無腳小Bird's Profile

星期六要開OT，女友就去銅鑼灣行住街shop住ping等我放工（-_-#）。 做到下午茶時間終於放得工，之後就約女友到銅鑼灣食飯。呢間晌舊紐約戲院樓上的法國薄餅店我地兩個都想試好耐架喇。佢地晌上環同灣仔都有分店，但環境好似銅鑼灣呢間新店靚啲，所以我地都係選左呢間食。當日天氣勁熱，我地坐低後先點咗支apple cider。佢地有甜及dry的版本，後者酒精濃度較高，我們則要了甜的版本，酒精濃度較輕，只有2.4%，非常好味，蘋果味清新。之後我我地點咗一客鹹，一客甜的法國薄餅。鹹的是帶子、香菇、芝士、煙肉和cream。先講薄餅個味道，我覺得係類似用左日本既soba，食落好香同埋有少少煙韌。讚。個餡既味道互相配合，非常夾。不過落cream落得好重手，食食下已經feel到好滯，好彩今日無叫小食。甜餅方面只係叫左standard的檸檬橙酒薄餅。上檯時傳統方法，燒著酒上。甜薄餅既質感同咸唔同，但同樣地有水準及好食。酒精燃燒過後，酒味唔算好太濃，食起黎有濃郁檸檬及橙酒味，非常不錯！另外，呢度好光猛，而且靜，裝修亦好新淨，值得約埋一班人黎食由於今日女友請客，所以無mark低每一味菜幾錢，酒一支好似120蚊左右，一客薄餅大約80蚊咁上下啦。下次一定會再黎試青口及其他味道。餐廳: LA Creperie地址: 銅鑼灣駱克道459-461號The L Square 8樓總分：90/100…Read More

   對於我地呢啲老餅，新x記呢類舊式粥粉麵荼仔一定認識。話說今日下午遲做完野，2點幾唔知食乜好，於是就由金鐘行過去灣仔果邊覓食。 行到蘭杜街時，發現好多人排隊。睇真啲原來係燒雞扒果間專門店。之前晌北角食過都幾好食的，但實在太多人了，肚子餓等唔到咁耐，望一望對面間「新釗記」，無人龍，又好耐無食呢類新x記，就是就同我個同事入去坐低。由於過左lunch peak hour，所以侍應們的動作都會較慢，但佢地都好好禮貌。午飯有7-8種選擇，我叫左福建炒飯，我同事就叫咗咖哩魚柳飯。由於未病好所以今日要飲熱ｏ茶。不愧為新x記，茶膽果然好味道。野食來了後，望外觀已知道不太OK…試食後果然唔掂…炒飯都唔係炒飯，溝少少蛋落去就算數，個汁死咸又好稀…再試一試朋友果個咖哩飯，試完之後馬上笑左出黎…咖哩汁好似開水咁，仲衰過大Ｘ活…魚柳非常之硬… 唔怪之得對面雞扒排長龍，呢度咁少人啦…希望呢類老牌餐廳可以加油做啦，因為始終個咖啡奶茶得，而修裝雖然舊，睇到打掃得好乾淨。午餐種類少啲都可以，但係落多少少心機做就最好喇。總分：50/100…Read More

上個星期去完日本旅行返黎，今個星期就已經思鄉。由於今日day off，所以好遲先食早餐，黎個late lunch，去試一試灣仔這間醬汁蛋包飯。平日兩點半到，已經唔駛排隊。佢地呢度野食選擇唔多，以幾款醬汁、幾款沙律同小食為主。入到舖，店員已經話漢堡扒賣曬。於是，我點咗蕃茄咖哩蛋包飯、三色腸同埋冷豆腐。「CAT’S EYE」地方好細，得十幾個位，裝修都ok，好似日本啲CAFÉ咁，不過因為佢牆係用白色，所以好多地方都已經污糟曬，例如係枱底果啲地方。廚房係OPEN KITCHEN，可以睇到師傅晌度整野。冷豆腐同我晌日本天丼食既差唔多樣，豆腐好滑，個豉油好味，配埋啲蔥食，味道同我晌日本食差不多啦。三色腸有芝士腸、豬肉腸同埋香草腸，個人覺得芝士腸最好食，其次係香草腸。主角蕃茄咖哩蛋包飯。蕃茄汁牛肉味唔重但係好有茄味，唔似得出面果啲獻汁咁， 十分OK。咖哩方面就係一般的日本咖喱，唔辣而帶甜，兩隻汁要黎配滑蛋都好掂，撈埋黎食又得。個米飯軟硬適中好好食。老實講，比我上星期去日本食果兩間還要好。仲有不得不提係佢地個辣醬好香，用黎撈飯一流，必試。試咁快就食曬成碟飯…跟住文台話陣間掛8號波，快快埋單搭車返屋企。食物價錢：「蕃茄咖哩蛋包飯」：$78無加一，以日本野黎講，算抵食，不過夜晚食會抵啲「冷豆腐」：$24，好滑，夠凍，消暑一流，可惜今日天氣唔夠熱，哈哈「三色腸」：$28，OK，送啤酒會啱啲「汽水」：$10，樽裝，夠汽總括黎講，如果中午同夜晚一樣價錢，咁夜晚就感覺抵食啲，兩個人黎$200左右可以埋到單，以日本野黎講算係抵食總分：85/100（夜晚會再黎食，試下漢堡扒同忌廉）…Read More

