Wilson489's Profile

好耐無光顧呢間餐廳，因為菜式方面已無新意，另一方面亦無其他優惠，但因為生日及有一張一元pizza卷，故再到一試。當晚一行五人，友人欣賞餐前微暖的麵包，但想再要一個，唔好意思，無，唔得。沙律只有一小碟，想再加，或轉凱撒沙律(從前加錢是可以)，亦都唔得，無。主菜，羊鞍，可以保持水準，有肉汁和香草夠味，但略為過火，太熟，仍算可以。:)燒雞豬排骨，夠味，雞是雪雞，一般。Pizza選墨西哥牛肉薄餅，水準之作，餅底香脆好味。:)因生日會送一個小蛋糕或不收切餅費，不錯。:)總括食物方面，水準還可以，夠味道。唯獨對於餐前的遭遇，幾掃興。再者，當晚雖然是假日，但場中枱數不多，但侍應們的服務一般，與其他的美或澳式的餐廳比較，不夠貼心，失色得多，清潔枱面及出蛋糕都三催四請，心散愛理不理。如果全場爆滿，可以原諒，但相反呢，場中只有一半枱。真係無地方食，先再會光顧。…Read More

這間放題最近好耐無光顧，本月已是第二次帮襯，價格依然係相宜，現更包埋飲品任飲，一個字，抵。:)食物種類方面，與之前的一樣，有部份的增加亦有刪減。不過始終都係主打刺身，水準依然，大大件，夠新鮮:)，唯獨只有立魚，都係有雪味，唔得(未改善過)。其他的：爐端燒、炸物、料理、壽司、天婦羅等，好味。尤以最近再次有得食的，芝士年糕--口感及芝士味儂、帶子--現採用比較大隻的，入口豐富、一口牛--不過不失、牛舌---夠軟稔夠味道。侍應方面，服務效率快、勤清理枱面。厨房出菜亦夠快，無需等。不錯。…Read More

到此餐廳試一試自助餐，因對蠔及鵝肝不太大興趣，所以退而求其次，選特早的時段，由五時半至七時十五分的一場。可能時間尚早，不太多食客，可輕鬆慢慢選擇。首先，海鮮：當然係蟹腳，都幾新鮮及帶有淡淡海水味，唔錯，只size略為細隻。刺身及壽司：只有三文魚、立魚、魷魚及甜蝦，只屬一般。至於壽司，火焰三文魚壽司都有水準，其他就亦不過不失。:)沙律：反而我頗為欣賞，種類夠多，每種都有各自特色。當中雞沙律配青瓜--清新及帶檻欖油香、生果沙律--有各種水果及切粒火腿，有口感及開胃。芝士盤亦有五款口味，伴以餅乾，creamy、臭芝味齊全。熱盤：最入味及首選燴牛尾，又夠稔。其次燒牛柳，約有六成熟，肥瘦適中又夠香。全程共光顧有四次，難忘。最後甜品，中等的水準，份量亦以細細件為主，亦算多選擇及齊款式。綜觀全個自助餐，各樣的菜式都齊備，當中亦有出色的作品，而且食品都不斷會加添。服務方面，侍應們可有效率及貼心，會不停為你加水及清理，可以:)。以此價錢食一個飽飽的晚餐，無求啦。…Read More

行開尖沙咀，試吓這間在對面海香港個個都叫好的茶餐廳，而且仲新開。:)到門外，排長龍，時間係大約三時。不過我只係兩個人，好快都可以安排入座。餐廳裝修保留舊式茶餐廳的特色，紙皮石的牆，舊式的枱櫈，就連我相信舊店的招牌都搬在此店中做裝飾，幾特別及懷舊。:)點咗此店話說出名的奶茶及豬排包：奶茶一到，色淡！不妙，一睇就知奶多；果然杯奶如其名，似足奶水，並無茶味亦無茶香亦不夠熱。只有杯茶的滑度可取，不[鞋]口。失望。豬排包：不過不失，略覺塊豬排比較肥膩。綜觀呢個下午茶，所收的價錢比起其他的茶餐廳略貴，但食到的質量反而不值；相比樓上的大家樂，我想日後會選擇後者。…Read More

放題入紙挑選，然後送到食客面前，無需動手攞食物。首先，飲品大大杯，多選擇。食物方面亦都分好多種類，沙律、湯、河/飯類、小食、主菜和甜品。除河粉及飯類都大大碗之外，其他的菜式都好細，甚至連春巻都好短小，只有吋半長。不過這個size都幾好，因為可以食多幾款，覺得好食的，就再落單。:)但係味道方面，亦只有湯河算合格，其他的食品，味道只一般，有點似快餐店或者街邊小吃的水準，但唔係好好食的評價。例如，簡單如牛油雞翼，無喱味道，相比大家樂的雞翼，後者仲比佢更好。其他的炸物，味道食落係預先已炸定，而且都放上長的時間。當晚的點食放題，除飲品有番點之外，全都無值得再點食多次。總括來說，味道唔係咁可以，不過只係花費約一百元的晚餐，而且任食，算吧啦！不過唔會再番轉頭囉！…Read More

