youqing's Profile

尋晚睇社交平台睇到介紹呢間燒臘店，突然燒肉心起，今日一支公走入元朗食返餐。以前已經幫襯過幾次外賣，佢哋既質素早已心中有數。第一次堂食，去到已經差唔多12點，擔心已經賣完，好彩靚姐話仲有燒肉雞，我話燒肉OK啦，結果上嚟肉雞拼，原來係一定要食燒肉雞飯，無單燒肉，OK啦，雖然我對雞只係一般興趣。明顯呢個係燒肉唔夠，雞又有剩既安排😒。店員同收銀好好口，好有禮貌，多謝唔該絕無欠你。不過當聽到有客話唔食雞嗰陣，阿姐態度180℃變化就有啲令人驚訝😅。OK啦，揾食啫。大排檔環境唔會乾淨，得兩大一小枱，阿姐原本要我插入大枱窄縫入面，好彩細枱啱啱有人起身，我就唔使夾住食。一坐低上手既骨仲係度，睇下水渠水已經淹上嚟，嫌污糟真系可以直接外賣。雞好一般，雞胸肉，有啲實，但又唔系鞋，都可以的。都見有人好彩食雞髀，無計，一切皆是命。戲肉當然係燒肉，佢哋話係新鮮肉烤製，有啲UN，有啲實，有肉味，塊皮扑扑脆，絕對好食，每次質素都差唔多好穩定。飯就系最弱既一環，鞋口有生米，唔掂。埋單29，單雙拼一樣價錢。值得一提，之前買外賣燒肉，放幾個鐘啲皮依然香脆，記得佐敦有某家燒臘都係咁講，可惜唔系事實。大排檔唔影相啦，已經有人upload一堆相片，自己參考下。…Read More

呢間酒家係我其中一間好鐘意去既中式酒樓，早兩日經過發現原來已經結業，網上寫永久停業，APP寫裝修中，希望有日會重開啦。上年2024大概年中最後一次幫襯，印象中點心食物一般，就係街坊酒樓既水平，但蝦餃尤其出色，通常一次食兩籠。雖然衛生環境都一般甚至係麻麻地，但職員非常熱情，彌補咗呢個缺點。收銀嗰位女士，你幫襯一次就記得你，無論幾耐無去佢都記得你當你熟客咁招呼，真系好窩心，香港就係需要呢啲服務業員工。因為工作關係已經好少過去，無諗過佢捱過疫情，捱唔過北上潮。往事只能回味，希望有日江湖再見，特此留一紀念。…Read More

話說幾年前，一次誤打誤撞既情況下去咗呢間茶餐廳食lunch，當時食咩已經唔記得，只係記得舊式老茶既裝修，同店員友善既服務。最近係fb知道呢間餐廳要結業啦，突然想起就想再去幫襯一次。2024年10月26日，嚟到門口已經見到大大張紅色告示，茶餐廳將會係廿九日正式結業。入到門口見到客滿，要等一陣，於是同收銀姐姐講，想等卡位，佢笑笑口咁話儘量啦:)。等咗無五分鐘，就真系有卡位坐。原本見客人碟茄子牛仔骨好正想食，不過啱啱到下午茶時間又唔系好餓，就點個下午茶算了。同朋友一個咖喱炒貴刁，一個菜脯叉燒炒飯，交換啲嚟食，貴刁無咩咖喱味，炒飯反而偏鹹。兩杯凍奶茶就OK正常。味道OK唔算好正，但氣氛好好，店員都笑笑口，仲見到老闆教客人點沖奶茶，有熟客問老闆點解唔做，老闆話做咁多年得個吉氣氛和諧，毫無怨氣，應該真系光榮結業。尊重店內請勿拍照既告示，出到門口先影兩相作為紀念。希望香港之後既食市都可以無差別咁多啲對客人展露笑容，唔好凈係識得呻點解無生意，或者出咗名就擺個臭面出嚟揀客做。…Read More

