肥魚魚's Profile

星期六中午食飯時間行入去，見有一對母子枱上既嘢食左大半，諗住等一陣就有位。我同另一半一邊傾偈一邊等位（冇計過等幾耐但望過隻錶差唔多行左半個quarter）。對母子食完準備走，企喺埋邊個肥女店員突然放低個留位牌然後同我哋講個位留咗俾promotor，佢哋一早俾咗錢，仲要好得戚大大聲咁講，成場人都聽到，唔憂冇生意咁。我聽到真係無名火起，我哋企響度等果陣你又唔早講？我哋等位果陣佢都在場企響度，唔係忙緊架喎。唔駛諗即刻走，浪費我哋時間，咁樣做生意講到d野幾好食都冇用。…Read More

夜晚7:00去到，叫個咖喱蛋包飯同黑山玉子燒，話要等15分鐘，得一個廚又要做堂食又要做外賣，結果等到7:30至有得拎😔返屋企先打開咖喱蛋包飯，個咖喱同蛋分開放，呢個細心位值得讚。咖喱係日式咖喱磚/包煮出黎，中辛，加幾粒細薯仔同紅蘿蔔，食到有一粒牛肉咁大把，味道就同我自己喺屋企煮咖喱包無分別。個蛋炒得幾靚，入面有少少流心，亦都夠蛋味，唔錯。接住落黎係黑山玉子燒，個賣相唔錯，放一舊入口 - 咁甜既，如果係雪凍左既玉子壽司減低甜度就好食，但玉子燒熱食黎講真係太甜，如果係落多左糖或少左鰹魚汁就要調較下份量。我自己喺屋企間中都整，材料都係蛋+糖+(醬油+味醂)/鰹魚汁放落pan煎，最重要掌握個火同捲既手勢，試多幾次就成功，不過我無方形pan整唔到佢咁靚既賣相，但自己整就一定無佢整得咁甜。試左呢兩樣野都係簡單野可以自己喺企整，$68貪新鮮或者懶煮一試無妨，但又唔覺得佢比我自己整得好食好多，所以還是自己煮吧。…Read More

近排面書有個食谷講呢間，先至知原來已經開左...佢前身果間小窩米線好食，以前住屯市成日食，所以執左都期待呢間新既...一入去，望望餐牌，都係食米線為主，選擇不多，無左以前在小窩米線最鍾意既薯粉，只得米線同飯，餸方面想食多款就要逐樣加錢...我倆叫左去骨海南雞米線同蔥油豬扒飯。我唔好酸辣/麻辣，米線揀左清湯底～米線先來到，配料只有咸酸菜同幾粒蔥，比較孤寒，要叫小鍋先有多d配料...湯底幾清，真心覺得唔錯，但個酸菜真係好咸好咸，咸到撈埋米線同湯底一齊食都仍然好咸，就咁夾黎食根本咸到入唔到口，如果食晒全日個鈉攝取量一定爆晒錶！今時今日大趨勢食野都係少鹽，至少我在其他地方食過無咁咸既酸菜，無佢咁重口味，希望店方可以改善下...講番海南雞，可能隻雞比較細，雖然數埋叫做有七件但都好細碟，我係女仔食埋個米線都只係僅僅夠飽，男士建議叫飯否則一定唔夠飽。雞皮好滑但雞肉唔算好嫩，味道ok既但講唔上好好食～反而之後黎既蔥油豬扒飯有驚喜，豬扒醃得入味煎得夠香，雖然只得一塊但幾大塊，加埋個蔥油撈飯一流...見其他網友推介胡椒豬肚雞/黃酒雞米線，但三十幾度高溫下食胡椒豬肚我真係受不了，驚會燥到流鼻血，還是留番秋涼再黎試吧～希望店方可以提供薯粉/泡飯/涼拌米線薯粉等多d選擇...簡單黎講，如果想食雞我會番去隔離食口福，路過會考慮幫襯佢但唔會特登去食，畢竟屯門太多米線舖，尚有其他選擇。…Read More

池記蘿蔔豬軟骨飯，未打開個蓋已聞到好香... 蘿蔔同豬軟骨都好淋好入味，有幾舊豬軟骨直頭炆得淋到可以滑入個口...對女仔來講份量頗大，跟飯仲送熱飲，選了桑寄生茶，女仔恩物，唔太甜幾好飲。另一半點了蘿蔔牛筋飯，說味道也不錯除了以上兩款，仲有蘿蔔牛腩飯，滷水雞翼飯可選～還可選便當，包以上飯類加三粒雲吞和配菜。另有冬菇，滷水雞翼，蘿蔔，雲吞等可加配小食，選擇多，惟一美中不足係無麵食。車上d阿姐服務唔錯，有講有笑。價錢中等唔算貴，飯餐$55包飲品，便當$65P.S. 池記美食車3月10日開始會泊在起動九龍東廣場，觀塘既打工仔lunch不要錯過～…Read More