此店一向都無提供放題，可能因經濟問題，現終屈服推出任食放題；與朋友到此店試一試。:)先來當然係主題--刺身：都有好多選擇，三文魚、吞拿魚、劍魚腩、油甘魚、蝦、赤貝、帶子等不能盡記得。質素唔錯，新鮮。:)壽司：即叫即制，新鮮及壽司飯有質感，不會散開，而且大小適中，推介有牛柳火焰壽司及芝士帶子火焰壽司。天婦羅：選擇的材料OK，但額為炸粉厚身，未夠脆口。鐵板燒及爐端燒：味道唔錯，不太咸夠味，推介三文魚扖、牛肋骨、帶子、靖花魚、串燒鰻魚。:)和食方面：青瓜沙律、枝豆、小黃瓜，清新開胃；人參雞湯咸咗少少、蜆粥唔係太入味，食落似蜆和粥係分開整，然後放番埋一齊。甜品：菠蘿，伴朱古力漿，好夾；布甸和紅豆，不太甜及夠香，好味道，必食的甜品。總括，服務都不錯，好快會收碟及添茶；環境亦不太嘈吵。唯熟食方面略為小選擇，望可有多少少花款。加70大元，亦可任飲各類酒精及其他飲品，價錢算適中。…Read More

應此餐廳的鮑魚主題，與老媽子到來大吃一餐。餐廳環境光猛、清潔；侍應們年青及勤換碟，服務週到。:)先食冷盤，除了生蠔之外，其他應有盡有；蟹腳、螺、大頭蝦、花蟹、賴尿蝦及聖子等。樣樣都新鮮唔錯，而且不斷供應。再來到沙律，中西日式選擇；亦可自助調配凱撒沙律：蔬菜清新，汁醬自己調校及齊全，可以。跟住隔離係刺身，三文魚厚切，好豐富及滿足的感覺；而吞拿魚，入口即溶，無筋，唯獨有部份吞拿魚本身仍有雪味，未夠完全解凍之故。推介記得要試刺身前面的蟹肉拿破倫(個名我作的)，用薄脆每層砌成，內有蟹肉及醬汁，入口清新、不甜及開胃。Ham方面都有四種選擇，不過肉質方面未夠油香，仍可一試。熟食方面，分別有中及西式，每樣都係以開放式廚房擺設，盡可能新鮮即製。中式方面有各樣點心、湯米或河等。西式有燒牛肉、羊鞍等。還有鐵板燒烤，有燒中蝦(幾大隻，不過燒得太乾，個人唔係太啱)、燒鰻魚(要食，燒得剛好，不乾不老，配上個汁，入味好食)、仲有羊鞍(好壞參半，部份半熟，軟滑夠稔；但有部份太熟或太肥):(。甜品類，水準好好及多種款式，每件甜品都以細件的形式，能夠試多幾款。甜品可以係稱職，可匹配到甜品的各類主題，如芝士餅(有香及濃的芝士味)、朱古力餅(夠朱古力的香滑、濃及略苦的味道)、天拿米素(有酒香和芝士的味道，但少少覺得未夠滑)。還有，記得留肚食雪糕，全部'哈根大'的雪糕，一共有五種味道。總括來說，整個自助餐給我感覺係食物新鮮企理；食品款式感受到廚師方面有下一番功夫及心機；旁邊有幾多小食，要留意及嘗試，會有意外驚喜。唯獨想講，自助餐的主題：鮑魚。好似並不太貼切，全場只見到有竹桶湯(味道不錯，湯中帶有竹的味道：清新)、湯翅(足料，內有新鮮蟹肉及鮑魚絲)。及到尾聲飽肚時，侍應才每枱派食鮑魚橽，已經無太多空間容下呢個撻啦！(味道中式煮法，帶少辣，配上個撻，有中和作用，唔錯！鮑魚就......還比指甲更細)。可能未有清楚的指示，鑑別出主題的刻意作品，因而令我忽略了，否則此主題就不太感覺與此自助餐有關連。最後，備有此網站的優惠巻(不是賣廣告)，可享有七折埋單，加上自助餐的食物水準，不錯的選擇啦！:)…Read More

