為食路人甲's Profile

昨晚途經登龍街想搵地方晚飯，見呢間奈良上釜有位就試一試。  點了 豚角煮及月見和牛，另啤酒一支。坐得迫係香港貴租區特式我唔太介意。 但如果以一般日式食肆做標準呢間係完全唔及格，真係茶餐廳級 - 杯茶點解可以淡到冇味呢樣真係難，啤酒杯冇雪凍兼有洗杯水喺杯入面，因為冇提供紙巾所以唯有用自己嘅去抺乾隻杯；待應唔認真，頭盤連擺位都未識，放低個盤對筷子擺喺向外果邊。  個頭盤味道冇乜特別好，味道算係可以嘅。 去到個主菜就真係冇辦法唔帖文警醒一下各位。 豚角煮係一般猪腩肉，亦冇話係和猪，腩肉勉強夠腍，飯嘅醬汁味道就個人口味喜歡。  個 ”月見和牛“ 就超級搵笨，各位千祈咪點，切到一口大細嘅所謂 “宮崎牛" 食落祗係類似超市嘅下價牛腩肉 - 韌夾硬仲要每舊 (係每一舊!!) 都有條特別硬嘅筋，有幾舊係冇辦法咬得開結果要放棄。呢個 ”月見和牛“ 如果真係用”和牛“，就係我咁多年曾經食過嘅和牛上天下地之中最差嘅（不論本港或外地）！ 收費 188 加一，完完全全係搵笨實 ！祗可以話廚房嘅調味水平唔錯，佢到而家都仲幾旺因為食物都係靠醬汁(就算刺身都要點醬油!)，味道是可以的；可惜店主連食材都冇辦法提供合理質素，就呢一樣巳經冇可能再光顧。  希望呢間唔會太快講 "拜拜"啦。…Read More

由佢位處天文台道到而家金巴利道，多年來都有光顧，炆牛肋骨食o左無數次由$50食到而家$88，初時搬到新舖水準仲保持到，最近兩次去食，出品質素明顯下降. 味道冇太大外變但牛肋骨肉越來越韌，以前係炆得好焾，食起上來係享受，對上一次去，起碼一半出晒力都撕唔開，要拆o左舊骨成舊肉放入口o趙到咁上下成舊吞，今次就更差，一共五舊，三舊要拆骨o趙，有一舊係韌到o趙唔開，咁多年第一次要放棄。以前經常要等位，今次唔駛，去到見門口阿姐望住對面新開果間韓式快餐眼光有D怪人搶生意，顧客立場梗係去好食果間，你越做越差，D客梗係去另一間；食完呢餐我都會講為乜要貼錢買難受，咁o既質素仲要旺角開分店，我祗可以話佢唔再搞返好D質素連老尖呢間都保唔住。我都好難肯定下一次仲會唔會再幫襯。…Read More

連續幾個星期打完波去幫襯樓上XX餐廳都留意到有間越南餐廳，自己都喜歡食終於呢個星期試下。地方好坐，睇價錢就知租貴要走較高檔例如一般生牛肉湯河佢叫做牛脊肉(sirlon)湯河收$53，唔可以話抵食。終於叫牛脊肉湯河，香茅豬扒湯檬，燒猪頸肉同蒸粉卷，青檸梳打. 叫正價粉，小食或飲品半價，不過飲品正價係$32，相對其他越南餐廳其實平得1-2蚊。值得一讚係侍應態度很好。可惜食品就令人失望，個別係未入流. 豬扒無香茅味， 燒猪頸肉鹹得很過份(陰謀論就係要客叫飲品)，所謂牛脊肉係一般牛肉仲得細細件的三塊，湯底又係鹹，青檸梳打好淡；唯一可以係蒸粉卷不過得細細件兩塊。本來冇打算寫食評，但係食完後真係希望呢間餐廳可以做好D，所以D相都係食晒之後影o既。我唔介意比貴D，畢竟似樣o既越南餐廳真係好少，但係真係要對得住個招牌!今時今日，飲食真係難做。…Read More

家住西貢，出入都經過. 佢o既位置近翠塘，唔難搵，最大問題反而係隔離間酒家太出名，大部份外來客來到呢邊o既食客都係o係隔離訂左檯，所以比較少人留意呢間小店.最初見佢出品娘惹菜，雖然聽蔡蘭講過係乜，因為冇食過所以冇特別衝動幫襯，後來留意下個餐牌見到有海鮮，所以打算試下. 今日同朋友打完波未有打算食乜(個人覺得西貢o既港式海鮮真係有d悶) 咁就提意試試呢間小店.菜式豐儉由人，由碟頭飯、串燒到娘惹小菜同海鮮都有.唔逐味菜寫啦因為個人比較懶惰，最基本係欣賞佢o地o既出品，廚房果幾位煮得用心. 簡單講，因為烹調方法同一般港式粤菜有分別，加上佢o地用生猛海鮮，所以出品都夠滋味. 條燒倉魚就係太心急搞到食左一半至醒起影相. 雖然佢o地菜式都幾多，個人特別欣賞呢幾個招牌海鮮. 最好果樣係抵食 (而家仲係，遲下唔敢講).呢類用心煮理o既小店唔多，希望可以長做長有。 太多人入到西貢來來去去唔係乜記就係物記，比咁貴價錢，實際上果幾間港式海鮮係咪比到相對水平o既出品呢? …Read More

