時落得太多鬆肉粉嗰種肉質。入面仲係keep 到七成熟，仲有好多肉汁。不過對比叉燒都係前者更加令人驚艷同同性價比高啲。另外叫左砂煲芥蘭，熱辣辣上枱，好夠鑊氣。蝦乾食得出係靚貨，芥蘭炒得仍青翠夠新鮮。最後每人仲送咗腐竹白果洋薏米糖水，甜度適中，煲到腐竹融哂薏米夠腍入口。上湯伊麵（$48）就正常，冇咩出彩，價錢就偏貴。反而白飯（$18）煮到到粒粒分明夠飯香，有咁好食嘅餸，真係食多幾碗都得。總結呢間真係我近年來食過數一數二好食嘅中菜，菜單有心思: 有好幾款失傳懷舊菜餐廳都嘗試復刻、用料靚煮得好，值得呢個價，宴請親朋好友絕對不失禮，希望有機會可以試吓佢午市嘅點心，例如沙翁、炒鮮奶等等。…Read More

全條街都係餐廳酒吧，坐出去唔怕凍嘅話會好有Feel。要左墨西哥街頭小食之一芝士燒粟米$78，半條x2，以粟米黎講都貴。比預期中少芝士，唔係全條coat 滿嘅，所以味道偏淡。食落似烚粟米加少少芝士味、鹽同紅椒粉咁。主食要左quesadillas $128揀左蝦做配菜，蝦偏細隻，不過都彈牙。呢個份量都唔算多，餅皮大概一隻半手掌咁大，所以本身以為唔夠飽。附送牛油果醬同一個青色嘅汁，食落好似$10五包撈麵嗰種蒜蓉汁。加青檸汁又係另一番風味，清新提鮮。另外叫左nachos grande $198 係焗嘅nachos 配芝士牛油果醬、黑豆蓉，勁大碗，topping 要左豬肉，不過食耐左覺得有啲乾，好似煲完湯嘅豬𦟌。呢碗嘅性價比好高，食到最後食唔哂。本身以為會唔夠飽，仲諗住唔夠再叫，比呢個nachos 打敗左。臨走仲見到係tableside即整牛油果醬，都幾得意，下次去試吓先。佢係地道嘅墨西哥菜，不過同灣仔嗰間coyote 比較，嗰間就再濃味同辣啲，酒吧feel重啲。…Read More

餐廳好似係19年米芝蓮推介，位於尖沙咀東海傍，對於行開尖沙咀中心黎講位置偏遠。餐廳一半係酒吧，一半係餐廳咁，坐出面嘅話會有少少熱。裝修都幾靚，幾有feel。用app book 枱去到餐廳係五點，半落場咁，不過上菜都算快，而且冇咩人好似包場咁。要左柚子沙律（$158），汁嘅味冇咁濃，重點反而放左係金柚度，係清甜唔苦嘅，份量就以呢個價錢黎講唔夠多。牛油果米紙卷（$68/4塊），好raw嘅組合，就係菜用米紙包住。牛油果偏生，唔香牛油果味，椰菜偏苦。主要靠佢嗰汁吊味，菜佔份量偏多，米紙有啲厚，一般。Pad thai（$168）本身不抱期望，但食落都唔錯。似泰國風味，係偏甜嘅。份量都夠大，炒得有鑊氣，蝦就都大隻彈牙。整體係預期之内嘅水準，米芝蓮推介嘅話覺得就爭咁少少。尖沙咀海傍黎講價錢就算冇半價都唔差，賣相係幾靚，但味道同街邊泰國小店差唔多，未係會想再食嘅味道，食過就算。…Read More

