小連's Profile

自清零兩年多來，出街食飯次數真的寥寥無幾，小小紀念日下來這兒串串燒啤啤佢。串燒與啤酒皆是本人至愛，坊間串燒多是港式或日式，要感受祖國情懷的，我覺得這間最好。這小店之前在轉角路邊經營，環境不濟但出品確是國內的風味，已幫趁十來次，上月開始就轉了入新鋪。新鋪光鮮，但衛生感覺就是一般般，地上不少垃圾，但來的是求吃，比起之前在路邊已好多了。國內串燒就是烤得透，孜然調味重手，是國內木屋燒烤的風味，雞翼、雞軟骨等串物都烤得恰到好處，脆卜卜的就是下酒好小吃。特別推介這兒的烤豬手，一開二，外脆內軟糯，香噴噴要落手來吃，正。這兒的麻辣薯粉亦是是坊間少見，用的是粗薯粉份量不少，煙韌湯汁夠麻夠辣，吃得過癮。通關無望，通到你都未必敢去，來這兒吃吃便好了。…Read More

吃了十年的地道粥品小店，由無冷氣的舊水上街市，到沙梨頭臨時場及至現在，仍是我倆每次到澳門必到食店！這兒最出名的是蟹粥，選用爆膏蟹，入口鮮濃芳香甜美無窮粥底綿稠，我倆由第一次來吃到現在也認定，這兒的蟹粥是全澳門最美味的除了粥品外，小店也有海鮮加工，在下層街市買心儀海鮮上來便可，老闆兩公婆手勢很好火喉十足，推薦香蒜煎焗大蝦及豉椒食物，今次買了蟶子皇上來，炒得惹味恰到好處，正！亦可試試老闆娘出的煎魚餅，佐酒一流！幫趁咁多年，除了美味外，重點是價錢公道，成煲膏蟹粥唔洗兩百，海鮮加工每款幾十蚊，抵食過去餐廳最少一半以上，來澳門想體驗地道的真美味，中國名粥是不二之選。…Read More

134月天紀念日，今晚吃好點，到了大角咀的性格餐廳Gold Water。第二次來幫趁了，對上一次來試早餐感覺驚喜價錢又唔貴，所以今晚一早就同老闆訂位，叫他準備食材。這兒全店只有老闆一人，招呼煮食介紹清潔乜都一腳踢，真係好佩服佢既能耐，重點是這兒食材挑選用心。慢焗龍蝦需預訂，肉質爽脆鮮甜，簡單調味已好好食。黑毛豬肉味濃，才$40塊抵吃。白酒煮蜆$48﹐肉厚又大隻，牛油、酒及香草味配搭得岩岩好。特別推介印弟安和牛辣意粉，既香且辣。埋單$400有找，可自攜酒水不收開瓶岩哂我，多謝老闆招待次次來食都睇到佢好辛苦但又好有heart﹐樂在其中，值得再三支持，多點找老闆吹下水，會有意想不到的收獲。…Read More

巴蜀麻辣米線在埃華街，夜晚來吃，成間鋪十幾張檯得一個叔叔做樓面，又要執檯又要落單又要傳菜又要收銀，睇到就覺得辛苦，但十分有禮，多謝前多謝後很有耐性。試了米線及上海拉麵，灼得岩岩好彈牙好吃；湯底出色，點了麻辣小辣，多麻小辣，飲兩啖麻到嘴震，過癮。配料正常無咩特別驚喜，吃完絕不口渴，吃過大角咀幾間米線，暫時呢間最好。網上街坊話這米線馳名已久，下午茶仲要極抵食，怪不得能屹立於埃華街呢個黃金地段咁多年啦！…Read More

抵食的$888蒸氣套餐 – 小漁港好友生日一行9人到了太子的小漁港晚餐，點了兩個這兒的$888四人套餐再加幾碟小菜試吓。老闆親自招呼(不過就比較長氣)，周五用餐想不到都全場滿座，霸唔到大圓檯關係座位比較迫狹。先上的是原條象拔蚌刺身，估佢唔到份量十足，出面打邊爐叫一條起碼都$4-$500，套餐都有此份量抵食，鮮味出眾。不得不提這兒的椒鹽豬手及鮮魷，炸漿薄香脆味濃，十分冶味，送啤酒一流。蒸海鮮最緊要新鮮，扇貝及大蜆恰如其分，令人回味。雪菜牛仔柳普普通通無甚特別。鮮蝦蒸糯米飯極足料，蒸的關係比較濕身但軟糯美味。重點在鍋底海鮮粥，盡吸海鮮食材精華。綿滑好吃，最後食唔哂成鍋打包走，明天早餐有著落。ASAHI特價$10枝，成班FRIEND聚頭梗係勁飲大賽啦。這兒只要LIKE佢FB就全檯有一次機會玩骰盅，搖到兩隻相同或圍骰都有獎品，雖然最後失手而回，但過程都幾搞笑，開心熱鬧的一晚，值得推薦。…Read More

意想不到的神秘菜單 - Tony's Hell我倆的一百二十二月天紀念日，食好點去試試這間在大角咀的Tony's Hell。由大廚Tony一人主理的小店，座位數得出的得四個，賣點是這兒吃Secret Menu。食乜唔知食時亦唔會話你知，餐牌分為五層地獄，意即你食幾多個course。這兒出品全是天然食物不加味精，食物賣相亦異常咁靚，一個凍湯用上四種食材打出來，我只估中兩種。Tony只叫大家繼續估，除非估中否則佢是不開估的。意粉同意大利飯做得恰到好處，講真去到尾我地都懶得再估了，藍色的飯好好食，點整由佢吧，細心品嚐便是了。價錢不算太貴，全部有心機睇住Tony切切煮煮，很有趣的小店。紀念日來慶祝玩吓試吓你從未食過既食物，值得。…Read More