好耐好耐以前，就聽說過某某港姐話上環呢間燒味鋪啲叉燒冠絕香港，一直都好想試，今日飛雲終於嚟喇，趁lunch去附近搞私務，就算趕啲都過去試下。一去到門口無預期既墟陷，不過都有七成滿，可能已經一點半過咗高峰掛，門口有個可能係老闆著住廚師服既阿叔，見我入嚟都無招呼直接揚下手，我諗系叫我坐掛，咁坐低睇餐牌，燒味飯好似只有一個60蚊雙拼餐，無仔細睇就是旦叫個叉肉飯算。於是到我揚手啦，阿叔望望我無反應，阿姐又望望我繼續無反應，再舉手結果都一樣，如是者坐咗可能有四五分鐘，我覺得自己忽然變得透明咗，咁唯有起身知難而退喇。網上評論話越做越難食，服務又差，可惜佢哋無比機會我試，幫佢哋平反，唯有係我張名單入面剔除喇。結尾又系嗰句，咁多人北上，唔系無原因既。P.S 又無食評又無相，唔知openrice比唔比po。…Read More

一直有聽聞呢間炳記茶檔既名聲，話未食過炳記等如無去過大坑，今日路過見落大雨無人排，就去試下。其實唔知食乜，凈係睇過YouTuber話豬扒麵同奶茶正，就點豬扒雞翼麵加奶茶，朋友點咗餐蛋麵，我仲笑佢唔食豬扒等如無嚟過。點知嚟到佢碗麵係default有豬扒，餐蛋只係加上去，唔知係搞錯定正常。豬扒同雞翼都入味，豉油味濃，好唔好食就好個人，但肉質就真係比較實，無咩鮮味，明白都係雪藏嘢，個麵就唔多掂，淋pat pat 食落似係用唔夠熱既水浸熟而唔係煮熟。奶茶偏苦茶味少啲，好一般。朋友就話佢杯茶走好正，但個豬扒麵就同我感覺差唔多，都係嗰句，口味好個人。招呼方面都可以，阿姐都有笑笑口打招呼，唔會好似一啲so called網紅餐廳咁西面。阿姐見我哋就講普通話，有啲人可能會覺得唔舒服，我就無咩所謂，而且阿姐應該係講開普通話既新移民，當時本地客都多，佢哋唔似係一心做遊客生意嗰種餐廳。埋單HKD 60，朋友就 50，午餐嚟講OK。整體感覺雖然無驚喜，不過唔使排隊既我會再嚟。…Read More

機緣巧合入去朗屏做啲嘢，無食飯又唔知有咩食，咁啱見到呢間腸粉檔，個樣雖然黑掹掹，好似幾污糟，但貌似老店仲係街坊小店，就不妨試試。走埋去見到個疑似人頭係廚房位置伸伸縮縮，就問聲唔該，仲有無腸粉？無回應，人哋做緊嘢咁我等一陣，兩分鐘後有個阿婆拎住大樽豉油走出嚟，第一句就話賣嗮會棟個牌，你問咩呀？OK，我明有啲人係講嘢倔啲，無惡意既，於是繼續啦，由點腸粉燒賣魚蛋到落咩醬，全程都寸寸貢，負到爆，咁好喇，妳咁唔想做，咁我以後都唔會打搞妳老人家喇。最後買咗腸粉燒賣魚蛋各五蚊，係平既，但都係將價就貨，啲腸粉工廠貨無咩講，但啲魚蛋燒賣就食得出係最cheap嗰啲貨，難食都算，仲要凍冰冰，阿婆，有啲良心好嘛。最慘係啲豉油有種怪味，應該自己調，仲要倒好多落腸粉度浸住，又鹹又怪味，真系唔明點解可以做到變老店。呢啲所謂街坊老店真係唔可以一廂情願咁以為佢哋都有乜鬼人情味，都可以好似澳牛咁既待客態度。咁多人北上，唔會無原因既…Read More