日本後起之秀「三田製麵所」登陸登龍街，原本諗住早啲去試，點知話就話開11點，之前果次10:50去到，佢話內部有問題改為開12點，於是就無法子抵下食第二樣。上星期同女友再挑戰，今次真係有準時開，同埋開門果時都係有人龍，不過由於我地早去，等左15分鐘多啲就有得入座。「三田」裝修都ok，但廚房有塊大玻離隔住左，無其他拉麵舖咁open咁親切。基本上menu唔係好多野揀，排隊時見到人地食湯麵覺得麻麻地，於是我同女友都係叫左佢個主打 「濃香豬骨魚介沾麵」，一個要凍麵一個要熱麵。如同日本一樣，大‧中‧小係同價，而特大就貴10蚊。另外叫左一個set係有炸雞，一個有餃子。落左單以為要等好耐，點知唔駛5分鐘就有得食。開波！先講個汁，正統野，有雞、豬同鰹魚味，基本上係無扣分地方。麵本身有啲硬，香味唔夠但都好ok（個人覺得灣仔另一間沾麵舖個麵好食好多），蛋就一般，但叉燒好硬無乜特別。個人就鐘意凍麵，始終如一彈牙少少。餃子一般野，唔記得影相，似商品多啲，睇黎都係唔係自己包，係入貨番黎煎食完之後,一如以往落埋清湯，試下沾汁湯，味道正正常常無驚喜。食物價錢：「濃香豬骨魚介沾麵」：$78 加一。不過不失，唔加一的話價錢算係ok「炸雞」：$20三件，雞無雞味，得啲雪味，仲炸到乾曬，調味只係加晌面頭十分失敗「餃子」：$20又係三件，似商品(唔記得影相) …Read More

火炭係一個基本上無街好行同無野好食（除左大排檔），因為呢度主力係工廠區，夾埋少量寫字樓，所有人都要求量大速度快同抵食，但之前開咗間好有特色的台灣野，吸引唔少區外人到火炭食，我都係其中一個，而呢間野叫做「伙食工業 Fooody」晌火車站行10分鐘就可以到。先講番佢個裝修先，以木為主，入面地方非常大，有超過100個位，不論燈、枱、梳化、椅子、擺設都非設有特色，仲有大量pops同埋懷舊物品，真係唔打得都睇得，難怪咁多人會黎食野。影完相就排隊買野食(呢排採取自行買票制)，條龍唔算好長，得6-7個人，但就用左好耐時間，職員好似唔係好熟手咁。點知排到我就知乜事，原來佢地會同客人confirm坐邊度，然後佢地自己要mark冧巴，可惜地方實在太大，講咗好耐職員都未知道我坐邊，對話大約如此：「請問先生坐邊度？」「果邊門果個梳化」「係咪有好多琴果度？」「我唔知係咪有好多琴喎…總之係果個方向有度門果個梳化」「……（好似唔知晌邊）梳化前面係咪有琴？」「我真係唔知係咪有琴，但梳化旁邊有個好大架放左舊相機」「……（繼續好似唔知晌邊）」「果度咪有個後門呢？（係呀）就晌後門旁邊個梳化度…」唔怪知幾個人排隊都等左我15分鐘…..>.<講番野食：「星星炸雞」：$40。食潮流，但用左港式甜醬，一咬落去似臭豆腐質感，唔似星星炸雞但幾好食。「台式魯肉拌意麵」：$48。意麵好食但太稔，配料得啲丸同少少肉醬，太多香菜阻住曬整體味道，最大鑊係寫住拌麵但係其實係湯麵。唔合格。「凍美式咖啡」：$24。啲冰太少，3分鐘就溶曬，味道一般。「凍黑糖奶茶」：$28。個杯好靚，但又係啲冰太少，一陣就溶曬，有黑糖味，但整體味道亦係一般。總分：60 / 100（值得一試）…Read More

每次食紅豆冰都會想起廣成，因為佢個冰山實在係太特別喇，不過已經好耐無食。今日同幾個friend晌上水體育館打完波，當然拉埋佢地去朝聖啦。「蛋牛治」：非常足料，蛋夠滑，牛肉夠稔，好食。「茶餐牛肉通粉」：牛肉味精極少，夠稔，通粉ok彈牙。薑絲加分。「奶茶」：夠滑，但茶味爭少少，可以再濃啲就好喇。「紅豆冰」：今日的主角!!真係好正，冰山唔在講，紅豆煲到起沙又有陣陳果皮香味，極之推介。「烚雞蛋」：呢個真係好普通，只係用西餐的egg stand上，所以相都無影。總括黎講所有friend都好滿意，之前有幾間餐廳sell紅豆冰，但都係麻麻地，紅豆冰都係廣成ichiban呢。總分：90 / 100（非常值得幫襯）要注意紅豆冰只會在兩點到六點先有得食，同埋間野係逢星期四休息。廣成已經出曬名，而家紅豆冰時間基本上一定要排隊，但係都仲好值得黎食呢！…Read More

以前同女朋友食過幾間唔同的風月堂，最有印象就係佢個好靚餐牌，攪到我地每一次都有選擇困難症。一個TOP SHOT影曬所有飲品，非常震撼，自己就未試過在其他舖頭見到呢種相。而家銅鑼灣同葵芳都結左業，旺角都CLOSE埋，好彩佢開番一間，最慘就係換左個餐牌，無以前咁多款式。必定要叫當然係佢個「凍咖啡」啦，呢個味道無失到準，非常之香。「三文魚蟹籽忌廉意粉」：唔記得影相，賣相麻麻，不過都OK好食。「薑汁黑豚肉薄餅」：都幾好食，但唔太特別。「紅豆抹茶窩夫」：唔會太甜，WAFFLE好香，水準之作。總分：72/100（值得幫襯）總括黎講食物水準OKAY，但總係覺得比以前差左少少。甜品比較出色，拍拖又或者黎食下午茶會比較合心水。推介：紅豆抹茶窩夫…Read More