昨晚朋友聚會去幫襯，有訂檯所以唔駛等. 現場環境舒適，服務態度好(朋友係熟客)。自己係第一次去，睇個餐牌第一個想法係魚生及壽司選擇較少所以都冇乜意見，由朋友發辦。魚生、壽司夠新鮮但都幾"的色"，最誇張係個魷魚包海膽，細件到呢 .... 最唔好係所有熟食都係過鹹，仲唔係輕微果隻，連個穴子(鰻魚)壽司個汁都係鹹到有d離譜 ! 理論上炒野唔會係日本師傅做唔會因為日本問題影響到個廚師心情；第一碟炒麵巳經出聲，但係跟住o既軟殼蟹沙律同第二份炒麵同穴子壽司都冇改善，咁就唔多尊重客人啦. 希望餐廳要明白客人當然希望服務好但係服務食唔到落肚，最終都要出品得至可以留客。起碼下次朋友話要再幫襯，我都會比多一兩個選擇啦。…Read More

見食評唔錯同太太今次係為試菜而來決定是否為稍後聚會訂檯，好彩試一試否則肯定被朋友埋怨到出年年尾.坐低招呼位阿叔態度幾好，兩個人睇o左菜牌一陣，阿叔埋來建議 $233 二人套餐，理論上套餐當然比散叫差，不過可以試晒湯、雞、菜(自選 $58 款式)、炒飯同甜品(兩個選擇). ok 落單. 好啦，阿叔好快就上湯，餐牌寫 "老火湯一窩" 阿叔擺低兩碗類似例湯o既東西，我仲以為佢怕我地等得耐醒兩碗例湯飲住先，飲一啖就可以放低呢碗味精水，可以講完全唔飲得 ! 我問行過位阿姐 "呢個老火湯呀?? 佢答係" 咁就唔駛再有祈望啦 !跟住上炒飯 (咁快?? ) 一睇就知係求其炒炒，飯仲係一舊舊， 完全唔成器，究竟個廚滿師未 !?到隻葱油雞，啊，變成炸子雞，但係碟底一灘油，可能就係所謂 "葱油" 不過得個咸字，唯一可取d皮仲幾脆，但係真係太咸 !自選 $58 款 叫o左個上湯鮮腐皮白菜仔，呢個仲可以，冇乜落味精，可能個廚都知鮮腐皮唔會"太重味".叫上埋糖水，伙計哥哥快速收野跟住即閃去裝糖水，咪話有兩個選擇，唔駛問我地想要乜 ??碗糖水認真係 ... 好聽就的式，難聽就小家. 就係檯面個細碼餐碗咁多多. 埋單兩位 $277. 講真，純粹呢個銀碼唔算平，加埋食物質素之差就絕對唔合理. 好簡單，即入黑名單，永不幫襯 !寫呢篇野係希望各位有 function 要揀食店真係要小心，咪淨係靠食評就訂檯，棧到時食到一肚氣仲比朋友怨唔識揀呀 !…Read More

最近西貢打完波有朋友想食日本菜又去幫襯，不過服務冇晒啦，樓面上菜漏o野要催幾次，又生又熟全部上晒好似茶餐廳。價錢貴o左20%但所有o野份量少o左好多，最過份剌身少o左足足30%。我叫o左個吉列豬扒飯，以前質素唔錯，今次d豬扒好似紙皮咁又鞋又乾又冇味 鍋燒烏冬成舊水但係份量細到女仔都話唔夠食。唉，好o既樓面冇晒，人手又嚴重不足，個場又迫。老闆娘身光頸靚但係非常唔識做，以前出品優良就寸得起，而家唔掂啦。…Read More

呢間老字號:既食評捧到天咁高，有冇咁好食呀，自從當年西貢榮華摺埋之後，好耐都冇食過一條真正好食o既蛋卷。坐言不如起行，買盒試下。去到話袛有椰汁蛋卷? 我乜卷都o岩，冇得揀對我來講完全唔係問題。返到屋企第一時間整條，前人提及乜o野"濃烈蛋香，鬆化，入口即溶" 祗係覺得係笑話o者! d食評出o左到而家可能事隔一段時間，而家d蛋冇味啦；入口係鬆，但唔係化而係散，仲係散到碎濕濕，成地都係，都唔知算點；至於"入口即溶"，哈哈，笑完算啦。我唔係搵來講，德成號o既蛋卷真真正正祗係中上而已；當然，唔好同我講如果同鉅記比又點，鉅記根本唔入流。…Read More

同太太試試呢間，座得幾迫。個雞煲d雞好細舊又好油o下，其餘叫多個小菜都就真係冇特別；但係見到d食具就真係眉頭皺，即棄食具一包仲要分總共四個膠袋，唉! 既然出品只係ok，為o左我o地生活環境著想，應該唔會再幫襯。…Read More