有一排無入元朗，今日見天氣OK入去探個朋友順便食最近上網睇到介紹既張光記。其實呢個冬菇亭我唔系第一次幫襯，但上次咖啡通粉既體驗十分惡劣，所以無再去幫襯，估唔到原來入面仲有間歷史悠久既老店可以試下。去門口見好多人排隊，諗住有排等，點知原來都係等外賣，咁見到有位就坐喇。事前做功課決定食鳳爪排骨飯同牛肉球，同店員直接落單，大約等咗十五分鐘左右，算有啲慢但都OK既。冬菇亭環境一般，但對香港人嚟講係有種情懷，只係天氣開始轉熱，無冷氣唔系個個都接受。鳳爪排骨飯既鳳爪口感有啲爽，同酒樓淋滑口感唔一樣，而排骨更加係麵豉醃製，跟酒樓既都唔一樣。見阿姐上飯前會加三樣醬料，猜測可能系熟油，老抽同生抽掛，但味道唔濃，少甜味。牛肉球如傳聞中紮實，有牛味有口感，感覺真材實料。好快咁食完，呢餐合乎期望，都幾滿足。麻煩阿姐睇數，阿姐收錢嗰陣講句多謝，我都講句唔該，禮貌睇嚟基本，但唔系間間餐廳都會。…Read More

難得一日去天后附近做嘢，約咗個客10 點，不過我未到九點已經到咗，無所事事咁不如去食嘢先。就係附近有間茶記叫大不同，個名咁不同就不如試下。一入餐廳感覺有啲昏暗，仲隱隱約約有種異味，不過氣味唔算濃都可以接受，只係冷氣好似唔多通風咁。自己搵位坐低，枱櫈有啲痴立立。成個場目測只有一位女侍應，收錢執碗抹枱送餐一腳踢，我打個招呼佢叫我等等，咁人哋唔得閒我又有時間，咪等下無所謂，點知一等10 分鐘，見佢繼續做佢既嘢仲得閒同熟客吹水，完全無打算理我，咁我又嗌聲佢，答案都係等等，不過今次真係等兩分鐘就過嚟。點咗個早餐沙爹牛肉麵，煎蛋腸仔，熱擰茶。見廚房師傅水吧又係得一個人，咁即係又唔會快，果然又係一等十幾分鐘終於個餐嚟齊。沙爹牛肉麵：沙爹夠香濃可惜啲牛肉梅梅爛爛一pat，咬落佢仲淋過豆腐，好奇怪質感，有啲牛肉會硬身啲，懷疑有啲係隔夜翻煮變到淋之之，反而個麵好似未煮熟咁仲幾硬身。腸仔應該係大陸或者中東貨，唔確定但就唔係香港人食開嗰啲。煎蛋無咩好評論，普普通通。個奶茶就真係熱過熔岩，好彩我唔趕可以慢慢飲，茶味都可以，但奶太多。花咗廿幾分鐘等餐再用三十分鐘食完，唔知算唔算耐，不過食完啱啱好去見客再食。原本一間普通茶記真係無諗過寫食評，所以連相都無影。而係呢間大不同對面有兩間光鮮啲睇落高質啲既茶記，但就係睇大不同個樣夠街坊，先入去試下，結果真係一次就夠。佢哋既沙牛真係太梅爛似係翻煮又翻煮。而得一個人做既大媽侍應又抹完枱執完碗又去送餐，加埋個場清潔一般，睇落有啲污糟。但最令我唔會再去既原因係大媽對客人愛理不理，同客吹水都唔落單，叫兩次都係等等，作為一個生客感覺幾差。想問下，妳無生客，邊得嚟熟客呢？…Read More