放工去銅鑼灣辦點事，老公突然想起想試呢間...我並唔係Kitty迷，老公想去係因為佢想幫個Kitty迷同事換果雙Kitty碗，順便試下味...大家睇過呢度既食評至去，所以或多或少有些心理準備，可能係平日，時間剛剛踏入晚上七點，竟然無人等位~店內全是Hello Kitty佈置，海報，筷子套，枱面...etc 全部有貓樣，Kitty迷一定開心死~一坐低，老公身先士卒叫左大家認為咸到痺既黑醬油湯底豚肉拉麵，而我就叫左味噌湯底既北海道粟米拉麵~黑醬油拉麵用黑色碗，我碗味噌拉麵用紅色碗，店家似乎花了點心思...連紫菜也印上Kitty模樣...味道最實際，老公話黑醬油湯底的確係咸，但比起我地上次在大阪咸到邊食邊飲水既金龍拉麵都仲差幾皮，佢接受到...至於我個味噌拉麵...坦白講無乜特別，粟米落得果少少好似孤寒左d~我地兩個都覺得麵質一般，湯底唔夠濃，食完唔覺得飽，豚肉(叉燒？)一夾即散，同各位網友所言一樣，隻蛋最好食~！雖然唔係難食，但亦都唔係好好食，只係一間好普通既香港拉麵店，完全沒有令人encore既意欲，而且價錢唔平，平均都要8，90蚊一碗，相信唔少錢俾左落Hello Kitty license fee度所以食物要將貨就價~最後幫老公同事換左一隻碗同一個袋，隻碗係店內用緊果隻，都幾大隻，不過相信Kitty迷未必捨得拎黎裝麵食~！…Read More

今日同阿妹榴槤癮起...兩個趁住老公唔喺度，去左貓山皇偷食...榴槤！下晝五點幾，唔算好多人，一行入舖好大陣榴槤味，好香！叫左個榴槤拿破崙($48)兩份share，餅好脆，最頂有榴槤膏，餡料既榴槤肉混左忌廉，滑得黎又有榴槤香，兩個人share唔係太heavy剛剛好。先到收銀處俾錢買野，店員會俾個牌仔你，搵位坐低，食物預備好就會送到面前~下次要帶埋阿爸阿媽黎食~…Read More

悠閒既下午，天氣炎熱~推門進入Accro coffee，一股咖啡香撲鼻而來...搵左個位坐低，order左一杯Latte，一件豆腐綠茶芝士蛋糕，享受今日既tea time...蛋糕先黎，細細件好精緻。綠茶味比較淡，相反豆腐豆味頗濃，有一陣清香，店方似是刻意把綠茶味調淡一d，以免蓋左豆腐既味道，消化餅底亦好鬆化...等左一陣Latte黎到...拉花好靚，咖啡味好濃，但店方用全脂奶，所以奶味亦重，兩者加埋味道好rich但唔苦，只係甘甘地，每飲一口之後仲有少少after taste，overall幾好飲~因為店方用全脂奶，杯咖啡雖然唔係好大杯，但飲完都幾飽...店內燈光柔和，冷氣亦夠，在炎熱既天氣下入去坐好舒服，就咁hea左兩個鐘...p.s. 小店將在10月暫停營業直至另行通知，要飲就快~…Read More

今晚收工同老公去灣仔做點事，之後正值晚飯時間，本來想去新開既神虎朝聖下，不過見到門口條人龍咁長都係下次先...走著走著，來到船街，路過Double Tree，見佢做緊任食甜品晚餐，價錢百零蚊也算合理，就入了去。點左兩個餐，先來餐湯，龍蝦湯和忌廉湯，龍蝦湯除了咸咸地外無乜味，反而忌廉湯夠creamy，又有少少甘筍絲，幾好飲~接下來係沙律，我叫左凱撒沙律幾清新幾好味，反而老公叫既芒果他他就細杯好多，味道亦無乜特別...主菜來了，我叫既龍脷柳竟然係成條魚上，老公叫既豬手當堂被比下去，佢問我點解次次點既都係抵食夾大件...條魚煎得好脆好好食，豬手其實都唔錯，只係份量較細...到了甜品時間，甜品選擇不多，但勝在任食~首先叫左咖啡布甸，幾香咖啡味，旁邊既焦糖燉蛋都好好食...綠茶布甸，New  York Cheesecake，Blueberry Cheesecake同Tiramisu，唔錯...仲有火焰雪山，賣相好靚，但燒過既部分有點苦，同埋成個甜品都偏甜...最後梗要叫番客朱古力心太軟，呢個真係好好食，流心得黎又唔會太甜，可以encore...跟餐既咖啡茶普普通通，所以無影相~順帶一提，待應服務好好，環境清靜，情侶用餐首選。…Read More

今午去灣仔辦點事，適逢lunch time周圍人頭湧湧，見呢間相對無咁多人就入去...睇睇餐牌，同一個餐外賣自取比堂食平$4-5，反正都要返公司，索性買番去食~叫左個焗煙肉火腿配卡邦尼汁長通粉，再配個沙律...返到公司一打開...沙律完全唔係我想像中果回事，成個盒九成係撈左沙律醬既薯仔，只有少許椰菜絲墊底，同menu下方個圖完全唔同...個長通粉亦不遑多讓，除了火腿都係火腿，反轉成盒長通粉都見唔到一塊煙肉，卡邦尼汁就變左普通白汁...個白汁頗咸，食半已經投降...其實佢算唔算違反商品說明條例?…Read More

