難得喺旺角接老婆收工，由於老婆收9:00pm，要搵一間收得夜嘅，多數都係茶餐廳，又想試新嘢，所以就係OpenRice睇吓有咩好食，見呢間食評幾好，多元化，又有甜品，就揀呢間，特登喺花園街行咗10分鐘，嚟到呢度，環境尚算OK，老婆嗌咗個肉丁煲仔麵，我就叫咗個牛柳拼蝦，(叫嗰陣個侍應冇問我要幾成熟)叫完未夠3分鐘，煲仔麵已經嚟咗，我記得以前附近都係有煲仔麵，整嘅時候大概要10分鐘，你嗰陣真係又滾又熱，但係呢個，我諗個煲會好熱，但啲面同啲湯好似喺個普通碗度咁，食落去同普通茶餐廳啲常餐公仔麵冇分別，煲仔麵溫度真係好緊要，其實都冇所謂，都係一個公仔麵，但最大問題，老婆食咗三四啖，我都忍唔住想試吓，一試難忘，咁近廣華醫院，好想去洗腎🫠，鹹到癲咗，由於我老婆可以食到濃味嘢，佢覺得只係鹹咗少少，我就浸咗兩杯滾水到落去，煲仔啲湯都滿晒，味道先啱啱好，記住係兩杯水，又叫單計起等咗15分鐘，我先醒起我冇嗌幾成熟，所以就叫個侍應過嚟（同一個侍應），問一問佢，佢話呢個餐set死咗係七成熟，咁我唯有接受，到再等多20分鐘，我老婆已經享用完佢嘅煲仔麵，我個牛柳都未嚟，我就同佢講，我唔食啦，要走了，成個心情都冇晒，個感覺淨係得我一個人鋸扒，我願意比佢嗰餐同我杯凍檸茶錢，跟住有另外一個侍應，叫我等多一陣，即刻幫我追，呢個侍應態度好過上一個好多，跟住我個牛柳就嚟咗，我一切落去，應該係10成熟，welldone ，食咗第一啖，硬過石頭，之後我決定買單走人，跟住，侍應B同我講，下次早啲同佢講話上五成熟，我話我有講，同佢講返，係侍應A話冇得轉，理論上，唔想等咁耐嘅話，係咪應該整五成快過整七成熟？我啖牛柳要吐返出嚟，轉身就買單，原來收銀姐姐一路望到我哋糾纏，佢話識得唔開心呢餐唔收我哋錢，我話唔好最少都要收返個煲仔面前同兩杯凍檸茶錢，佢話唔使啦唔使啦，咁我先順返少少氣。講真。人生第一次食一間裝修唔錯但嘢食可以難食到呢個地步嘅茶餐廳。臨走嗰陣我仲同佢講真係要檢討吓如果唔係好快執，特登搵一間好少少嘅茶餐廳食吓嘢，點知會搞成咁樣，嗰晚我完全冇食嘢就返咗屋企，非常唔開心…Read More
冇下次