我o係灣仔大，金鳳舊舖食到新舖，睇住o個幾個被叫做"臭串"伙計都做o左二三十年，見到下面位食家比蘇xx點來食結果一肚氣。奇怪係究竟各位食客跟d食評用乜心態去幫襯? 金鳳伙計"咁串" 同埋"門口個雪櫃已擺滿三層一杯杯因時間關係雪咗唔知幾耐的凍奶茶" 三十年來都咁，呢d係佢地o既文化，唔知o既係會覺得唔對路。事實係，金鳳主打實在唔係d乜野常餐、快餐。所以各位食客真係唔好聽完人求其介紹完某店就去，做多d功課對自己有好處呀。最後，其實蘇xx咪一樣咁串，點解仲睇佢節目呢?…Read More

上星期六幫襯隔離，當時奇怪點解增輝生意差咁遠，隔離坐滿幾間舖，呢邊正舖同分舖仲有位。就係唔信鏡，特登要試試。之前食過隔離o既焗魚腸，特別叫返比較下。另外點南乳吊燒雞同炒菜，簡單。等o左一陣有得食，最先上o既係焗魚腸，咁快!? 結果係失望，魚肝多過魚腸兼夾入面出晒水，完全唔得。跟住果碟南乳吊燒雞變o左燒雞(即係炸雞啦)完全唔同價喎，問阿姐點解連果碟仔南乳都唔比，出面哥哥仔仲好野: "不嬲都冇喎"。正式南乳吊燒雞梗係冇啦，查晒上隻雞度嘛，但係你果隻祗係普通炸雞，咁同搶我錢冇太大分別；不過，隻雞都仲算係肉滑少肥膏。埋單價錢同早三日隔離食差不多，要成七十蚊一個人其實唔平，但係呢邊菜式選擇少好多之餘水準仲要差一截。唔係話增輝生意差，但係點解同隔離差一截? 原因就係咁簡單。…Read More

餐廳搬來呢個位後幫襯過一次，感覺係唔專業但出品質素同價錢ok，今個週未冇乜特別想食就再去幫襯；今次叫o既石燒鰻魚飯呀/剌身呀質素都係非常一般。但係今次之後肯定好耐都唔會再考慮呢間。食物選擇少，好多基本食物都冇(普通鰻魚飯/豬扒飯/牛肉飯/拉麵之類都冇)。上錯剌身。我都有責任，咁都睇唔到照食，但係個問題係"點解會上錯呢?" 老板娘埋來講"唔好意思... "但係原來佢唔係道歉，意思係問"唔好意思，份剌身好似唔係你叫喎，你做乜照食!?" 跟住就話"我加埋落你張單度啦" 全程係完全冇道歉o既意圖。快快上食物做多轉。可以理解；但係連食日本菜生先熟後都唔識，拿拿林乜都上晒放到成枱都係... 唉，我而唔係去酒家喎。今次發覺老板娘非常好客，但祗限外國人!! 對於我o地呢D本地散客，態度係"我唔介意你唔幫襯" 同上次原全兩回事，可能生意好o左啦。唔找錢。兩個人食o左三百幾，埋單應該要找8蚊，我心裏面都打算佢一埋來就叫佢唔駛找，但係比係人情，唔比係道理，巳經有service charge d 待應絕對應該找錢，我係想睇真o下呢間餐廳真正服務態度。非常失望，埋單後上o既果盤都食埋都唔找返來，心諗"唔係咁樣衰嘛，末落到咁o既地步，幾蚊都搶!?" 打算叫個待應埋來問，哈哈，兩個待應居然唔敢望過來跟住一齊走o左出去門口露天場地招呼同一張檯!(我係坐o係入門口第一張枱!) 咁樣態度係擺明唔找啦，我o地起身走冇任何人講一聲"多謝" (剌身枱/老板娘/待應都冇)。唉! 而家仲有d咁o既經營手法，真係無話可說。…Read More

兼併中泰舊位o既全記，豪裝後重開，試試茶市水準。外面豪裝但裏面仲係舊式管理，地方唔算乾淨，廁所濕漉漉。點心麻麻地，叫o左燒買/蝦餃/咸水角/腸粉，做唔返舊式點心o既滋味，唔知係材料定師傅啦；唯獨價錢幾公道。好懷念以中泰o既點心... …Read More

都有定期去食。今次都係鍋貼、酸辣湯同牛展麵。鍋貼皮厚、濕兼食落有d散；酸辣湯得個辣字；d牛展薄o左又少o左。樓面伙計明顯減少o左所以顧唔掂又搞錯單。保持唔到水準就會面臨被淘汰，可惜呀。…Read More

以前試過任食燒烤，今次試o下料理。必食炆牛肋骨好夠味，份量夠食但炆得未夠腍。傳統石頭飯味道幾好，係個人認為可以唔駛咁濕，因為搞到些少似爛飯仔。其實最開心係咁多款泡菜。價錢算合理。唯一差些少係位女待應雖然服務殷勤但完全冇笑容。結論係穩陣，不過相比下個人喜歡另一間o係尖沙咀o既餐廳多些少。…Read More