作文都寫過，香港作為美食之都，咩國家嘅菜式都有。今次就去左中環一試冷門嘅秘魯菜。以前係屋企都試過整ceviche，秘魯出名嘅前菜，即係用檸檬汁醃熟啲生魚肉，調味之餘仲起到殺菌嘅作用。不過呢啲比較簡單嘅野，今次就冇揀到啦。值得留意嘅係lunch set 比起散叫扺食，想嘗鮮嘅建議lunch hour黎，佢嘅lunch做到三點架。今次反而要左秘魯燒烤拼盤($199) 有牛扒、四分之一隻烤雞、香腸同兩款配菜，兩個人share好夠食， 一個人叫呢個肯定係大胃王先食到。唔叫兩個set嘅原因係貪佢咩都有啲， 可以一次過試曬。Lunch set有湯，每日都唔同，今日就係豆類煮成嘅湯，講唔出係乜嘢嘅味道，帶點香料味。牛排反而偏乾，但點嘅汁好惹味，有yellow mastrard 再加香料咁。其實食落冇想像中咁異國風情咁重香料味，平時唔鐘意印度菜咁重香料味嘅人應該都會接受到。香腸嘅話就正常，係肉感多於粉感嘅腸，食落都有啲似台灣腸。雞肉仲好juicy，唔柴， 但雞皮略嚴有啲乾，1/4隻亦都大大份，食完非常之夠飽，食落似港式蒜汁雞扒咁。 配菜就揀咗蒜頭飯： 同平時食開嘅大差唔多有乾蒜係面，食落蒜味幾足；同蕃薯條，蕃薯都係秘魯嘅其中一種主食 。順便科普下，其實秘鲁菜自上世紀嘅中國日本嘅移民影響，飲食文化都帶點亞洲風味，例如有好似鼓汁炒牛肉配薯條嘅lomo saltado。所以秘魯菜聽落好似好異國風情，但其實都好啱香港人口味。中環同灣仔都有分店，食得多西餐嫌悶，不妨探索下新菜系。…Read More

exxigo嘅新餐廳，有折扺食好多，佢係諾士弗臺地面嘅酒吧，有室外同室内。室内環境有特色，走復古美式風之餘帶點raw，連廁所嘅洗手盤都係桶同水管嘅併接，幾得意。要左jalapeno rolls($78)望個様覺得佢唔算正宗，不過味道係好食嘅。好似炸春捲咁，但略微有少少油，入面係芝士同青紅椒，爆哂餡，味道好似 pizza，反而食唔出 jalapeno嘅味，係唔辣嘅。主菜要左Pink sauce pasta ($148)味道正常，芝士味突出嘅，份量正常，唔算特别出彩。另外要左 tacos carnitas ($148)即係pulled pork，佢係麵粉taco，豬嘅份量都幾多，食到啖啖肉，調味好balanced，加上蕃茄碎，食落唔會太乾。臨尾七成飽，再叫多左個 chickens satays($88)落單後隔左都一陣先有，有三串，唔係想像中嘅泰式沙嗲，見到表面就燒得過焦左少少，但食落中間就只係啱啱熟，仲有少少粉紅色。變左成餐嘅唯一敗筆，早知唔叫好過。整體黎講，餐廳氣氛唔錯，以酒吧為主嘅餐廳黎講，食物大部分都ok。…Read More

去完新開嘅M+，附近圓方嘅餐廳貴夾唔好食，忍住餓咁求其行去佐敦希望揾間平平地塡下肚就算。就咁聽個名會以為係越南野，不過其實係韓國野。店員大多唔係香港人，不過講廣東話佢地都聽得明。上網再查先知我地誤打誤撞去左間黃店，仲要食物質素唔錯。可惜去到已經冇午餐下午茶，要單點。聽隔離枱話炸雞唔好食，好彩冇叫到。前菜比嘅泡菜都幾好食，夠脆又辣。食開嘅紫菜包飯都係伏，日式嘅飯卷求其加翻啲麻油就叫係kimbap，所以本身都對佢冇咩期望。友人要左烤牛肉拌飯($88)，味道係想像中嘅味道，唔算太大驚喜，不過夠熱辣辣。要左泡菜呑拿魚紫菜包飯($78)，本身以為唔多，但上到黎有成條咁多，頭尾都比埋你。食落味道好有層次，泡菜包住罐頭呑拿魚，再加上紫蘇葉高質，饀多飯少又夠實淨，食完就飽哂。單點價錢係偏貴，如果食午餐set會扺好多，食物質素唔錯，下次有機會都會想再食。順便仲可以去附近買布丁包食。…Read More