係荃灣區打滾多年，一直都唔知有呢間手工燒賣。直到燒賣關注組同一啲YouTube介紹先知呢間街坊小店。呢一代人食飯追求既，已經唔止係環境食物，仲要加埋特色情懷，呢樣對冠華就應該係強項。根據知情朋友介紹，點咗碗牛雜河加一份20蚊既手工燒賣。牛雜入味，但牛肚較韌，其他一般，河粉太淋，沾滿牛腩湯汁卻有化學作用，變得惹味。主角手工燒賣，粒粒形狀不一正好係手工一粒粒造既證明。燒賣size有如一個乒乓波大小，咬落去較粉有啲實，質感十足。有魚味，調味亦夠，加上豉油同辣油，味道OK。雖然無網上講到咁神，辣椒油亦唔係特別出色。但每一粒燒賣都系獨特既，亦算好食，誠意足以超越坊間一啲以主打濃味汁料，但忽略燒賣本身既店鋪。另外由於係街坊店，人情味真系濃啲，入去會見到街坊食麵同老闆吹水，如果我無睇錯，甚至熟客會幫手落單收錢。燒賣阿姨拎燒賣嚟既時候會一直叫你小心熱，但要趁熱食先好食，感覺同出麵一啲排長龍但出名西面既所謂名店完全唔同。據聞呢間店可能會光榮結業，到時香港又少一間特色小店。未食過既趁而家仲有就不妨去感受一下。…Read More

2023年8月某個平日，約咗朋友去元朗hea行山，去到朋友竟然仲未起身，好啦，我揾間酒樓等佢。Google一下就去呢間大集團既，唔一定好食，但應該比較穩陣。好歹係個食評，先講食物吧飲茶飲茶，最先梗系試下啖茶，自動煮水壺可以煮到100℃，但用嚟煮鐵觀音就太高了。茶葉獨立包裝，似大陸，滾水攤凍少少先泡，茶味都夠，有甘香味，OK。最先嚟既點心係蘿蔔糕，薄薄小小既兩件，比大X樂既大少少，鬆鬆散散，快餐店既味道。之後嚟既係叉燒腸，粉皮較乾硬，叉燒味道正常，豉油偏鹹。之後就係蝦餃燒賣，蝦餃蝦有啲梅，唔彈牙，皮散易爛。燒賣係今餐最好食，肉香彈牙，雖未係最高品但都中上。然後係山竹牛肉，今餐最難食既食物，腐竹硬，牛肉球都硬，仲要臊，仲差過叮叮點心。最後係鳳爪排骨飯，濃味，算好食，可惜油太多，整碗飯都系油，濕立立，比較難入口。埋單75.5，六款點心，一位茶，雖然有啲點心唔足一碟，但性價比依然唔錯。講完食物，想講環境態度，呢啲雖然唔係食物，但絕對係會影響食慾既一環。環境裝修古典，感覺高級，可惜係職員態度同服務水平嚴重低下，令人無法好好享受一餐。一入門，知客位無人，一班茶客係門口等，我一支公，撳飛仔先，撳唔到既？搞咗十幾秒，旁邊大媽突然無聲插入撳咗先，雖然嚇一跳，但至少證明部機無壞。又搞一陣先見個職員走出嚟，第一句就話一個撳唔到架，啊，原來係咁，咁點解唔寫出嚟搞到我成個傻仔咁一直撳。不過職員效率快，一手指住門口叫我坐嗰個孤獨位，幾好，夠獨立無其他人騷擾，就係坐咗呢個位，短短一個鐘睇到好多精彩嘢。首先見到一堆亂碗碟放滿隔籬枱，好耐都無人收。之後見到自己張孤獨枱得一對碗筷，其他都無。等一陣，終於有職員過嚟問咩茶，然後就係一輪埋怨，中間夾雜粗口，鬧既唔止係同事，廚房，稻香既office，更甚係鬧催單既茶客，入咗場既客人。粗口同鬧人既內容不便在此說明，但絕對係兒童不宜，不幸既係，同場等位既有唔少小孩，老人家一家大細。呢啲粗口雖然未必引起不安，但絕對係會引起反感。目測酒樓內仲有吉枱，職員都至少有六七個，應該人手夠，但奇怪，當日經常出現無人執枱，無人開茶，點心要等30分鐘以上先有，客人催單要被鬧，職員充滿怨氣。到底，呢個係管理問題？職員問題？定系客人問題？最近好多人講香港既市道一潮死水，夜晚靜英英無人食飯消費，反向一河之隔既深圳餐廳就夜夜笙歌，究竟係咪因為香港無夜市？定系香港既餐廳除咗貴之外，仲要服務質素茶趕客？大家一齊思考下。…Read More