年廿九, 又係執平貨既時候, 在sogo血拼了半天, 到Foodcourt 北海拉麵一試歇歇腳...兩口子叫左兩個拉麵同兩個小食, 餐廳柔和既燈光好舒服, 坐下了真不想走~ 日式煎餃子, 餃子皮好香口, 又唔太油, 唔錯~ 芝士薯餅, 半溶既芝士包在炸薯餅裡, 食完好想再食~~~ 北海叉燒拉麵, 醬油湯底, 大大碗, 叉燒肥瘦適中... 芝士粟米拉麵, 原來也有叉燒, 不過芝士比我想像中有落差, 我仲以為係溶了鋪上面, 原來係原塊上車打芝士...湯底係麵豉湯, 但好鹹, 越食越鹹, 很有關西風味... (大阪的拉麵也是好鹹, 那邊的日本人說要一邊食一邊飲水至正宗)味道ok, 服務亦不錯, 起碼唔會見你食完收晒d野趕人走...…Read More

阿妹轉左工在西環返工, 約佢食餐lunch先~由金鐘落黎實在太遠太趕, 不過呢度真係抵食, 或者下次放工至落黎... 牛脷酥: 炸得鬆軟, 夠大件抵食! 叉燒腸, 夠大碟~ 鎮店炒麵, 幼身得黎又入味, 真係好味, 我同阿妹唔駛5分鐘KO左佢... 豬紅艇仔粥, 粥底綿, 都OK多料... 超抵食炸腸, 大碟到幾乎連個碟都裝唔落, 加左價都只係$8碟~!一貫舊式粥店格局, 很有老香港風味, 有機會會再幫襯~…Read More

星期六中午, 肚空空, 好想去洪水橋食大發...午餐唔多岩我, 散叫了窩蛋菜遠牛肉飯, 加杯醒神既咖啡, 簡直係一個完美既lunch... 窩蛋菜遠牛肉飯呢家野要整唔難, 但要整得好食就幾難, 大發做得唔錯, 用牛扒代替牛肉咬下去更有質感, 菜心唔老, 隻蛋同個芡汁溶埋一齊撈飯一流~~:) 咖啡香而不苦, 雖然比呢度既奶茶王搶了鏡, 但都唔錯呀...…Read More

在search元朗食肆既時候, 無意中見到呢間, 排名頗高, 一於搵老公駕車落黎一試...其實都幾難搵, 在荃錦公路一個小路口轉入去, 幾乎miss左, 條路僅夠一架車過, 遇著對頭車便要讓路~下午兩點半黎到, 已經人山人海, 幸好泊好車後剛有人走, 唔駛等位, 有咩好食呢... 薑汁撞奶: 奶味唔算好濃 (我反而鍾意), 薑汁亦不太辣, 剛好, 上桌時要等一陣至好食, 風味更佳~ 魚肉燒賣: 雖然老細坦白話係交黎，但都幾彈牙... 雪菜肉碎烏冬:據聞淨係星期六日至供應，烏冬幾入味同幾滑... 鹵水雞翼: 最後幾隻, 整得好入味, 唔怪得咁好賣~鎮店之寶餐蛋丁, 雖然賣$22一碗咁貴都大把捧場客, 午餐肉煎到脆邊, 配上煮到岩岩好既丁麵同荷包蛋, 付鈔也值得~老細招呼都唔錯, 有講有笑, 不過位置實在太偏僻, 若果唔係行山或者駕車真係唔知有間咁既野...…Read More

夜晚九點幾, 元朗豐年路一帶除左元朗廣場都無乜食肆, 老公突然諗起呢間未食過想試下...一入去自己搵位坐低, 叫左幾樣野: 甜豆漿, 用碗上, 唔太甜幾有豆味... 豬軟骨菜飯, 豬軟骨煮得幾入味~ 小籠包, 一籠六個, 皮薄多汁幾 juicy! 上海豬扒菜飯, 豬扒炸得唔太乾, 幾鬆軟... 炸雲吞, 炸得好脆, 食到唔停口~食物質素唔錯, 招呼都OK, 會再來~…Read More

上回食完海鮮冷熱盤, 今回食甜品... 紅豆豆腐花, 個豆腐花好滑, 呢個超讚! 酒釀丸子, 好甜, 只飲到糖水食唔到丸子... Tiramisu麻麻地, 蘋果酥批夠脆OK, 麵包布甸有點硬, 石榴慕絲太甜, 木瓜涷糕幾香, 最好味係咖啡杏仁蛋糕~ 是日Yogurt: 朱古力味, 老公話似食軟雪糕, 不過幾好味~ 生果普通, 最好味係菠蘿~! 當然唔少得雪糕, 不過一食落口... 陣味咁熟既... 係雀巢! 香格里拉buffet食雀巢雪糕, 我接受唔到囉! 最後以咖啡作結... 總括黎講, 如果用半價生日優惠(兩個人)黎食就ok既, 否則正價黎食就不值了...…Read More