昨晚到此間美心快餐食焗豬排飯，加一杯熱咖啡。:)一攞個餐，賣相已經唔得，塊豬排又細，汁醬又少。跟住先試豬排，乾柴一樣，豬排雪味十足，又乾又無味。汁醬亦都一樣，不酸不甜，唔知似乜味。再加上飯底濕，好似食軟飯一樣。可能個豬排飯太差，連帶杯咖啡都唔夠香，無味道。呢餐早知上多一層，食番一哥的焗豬排飯好過。後悔。唯獨清潔呀姐好勤力及有禮貌，唔係就一文不值。:(…Read More

三個人在七點到此火煱店，光顧任食火煱。每位129元，已包湯底及加一，但飲品不包；其他優惠，只有在九時後才提供。之前其實都有光顧過這間火煱店，水準不錯；而且仲有免費泊車，方便。不過今次再食，感覺大不如前。首先，湯底，揀選麻辣鴛鴦；一邊清湯另一邊麻辣；清的一方，牙菜水，無味道，真係好清；紅的一方，不麻不香不辣，唔知似乜。其他所點的火煱配料，只可以用新鮮的字眼來形容。當中的水晶飽：皮厚無味；炸魚皮：不脆有油益味；油炸鬼：硬過石頭，係早市賣淨；芝士牛肉丸：無味，芝士何在？生的食物，都可說是新鮮，不過全部就好似受過輻射一樣，細細件，細細片，全都好似未發育咁，'UN挑鬼命'，例如九肚魚，一滾都唔知去咗邊度，只是其中一個例子。總括來說，侍應服務可以，但食物質量就要改善一下，雖說現在市道真係差咗，但火煱店的競爭就好利害，不進則退，希望下次會改進啦。:)…Read More

得知$88元一條東星班的優惠到四月九日會完結，於是就即慶到新星享用。八時半入座，座無虛設，每枱都有一條東星，不得了。真係好大條，足有兩斤半重。侍應拍心口話九時前入單，保證有魚。兩個人，於是落咗一條東星，同埋一碟六瞉炒飯。條魚到咗，真係好大絛，條魚紅色有班點，貨真價實。魚手仲係伸直向天。(少少經驗分享，魚手即條魚游水時候，兩邊近魚腮的兩隻擺擺吓的魚手。如果魚在蒸之前已經昇天，蒸出來條魚的手，就會擺低；相反的話，魚手係會企直向天。:)唔信下次食魚時留意留意)食落，雖然係養的，但真正新鮮，火候剛好，蔥香肉滑。炒飯就只係一般，無太多配料，同埋比較濕；不過就不太油。整體來說，埋單連茶芥，共180元。兩個人根本食唔哂。以這個價錢，還有甚麼要求呢，收哂貨啦。一個字，抵！:)…Read More

駕車到此新酒店餐廳一試自助餐，位置都頗寧靜和遙遠，選擇火車係比較方便的一路，又或者自駕到此；現酒店的泊車是免費，無需付款。入到酒店，由於新落成，未見有商舖，大多店舖仍是空置。到了餐廳，首先一個落地高高大玻璃，望山景，再加上樓底高，清靜、開揚和舒服。開始自助餐，先來冷盤：無蠔，只有蝦、螺、蟹及法國青口，無甚特別，但都新鮮。:)至於沙律，可隨意點選，然後由廚師為你調校獻上。而刺身：應有的有，而且已切好小小碟，要多吃的話就要走多幾轉啦。蜜瓜火腿：火腿未夠香，爭少少，紿終配合哈蜜瓜係好啲。唔好忘記試枱角的芝士，六款選擇，香滑及富奶味，唔錯。:)燒烤：牛羊串、雞漢堡、蒜蓉包、香腸、金沙骨及豬頸肉等。味道中等，OK啦。反而要食燒牛肉，外層香脆而內裏半熟，走去食咗兩轉。:)枱邊設計似開放式廚房，擺放多種醬汁、芥末等，任君選擇。仲有各樣意粉及薄餅，推介要試Lagasa(應該串錯字，係千層濶麵)，面層芝士香濃及脆，下層夠味，厚薄適中，好味。熱食方面：中式為主，牛腩、雞丁、蒸魚(分小塊切開)等，廚師在旁不停添加及炒出小菜，新鮮及味道不錯。但最緊要食燒味，有乳豬、燒鴨、油雞、义燒等。乳豬及义燒必食，皮薄、入口脆及化。义燒雖然比較廋，但肉質夠稔和入味。好好食和必試。甜品：種類都幾多，而且蛋糕成個上，不是細細份。水準就一般。芝士蛋糕，一义就散哂，好似炒飯咁散開；Tiamisu就好夠酒香及甜滑，但欠冷温，唔夠凍，而且低層的蛋糕太濕，好似成塊蛋糕被酒完全沉醉住。朱古力千層蛋糕好夠味道和濃香，不錯。整體來說，蛋糕係好味的，但略欠少少質感。另外仲有多款雪疤、雪糕和生果，已經無哂空間存放，好飽好飽啦。最後再來一杯咖啡，好飲，不酸又香，已好滿足。:)服務方面，待應好勤力及親切，不停清理枱面，及詢問食品的質素及意見。是晚客人不太爆滿，清閒有秩序，無出現爭及搶的場面，最怕。總括食品及服務都在中上，不錯的自助餐。…Read More