今朝要去深水埗名店買口罩，未免晏咗人太多，所以一早就出門，點知嚟到又太早，咁不如再翻兜我心念念既中央飯店。上個禮拜無食到臉咁大既大包，今次一樣食唔到，阿姐話啱啱賣嗮。咁好啦，好彩仲有蝦腸，今次食返無上次咁驚喜，感覺粉皮無上次咁滑，上星期既蝦味道比較鮮，但今次既蝦腸都係上等既。另外又點咗魚肚燒賣，第一次食，魚肚索嗮啲汁，食落爽甜，燒賣本身彈牙有咬口，裏面除豬肉外，應該仲有蝦肉，味道唔錯。最後食咗碟鴨腳扎，裏面既芋頭入口鬆化，肉就係魚肚燒賣既肉，拆開腐皮，裏面既鴨腳包住醬汁，都幾得意，醬汁係腐皮裏面，唔係外面，呢個係我見過第三個版本既鴨腳扎，都算幾特別，鴨腳質感比較raw，入味但唔係燜到淋，有咬口，甚至腳筋都系脆既。特別一提，呢間酒樓推車阿姐好好記性，我問佢有咩點心，佢真系好努力咁背嗮十三款點心出嚟，我無辦法唔比讚，試想象，你如果一日要推十幾轉，每轉都十幾款唔同配搭，你點記。阿姐中途仲要話唔好意思，多謝嗮之類，其實系我唔好意思就真，因為阿姐話想食咩同佢講就得，唔使問有咩係車度。時隔一星期，再次幫襯感覺都系咁好，食物質素中等，服務不錯，價錢貼地，有機會一定要再嚟。…Read More

今日睇完YouTube介紹，原本想去保安道街市食個街坊茶樓，點知上到去佢哋話休業到九月，無緣食到都無計。想起N年前去過既中央飯店，於是憑記憶加Google map去揾返嚟拜訪下。走咗差唔多一個鐘，當做運動，終於嚟到太子同深水埗之間既中央飯店。一個老舊既霓虹燈招牌已經好搶眼，入去見到每張枱都鋪咗棗紅色枱布，懷舊感又多一層。隨便坐低咗，檯布有啲污跡，可能無換到，我諗四十以上又去過舊式茶樓既人嚟講，應該唔會意外，雖然而家感覺有啲污糟，但呢種做法係以前嚟講好常見，通常都走幾轉人客先一半一半咁換。講咗咁多廢話，講下食物。老實講，食物質素中等。點咗蝦餃，皮有點厚同硬，蝦塞得滿滿的，但有種蘇打粉味。另外點咗鐵皮車煎蝦米腸。真系童年回憶返嗮嚟，停在你身邊煎，油煙連腸粉既焦香味陣陣飄來，香脆既腸粉連分開上既混醬，真系人間美食，雖然部分比姨姨煎燶咗少少，但味道風味仍然唔錯。最後講下碟令人驚喜既鮮蝦腸。之前蝦餃既問題似乎無係蝦腸上面重複，反而蝦腸既蝦肉爽滑彈牙，腸粉皮幼滑，簡直係90分以上之作。埋單88，好合理又貼地既價錢，比完錢收銀姐姐仲會講句多謝，而家就算大酒樓收你幾千都唔識得講既說話。食完之後覺得質素都可以，只系得一支公試唔多，下次帶埋老婆嚟一齊食，可以食多幾樣。好似魚肚燒賣，同比塊臉仲大既大包，好想試試。舊式茶樓買少見少，人情味滿滿既荃灣海蓮之外，中央都系碩果僅存既經典，唔知幾時會失去，希望仲係度既時候可以食多幾次。…Read More