金鑽喱晚飯金鑽喱，賣的是碟頭飯亦有麵，當然係食咖哩點了咖哩牛腩及雞扒，份量足，雞扒牛腩大大兜，雞扒炸過香脆，牛腩亦腍軟，但咖哩不夠濃稠洋葱下得雖多卻欠香氣，惟愈食愈辣，尚算冶味，兩口子吃得滿頭大汗離開。…Read More

壽司部今晚為了支持香港隊外賣壽司部刺身壽司如三文魚、帶子、魷魚等都很足料，刺身大大舊炸蝦卷有成8件即炸香脆好吃反觀紫菜包的壽司可能焗了一陣就腍了點比較失色，壽司飯醋唔太夠前菜$20兜份量多，埋單$18x，兩個人吃飽！…Read More

份量足味道好 - 新錦園初來大角咀報到，當然要試試這兒最出名的新錦園大牌檔，今晚就到大角咀街市熟食中心試吓。二樓熟食中心成層都係新錦園，真係估你唔到，6:30pm來到已爆了四份三，7:00pm更全爆門外要等位，我仲以為自己去左陳根記。價錢尚算大眾化，兩口子點了三個餸蒜蓉粉絲扇貝是King Size，$28隻合理，新鮮爽甜，其實每人兩隻連粉絲都已半飽椒鹽墨魚咀，炸漿薄脆，很美味的佐酒小吃，一碟三四十粒，兩個人就有點吃不消芥蘭鮮魷又係極大碟，也許是這兒特色。味道很不錯，是二人來到碟頭太大真不太懂點餸，吃兩味又像太寡，埋單連兩枝啤酒$320﹐唔貴，多點人來吃更有抵食套餐，街坊生意怪不得全場座無虛席，一家開餐的好地方。…Read More

要大定要細 - 英記油渣麵繼續大角咀，試了這間在這區內已三十多年的英記油渣麵。第一次來吃，尚未搵到位坐低，阿姐姐已問我要大定要細，心諗洗唔洗咁急呀？回一回神先估計佢應該問我地要大碗定細碗油渣麵。獨孤一味賣油渣麵，尚有煎雞翼、芝士腸及油菜作配菜，穩陣點叫了碗細的來試吓。上海麵軟硬適中，有o趙口岩口味﹔邪惡的油渣下得足，通常食得呢味野都唔好望咁耐，愈望愈生罪惡感，放入口最實際，油香的確令人難以抗拒，一個月一次不會超標吧？每麵都有幾片煮得十分入味的冬菇，湯底帶菇香，三十多年老字號，有原因的。…Read More

連湯底都飲埋 - 靚湯水餃大角咀埃華街呢間在車品品對面的靚湯水餃，第二次幫趁，點都要介紹吓。自包餃子，標榜以老火靚湯做湯底，食完餃子可連湯都飲埋。今天的湯底是花膠螺片豬骨淮山雞湯，睇落濃郁，飲落亦很清甜，很不錯﹔鮮肉韭菜餃子餃皮薄餡料爆滿，如肉的比例多番點會更好反而鮮肉粟米餃聽落騎呢，但肉與粟米兩種甜味夾埋估佢唔到咁夾，又甜又鮮好好味。這兒提供的上海麵是幼身的，彈牙煙韌，正喎﹗連湯清哂，重點是飲完湯完全唔口渴，真係無加味精，大角咀健怡美味之選啊！…Read More

大角咀的外賣小食店極多，試了幾間以這間的味道最出眾。呢間美味小食，賣的是現灼的魚蛋燒賣及車仔麵等，值得推介，有時收工真係懶煮買D小食返屋企煮個麵都不知幾正﹗平日見佢排長龍，魚蛋用豉油蛋，煙韌有嚼勁；辣醬重蒜亦夠辣，味道濃稠有認真調製過，配埋水魷豬皮，好吃！老闆娘好好笑口，耐性地為客人打包食物，完全唔會因為多客而趕頭趕命，呢D態度好抵讚﹗在網上分享，見不少大角咀的街坊都話呢間小食店係佢地最愛，怪不得咁好生意，我都要多D來支持吓先得﹗…Read More

老店格局座位十來個，全店我一個姐姐主理，忙得不可開交，下得單來又要煮粉，睇見佢都辛苦。薯粉大碗，但煮得太腍不夠彈牙麻辣湯底死辣似李錦記麻辣醬，麻麻地，不會有下次了。…Read More

連鎖店，在香港都有幾間，價錢唔貴，午間時份都爆場。點了香茅豬扒檬粉，份量夠哂大，堆得滿滿，基本上一個人是吃不完的，豬扒入味不錯這兒的春卷香脆足料，跟餐有得平，好吃﹔食家試了牛河，湯底偏淡﹔跟餐試埋鳳爪亦唔太入味，只是一般！…Read More

繼續大角咀四圍食﹗又到晚飯時間，我倆就愛巡吓平日不會去的小巷，睇吓有咩好野食，無意中竟然俾我地發現呢間小店，是2016及2017的米芝蓮小吃推薦，當然入來試試啦﹗平民米芝蓮，價錢唔貴，都係$40一盅左右，出名是湯品，有五六款選擇，可惜有兩三款已賣哂試了黑虎掌湯，足料湯甜，不加味精，飲完不口乾食家點了松茸湯，湯頭更勝黑虎掌，我倆鍾意佢鹽也下得少，夠健康，平時零湯水的人找到間在屋企附近的盅湯店是萬幸，這兒除了湯水外另有飯麵餐，價錢都係$60左右，值得試下，會再來幫趁。…Read More