ki01171's Profile

富昌商場裝修咗之後好多新餐廳加入，所以就決定去試吓啦。而且次次經過都好多人排隊。見到鐵板餐幾抵食，就叫咗個西冷牛扒試吓。同埋比門口嘅滑蛋鰻魚飯吸引左。加多杯凍檸茶。先上左個例湯，係紅青蘿蔔湯，不過不失，飲完冇口渴嘅感覺。多士有啲燶，牛油都香。個鰻魚飯，滑蛋好靚，食落唔錯，但鰻魚係凍㗎，嗰醬有啲鹹，但都幾好食。鐵板餐上枱嘅時候溫度好夠，但係塊西冷真係唔得，仲差過大家樂，完全冇牛肉味，而且好靱，汁又唔係好夠，完全唔覺自己食緊牛肉以為黎錯咗。叫職員幫手落單嘅時候， 你會感覺到佢唔耐煩咁叫你等一陣好唔好，但行埋黎幫嘅時候都ok。但係好多時你叫佢哋幫手，佢哋都唔應你，要叫好多好多次，叫埋靚仔都冇人應。水吧個位係見到入邊既，見到有一個人係入邊一路食煙一路做嘢，可惜相機不夠快。冇相冇真相，唉。…Read More

同男朋友撐枱腳，佢話嗰條街多咗好多餐廳所以拉我去食。一入到去右手邊見到泰國嘅佛像，一條細小嘅走廊，入到鋪入邊都幾大，光猛，乾淨。我哋都算早過去所以冇乜人。坐咗喺左手邊靠牆嘅四人枱。我哋叫咗海南雞飯，馬拉盞炒通菜，沙嗲串燒，同一罐可樂。海南雞飯啲雞都幾滑，但係冇乜雞味，男朋友話啲飯見到有白色嘅米唔合格，我食到有一舊雞有骨，可能係靠近軟骨位所以佢哋冇發現。附送嘅嗰個節瓜湯都幾甜。馬拉盞炒通菜有啲辣，但係幾惹味，出邊街多數馬拉盞都會有過鹹，佢就啱啱好。串燒叫咗豬/牛/雞各兩串，串燒配嘅嗰個沙嗲醬為串燒加咗分，食到粒粒嘅花生，牛就係醃左嘅，串燒黎講我就麻麻地。服務質素唔錯。…Read More

因為我地得兩個人，所以安排左面對牆既位置我地坐。我地叫左幾次，先有職員幫我地落單，人手唔係好夠？！叫左個甜辣炸雞，人蔘雞湯，芝士泡菜煎餅，一枝柚子燒酒，一枝水蜜桃汽泡酒。炸雞上檯好熱，有俾手套，係雪藏雞，死鹹，肉都滑既，係食甜辣醬個味～～煎餅既芝士唔係拉絲果隻，麻麻地，邊邊位都焦脆。人蔘雞湯，入面都係有糯米紅棗，但湯係清清淡淡，無咩蔘味，但有幾枝蔘係入面，雞肉煲得好軟腍，連骨都碎埋，但糯米可能浸得唔夠時間。酒果啲就唔洗點講，當時叫左枝汽泡酒，但要係倉拎過黎，唔凍，職員幫我地雪凍左，先再拎俾我地。…Read More

朋友之前就話想試，我又中意食雞又對藥膳無抵抗能力所以就應承左喇😬本身book左7點，但因為塞車辭到，有職員打黎問，都好好禮貌，叫我地慢慢。鋪頭唔係好大，乾淨企理。一坐底會推薦燒海鮮。我地都叫左鮑魚，之後叫左半隻雞既藥膳雞煲，因為得兩個人，而且想食下其他燒烤。叫左牛舌，雞腎同埋茄子，職員提議叫少辣，會好食啲，同埋可以夾走面頭辣椒，唔會太辣，當然好啦。同埋會上一碟辣椒鼓油俾你食雞煲點。雞煲勁香，會幫你落雞，幫你睇住佢幾時熟，會提你幾時食得！會食哂燒烤先食雞煲，定兩個同時食，我地就諗住食埋燒烤先，甘職員就幫我地熄左個火佢。牛舌好厚好林，好食呀，雞腎同茄子就正常，鮑魚都爽口。食藥膳緊係飲啖湯先啦，超正，好足料，超甜，有紅棗，龍眼肉，杞子等等，同朋友狂飲。雞好似煮耐左少少，浸耐左。之後我地叫左皇帝菜，菜都新鮮。因為食完都唔飽，就再諗住再叫，職員提我地個菜仲未食喎，應該係怕我地食唔哂，但我地其實好大食。再叫左油麥菜同水餃，油麥菜唔係好靚，水餃就普普通通。雞煲加湯唔係加水架，但唔知係咪我地食哂啲龍眼肉，愈煲愈咸個湯，但都忍唔住飲兩啖，因為好鮮。埋單先500蚊，我地仲叫左杯500ml既啤酒同一罐可樂，俾預期平。下次我地會食一隻雞，加上職員好有禮貌，每次落野佢都會叫多謝哂。有下次😂…Read More

2016年2月25日係新假期見到介紹佢，所以決定一試，要睇清楚地址，因為柯士甸道同柯士甸路，差一個字差好遠！因為上網睇過地址，係兩個鋪頭既中間，好似係天井位甘,位置都幾特別。 鋪頭得兩個人，如果你見到佢無帶手套煮野食，會驚既話，就唔好去，因為佢全程無帶，仲會聽電話，收錢，落單。 兩個人叫左大板燒，叫左個set，同沙律。大阪燒用燒肉鋪面，有某幾枱整得比較燶。 個日好彩早到，等左一陣就到我地，因為俾雜誌介紹完有勁多人黎朝聖！有客問老闆後唔後悔上雜誌？老闆話要做就要做到最好！雖然有d老土，但睇得出兩個年輕既男士好俾心機！野食既味道要再提升！要再加把勁！ 整體黎講都係還可以:)…Read More

2016年2月26日因為朋友生日，又想食下新野，講左好耐話要食素，所以我地就去左呢間。我地三個叫左個二人餐，再叫多個飯同刺身。 整體黎講朋友好滿意，我同另一個就覺得麻麻。book左枱要係門口等一陣，佢會問你答唔答枱，我地都唔係太中意，對住唔識既人，唔知眼神放係邊好～個d啊姐會講兩句遊說你！服務都ok既。切蛋糕唔洗俾切餅費，但限食個半鐘，食甘飽都趕唔切切餅。上菜都快既。呢餐還可以啦。:)…Read More