尋日睇新聞話荔枝角某冰室MMA，心諗而家啲茶餐廳都咁澳牛風既咩？正在懷疑之際，今日就見識咩係惡劣既茶餐廳。今朝一早去長沙灣開工，做完上半場就去食個早餐，經過呢間巴打見早餐有丹麥多士，就入去試下。一坐低，一個攣毛女侍應用好港式茶餐廳既語氣問食咩？我免得對方唔開心就儘快落單，點個早餐B 沙爹牛肉麵，等待中感到餐廳冷氣唔夠，一直飆汗，聽到有顧客問點解無冷氣，侍應答話如果開大怕會凍死你原來咁都系答案。已經感到唔對路，好彩食物好快就到，呢個效率值得讚下。先食沙牛麵，牛肉太鹹，醃肉粉味濃，有啲苦，麵OK。之後就係煎蛋腸仔，無咩好講，不過不失，可惜期待中既丹麥多士，變咗普通多少，而且又凍又硬，好難話佢好食。凍奶茶走甜，茶味一般，奶味較多。由於太熱，拿拿聲食完走人，埋單問攣毛收唔收wechat，佢粒聲唔出凈係用手做過類似過嚟既手勢，我話下？攣毛就憤怒了，話：單呀！下？咁即系收唔收wechat？佢又好唔耐煩咁掉咗一個單字：收好好好，咁我比現金，可能wechat要佢撳多兩個制唔高興。比完錢走人，同巴打講bye bye，妳以後都唔會賺到我錢啦。…Read More

一個突如其來既港鐵故障，造就咗我今日嚟呢間酒樓飲茶。原本約同事9點元朗開工，點知港鐵又故障搞到同事嚟唔到，咁肯定有排等，師傅仔呢啲茶餐廳食完就走肯定唔啱等人，咁有咩好過去飲茶hea住等呢？最近西鐵站既平民酒樓，我諗應該係呢間利滿皇宮，門口寫住孖寶28.8 (上去變咗29.8😟)，同9.8起點心 (最後見唔到有9.8既，可能我睇漏)，咁幾抵喎上去試下。點咗孖寶牛肉腸+黑椒爽肚，再點雞絲粉卷，拎加自取鳳爪排骨飯。問心呢間酒樓點心幾好，尤其係牛腸，夠滑又煙煙韌韌，整體點心有70分以上。另外唔係用散茶葉沖茶，而係一大包嗰種，感覺比較衛生，但疑似銅茶壺唔隔熱，唔小心就會辣親，而且茶壺嘴設計不佳，倒茶時非常容易漏到一枱都系。至於咁好食，點解感概呢？咪就係香港服務業一直比人詬病既態度差問題。酒樓有熟客文化大家都明白，但系對生客唔禮貌甚至呼呼喝喝，咁仲點會有熟客呢？態度差，點心上枱時混埋其他點心既汁，無換連唔好意思都無仲要掉上枱，無嘢呀？一堆老鼠屎，即使食物再好，都搞到我以後都唔會再嚟呢間嘢。而家未有遊客已經咁差態度，有遊客嚟更加難以想象。希望香港飲食業同港鐵，都會有改善服務既一日。…Read More

今朝又入元朗真的很興奮，唔記得幾時開始，去到元朗既早晨第一餐都會嚟師傅仔食，佢哋既早餐係元朗嚟講算cp值最高的了。疫情未過，物價已飛，但師傅仔早餐一直都系呢個價位。幫襯多年，點解突然寫食評？皆因今朝發生件小事，我覺得要表揚一下。先講講食物質素，我例牌食B餐沙牛轉通粉，沙牛味唔濃但OK，通粉索嗮湯汁又唔會好淋之之，但最大賣點係塊跟餐既奶醬多，外脆內軟，一般茶餐廳餐包不能比擬，最後仲有一塊煎到脆扑扑既豬扒，cp值已勝附近同行。小事來了，今朝落單講好豬扒分開上，可以慢慢切，但嚟到既係放埋個碗入面，原本都無咩所謂，豬扒係碎件兩塊，都OK既，但問題係豬扒有個位有啲詭異，於是我同店員姐姐講要換，姐姐二話不說咁同我幫廚房講咗，廚房亦無咩不滿表情就整個塊比我。全程都有禮貌，無任何唔舒服感覺。其實真系小事，但係好多香港茶餐廳都會突然變了大事，唔肯換，鬧你，比說話你聽既茶餐廳比比皆是，所以我真心覺得師傅仔呢次值得拎出嚟表揚一下，希望服務繼續維持水平…Read More