今日口痕，到此酒樓試食推介的一蚊雞。八時四十五分入座，阿姐話仲可以優惠價食一蚊一隻雞。只要在九時前入單就可以此價錢優惠。DBS埋單的話，仲有八八折！嘩！因為只與靚靚二人，故只點選隻雞及一碟海皇炒飯。雞好快到，隻雞體型比隻乳鴿大少少；好可憐！咁快就離開呢個世界。雖然係冰鮮，但雞肉都幾滑及入味，唔錯。:)一蚊物超所值，無嘢批評啦。至於海皇炒飯，內裏有各類海鮮，當中帶子份量幾多，亦不太油膩；唯一係飯炒得比較濕，未夠乾身。最後甜品，紅豆桂花糕。二層做法，上層桂花，下層紅豆，兩者都幾夾，紅豆夠稔及起沙，桂花夠香；只係個糕做得比較甜，可能唔夠凍的關係。總括來說，稻香試過多次光顧，食物都能保持水準；員工服務方面，顧客雖然人山人海，但都會俾意見及轉碟，成日提醒啲優惠，算勤力OK啦。不過一蚊隻雞，又無取考，真係可以叫個白飯，八蚊茶錢連加一，之後四十大元埋單，無嘢好講啦。…Read More

此店主打火煱，當然睇睇有甚麼湯底款式？當中大部份的火煱底都有供應，之前試過魚湯，今次我哋一行八人就揀咗椰子雞。個火煱一到，老細推介首先落哂啲雞，跟住就熄火等雞浸熟。雖然隻雞係冰鮮，但食落都好滑，再飲少少湯，無介紹錯。:)跟住再加水，就無味啦，唔再係椰子雞湯味。不過都無所謂，開始滾吓滾吓啦。 老細預留咗牛頸脊，油脂分佈平均，滾兩滾就入口，軟滑有牛味，又夠稔。不過就唔係好多塊，大約有二十塊，份量okl。: 其他火煱料水準都唔錯，無甚特別！唯獨我覺得魚皮餃好食，皮夠薄肉夠味。:)至於老細猛推介的海鮮就一般，新鮮及不過不失；當中的桶蠔，大大隻。野生鱔，新鮮又爽。仲有一樣，牛肉芝心丸，肉中有芝士，幾特別，相比起豬肉，牛肉比較彈牙。:) 總括用料新鮮，火煱料雖然多選擇，但都係一般火煱店應有的，水準中等。地點適中，朋友共聚方便。…Read More

Outback在其他地方都有分店，但黃埔這間我覺得無論服務、食物份量、Happy Hour 時段(有部份分店假日無歡樂時光)都可保持水準的餐廳。:)店內推介的，歡樂時光飲品半價，啤酒大大杯，或紅酒一送一(酒鬼必選)。不過依家飲酒唔好開車啦。食物方面，頭盤，免費供應的黑麥包(每次起碼食三個)、炸洋蔥、蝦凱撒沙律。跟住主角，燒牛排，外層香內裏鮮味、嫩滑、有肉汁，記得伴碟要有焗蕃薯，甜甜的。:)另外亦可點選羊鞍，五成最好，少少蘇，夠新鮮，伴薄荷汁，流哂口水。寫完呢篇食評，揾日又去光顧啦。…Read More

之前都有到過小肥羊打邊爐，雖然週圍都有羊味，但都無法阻止我再返。今日晚上六時已到小肥羊，因為無訂位，早啲去食頭圍。店內當然食火煱啦，但都記住不忘熟食，燒羊。點菜：火煱料：推介有羊肉(入口即溶，夠嫩)、羊肉餃子(皮薄入味):)、羊軟骨(記得滾耐一點，否則會硬；軟骨帶有少少羊肉，骨脆又有肉味，而且唔肥又有骨膠原，健康!)、菜及菇(新鮮)。熟食：燒羊腿、燒羊排、煎羊鞍、燒羊串、蒙古烤餅。總括，返來再食，保持水準，但食咗啲推介菜式，都無空間試其他，尤其是熟食，今次就發掘到羊軟骨，好食就見仁見智，我就覺得幾有咬勁。侍應服務唔錯，雖然人多，都不忘推介新菜及火煱，近期就有烏龍茶煱底。飽飽咁走，滿足!!!:)…Read More